Xərclərin üçüncü qrupu - əmanət və yığımlardır ki, onlar da bazar iqtisadiyyatı
münasibətləri şəraitində ev təsərrüfatının fasiləsiz inkişafını təmin edir. Bu xərclər Milli
iqtisadiyyatın sabitliyinin təmin edilməsində mühüm rol oynayır və mühüm investisiya
mənbəyi hesab edilir. Ev təsərrüfatı üçün əmanət və yığımların zəruriliyi aşağıdakılarla
əlaqədardır:
- uzun müddətə istifadə edilən bahalı əmtəə və xidmətlərin alınması üçün ehtiyatın
yaradılması; - gəlirlərin tərəddüdü zamanı istehlak xərclərinin adi səviyyəsini saxlamaq üçün sığorta
fondunun formalaşması; - gəlirliyin səviyyəsini yüksəltmək məqsədi ilə qiymətli kağızları investisiyalaşdırmaq
üçün pul fondlarının yaradılması. İqtisadi islahatların həyata keçirilməsinin başlanğıcında əhalidə xeyli pul yığımı
olmuşdur. Lakin 90-cı illərin birinci yarısında güclü inflyasiya əhalinin kredit təşkilatlarına
inamını azaltmışdır.
Hazırda ev təsərrüfatının pul yığımları və əmanətləri iki formada çıxış edir:
qeyri-mütəşəkkil və mütəşəkkil. Birinci forma - əhalidə manatla və xarici valyutada
nağd puldur. Xarici valyutanı alanlar banklara və milli valyutaya inamını itirmiş və habelə
xaricdən istehlak mallarını alıb və onları Azərbaycana idxal etmək üçün xarici valyuta alan
insanlardır. İkinci forma - kommersiya bankları hesablarında olan və ya qiymətli kağızlara
qoyulan pul vəsaitləridir.
