İkram agasiyev şİrxan səLİmov azərbaycan tariXİ baki-2017 Elmi redaktor

Şirvanşahlar dövləti I Axsitanın dövründə. 1160-cı ildə III Mənu­çöhrün ölümü ilə Şirvanda vəziyyət yenidən mürəkkəbləşdi. Şirvanşahın oğulları arasında taxt-tac uğrunda mübarizə başladı. Hələ III Mənuçöhrün sağlığında saray çevrilişi etməyə cəhd göstərmiş Şirvan əyanları yenidən fəallaşdılar. Sarayda yaranmış qarışıqlıqdan istifadə edən Tamar kiçik oğlu və bir qrup əyanla birlikdə qıpçaq türklərinə arxalanaraq Şirvanı Gürcüstana birləşdirməyə cəhd göstərdi. Lakin Azərbaycan Eldənizlər dövlətinin işə qarışması ilə bu plan pozuldu. Atabəy Şəmsəddin Eldənizin hərbi qüvvələrinin köməyi ilə III Mənu­çöhrün böyük oğlu Axsitan hakimiyyəti ələ keçirdi. Tamar özünün gürcü əhatəsi ilə birlikdə Azərbaycandan qaçdı və rahibliyə qapılaraq ömrünü monastırda başa vurdu.

I Axsitanın hakimiyyəti illərində (1160-1196) Şirvan dövləti daha da gücləndi. 0, atası III Mənuçöhrün səhvini düzəldərək səlcuq türkləri ilə dostluq münasibətlərini bərpa etdi. I Axsitan ömrünün sonunadək ona hakimiyyəti ələ keçirməkdə kömək etmiş Azər­baycan Eldənizlər dövləti ilə dostluq əlaqələri saxladı, ona arxalandı. Eyni zamanda Gürcüstan çarlığı ilə də dostluq münaslbətlərini davam etdirdi. I Axsitan Şirvan-Gürcüstan qohumluq ənənələrini davam etdirərək gürcü çarı III Georginin bacısı qızı ilə evləndi. 1173-cü ildə Şirvanşahın hərbi qüv­vələri Şəki ərazisindən keçərək Gürcüstana hücum etdi və mərkəzi hakimiyyətə qarşı qalxmış qiyamı yatırt­maqda III Georgiyə köməklik göstərdi. Bundan başqa, I Axsitanın hakimiyyəti illərində Dərbənd hakimliyi yenidən Şirvan­şahlardan asılı vəziyyətə salındı. Atası III Mənuçöhr kimi, I Axsitan da Şirvan dövlətinin müdafiə qüdrətini artır­dı. Ölkənin ərazisində çoxlu müdafiə qurğuları - qalalar, qüllələr, sədlər tikildi və bərpa edildi.

1175-ci ildə Şirvanşahlar dövləti yenidən xarici təcavüzə məruz qaldı: rusların 73 gəmidən ibarət donanması Azərbaycana basqın etdi. Yadellilər Kürün mənsəbinə daxil olaraq Ləmbərana qədər hərəkət etdilər. Elə bu zaman şimaldan qıpçaq türkləri Dərbəndi və Şabranı ələ keçirdilər. Şirvanşahın hərbi qüvvələri rus donanmasını məhv etdi. Şabran və Dərbəndi qıpçaqlardan geri aldı.

1192-ci ildə güclü zəlzələ nəticəsində Şamaxı dağıldı. Şəhər əhali­sinin xeyli hissəsi, o cümlədən I Axsitanın ailə üzvləri məhv oldu. Bu hadisədən sonra Şirvanşahlar dövlə­tinin paytaxtı Bakıya köçürüldü.

Şirvanşah I Axsitan və onun varislərinin hakimiyyəti illərində Azər­baycanın şimal torpaqlarında yaranmış siyasi sabitlik, Şirvan­şahların Azərbaycan Eldənizlər dövləti və səlcuq türkləri ilə dostluq siyasəti, Gürcüstanla qonşuluq münasibətləri, Dərbənd keçidinin möh­kəmləndirilməsi iqtisadi inkişafa və mədəniyyətin tərəqqisinə müsbət təsir göstərdi.