Uzluksiz ishlaydigan, qarama - qarshi yo’lli tsilindrik qurilmalarda gaz oqimi taqsimlovchi teshikli panjara ostiga uzatilsa, material esa qurilma-ning tepa qismidan yuklanadi (9a-rasm). Gaz taqsimlovchi teshikli panjara ustida donador materialning bir xil sathini ta’minlash va qurilmadan chiqarish uchun oqib o’tuvchi patrubkalar xizmat qiladi.
Vertikal tsilindrsimon qurilmalar katta miqdordagi don – dunlarni yig’ib qo’yish uchun ishlatiladi (9b-rasm). Gaz taqsimlash kamerasi yassi tub va teshikli panjaralar orasida joylashgan ikkita tsilindrdan iborat. Bu konstruktsiyali kameralarda kontsentrik to’siq uni ikkita, ya’ni ichki va tashqi halqalarga bo’ladi. Tashqi halqa bo’shlig’iga, ichkiga qaraganda 2 marta ko’p gaz yuboriladi. Turli miqdorda gaz uzatilgani sababli, qurilmada don mahsu-lotining yo’naltirilgan tsirkulyatsiyali harakati paydo bo’ladi. Natijada material intensiv aralashadi va zarrachalar harakati qurilma o’qidan tsilindrik devor tomonga yo’nalgan bo’ladi.
Konussimon qurilmalarda pastdan yuqoriga qarab tezlikning pasayishi polidispers materiallarni mavhum qaynatish imkonini yaratadi (9v-rasm). Gaz oqimi katta tezlikda qurilma tubidagi shtutser orqali yuboriladi. Ushbu holatda qurilmaga gaz taqsimlovchi teshikli panjara ham o’rnatilmasa bo’ladi. Teshikli panjarasiz qurilmalarda yopishqoq materiallarni ham mavhum qaynash jarayonidan foydalanib quritsa bo’ladi. Agar, konuslik burchagi katta bo’lsa, gaz oqimining qurilma devori yaqinida faolligi kamayadi va konus o’qi bo’ylab uzluksiz kanal barpo bo’lishi mumkin. Ushbu kanal orqali katta tezlikda «gaz - qattiq zarracha» aralashmasi harakat qilib, qatlamdan otilib chiqib, qattiq zarrachalar favvoralarini hosil qiladi. Bunday qatlam favvorasimon qatlam deb ataladi. Diametri 25...40 mkm o’lchamli yopishqoq va elektrolizatsiyaga moyil mayda zarrachalar mavhum qaynash jarayonida yaxshi aralashishini ta’minlash va harakatsiz zonalarni bartaraf qilish maqsadida, hamda issiqlik va massa almashinish jarayonlarini intensivlash uchun gazomexanik mavhum qaynash usulidan foydalaniladi (9g,d-rasm). Qatlamga qo’shimcha energiya uzatish turli xil aralashtirgich va tebratgichlar yordamida amalga oshiriladi (9g-rasm).
