Ma’muriy amaliyotni tashkil etish fanining taqsimlanishi dasturning mazmuni

3.Organlarning mamuriy huquqbuzarlik to’g’risidagi ishlarni yuritishdagi vazifalari.

Ma’muriy huquqbuzarlik to’g’risidagi ishlarni yuritish vazifalari: har bir ishning holatini o’z vaqtida, har tomonlama, to’la va obyektiv ravishda aniqlab chiqishdan, bu ishni qonun hujjatlariga muvofiq holda hal etishdan, chiqarilgan qarorning ijrosini ta’minlashdan, shuningdek ma’muriy huquqbuzarlik sodir etish sabablari va bunga olib kelgan shart-sharoitlarni aniqlashdan, huquqbuzarliklarning oldini olishdan, fuqarolarni O’zbekiston Respublikasi Konstitutsiyasi va qonunlariga rioya etish ruhida tarbiyalashdan, qonuniylikni mustahkamlashdan iboratdir.
Ma’muriy huquqbuzarlik to’g’risidagi ishlarni yuritish tartibi ma’muriy javobgarlik to’g’risidagi Kodeks va boshqa qonun hujjatlari bilan belgilanadi.
Quyidagi holatlar mavjud bo’lgan taqdirda ma’muriy huquqbuzarlik to’g’risidagi ishlarni yuritishni boshlash mumkin emas, boshlangan ish esa tugatilishi lozim:
1) ma’muriy huquqbuzarlik hodisasi yoki alomati yo’q bo’lsa;
2) ma’muriy huquqbuzarlikni sodir etish paytida shaxs o’n olti yoshga to’lmagan bo’lsa;
3) g’ayrihuquqiy harakat yoki harakatsizlikni sodir etgan shaxs aqli noraso bo’lsa;
4) shaxs harakatni zaruriy mudofaa holatida yoki oxirgi zarurat holatida qilgan bo’lsa;
5) amnistiya akti chiqishi, agar u ma’muriy jazo chorasini qo’llanishni bekor qilsa;
6) ma’muriy javobgarlikni belgilovchi hujjat bekor qilingan bo’lsa;
7) ma’muriy huquqbuzarlik to’g’risidagi ishni ko’rib chiqish paytiga kelib ma’muriy javobgarlik to’g’risidagi Kodeksning 36-moddasida nazarda tutilgan muddatlar o’tib ketgan bo’lsa;
8) ma’muriy javobgarlikka tortilayotgan shaxs xususida shu fakt yuzasidan ma’muriy jazo qo’llanish to’g’risida vakolatli organ (mansabdor shaxs) qaror chiqargan bo’lsa yoki ma’muriy huquqbuzarlik to’g’risidagi ishlarni tugatish to’g’risida chiqarilgan qaror bekor qilinmagan bo’lsa, shuningdek mazkur fakt yuzasidan jinoyat to’g’risidagi ish qo’zg’atilgan bo’lsa;
9) shaxs ishi yuritila boshlangan paytda vafot etgan bo’lsa.
Ma’muriy huquqbuzarlik to’g’risidagi ish barcha fuqarolarning jinsi, ijtimoiy kelib chiqishi, shaxsiy va ijtimoiy mavqei, irqi, millati, tili, dini va e’tiqodidan qat’i nazar, qonun oldida va shu ishni ko’rib chiquvchi organ (mansabdor shaxs) oldida tengligi asosida ko’rib chiqiladi.
Ma’muriy huquqbuzarlik to’g’risidagi ish o’zbek tilida, qoraqalpoq tilida yoki muayyan joydagi ko’pchilik aholi so’zlashadigan tilda yuritiladi. Ish yuritilayotgan tilni bilmaydigan ish ishtirokchilariga tarjimon orqali ish materiallari bilan to’liq tanishish va ishni mohiyati bo’yicha ko’rib chiqish chog’ida qatnashish huquqi, shuningdek o’z ona tilida so’zlash huquqi ta’minlanadi.
Ma’muriy huquqbuzarlik to’g’risidagi ish ochiq ko’riladi.
Ma’muriy huquqbuzarliklar to’g’risidagi ishlarni ko’rib chiqishning tarbiyaviy va ogohlantiruvchi rolini oshirish maqsadida bunday ishlar huquqbuzarning ish, o’qish joyidagi jamoalarida yoki yashash joyida ko’rib chiqilishi mumkin.
Prokuror ma’muriy huquqbuzarlik to’g’risidagi ishlarni yuritish chog’ida qonunlarning ijrosi ustidan nazoratni amalga oshirar ekan:
ma’muriy huquqbuzarlik to’g’risida ish qo’zg’atishga;
ish materiallari bilan tanishib chiqishga;
ish yuritish vaqtida organlar (mansabdor shaxslar)ning harakatlari qonuniyligini tekshirishga;
ishni ko’rib chiqishda qatnashishga;
ishni ko’rib chiqish vaqtida vujudga kelgan masalalar xususida iltimosini bayon etishga, xulosalar berishga;
ma’muriy huquqbuzarliklar uchun tegishli organlar (mansabdor shaxslar) ta’sir ko’rsatish choralarini to’g’ri qo’llanganligini tekshirishga;
ma’muriy huquqbuzarlik to’g’risidagi ish yuzasidan qabul qilingan qarorga yoki shikoyat yuzasidan chiqarilgan hal qiluv qaroriga protest keltirishga;
qonunda nazarda tutilgan boshqa harakatlar qilishga haqlidir.