Lekciya. Óndiristiń sanitariya hám gigiena normaları, mazmunı

8-lekciya. Óndiristiń sanitariya hám gigiena normaları, mazmunı
Jobası:
1. Óndiris sanitariyasınıń ulıwma túsinigi
2. Kásiplik keselliginiń aldın alıw hám jeke gigiena
3. Óndiris imaratları hám jumıs orınlarınıń mikroklimatı
4. Jılıtıw sistemasınıń túrleri hám olarǵa qoyılǵan tiykarǵı talaplar
5. Jaqtılıq haqqında ulıwma maǵlıwmatlar


1. Óndiris sanitariyasınıń ulıwma túsinigi
Óndiris sanitariyası – bul jumısshılarǵa tásir etiwshi zıyanlı faktorlardı saplastırıwǵa qaratılǵan shólkemlestiriw, gigienalıq hám sanitariya-texnikalıq jumıslar hám de qurallar sisteması.
Óndiris sanitariyasınıń tiykarǵı wazıypası bolsa zıyanlı bólekshelerdiń belgilengen ruxsat etilgen muǵdarı (REM) tiykarında salamat hám qáwipsiz jumıs jaǵdayların jaratıwdan ibarat.
Bizge belgili, xalıq xojalıǵınıń ayırım tarawlarında, atap aytqanda awıl xojalıǵı, neft hám gaz qudıqların qazıw hám olardan paydalanıwda kópshilik jumıslar ashıq hawada ótkeriledi. Bunday jaǵdayda jumısshılarǵa meteorologiyalıq jaǵdaylar, yaǵnıy hawanıń temperaturası, ıǵallılıǵı, basım, qar, jawın, quyash radiaciyası hám basqa usı sıyaqlı faktorlar úlken tásir etedi. Usı faktorlar eki jol menen, yaǵnıy, hawa arqalı yamasa tikkeley qatnasta bolıw arqalı tásir etiwi múmkin.
Hawa arqalı tásir etiwshi zıyanlı faktorlarǵa jumıs ornınıń mikroklimat jaǵdayın belgilewshi kórsetkishler muǵdarı, shań, gaz, shawqım, infra hám ultradawıslar, jaqtılıq dárejesi elektromagnit maydan, infraqızıl hám ultrafiolet nurlanıwlar hám de basqalardı mısal etiwimiz múmkin.
Ekinshi jol, tikkeley baylanıs arqalı tásir etiwshi faktorlarǵa bolsa hár qıylı qattı hám suyıq zıyanlı bóleksheler, terbeliw menen islewshi ásbap hám úskeneler kiredi.
Joqarıdaǵı faktorlardı esapqa alǵan halda olardıń insan salamatlıǵına tásirin úyreniw hám de bul tásirlerdi saplastırıw is-ilajların islep shıǵıw zárúr. Bul másele bolsa miynet gigienasınıń tiykarǵı wazıypası esaplanadı.