Kredit bazarı dedikdə kreditlərin alqı-satqısı sazişi (sövdələşməsi) başa düşülür. Kredit
bazarının başlıca xüsusiyyəti ondan ibarətdir ki, burada ticarətin obyekti kimi pul qəbul
edilir, yəni pul alınır-satılır. Hər bir digər bazarlarda pulun hər hansı digər əmtəəyə
mübadiləsi baş verir. Kredit bazarında ssudaya verilmiş pul əvvəlcə kreditordan borcalana
keçir, müəyyən müddətdən sonra isə fazilə birlikdə borcalandan kreditora qayıdır. Kreditin
təqdim edilməsinin müddəti nə qədər çoxdursa, bir qayda olaraq alınmış fazilər bir o qədər
yüksək ola bilər. Kredit bazarının əsas funksiyası iqtisadi istehsal prosesinin fasiləsizliyini
təmin etmək üçün kifayətedici həcmdə pul vəsaiti ehtiyatı yaratmaqdan ibarətdir.
Artıq yuxarıda da deyildiyi kimi, kredit bazarına alqı-satqı obyekti kreditə (ssudaya)
verilən pul vəsaitləridir. Borclanmanın müxtəlif üsulu və müvafiq olaraq müxtəlif növ kredit
mövcuddur. Kreditin növlərinin həddi onların hər birinin likvidliyini müəyyən etmək üçün
olduqca zəruridir. Likvidlik hər bir aktiv üçün əhəmiyyətli xüsusiyyətdir. Kreditin likvidliyi
dedikdə yerləşdirilmiş pul vəsaitinin vaxtında qaytarılması imkanı başa düşülür. Yüksək
likvidliyə, məsələn, müddətsiz bank əmanətləri malikdir. Aşağı likvidlik isə uzunmüddətli
kredit üçün xarakterikdir ki, bu da vəsaitin uzun müddətə verilməsi ilə əlaqədardır.
