İslam İnqilabının Böyük Rəhbəri həzrət Ayətullah Seyid Əli Xameneinin elm və elm istehsalı barədə çıxışlarından seçmələr Birinci cild

Düşmənin ölkədə elmi inkişafa müxalif olması

Biz müxtəlif sahələrdə inkişaf edə bilmişik. Əlbəttə, İslam Respublikasının müxalifləri - İslam Respublikasının özünü qəbul etməyən və xoşlamayan şəxslər ölkəmizdə elmin inkişafına sərt müxalifdirlər. Çünki bunun İslam Respublikasının qüdrət amillərindən biri olduğunu bilirlər.³²⁴

Nüvə texnologiyasını dayandırmaq tələbi

Sözsüz ki, bizim məqsədimiz bu texnologiyadan dinc istifadədir. Bundan bir neçə il öncə kimyəvi silahların qadağan olunmasına dair konvensiyaya qoşulmaq məsələsi müzakirə olunanda mən ölkə məmurlarına öz fikrimi dedim. Mənim fiqhi nəzərimcə, kütləvi qırğın silahlarının istifadəsi qadağandır. Biz fiqhdə ümumiyyətlə, bu məsələyə qarşı çıxır və bunu haram bilirik. Buna əsasən, biz kütləvi qırğın silahlarının və atom silahının tərəfdarı deyilik, onları əldə etməyə çalışmırıq da. Lakin bu texnologiyanı əldən vermək istəmirik. Bu texnologiya çox mühüm faktordur, xalqımızın haqqı və nailiyyətidir. Amerikalılar açıq şəkildə dedilər, bəzi avropalılar da söylədilər ki, İran nüvə yanacağının istehsalını dayandırsın. Xeyr! Bu, yersiz, haqsız, zülmkar bir istəkdir və biz heç vaxt buna boyun əyməyəcəyik.³²⁵