|
KƏSİ
Dəryaların suyu söndürə bilməz,
Məhəbbət yanğısı yandıran kəsi.
Günəşin istisi əridə bilməz,
Nadanlıq şaxtası donduran kəsi.
Bir insanın qəlbi, könlü paxılsa,
Şöhrət tapmaz inan, dağa sıxılsa.
Yıxa bilməz şahənşahlar yığılsa,
Taleyi köhlənə mindirən kəsi.
Vicdan ləkəsini göz yaşı silməz,
Vətənçün yaradan yaşayar, ölməz.
Aqillər də elə qandıra bilməz,
Həyatın sınağı qandıran kəsi.
Kəmhünər ad ala mahalda çətin,
Arsızı bu dünya qocalda çətin,
Şiruyə, el-oba ucalda çətin,
Taleyin hökmü endirən kəsi.
|
|
|
