2.Bədii əsərin sinifdə təhlili haqqında da metodik ədəbiyyatlarda mübahisələr olur. Son illərdə belə bir fikir yaranmışdır ki, əsərin sinifdə təhlilini ifadəli oxu ilə əvəz etmək olar. Guya təhlil çox darıxdırıcı olur. Estetik təsiri azaldır. Əlbəttə, bu fikir tamamilə yanlışdır. Çünki ifadəli oxu üçün tələb olunan bütün məntiqi cəhətlər təhlil prosesində meydana çıxır. Bu mərhələdə əsərin ideyası və məzmunu tələbələr tərəfindən qavranılır. Əsərin sinifdə təhlili mərhələsində lüğət üzərində iş aparılmalı, şeir nümunələridirsə bədii mətn şeirdən nəsrə çevrilməli, obrazların səciyyəsi verilməli, şeirin vəzni, ölçüsü, qafiyəsi, bədii xüsusiyyətləri, üslubu müəyyənləşdirilməlidir. Seçilmiş hər hansı bir bədii mətn sinifdə təhlil edildikdən və tələbələr tərəfindən tam qavranıldıqdan sonra ifadəli oxuya başlamaq olar.
