6.2.Verilənlər bazasının verilənlər anbarından fərqli cəhətləri
Verilənlər anbarı haqqında ətraflı məlumat 4-cü fəsildə verilir. Burada isə verilənlər bazası ilə verilənlər anbarının QQDS-də tətbiqi ilə bağlı onların fərqli cəhətlərinə baxılır.
Qərar qəbulunu dəstəkləyən sistemlərdə verilənlər bazasından iki halda istifadə edilir:
1.Əgər ilkin operativ verilənlər VB-də saxlanılırsa, QQDS-in işi zamanı ilkin verilənlər həmin VB-dən götürülür.
2.Əgər qərar qəbulu operativ verilənlər əsasında aparılırsa.
Hər bir hala uyğun verilənlər bazası təşkil olunur. Aydındır ki, bu hallardan biri və ya hər ikisi olmaya da bilər.
1-ci halda VB-nin qurulması QQDS-in layihəsinə daxil edilməyə bilər, yəni müəssisədə və ya təşkilatda operativ verilənləri saxlayan verilənlər bazası QQDS qurulmazdan əvvəl fəaliyyət göstərə bilər. Əgər belə VB yoxdursa, onun qurulması QQDS-in layihəsinə daxil edilə bilər.
2-ci halda VB-də müəssisənin (təşkilatın) fəaliyyətini xarakterizə edən operativ verilənlər saxlanır və qərar qəbulu da həmin verilənlər əsasında aparılır. Bu halda verilənlər bazası QQDS-in tərkib hissəsi kimi layihələndirilməlidir.
QQDS-də istifadə baxımından həm VB-yə, həm də VA-ya xas olan müsbət və mənfi cəhətlər mövcuddur. VA-da verilənlər nisbətən uzun vaxt kəsiyində (il, beş il və daha çox) saxlanır və bu müddət üzrə onlar ümumiləşdirilir. Odur ki, VA-dan strateji qərarların qəbulunda daha çox istifadə edilir. Operativ qərarların qəbulunda isə VB-dən istifadə edilməsi daha məqsədəuyğundur.
Dostları ilə paylaş: | 
