İslam İnqilabının Böyük Rəhbəri həzrət Ayətullah Seyid Əli Xameneinin elm və elm istehsalı barədə çıxışlarından seçmələr Birinci cild

Dinin elmlə uyğun olması və ona düzgün istiqamət verməsi

Dünyada elmin sekulyar mahiyyətli olmasını və dəyərlərlə heç bir əlaqəsi olmadığını sübuta yetirmək üçün çox çalışdılar, onun üçün fəlsəfə düzəltdilər, dəlil göstərdilər. Bilik anlayışını dəyərlərdən uzaq bir anlayış kimi göstərmək üçün çalışdılar; yəni indi sizin gördüyünüz işin tam əks tərəfi. Siz deyirsiniz Universitet cihadı. Cihad bir dəyərdir. Həqiqət də budur ki, elm və ağıl ikitərəfli qüvvələrdir. Onlar dəyərlərin xidmətində də dura bilərlər, heyvanlığın və yırtıcılığın xidmətində də. Bu, elmin idarəsinin kimin əlində olmasından asılıdır.

Əgər elmin idarəsi dünyagir, hökmranlıq istəyində olan, pulpərəst və müstəmləkəçi insanların əlində olsa, bu gün dünyada müşahidə etdiyiniz olacaq; yəni elm müstəmləkə, istismar, xalqların təhqiri, işğalçılıq, pozğunluğu, seksi və heroini yaymaq üçün vasitə olacaq. Elm olmasaydı, müstəmləkə də olmazdı. Avropalılar elmlərinin sayəsində dünyada xalqları müstəmləkəyə çevirdilər, 100-150, 200 il geridə saxlayıb öz maddi sərvətlərindən məhrum, insani istedadlarını məhv etdilər, qırğınlar törətdilər. Elm həyatın heyvani cəhətlərindən başqa bir şey haqda fikirləşməyən insanlar tərəfindən idarə olunanda belə olur.

Lakin elm mömin bəndələr tərəfindən idarə olunsa, o zaman xidmət göstərər və ziyanlı olmaz. Əgər nüvə enerjisini kəşf edənlər dəyər və təqva sahibləri, onu işlədənlər dəyərli və mömin bəndələr olsaydılar, heç zaman Hiroşima hadisəsi baş verməzdi. Siz görürsünüz ki, onlar hələ də bacardıqları qədər bu dağıdıcı amildən istifadə edirlər. Bu qüvvələr zəif atom silahlarını 10-12 il əvvəl İraq müharibəsində işlətdilər. Dünyanın başqa regionlarında da nəsillərin kəsilməsinə səbəb olan bu silahı işlətmişlər. Bu silah, Quran sözü ilə desək, insanları sonsuz və yerləri məhv edir.⁹¹ Allah bilir ki, həmin zəhərli və dağıdıcı şüaların təsirləri hələ neçə illər, neçə nəsil və xalqlar üçün qalacaq. Əgər elmin idarəsi mömin insanların əlində olsa, bu məsələlər qarşıya çıxmaz və elm bəşəriyyətin xidmətində durar. Çünki onda bu potensial da var.

Buna görə də, elmi sekulyarizə etmək, elmin dəyərlə birgə olmadığını sübut etməyə çalışmaq çox böyük bir çaşdırma və hiylədir. Xeyr! Elm dəyərlə birgə ola bilər. İslam mənəviyyatının heyvanlıqla, fəsadla və elmdən sui-istifadələrlə problemi var, elm, texnologiya və tədqiqatla yox. Mənəviyyat elmlə birgə ola, elm və tədqiqatın nəticələri mənəviyyat istiqamətində hərəkət edə bilər.⁹²