Issiq iqlim sharoitida bolalarni jismoniy tarbiyalash

Issiq iqlim sharoitida bolalarni jismoniy tarbiyalash.
Reja.
1.Bola organizmini chiniqtirish.
2. Chiniqtirishning asosiy tamoyillari
3. Bolalarni quyoshda chiniqtirish.

Mamlakatimizda shaxsni har tomonlama va garmonik rivojlantirish, shu jumladan, yosh avlodning jismoniy jihatdan sog‘lom va baquvvat bo‘lib o‘sishi uchun barcha shart-sharoitlar yaratib berilgan.

Moddiy farovonlik darajasining oshayotgani, tibbiyot muassasalari, dam olish uylari, sanatoriyalar, bolalar oromgohlari tashkil etilganligi – O‘zbekiston aholisining sog‘lig‘ini mustahkamlash va ularning jismoniy tomondan rivojlantirish yo‘lida qilinayotgan ishlarning bir bo‘lagidir.
Bola organizmining mustahkam bo‘lishi va rivojlanishi uning, ya’ni organizmini chiniqtirish bilan chambarchas bog‘liqdir. Har bir ona o‘z farzandini muntazam chiniqtirish yo‘li bilan bolaning ko‘pgina kasalliklarga chalinishining oldini olishi mumkin.
Oftob, havo va suv barcha yoshdagi bolalarga uchun chiniqishning eng oson vositalaridan biri. Tabiatning bu in’omidan jismoniy tarbiya tizimida maktabgacha ta’lim muassasalari, bolalar oromgohlari, sanatoriyalarda chiniqtirish maqsadida foydalaniladi.
Biroq, oftob, havo va suv barcha yoshdagi olalarga turlicha ta’sir qiladi. Ayniqsa, O‘zbekistonning issiq iqlim sharoitida Quyoshning radiatsiya nurlari turli fasllarda har xil bo‘ladi. Shuning uchun chiniqtirish bo‘yicha olib boriladigan ishlar yurtimizdagi bu sharoitlarni hisobga olgan holda olib borilishi lozim. Endi O‘zbekistondagi iqlimga nazar solsak, Respublikada yog‘ingarchilik kam, iqlim quruq kontinental, issiqlik va yorug‘lik ko‘p. O‘zbekiston hududining katta qismi mo‘tadil mintaqaga, janubi subtropik mintaqaga mansub. Respublikada quyosh yil davomida qariyb baland, tik bo‘ladi. U iyun oyida ufqdan 72 darajaga, Termizda 76 darajaga ko‘tariladi. Yozda kunduz 15 soat davom etadi, qishda esa 9 soatdan kam bo‘lmaydi. Yozda kunduz 15 soat davom etib, bulut kam bo‘lganligi sababli, quyosh uzoq vaqtgacha nur sochib turadi, undan kelayotgan issiqlikning 70–80 %dan ko‘prog‘i esa tuproq va havoni isitishga sarf bo‘ladi.
Eng issiq oylar iyun, iyul, avgust hisoblanadi. Havo harorati +36...+38° C bo‘ladi. Qishda O‘zbekistonning ko‘pgina joy- larida ob-havo beqaror bo‘lib, iliq va sovuq kunlar almashinib turadi. Eng sovuq oylar yanvar–fevral oylari hisoblanadi. Bahor oylarida iliq va issiq kunlar almashib turadi. O‘rtacha harorat +19...+22° C, yomg‘irlar tugaydi, lekin vaqti-vaqti bilan kelib turadigan salqin havo issiqlikni ko‘tarilib ketishiga yo‘l qo‘ymaydi. Kuz oylarda ham havo harorati 30– 35 daraja bo‘lib, kunduz 14 soatni tashkil etadi. Lekin quyosh nurlari tik tushadigan ana shunday issiq iqlim sharoitida o‘sayotgan bolalarning rivojlanishi o‘ziga xos xususiyatlarga egadir. Bu iqlimda yashovchi bolalarda organizm issiqlikni chiqarishni kamaytira olish, obhavoga qarab ko‘paytirish xususiyatiga egadir (qish oylarida). Ana shunday xususiyatlar bola organizmini chiniqtirish natijasida hosil bo‘ladi.
Bola organizmini chiniqtirish tizimi, deganda organizmini mustahkamlash, turli kasalliklarga qarshi kurashish, immunitetini oshirish, hayotiy sharoitlarning o‘zgarishiga tez moslashish qobiliyatini rivojlantirishiga qaratilgan tadbirlar tizimi tushuniladi. Chiniqqan kishi sovuq va issiqqa, haroratni keskin o‘zgarishiga bemalol chidab beradi hamda shamollash kasalliklari bilan ancha kam og‘riydi.
Chiniqtirish protsessi fiziologik hodisalarning juda murakkab va xilma-xil kompleksidan iborat. Markaziy asab tizimining faoliyati tufayli bola organizmi doimo o‘zgaruvchi tashqi sharoitga moslashadi. Bunda teri asosiy rol o‘ynaydi. Teri bola organizmini harorat, nur, kimyoviy va mexanik ta’sirlardan va mikroblar kirishidan saqlaydi.Issiqlikni tartibga solish issiqlikni hosil qilish yo‘li bilan ham va uni atrof-muhitga tarqatish (issiqlik chiqarish) yo‘li bilan ham amalga oshiriladi. Issiqlik barcha to‘qimalarda muntazam ravishda ishlab chiqariladi, u muskullarda va jigarda ayniqsa ko‘p bo‘ladi. Issiqlik, asosan o‘tkazilish va tarqalish yo‘li bilan teri yuzasidan (7 %), shuningdek, nafas olish va ter chiqarishda bug‘lanish yo‘li bilan chiqariladi. Shuni ham qayd etib o‘tish zarurki, issiqlik organizmda mustaqil hosil bo‘lib va chiqarib turiladi. Aks holda organizm qizib ketishi yoki sovib qolishi mumkin.
Bolalardagi issiqlikni tartibga solish mexanizmi murakkab reflektor akti hisoblanadi, unda shartsiz reflekslar, shartli reflekslar ham mavjud. Chiniqtirishning asosiy mohiyati bolada ana shunday shartli reflekslar paydo qilishdan iboratki, bunda ularning yordamida organizm o‘ziga zarar keltirmagan holda tashqi noqulay ta’surotlarga qarshi tura oladi.
Bolalarni butunlay sog‘lom va baquvvat bo‘lishi haqida muntazam g‘amxo‘rlik qilinar ekan, chiniqtirish tadbirlarining o‘zi bilan kutilgan natijalarga erishib bo‘lmasligini unutmaslik kerak. Chiniqtirish tadbirlari tog‘ri tashkil etilishi uchun maxsus sharoitlar bo‘lishi kerak: bolalar muassasalari va uyda sanitariya- gigiyena sharoitlarini to‘g‘ri tashkil etilganligi, organizmning yoshi va uning sog‘liq darajasi talablariga mos keladigan ratsional to‘la qimmatli ovqatlar, bola kun tartibini to‘g‘ri tashkil etilishi, yoshiga qarab uyquni tashkil etish, mehnat bilan dam olishning almashtirib turilishi, bolalarni sof havodan muntazam foydala- nishi (sayr), shifokor nazorati va boshqalar.