Лекция. TÁRbiyaNÍŃ ulíwma metodlarí Jobası

Kúndelik rejim arqalı shınıqtırıw - belgilengen rejimge úyretiw, mektep oqıwshıları ushın júdá zárúr. Sebebi rejim - bul waqıttı únemlewdiń tiykarı. Kúndelik rejimdi durıs paydalanıw oqıwshılardıń aqlıy xızmet etiw procesinde tez sharshap qalıwına jol qoymaydı. Sonday-aq, olardıń shınıqqan bolıwına unamlı tásir etip, óz bilimin kóteriwge, jámiyetlik paydalı islerge qatnasıwına, úy jumıslarına kómeklesiwge járdem beredi. Kerisinshe kúndelik rejimdi durıs paydalanbaw balanıń aqıl-oyınıń, minez-qulqınıń, tártibiniń rawajlanıwına unamsız tásir etip, onıń densawlıǵınıń nasharlanıwına, ruwxıy rawajlanıwınıń kambaǵallasıwına alıp keledi. Bala mektepte tórt-altı saat boladı, al qalǵan onsegiz - jigirma saat waqıttı mektepten tısqarıda ótkeredi. Sonlıqtan mektep hám sem`yanıń kúndelik rejiminiń bar bolıwına eriskenimiz maqul boladı.
Tapsırma beriw arqalı shınıqtırıw. Mektepte tapsırmalar sisteması oǵada úlken orındı iyeleydi. Balalar baslawısh klass oqıwshısı bolıwı menen-aq, gúlshi, fizikalıq tárbiya shólkemlestiriwshisi, xojalıq baslıǵı degen hám basqa da tapsırmalardı aladı. Hár bir oqıwshı berilgen tapsırmalarǵa úyrenedi, onı haq kewli menen orınlawǵa háreket jasaydı. Jámiyetlik tapsırmalar sisteması balanı kollektiv nızamları menen jasaw hám islewge, jámiyettiń konkret islerine ózleriniń baylanıslı ekenligin durıs seziwge úyretedi.
Hár qanday tapsırma oqıwshılarda tapsırılǵan iske bolǵan jeke juwapkershilik qatnastıń, miynet súyiwshiliktiń rawajlanıwına unamlı tásir jasaydı. Biraq, hár qanday tapsırma balada juwapkershilik sezimlerin payda ete bermeydi. Beriletuǵın tapsırmalardıń oqıwshılardaǵı juwapkershilikli sezimlerdn rawajlandırıp barıwı ushın tómende kórsetilgen bir qatar orınlanıwı kerek bolǵan talaplardı basshılıqqa alǵanımız maqul boladı;
- beriletuǵın tapsırmalardıń jámiyetlik áhmiyetin oqıwshılardıń bilip barıwı;
- jámááttiń ózine isenip tapsırǵan tapsırmasınıń áhmiyetliligin hám zárúrligin túsiniwi;
- tapsırmalardı bergende hár bir balanıń qızıǵıwshılıǵın, intasın, múmkinshiliklerin esapqa alıp, orınlaw qolınan keletuǵınday etip beriw;
- tek tapsırmalardı bólistirip beriw menen sheklenip qalmastan, al, hár bir oqıwshını sol tapsırmalardı orınlawǵa úyretip barıw.