Mavzu : Oshiqnoma dostonlarida so’z ma’nosining ko’chish yo’llari Mundarija Kirish Reja; I bob. “Oshiq turkum” dostonlarining o‘rganilishi va o’ziga xos xususiyatlari

II bob. Oshiq turkum” dostonlarida so’z ma’nosining ko’chishi ko’rinishlari.

2.1. “Oshiq turkum” dostonlarida badiiy tasviriy so’z ma’nosining ko’chishi

Buyuk kashfiyotlardan bo‘lmish so‘z san’ati tarixi juda qadimiy bo‘lib, uning tub ildizlari dunyo xalqlarining folklori tarixiga borib taqaladi. Jumladan, so‘z san’ati tarixining bir uchi xalq dostonlariga borib tegadi. Xalq dostonlari qaysi namuna turiga qaramaylik , tub ildizlari va shakllanishida epik tafakkur bilan bir vaqtda, mifologik tasavvurlar ham muhim rol o‘ynaydi.
Ya’ni, epik tafakkur mifologik tasavvurni yangidan badiiy rivojlantib, badiiy-estetik voqelikka olib chiqadi. Mifologik tasavvurlar qadimgi odamlarning ibtidoiy tushunchalari mahsuli bo‘lib, inson tafakkurining shakllanishida muhim ahamiyat kasb etgan. Epik asarda tasvirlangan qahramon harakteriga xos tabiiylikni saqlab qolgan holda uning dardini, ichki kechinmalarni ramziy – metaforik usulda talqin qilish uchun har bir baxshi avloddan-avlodga o‘tib
kelayotgan e’tiqod va ishonchlarga murojaat etgan holda, ularni badiiy-estetik mahorat bilan dostonlarda kuylaydi.
Dostonlar tarkibida asrlar davomida shakllanib, takomillashib, o‘ziga xos bir badiiy sistemani tashkil etib kelayotgan, eposning bayon uslubini belgilovchi badiiy ifoda vositalari - epik an’anaviy formulalar hisoblanadi. Xorazm dostonlarining matni, xususan, ularning she’riy qismi turg‘un ko’rinishga ega. S.Ro‘zimboyev bu haqida shunday yozadi: “.....dostonlar tarkibidagi she’rlar ritmik jihatdan tugal uyg‘unlashgan, silliqlashgan, badiiy jihatdan mukammal
bo‘lgan she’riy matn shaklga kirgan. Shu boisdan ham Xorazm dostonlaridagi she’riy parchalar qat’iy tartib asosida qofiyalashadi va bandlarga bo‘linadi61. Yana bir o‘ziga xos jihat shundaki, Xorazm dostonchiligidagi epik repertuarning
aksariyat qismi ishqiy romanik turga mansub namunalardir. Bevosita baxshilar ijrosidagi o‘ziga xos jihat xususida to‘xtaladigan bo‘lsak, bugungi kunda baxshilar ikki yo‘lda o‘z asarlarini ommalashtirishyotganligi qayd etilgan. Ya’ni:

a) baxshilar va ansamblli xalifalar repertuari orqali og’zaki tarzda;

b) yakka xalfalar, qissaxonlar repertuari orqali kitobiy matn o‘qib yodaki eshtirish tarzida”
Shunday qilib, yuqoridagi fikrlar Xorazm dostonchiligi o‘z an’analari, repertuarlari va boshqa jihatlari bilan umumo‘zbek epik ijodiyotida munosib o‘ringa ega ekanligini ko‘rsatib turipdi. Shunday ekn, bu hududdagi epik ijod bilan bog‘ liq barcha holatlarni ilmiy hihatdan tadqiq etib, munosib bahosini berish
umumo‘zbek epik ijodiyotini yanada teranroq tanish, ilmiy o‘rganish va keng ilmiy jamoatchilikka yetkazish imkonini yaratdi.
Epik an‘anaviy formulalar “oshiq” turkum dostonlarining asosini tashkil qiladi. Folklorshunos S.Ro‘zimboyev o‘z maqolasida shunday yozadi: “Xorazmda tarqalgan dostonlarda bosh qahramonni safarga kuzatish oldidan savol-javob qilish, unga oq yo‘l tilash, asar qahramonning ot-yaroq so’rashi, uning ba’zan
jang oldidan yohud safarga ketayotib aytadigan faxriyalari, “epic homiy”lar bilan duch kelishi, jang tasviri, otiga murojaat qilishi, sevgilisini ta’rif qilishi, qiz olib kelishi, finalda to‘y-tantananing boshlanishi kabi an’naviy epizodlar tez-tez
ko‘zga tashlanadi. Ularda ishlatiladigan an’anaviy ifoda vositalari, o‘ziga xos obrazli parallalelizmlar, asardagi konkret vaziyatlar, obrazlarnining qiyofasini va kayfiyatlarini bayon etishga xizmat qiladilar.”
Yuqoridagi keltirilgan fikrlarni ta’kidlashimizdan maqsad, kurs ishimiz ob’yektimizning bu bo‘limida “Oshiq” turkum dostonlarning aynan badiiy tasviriy vositalari haqida to‘xtalib o‘tmoqchimiz. “Oshiq” turkum dostonlarida asarning ekspozitsiyasidan keyin, bosh qahramonning safar sarguzashtlaridan boshlanib,
finalda to‘y-tantana bilan yakunlanishi, baxshining yuksak badiiy-estetik mahorati kuchli ekanini, dostondagi har bir obrazlar qiyofasi, konkret vaziyatlar, kayfiyatlar bayoni she’riy monologlarda tasvirlanganligi doston kuylovchining professional
badihago‘ylik darajasi yaqqol namoyon bo‘ladi.
“Go‘ro‘g‘li” turkumi dostonlarida jang tasviri, jasorat va mardlik, jangovorlik xususiyatlarini ochib berishga qaratilgan bo‘lsa, “oshiq” turkum dostonlarida asosiy vazifasi esa ma’shuqa go‘zalligini, oshiqning iztiroblarini aks ettirishga yo‘naltirilgan.
Ushbu fikrlarimizga “oshiq” turkum dostonlariga nazar tashlasak,
maqsadga muvofiq bo’ladi. “Oshiq G‘arib va Shohsanam” da boshqa “oshiq” turkumiga kiruvchi namunalaridan farqli holda oshiq va ma’shuqa voqealarida
birdek faol ishtirok etadi. Oshiq o‘z sevgilisi va muhabbati uchun qanchalik kuyinib harakat qilsa, ma’shuqa ham undan kam bo‘lmagan darajada faoliyat ko‘rsatadi. Bu o‘rinda tarozning oshiq va ma’shuqa pallalari teng turadi. “Oshiq G‘arib va Shohsanam” dostonida zo‘r ko‘tarinki ruh bilan tasvirlangan asosiy obrazlardan biri G‘aribdir. G‘arib butun qalbi bilan Shohsanam uchun berilgan fidoyi, sofdil oshiq obrazidir. Uning barcha sarguzashtlari, azob va xo‘rliklari, ichki kechinmalari, o‘z yorining visoliga yetish uchun zo‘r chidam va yuksak iroda bilan olib borilgan kurashning rang-barang sahifalari orqali namoyon bo‘la boradi. Ushbu dostonda oshiq o’z yorining hajrida dard chekib, go‘zalligini ta’riflaganini quyidagi so‘zlarda ko‘rishimiz mumkin:

“Oshiq Mahmud” va “Oshiq Alband” dostonlarida bu holatning guvohi bo‘lmaymiz. Bu dostonlarda ma’shuqa oshiq qancha mashaqqat va sinovlardan o‘tib, uni izlab topib borgandan keyingina asar syujetida to‘laqonli ravishda namoyon bo‘ladi.

Ushbu ikki xil syujet tipini yuzaga keltirgan “oshiq” turkum dostonlari tarixi, tub ildizlarini yoritishda ayni holatni inobatga olish kerak bo‘ladi. Chunki, har qanday asar qahramonlari taqdirining bayon etilish tarkibi qahramon xarakterining qanday asoslarda yuzaga kelishini belgilaydi. Folklorshunoslikda romanik dostonlarga ham badiiy-estetik hodisa sifatida qahramonlik dostonlariga nisbatan real voqelikka uyg‘un tasvirlash holati kuchli. Ayniqsa, bevosita shahar hayotiga yaqin makon qamrovida yaratilgan “oshiq” turkum dostonlarida
bu holat yanada yaqinroq seziladi. Ayni paytda, romanik dostonlarda qorishiq holatida yangi bir badiiy-estetik bosqichga ko‘tarilgan xalqning qadim dunyoqarashlari, ishonch-e’tiqodlarining o‘rni boshqa turdagi dostonlardan kam bo‘lmagan darajada o‘z o‘rnini olgan. Bu holatni asarlarning badiiy tasviriy vositalari misolida yana aniqroq ko‘rishimiz mumkin. Bu o‘rinda folklorshunos
Jabbor Eshonqulovning quyidagi fikrini keltirish o‘rinli:
“Garchi har qanday obraz va hodisa zamirida voqelik yotkanini inkor etmagan holda, shuni ta’kidlash joizki, obraz va hodisadan to‘liq reallik izlash asarni yuzakilashtiradi, obrazning tarixiyligi, eng avvalo, unda mujassam etilgan ifoda va
tasavvurda ko‘rinadi. Bu ifoda hamda tasavvur turkiy xalqlarning birlamchi dunyoqarashlariga, shomonlik va ungacha bo‘lgan davrlar tasavvurlariga mos va hozirgi kunga qadar ham shu tasavvurni tashiydi. Uni antagonistik sinfiy nuqtai nazardan izohlab bo‘lmagani kabi, quruq xayolot deb ham bo‘lmaydi.

Bu obrazlar xalq tafakkur tarzining, xayoloti va dunyoqarashining

bir bo‘lagi sifatida tadqiq qilinmog‘i shart. Shundagina biz an’anaviy obrazlar va xalq og‘zaki ijodiga baho bergan bo‘lamiz. ”.
Bu o‘rinda “oshiq” turkum dostonlaridagi yana bir muhim g‘oyani alohida qayd etish lozim. Ma’lumki, xalqning ideali bo‘lmish alplar bir paytning o‘zida jismonan va ma’nan kamolga yetgan shaxslar bo’lishadi. Ular o’zlarining ana
shu fazilatlari bilan xalq ozodligi, erki, ma’naviy yuksalishiga o‘z hissalarini qo‘shadilar. Aksariyat qahramonlik dostonlarida qahramonning jismoniy kuch-qudrati va shu jihati bilan bog‘liq jasoratlari tasvirlanadi. Bu holning yorqin misoli “Alpomish” dostonida Alpomishning komoloti asarda u qadar ko‘rsatilmagandek tuyuladi. Faqat uning maktabda o‘qish, “Burro savodi chiqib, xat o‘qib-yozadilar, mullo bo‘ldi”67, deb izohlash bilan kifoyalangandek ko‘rinadi. Aslida esa, Alpomishning ma’naviy kamoli uning homiy eranlar ta’limini olganligidan ma’lum.
“Oshiq” turkum dostonlarida asosiy urg‘u qahramonnig ma’naviy tarbiyasi va kamolotiga qaratilgan. Oshiq qahramon o‘z oldidagi to‘siq va sinovlarni o‘zining fazilatlari bilan yengib o‘tadi. Biz bu o‘rinda qahramonning badiiy tasviri mifopoetik talqindan sof poetic talqinga aylanganligini yaqqol ko‘rishimiz mumkin.
Eposda qahramonning ma’naviy komolotini badiiy tasvirlagan she’riy parchalardan misol qilib “Oshiq Alband” dostonidan oldik. U yerda Oshiq Albandning piri Oshiq Oydinning mulla Ma’rifiy bilan savol-javob bellashuvi keltirilgan. Ushbu savol-javoblar ma’rifiy-irfoniy xarakterda bo‘lib, unda odam, olam va butun borliq yaxlitligi, ruh va tan munosabatlari haqidagi orifona fikrmulohazalari badiiy tasvirlariga guvoh bo‘lamiz

Barcha komil ustozlargina ma’lum bu dunyo sir-sinoatlarini o‘ziga

jamlovchi ushbu savollarga xalifai Jahongir javob topolmaydi. Oshiq Albandning ushbu savoli uning kamolotda yuksak maqomga erishganligi, ilmi hol, ilmi qolda benazir bo‘lganligi bildiradi.
Aslida yetuk baxshi-shoir, oshiqlar ham so‘fiylar kabi yuksak maqomda yuradilar. Shu ma’noda Oshiq Alband obrazini komil baxshi-shoir timsoli sifatida qarash mumkin. Ushbu so‘fiyona savol-javobning “Oshiq” turkum dostonlari tarkibiga kiritilishini birgina yozma adabiyoti va kitobiy dostonlar an’anasi bilan
baholash biryoqlamilik bo‘ladi. “Oshiq” turkum dotonlarining tabiati,
xususan, oshiq qahramon xarakteri, ya’ni uning ma’naviy kuchqudratiga e’tiborning qaratilishi ham ana shu ruhdagi g‘oyani talab etishi bu xil talqinlarning dostondan o‘rin olishiga sabab bo‘lgan.
Oshiqning o‘z taqdirga yozilgan yorini izlab, mashaqqatli safarga otlanishi badiiy tasvirini “Oshiq Mahmud” hamda “Oshiq Alband” dostonlarida ko‘rishimiz mumkin. Real voqelik mantig‘idan kelib chiqib baholanadigan bo‘lsa, mazkur holat u qadar haqiqatga yaqin emas. Ayni safar tadbiri ushbu dostonlar asosining qadim an’analar zamirida shakllanganligini ko‘rsatadi va safarga jo‘novchi oshiqning badiiy tasvir zuvalasi an’anaviy tasavvurlar asosida paydo bo‘lishligini bildiradi.
“Oshiq” turkum dostonlarida oshiq-ma’shuqalar uchrashuvi makon ham badiiy tasviriy vositalardan bo‘lishi ehtimoldan holi emas. Bevosita misollarga murojaat qilamiz.
“Oshiq Mahmud” dostonida tush ko‘rib uyg‘ongan Mahmudning
ahvolini ko‘rgan vaziru vuzarolarga Mahmudjon shunday javob
beradi:
“Og‘alar, yotardim kecha tush ko’rdim,
Ali bobom kelib turg‘il, dedilar,
Yo‘lni uzoq ko‘rdim, xiyla ish bildim,
Nigorxonni hikoh qilib berdilar.
Bu nechuk sir – aslo yeta bilmasman,
Ayriliq o‘tiga duza bilmasman,
O‘zga yora boshim qo‘sha bilmasman,
Shahri Lut eliga borg‘il, dedilar.
Og‘alar, ko’rganim bayon aylasam,
Sizlarga tushimni ayon aylasam,
Qizil gul bog’idan chaman bog‘lasam,
Nigorxon bog‘innan tergil, dedilar”.71
Ushbu matnda alohida urg‘u berilgan badiiy tasviriy vositasi epic makon “shahri Lut” bo‘lsa-da, yorning turar manzili sifatida bog‘ ko‘rsatilgan. Agar diqqat bilan qaralsa, “oshiq” turkum dostonlarida oshiq-ma’shuqlarning uchrashib, bir-biriga yetishuv makonlari badiiy tasviriy vositalar sifatida asosan “bog‘” va “gulzor” tanlangan. Hatto oshiq G‘arib sevgilisi Sanamni ko‘rish uchun bog‘bonga shogird tushadi.
“G‘arib onasi, singlisi bilan xayrlashib, bir qancha yo‘l yurib, Shohsanamning bog‘iga keladi va bog‘bonning xizmatini qilib yuradi. Bahor kunlarida bog‘bon Shohsanamga guldasta olib borar edi. Bir kun tongda G‘aribjon boqqa yolg‘iz borib, ochilgan gullardan guldasta bog‘lab, g‘azal yozib, guldasta ichiga qo‘ydi. Bog‘bon G‘aribning guldastasini o‘zi bog‘lagan guldastalarga qo‘shib, Shohsanamga olib bordi. Shohsanam bog‘bonning guldastalarining ichida bir necha yaxshi bog‘langan guldastalarni ko‘rib, ularni kim bog‘laganligini so‘raydi. Bog‘bon chiroyli guldastalarni o‘zining xizmatkor yigiti bog‘laganligini aytadi. Shohsanam bir yaxshi guldastani olib ko‘rsa, ichidan xat chiqdi. Hayron bo‘lib xatni o‘qiydi.
Quloq solib eshit mening arzimni,
Zamon-zamon battar bo‘ldim dardingdan.
Nola chekdim firoqingdan, hajringdan,
Qonlar yig‘lab o’tar bo‘ldim dardingdan...
Kishi bilmas mani asli zotimni,
Sendan o‘zga hech kim bilmas dardimni,
G‘arib aytur: man kal qo‘ydim otimni,
Senga dodim aytar bo‘ldim dardingdan”.
Oshiq Mahmudning o‘z yorini bog‘da topishini homiy-erandan eshitishi, oshiq G‘aribning yor vasliga yetishishi uchun kal sifatida bog‘bonga shogird tushib, bog‘da gullar orasida Shohsanam bilan uchrashishi shunchaki tasodif emas. “Oshiq Alband” dostonida Albandni jazolash maqsadida Nazarbek uni pashshalarga yem bo‘lsin deb, Xatar terakka bog‘laganida, tongacha uni pashshalar talab, butun badani qizil qonga belanadi. Ana shunda Oshiq Alband xudoga
murojaat qiladi:
“.. Bu qonima gullar bo‘ldi rang-barang,
Qonlarga do‘libdi dog‘ bilan dolon.
Qo‘ymang bu baloda – tez ozod aylag‘il.

Har yerga borganda chekarman meynat,

Oshiqni o‘ltirur jonima minnat,
Bu kunimda ziyoda bo‘ldi mashaqqat,
Mani bu meynatdan ozod aylag‘il”
“Buzruglar hozir bo‘lib, banddan xalos etib, ilohidan libosi shohona
kiydirib: “Endi sen gullarning orasinda o‘ltirg’il, endi sani So‘najon
izlab topsin,” deb gullarning orasiga o‘tqazib g‘oyib bo‘ldilar”.
So‘najon oshiq Albandni gullar orasidan topadi. Keltirilgan misollardan shuni ko‘rishimiz mumkinki, “oshiq” turkum dostonlarida oshiq-ma’shuqlarning bog‘da uchrashuvi va birbirining vasliga yetishuvi an’anaviy holat kasb etmoqda. Ma’shuqani gul, oshiqni bulbul timsolida tasvirlash aslida xalq she’riyati uchun
xos. Bu o‘rinda bog‘ va gulzorning ramziy mazmun kasb etayotkanligini ham nazardan qochirmaslik kerak. Oshiq-ma’shuqlarning bir-biriga yetishuvida ularga hamisha homiy ruhlar rahnamo bo‘lishadi.
Ushbu holat ham oshiq, ya’ni baxshi haqidagi xalq tasavvurlari an’analariga bog‘liqdir. Chunki yuqorida ta’kidlab o‘tilganidek, baxshishoir xuddi shomondek hamisha o’z piri, homiy eranlardan quvvat olib turadi. “Oshiq” turkum dostonlarida homiy eranlarga ko‘p o‘rin ajratilishining va oshiqning o‘z ma’naviy ustozlar himoyasida tasvirlanishining zamirini ana shu dunyoqarashlar tizimi belgilaydi.
“Oshiq” turkum dostonlarda sevgi va muhabbat, ma’shuqalarining qahramonligi, kanizaklar alohida romantik ruh bilan tasvirlangan. Shohsanam oshiq G‘arib bilan birga tug‘iladi. Ular go‘dakligidan bir-biriga beshikkerti qilinadi. Shahabbos va’dasidan tongach, G‘arib bilan Shohsanam orasiga ayriliq tushadi. Lekin G‘arib Shohsanam uchun o‘zini bozorga solganda, ma’shuqa oshiqni ming tilloga sotib oladi. G‘arib kal suratida bog‘bonga shogird tushganida Shohsanam uni xati, guldastasidan tanib, o‘z bog‘ida yashirin saqlaydi. G‘arib
Shohabbos ta’qibidan qochib, Bag‘dod shahrida yetti yillik qochqinda yurganida uning izidan odam yuborib, chaqirtirib keladi. Shohsanam o‘z hayotini xavfu xatarga qo‘yib, G‘arib bilan birga o‘zga yurtlarga ketishga rozi bo‘ladi. Bir so‘z bilan aytganda Shohsanam G‘arib bilan teng darajada o‘z sevgisi uchun kurashish tasvirlarini ko‘rishimiz mumkin.
“Oshiq Mahmud” va “Oshiq Alband” dostonidagi ma’shuqalar oshiqlari ularni izlab borib, jonlarini xavf-xatarga qo‘yib, o‘zlarini tanitmaganlaricha asar voqealariga aralashmaydilar. Lekin “oshiq” turkum dostonlaridagi ma’shuqalarni yaxlitlashtiruvchi bir an’anaviy tasvir borki, bu holat “oshiq” dostonlarining barchasida mohiyatan deyarli bir xilda o’z talqinini topgan. Ya’ni, oshiqning bog‘da yoki saroyda turganligini ma’shuqaga kanizning ishqi tushib, unga o‘zining shaydoligini bildirishi va aksariyat holda oshiq-ma’shuqalarning siri fosh bo‘lishiga ana shu inkor qilingan sevgining sabab bo‘lishi.
“Oshiq G‘arib va Shohsanam” dostonida Shohsanam va G‘arib bog’da bir-birini topib, visolga yetishib, ahdu paymon qilishgan vaqtida G‘aribga shaydo bo‘lib, sevgisi rad etilgan Suvchi kaniz, rad etilgach oshiq-ma’shuqlarning bog‘da birga ekanliklarini Shohabbosga yetkazadi.
“Oshiq Alband” dostonida So‘najon oshiq Albandni gulzor ichidan topib, o‘z ko‘shkiga olib borib, to‘qqiz kecha-kunduz davron suradi. Ana shunda Albandni yoqtrib qolgan Gulzor kaniz So‘nadan Albandjonni bir kechaga so‘raydi. Rad javobini olgach, bor gapni So‘naning ota-onasiga yetkazadi. “Oshiq Mahmud” dostonida esa oshiq-ma’shuqalar sirini oshiq Mahmudning raqiblari bo‘lmish baxshilar oshkor etishadi. Oshiq-ma’shuqalarning bog‘da – gulzorda topishuvi va oshiqni avvalo kanizlardan biri ko‘rib, unga shaydo bo‘lishi motivini Go‘ro‘g‘li turkumiga mansub “Yunus pari” dostonida ham uchratamiz. “Hilola pari va G‘arib” dostonida ham Hilola parining kanizi Dastagul bog‘ga kelib, G‘aribjonga hushomad qilib murojaat qilganini ushbu she’riy parchalarda ko‘rishimiz mumkin:
Ey G‘aribjon muncha so‘zlar demagil,
Borg‘aning yaxshidur ishorat bila.
Maning bu so‘zimni hazil bilmagil,
Borganing yaxshidur siyosat bila.
Bog‘i safo aning manzil makoni,
Tamomi zarafshon ko‘shki ayvoni,
Bo‘lsang Hilolaning aziz mehmoni,
Solur yuz ming alvon qiyomat bila.
Halo yaxshi so‘zlar birla yurmasang,

Badiiy tasvir vositalari asar tilining shirali, bo‘yoqdor, rang-barang bo‘lishiga yordam beruvchi omillardandir. Bu xususiyat “oshiq” turkum dostonlarda keltirilgan misollar orqali yaqqol sezilib turibdi. Chunki, asarda tabiatdagi ixchamlik, siqiqlik ko‘chma ma’no tashuvchi badiiy tasvir vositalariga ko’proq ehtiyoj seziladi. Dostonlarning lirik liro-epik, dramatik ko‘rinishlarida badiiy tasvir vositalarning maqomi har qachongidan kuchayib borayotganiga guvoh bo’lishimiz mumkin.

Tasvir vositalarining quyuq qo‘llanishi murakkab kechinmalar tasvirini
chizishda, rangin ruhiy holatlarni siqiq va aniq ifoda etishda qo‘l keladi. Bu kabi xususiyatlar epik formulalarning an’anaviy dostonlar matnidagi bir ko‘rinish bo‘lsa, ikkinchidan, nazmiy misralarning goh boshida, goh o‘rtasida kelib doston tasvirida ifoda etilayotgan voqelikka badiiy o‘ziga xoslik bag‘ishlaydi. Bu holat baxshi xotirasida saqlangan epik formulalar yordamida epik voqelikni
shakllantiradi, jonli obraz yaratadi.

2.2. . “Oshiq turkum” dostonlarida yetakchi ramzlarning so’z ma’nosining ko’chishi

Xalqimizning ko‘hna dunyoqarashlari, badiiy tafakkur tarzining ildizlarini aks ettiruvchi mifologik obrazlar, eposdagi ramzlar talqini turli metod va nazariy qarashlar asosida tadqiq etilib kelayotganligi e’tiborga sazovordir. O‘zbek xalq dostonlarida syujetlari, yetakchi motivlari, obrazlari o‘ziga xos ravishda timsollarda idrok etilib, badiiy-estetik sathga ko‘chgan.
XX asr g‘arb adabiyoti vakillari J.Joys, M.Prust, A.Kamyu, J.Sartr, R.Muzil, G.Gesse, U.Folkner, T.Vulf, X.L.Borxes, S.Bekket kabilar tushdagi manzaralarni ramz sifatida baholash ramziy tilga asoslanligi, ularning ijodiga katta ta’sir ko‘rsatdi.
Shu sababli Ovrupa yozuvchilari orasida tushni ramzlar sifatida baholashga asos solgan Freydni o‘qimagan yozuvchi bo‘la olmaydi degan qarashi mavjud. Bu qarashlar “Tush ta’birlari” kitobi bosilib chiqqandan so‘ng vujudga keldi, adabiyotda aynan shu kitobning ta’siri bilan syurealizm, shuur oqimi kabi adabiy oqimlar shakllana boshladi. Freyd tushni inson ruhiyatining ko‘z bilan ko‘rib, eshitib bo‘lmaydigan tomonni aks ettiruvchi ko‘zgu sifatida sharhlangan edi.Fromm esa bironta ham ta`birlanmaydigan tush bo‘lmaydi, har qanday arzimas tushda ham inson kayfiyati va kechinmasining qaysidir deb aytgan edi. Tushni ramz sifatida o‘rganish yozuvchilarga hayotdagi voqea-hodisalarni ham ramz sifatida talqin etish imkoniyatini kengaytirdi, deb ta’kidlaydi professor J.Eshonqulov.

San’at va mifning tili bitta - ramzlarga asoslanadi, deb yozadi J.Eshonqulov, hamda har ikkalasini ham ramzlarni sharhlab o‘rganish mumkinligini aytadi, o‘z “O‘zbek folklorida tush va uning badiiy talqini” kitobida.

K .Yung miflarni tahlil qilishda ko‘proq ommaviy ong osti hislarga e’tibor beradi. Uning fikricha, ommaviy ong osti hislari miflar yaratilyotganda asosiy o‘rin egallagan. Bu ong ostida hislari miflarga ramz, timsol, surat sifatida
ko‘chib o‘tadi, to‘g‘rirog‘i, tashqi dunyoni ramzlari bilan qabul qiladi.
Tush va mifni o‘rganuvchi, sharhlovchi tilni E.Fromm “ramzlar tili” deb ataydi85 va bu atama hozir jahon falsafa va folklorshunosligida ko‘p takrorlanadigan atamaga aylandi. Bu barcha fikr-mulohazalarni ta’kidlashimizdan maqsad, biz
ham “Oshiq” turkum dotonlarida ramzlarni qanchalik muhim ahamiyatga ega ekanligini, ular dostonning mazmun-mohiyatini qanchalik darajada ko’rsatib berishi haqida alohida to‘xtalib o‘tmoqchimiz. Aytishimiz joizki, “oshiq” turkum dostonlardagi ramzlarni anglamay turib, asarning g‘ oyaviy-mazmuniy mohiyatini
anglab yetishimiz qiyin kechadi. Yetakchi motivlar hamda ramzlar bir-biriga chambarchas bog‘liq. Asosan, bu turkumda ramzlar takrorlanib kelib, asar syujeti hamda badiiy tasviri vositalari juda bir-biriga o‘xshash tomonlari ko‘ p. Masalan,
homiy ruhlar, ilohiy tug‘ilish, olma, sharob kabilardir.

Xorazm dostonlarida ramzlar turli xil epik bayon etilgan. Bu asarning o‘ziga xos ko’rinishdagi badiiy shakllarini tarixiy- genetik nuqtai nazardan o’rganish Xorazm dostonlarining mifologiya bilan uzviy aloqadorligini ko‘rsatuvchi ko‘plab ilmiy dalillarni beradi. Xorazm dostonlari silsilasida alohida o‘rin tutuvchi “oshiq” turkum dostonlaridagi yetakchi ramzlarning tub mohiyati fikr yurutishda ushbu ramzlarni umumxorazm epik an’analar ko‘lamida olib mulohaza yuritish talab etiladi. Ana shunda “oshiq” turkum dostonlarida ramzlarning qaysi ko‘rinishi qo‘llanib, o‘z badiiy talqinini olganligining sabab va oqibatlari haqida to‘la tasavvur hosil etish va ilmiy baholash imkoni paydo bo‘ladi. Shu sababli ham biz

ramzlarni talqin etishda nafaqat “oshiq” turkum dostonlari, balki qator dostonlar bilan ham o‘zaro qiyos qilgan holda olib talqin etishni maqsadga muvofiq deb bildik. Bu o‘rinda ramzlarni talqinini batafsil tahlil qilamiz.
Eposdagi eng yetakchi bo‘lgan ramzlardan biri ilohiy kuchlar yohud ilohiy ruhlar, ya‘ni badiiy talqinda Xazrat Ali, Xizr, pirlar, nuroniy chol kabi turli xil nomlar bilan asarda homiy kuchlar motivida kelgan. Nafaqat “oshiq” turkum dostonlarida, balki o‘zbek folkloridagi epik asarlarning barcha janrlarida, turlarida qahramonga homiylarning g‘ayritabiiy ko‘mak va yordam berishini kuzatamiz. Odatda, homiylar qahramon hayotining barcha bosqichlarida, turli shakllarda
yordam beradi va ko‘pchilik holatlarda homiylar bajargan ishlar qahramon tomonidan bajarildi deb ham qabul qilinadi.
Qahramonning tug‘ilishi, uning tarbiya topishi, o‘z oldida turgan vazifalarni bajarishda doimo homiy kuchlar yordam beradi. Umuman olganda, hayoti davomida insonni hamisha qo‘llab-quvvatlovchi ilohiy ruhlar, ilohiy kuchlar homiy deb yurutiladi. Xususan, bu qarashlar esa shu olamda odam ko‘ziga har doim ham ko‘rinavermaydigan, lekin zarur paytda yordamga hozir ilohiy kuchlar borligiga ishonch natijasida vujudga kelgan. Aynan shu qarashlar esa diniy-e’tiqodiy dunyoqarashning eng qadimiy shakllardan biri shomonizmga
hosdir. Bizning xalqimiz orasida shomonizm qadim-qadimdan yashab kelayotganligi ilmiy adabiyotlarda isbot etilgan.
Shomonlarning homiy kuchlari va yordamlari turli toifada va turli xarakterda bo‘lganidek, epik asarlarda keluvchi homiy kuchlar ham turlicha. Binobarin, “oshiq” turkum dostonlaridagi homiy kuchlar haqida o‘z fikr-mulohazlarimizni
bildiramiz. “Oshiq” turkum dostonlaridagi homiy kuchlarning faoliyati
va ularning epik qahramon taqdiridagi o‘rni bevosita bu turkum dostonlarining shomonistik dunyoqarashlar hamda qadimiymifologik tasavvurlarga bo‘liq holda shakllanganligini bildirib, ularning o‘ziga xos bir turkum obrazlarga ega ekanligini
ko‘rsatadi. Oshiq dostonlaridagi homiy kuchlar obrazlarini yaqinroq o‘rganib chiqilsa, bari obrazlar mifologik dunyoqarashning turli bosqichlari bilan bog‘liq tarzda vujudga kelishi ham ma’lum bo’ladi. Ya’ni, manistik tasavvurlar asosida
dunyoga kelgan homiy kuchlar, animistik tasavvurlarga aloqador homiylar. Homiy kuchlarning bevosita badiiy matndagi tasviri har doim ham bir xil tarzda, ma’lum qolip hamda andozalarga qat’iy qoidalar asosida kelmaydi.
Doston janrlarining shakllanishi va rivojlanishida manistik mifologiyaning ahamiyati juda kattadir. Ayrim manbalarda qayd qilinishicha, ushbu toifa miflar mifologiyaning eng quyi bosqichlaridayoq paydo bo‘lgan. Shuni ta’kidlash kerakki, manistik miflar ajdodlar homiyligi, afsonaviy, tarixiy qahramonlar haqida
izohlaydi. Mifshunos olim Yan Parandovskiyning ta’kidlashicha, miflarda
tasvirlanuvchi qahramonlar juda qadimiy bo‘lib, ularning dastlabkilari
“O‘z vatandoshlariga xizmat qilib, alohida hurmat qozongan
buyuk kishilar: urug‘, qabila boshliqlari, qonunshunoslar, mashhur
jangchilar, ruhoniy-kohinlar, payg‘ambarlar, buyuk shoirlar bo‘lib,
ular vafot etganlaridan keyin xalq orasida qahramonga aylanib, ularga sig‘inish boshlangan ” .
Mana shu turli toifadagi buyuk shaxslar ibtidoiy inson tasavvurida karomatli shaxslar sifatida namoyon bo‘lgan va ular ruhiga sig‘inish odati yuzaga kelgan. Bora-bora bular homiy sifatida tan olinib, manistik mifologiya qahramonlari
timsolini egallaganlar. “Oshiq” turkum dostonlarida manistik mifologiyaga oid
lavhalarni ko‘p uchratamiz. Xorazm dostonlarida animistik miflarga qaraganda manistik mifologiyaga oid lavhalar kengroq o‘rinni egallagan.
Shulardan, “Oshiq Mahmud” dostonidagi Shohimardon pirni manistik homiy kuchlardan biri desak mubolag‘a bo‘lmaydi. Ushbu dostonda Ganja Qoraxon “Shohimardon pirning qabriga borib, qirq kecha, qirq kunduz yastanib yotadi”.
Shohimardon pir uning tushida “nuroniy bir chol” sifatida kirib, unga o‘g‘il ato etganligini bayon etadi. Shohimardon pirning sharofati bilan Mahmudjon dunyoga keladi. Oshiq Mahmudning tushiga ham “bir nuroniy pir kishi”
kirib, Nigorxonni unga atalganidan xabar beradi. Nigorxonning tushiga ham “bir nuroniy pir odam kirib”, Mahmudjonni unga ko‘rsatib, g‘oyibona nikoh qiladi.
Ganjaxon bilan bog‘liq epizodda pirning nomi Shohimardon, deb aniq aytilib, uning bir nuroniy chol ekanligi tasvirlanadi. Lekin Mahmudjon va Nigorxonlar tushiga kirgan pirning nomi dostonda aniq aytilmagan. Shunday bo‘lsada, homiy pirning sifatidan uning Shohimardon pir ekanligini anglash qiyin emas. Ayni paytda, Oshiq Mahmud tushida Qambarjonni unga do‘st deb tanitgan pirning nomi
Qambarjon ko‘rgan tushda Hazrat Ali sifatida aytiladi. Qambarjonning uyqusida Hazrat Ali tushiga kiradi. Unga uch kosa sharob ichirdi.
- O‘g‘lim Qambarjon! Mahmudjon do‘sting bilan birga ketgil albatta maqsadinga yetasan, - deb og‘ziga tuflab, orqasiga shappot urib, ko’zdan g‘oyib bo‘ldi”.
Shohimardon pir va hazrat Alini bir yaxlit obraz sifatida tasvirlash va anglash nafaqat “Oshiq Mahmud” dostoni, balki boshqa folklor namunalari va xalq tasavvurlarida ham keng uchraydi. Barcha fikrlarimiz dalili sifatida Farg‘ona
vodiysidagi eng katta qadamjo Shohimardon va Nurota yaqinidagi ayni shu nom bilan yuritiluvchi aziz joylar ham hazrati Ali nomi va qabri bilan el orasida shuhrat
topganligini keltirishimiz mumkin.
Xorazm dostonlarida hazrat Alining mushkul ahvolda qolgan qahramonlarga homiy sifatida yordam bergan holatlari ko‘p uchraydi.
“Oshiq G‘arib va Shohsanam” dostonida asar bosh qahramoni G‘arib musofirlik chekib, sargardon yurgan paytida yori Shohsanamning Shohvalad podshohga to‘y bo‘ layotganini eshitadi va o‘z eliga yetish uchun yo‘lga tushadi.
“Shu kelishida bir otliq yo‘ liqadi. U: “Ey yigit, otning orqasiga min”, dedi. G‘arib sakrab mindi, ko‘zingni yum, dedi, yumdi. Ko‘zingni och , deganda qarasa, o’z elining bir chekkasiga kelgan ekan”. Hazrat Alining homiy sifatida ko’rinishi “Asil va Karam” hamda “Gulqand” dostonlarida ham uchratishimiz
mumkin. Hazrat Ali aksariyat hollarda qora to’nli, qora otli kishi tarzida tasvirlanadi. Homiylik qilganda ham, asosan, chavandoz qiyofasida faoliyat ko‘rsatadi.
Yuqoridagi fikrlardan kelib chiqib, Ali obrazi Islom dini Markaziy Osiyoga yoyilganidan keyin folklor asarlari tarkibiga kirganligini ko‘rishimiz mumkin.
Elshunos olim G.P.Snesarevning ta’kidlashicha, Ali obrazi Markaziy Osiyo xalqlari ijodida juda mashhur bo‘lsa-da, Xorazmda nisbatan kamroq ko‘ zga tashlanadi. Qolaversa, Alining afsonaviy obrazi zaminida Xorazmda
mashhur bo’lgan qadimiy obraz, chavandozlar piri Siyovush faoliyati yotadi94. Keyingi davrlarda Siyovush obrazi bilan bog‘liq ko‘p voqealar Ali obraziga
ko‘chirilganligiga shubha qilmasa ham bo‘ladi. Chunki, qadim Xorazm mifologiyasi bilan aloqador bo‘lgan anchagina motivlar so‘ngi davrlarda boshqa shaxslar faoliyati bilan bog‘liq holda o‘zgarishga uchragan. Zardushtiylik dinining
asoschisi Zardusht bilan bog‘liq voqealarning Sulton Uvays faoliyatiga ko‘chishi ham ayrim manbalarda qayd qilingan.
Shuni bilishimiz joizki, Xorazmda tarqalgan arxaik mifologiya davrlar o‘tishi bilan turli o‘zgarishlarni boshidan kechirgan. Zardushtiylikning muqaddas kitobida berilgan ayrim syujetlar ham Islom dini paydo bo‘lganidan keyin uning
targ‘ibotchilari bo‘lgan ayrim tarixiy shaxslarning badiiy obrazlariga ko‘chgan.
Hazrati Alining Xorazm dostonlaridagi homiy obrazlar darajasiga ko‘tarilishini ham shu nuqtai nazardan izohlash lozim bo‘ladi. Endi bevosita Shohimardon pir obraziga keladigan bo‘lsak mardonlar piri bo‘lmish bu obraz ham
bevosita Siyovush obrazi bilan ham aloqador bo‘lishi ehtimoldan uzoq emas.
“Oshiq” turkum dostonlari orasida homiylik tizimi mukammal darajada ko‘zga tashlanuvchi asar “Oshiq Alband” dostonidir. Doston bevosita Oshiq Alband hayoti va tarjimai holi bilan emas, uning piri, ustozi Oshiq Oydin bilan
bog‘liq epizod orqali boshlanadi:
“.... Ammo roviylar andoq rivoyat qiladirlarkim, Bo‘ston shahrida Oshiq Oydin degan bir pir bor edi. Do‘kon qurub po‘lotdan otash pishirib, uch yuz oltmish shogird hizmatida edi...”.
Butun doston davomida Oshiq Oydin shogirdi Oshiq Albandga homiylik qiladi. Chunki u Oshiq Albandni safarga kuzatar ekan: “Sen ham har yerda bo‘lsang, biz xabardormiz”, - deb fotiha beradi. Ma’lumki, Oshiq Oydin Muhammad payg‘ambarning ruhiy himoyasida turadi, o‘z navbatida, Oshiq Alband Oshiq Oydinning homiyligida harakat qiladi, deb aytilmoqda.
Binobarin, Oshiq Oydin obrazi haqida to‘xtaladigan bo‘lsak, Oshiq Oydin homiy sifatida Xorazm dostonlarida ham uchraydi. Misol tariqasida, “Go‘ro‘g‘li” turkum dostonining
“Xirmondali” shaxobchasida Oshiq Oydinning yorqin obrazi chizib berilgan. Bundan tashqari, Oshiq Oydin timsolini yana “Oshiq Alband”, “Oshiq Najab” dostonida ham uchratamiz. Xorazm dostonlarida Oshiq Oydin oshiqlarning
piri, soz va so‘z ustasi sifatida ta’rif etiladi. Uning obrazi mifologik tasvirdan muayyan darajada badiiy obraz tomon siljilgan. Ammo uning faoliyatida mifologik
xususiyatlar saqlanib qolgan.
“Oshiq Alband” dostonida homiy kuchlarning yana asar voqealar davomida ikkinchi jihatidan qahramon qiyin ahvolda qolgan vaqtda unga yordam beruvchi ilohiy kuch sifatida turli xil ko‘rinishlarda kelgan. Ya’ni, Oshiq Albandga So‘na kelin xabarini aytuvchilar: dostonda “pirlar kelib aytadilar”98 deyilgan. Homiy kuch bir kishi emas, ko‘pchilik deb aytilmoqda. Odatda, ko‘pchilik sifatida
keluvchi homiy kuchlar chiltonlar hisoblanadi. Shu jihatdan Alpomishning tushi va Go‘ro‘g‘lining homiylarini eslash kifoya bo‘ladi.
Yana “Oshiq Alband” dostonidan quyidagi keltirilgan parchalarda: Albandning yo‘lida bir buloq chiqdi. Unda qizil suv bordir. Bir bo‘lak kiyik buloqdan suv ichmoqqa keldi. Alband irim qilib: “Agar so‘zim bovar bo‘lsa,
So‘najonni olurman, bovar bo’lmasa, olmoq yo‘q deb”, - bulardan so‘radi. Bu kiyik suvratidagi buzruglar edilar. Ular Albandjonni sinash maqsadida kiyik suvratida ko‘ringan edilar. Ular Albandjonga dalda berib yo‘lga
solishdi.
Ushbu parchalarda buzruglar tasviri bayon qilinadi. Yana Albandjonnig yo‘lida ikki devona osmondan tushishi, Tabrizga yetib kelganida sarhovuz bo‘yida bir boboga yo‘ liqishi, Oshiq Alband bandi bo‘lgan vaqti buzruklar kelib, banddan ozod qilib, ilohidan libosi shohi kiyidirishi, So‘najonning tushiga pirlar kirib: “O’n besh yillik yo’ldan Albandjon sani, deb kelib, bog‘da peshada yotibdi, nechun undan xabar olmaysan”100 deb aytib ketishilari barchasi ilohiy, ya’ni homiy kuchlar tasvirlanganini ko‘rishimiz mumkin.

Keltirilgan ma’lumotlardan shuni bilishimiz joizki, Oshiq Alband va So‘najonga homiylik qiluvchi kuchlar sifatida bir necha guruh kuchlar tilga olinmoqda. Ya’ni, Oshiq Oydin, mo‘ysafid bobo, kiyik suratida kelgan buzruglar,

osmondan kelgan ikki devona, bir bobo, pirlar. Bulardan ma’lum bo‘lmoqdaki, mo‘ysafid bobo, bir bobo qiyofasidagi obrazlar Oshiq Oydin ekanligi bevosita homiy kuchning:
“Senga fotiha bergan xalifa piringman”, - degan e’tirofdan bilishimiz mumkin. Demak, Oshiq Oydin obrazi dostonda xuddi Hizrdek o‘z suratida namoyon bo‘la olish qudratiga ega deb tasavvur etigan ulkan imkoniyatli homiy sifatida tasvirlanmoqda. Kiyik suratida kelgan buzruglar, osmondan
kelgan ikki devona, pirlarni ham u o‘z shogirdiga jo‘natgan deb asos beradi. Ushbu homiylik tizimi esa bevosita animistik dunyoqarashga asoslangan shomonlik tasavvurlariga mos keladi.
Oshiq Oydin obrazi bevosita manistik tasavvurlar bilan bog‘liq bo‘lsa-da, bevosita animistik tasavvurlarga xos xususiyatlarni ham o‘zida etuvchi boshqa homiy kuchlarni o‘zida ifodalashi ham bu obrazga berilgan sifat va xususiyatlarni aniq bildirib turipdi.
Xorazm folklori “oshiq” turkum dostonlarida homiy sifatida keluvchi obrazlardan biri Xizrdir. Atoqli folklorshunos olimlar M.Jo‘rayev va Sh.Shomusarov o‘zlarining “O‘zbek mifologiyasi va arab folklori” deb nomlanuvchi kitobida Xizr obraziga alohida qism ajratishgan va ular shunday
yozishadi: “Turkiy xalqlar folklorida epik qahramonning homiy sifatida talqin qilinuvchi mifologik personajlardan biri Xizr bo‘lib, u xalq qarashlariga ko‘ra, ajdodlar ruhining epik timsoli, mushkul ahvolda qolganlarga madad qo‘lini
cho’zadigan afsonaviy homiy, donishmand oqsoqol, obi hayot
chashmasining sohibi hisoblanadi”.
Tadqiqotchilar Xizr obraziga xos xususiyatlarni maxsus yetti qismga ajratib ko‘rsatishgan va bevosita Xizr obrazining paydo bo‘lishiga ajdodlar kultiga sig‘inishi bilan aloqador e‘tiqodiy qarashlar asos bo‘lgan, degan xulosaga kelishgan. “Oshiq Alband” dostonida Albandjon ma’shuqasi So’na kelinni izlab yo‘lga chiqar ekan baxshi oshiq tilidan shunday deydi: “Madad bergan yo‘lda Xizr bobo”. Doston voqealari tizimining navbatdagi bosqichida chindan ham Oshiq
Alband ikki qiz qutqusidan “Bir bobo mo‘ysafid” qutqaradi. Dastavval, Oshiq Albandning cho‘lda “Xizr bobo madad bergay” deyishi bejiz emas. M.Jo’rayev hamda Sh.Shomusarovlar Xizrga xos jihatlardan birini “Xizr cho‘l va sahrolarda g‘oyibdan paydo bo‘lib, qiyin ahvolda qolgan kishilarga ko‘mak beruvchi ezgulik timsoli”, deb ko‘rsatishgan.
Folklorshunos J.Eshonqulov dostondagi homiy ruhlarni shunday ta’riflaydi: “Dostonlardagi, jumladan, “Alpomish”dagi tushlarda homiy ruhlar sifatida Muhammad payg’ambar, Hazrati Ali, avliyo-anbiyolar, homiy eranlarning ramzlar
orqali berilishi islomiy qatlam bo‘lib, ” deb, shu fikr yakunida “dostonlarda u yetuk tipik obraz darajasiga ko‘tarilgan” deya yozadi o‘z kitobida.


Xulosa

Ushbu kurs ishimizda Xorazm “oshiq” turkum dostonlarining o‘ziga xos xususiyatlarini aniqlab, bu tip dostonlar syujeti va yetakchi motivlarning mifologik asoslarini tahlil qilish natijasida quyidagi xulosalarga keldik:

- “Oshiq” turkum dostonlarining alohida mustaqil epik asarlar silsilasi sifatida asosiy tayanch belgisi ularda tasvirlangan bosh qahramonnig oshiq-baxshi ekanligidir. Yetakchi personajning baxshi (oshiq)ligi “oshiq” turkum dostonlariga xos qahramon tipining yetakchi xususiyati bo‘lishi bilan bir qatorda, uning
o‘z ma’shuqasi vasliga yetishi va bu yo‘ldagi to‘siq hamda sinovlardan o‘tishida ham ana shu xususiyat, ya’ni soz chalib qo‘shiq ayta bilishi asosiy vosita bo‘lib hizmat qiladi. Ayni holatni “Oshiq G‘arib va Shohsanam”, “Oshiq Alband”, “Oshiq Najab”, “Oshiq Mahmud”, “Hiloli pari va G’arib” dostonlarida
yaqqol ko‘ramiz.
- “Oshiq” turkum dostonlarining o‘ziga xos xususiyatlaridan yana biri qahramon ham oshiq, ham baxshi, ham shoir sifatida tasvirlanishi bo’lib, bu tip dostonlar syujetiga asos bo‘lgan epik voqealar talqinida qahramonnig ishqiy sarguzashtlari
yetakchi o‘rin tutadi. Boshqa tip dostonlardan farqli o‘laroq, “oshiq” turkumi dostonlarida turli xil jang-u jadallar, kurashli olushuvlar, personajlarning o‘zaro jismoniy bellashuvlari, sinovto‘siqlarni jang va jismoniy kuch yordamida hal qilish
an’anasi uchramaydi.
-“Oshiq” turkum dostonlarida tasvirlangan ishiqy-sarguzashtlar nafaqat asar qahramoni bo‘lgan oshiqning, ayni paytda, balki baxshi-shoirning ruhiy olamida ro‘y bergan kechinmalardan ham iborat bo‘ladi. Qahramonning turli sinov va to‘siqlardan o‘tishi, o‘zaro bellashuvlari ham baxshi-shoirning so‘z va sozi bilan
bog‘liq holatda ro‘yobga chiqadi. Oshiq baxshining ruhiy komoloti timsolida o‘z yechimini topadi.
-“Oshiq” turkum dostonlarining shakllanishi qahramonlik eposida ancha keyin yuzaga kelgan. Ushbu tipdagi dostonlar jamiyat taraqqiyotining keyingi bosqichlarida paydo bo‘lganligiga qaramasdan, o‘z tarkibiga qahramonlik eposiga qaraganda mifologik xususiyatlarni ko‘proq qamrab olgan. Bu, albatta, “oshiq” turkumi dostonlarining o‘ziga xos xususiyatlari bilan aloqadordir. Shu sababdan, Xorazmda tarqalgan romanik epos namunalari tarkibida ko‘plab mifologik obraz, motiv va detallarni ko‘rish mumkin. Ular turli badiiy usullar orqali doston tarkibidan o‘rin olgan va asarning kompozitsion qurilishida muhim ahamiyatga ega.
- Dostonlarda qahramonlar portretini chizishda mifologik tasvirlarga murojaat etish an’anasi, tabiat va tevarak-atrof manzaralarini berishda g‘ayritabiiy tasvirga moyillik, ayniqsa ko‘proq ko‘zga tashlanadi.
-“Oshiq” turkum dostonlari turkiy xalqlar folkloridagi barcha qiyosiy-tipologik jihatdan ko‘tildi, bu esa “oshiq” turkumi dostonlarining genetik asoslari, epik an’anada tutgan o‘rni, syujet tiplari va yetakchi motivlar tarkibining poetik vazifalari o‘rganildi.
-Xorazm “oshiq” turkumi dostonlarini tahlil qilish shuni ko‘rsatadiki, ularning syujet tarkibidagi voqealar negizida mifologiyaning deyarli barcha ko‘rinishlari mavjud. Shulardan biri animistik mifologiya bo‘lib, unda tabiat hodisalari sehrli
kuchlarga bog‘liq holda tasavvur etiladi.