Mavzu: Boshlang’ich ta’limda yaratilgan alifbening qiyosiy tanqidiy tahlili Reja: Kirish

Savod o’rgatish metodikasining ilmiy, psixologik va lingvistik asoslari

O’qish va yozish nutq faoliyatining turi. Maktabda o’qitish elementar o’qish va yozishga o’rgatishdan boshlanadi. “Alifbe”ga asoslangan holda qisqa vaqt ichida o’quvchilar o’qish va yozishga o’rgatiladi, ya’ni o’qish va yozish ko’nikmasini egallaydilar.

Savod o’rgatish davrida o’qish va yozish harakatini maqsadga muvofiq ravishda bajara olish o’qish va yozish ko’nikmasi deyiladi. Bu ko’nikma bilimni talab qiladi, chunki har qanday ko’nikma bilimsiz shakllanmaydi. Bilim ko’nikmaga aylanmagan bo’lishi mumkin. Masalan, bola v harfining elementlarini, yozuv chiziqlari orasiga qanday joylashtirilishini bilib, uni daftarda yoza olmasligi yoki o’quvchi harflarni tanib, ularni o’qiy olmasligi mumkin. Yozish ko’nikmasini hosil qilish uchun boshqa faoliyat turlari, ya’ni yozish jarayonida partada to’g’ri o’tirish, ruchkani barmoqlar orasida tutish, daftarni qiyalikda qo’yish kabilar ham o’rgatiladi.

O’qish va yozish ko’nikmasi takomillashtirila borib, malakaga aylantiriladi. Malakaning shakllanishi uchun bir faoliyat bir necha bora takrorlanishi lozim. Yozish malakasida o’quvchi ruchkani qanday ushlash, qanday yurgizish haqida o’ylab o’tirmay, so’z va gaplarni yoza boshlaydi. Demak, o’qish va yozish malakasi harakatning o’ylab o’tirmay amalga oshirilish jarayonidir. Malaka o’qitishning keyingi bosqichlarida mustahkamlanib, avtomatlashish darajasiga yetkaziladi.

O’qish va yozish malakasi biri ikkinchisining muvaffaqiyatli amalga oshuvini ta’minlaydi. SHuning uchun ham o’qishga o’rgatish bilan yozuvga o’rgatish parallel olib boriladi va bu faoliyat muntazam ravishda mashq qildiriladi. SHunday ekan, savod o’rgatish jarayonida bola juda ko’p o’qishi va yozishi zarur.

O’zbek tili yozuvi tovush yozuvi, ya’ni fonematik yozuvdir. Har bir tovush uchun, har bir fonema uchun maxsus grafik shakl (harf) olingan. O’qishda grafik shakllar tovushga aylantirilsa, yozuvda aksincha, tovushlar harflarga aylantiriladi.
Analitik-sintetik tovush metodida savod o’rgatish jarayoni 4 oy davom etadi. Bu jarayon 2 davrga bo’linadi:

a) alifbegacha tayyorgarlik davri (2 hafta)

b) alifbo (asosiy) davr 31 dekabrgacha davom etadi. (120 soat 60 soat o’qish, 60 soat yozuv darsi)

Alifbogacha tayyorgarlik davri 2 bosqichga bo’linadi:

a) tovush-harf yozilmaydigan bosqich (2 hafta) o’qish darsi (8 soat)

b) harf yozilmaydigan bosqich (2 hafta) yozuv darsi (8 soat)

Savod o’rgatish jarayonidagi darslar faniga ko’ra ikki turli:

A) “Alifbe” darsligi asosidagi o’qish darslari

B) “YOzuv daftari” asosidagi yozuv darslari

1-bosqichning asosiy vazifasi o’quvchilarni maktab, sinf bilan tartib-intizom qoidalari bilan tanishtirish. Ularga nutq, og’zaki va yozma nutq haqida gap, nutqning gaplardan tuzilishi, so’z, gaplarning so’zlardan tuzilishi; bo’g’in, so’zlarning bo’g’inlardan tuzilishi, so’zlarning bo’g’inlarga bo’linishi; tovush, bo’g’inlarning tovushlardan tuzilishini; tovushlarning unli tovush va undosh tovushlarga ajratilishini o’rgatish, ulardan amaliy foydalana bilish ko’nikmalari hosil qilishdan iborat. Bu davrda maxsus nusxalar asosida o’quvchilarning bog’lanishli nutqi ustida ishlanadi. Ularga “Alifbe”da berilgan rasmlar asosida hikoyalar tuzdirishdan tashqari, o’zlari bilan she’r,ertak, hikoya, tez aytish, maqol, topishmoq, xalq ashulalari, alla, qo’shiqlar, latifalardan ayttirish lozim.

Tayanch so’zlar asosida gap tuzdirish, “Alifbe”sahifalaridagi so’zlar, ularning ma’nolari ustida ishlash kabi ishlar uyushtiriladi. (Bu tarzdagi ishlar har bir darsda mavzularga bog’liq ravishda izchil davom ettirib boriladi)

Bu bosqichdagi yozuv darslarida o’quvchilarga daftar bilan, yozuv chiziqlari bilan tanishtirish, harf elementlarini yozishga o’rgatish, namunaga qarab grafik xatolarini aniqlash – o’z-o’zini tekshirish, harf oralarining tengligiga rioya qilish kabi ko’nikmalar hosil qilinadi.

2-bosqichda harf elementlarini yozishga o’rgatiladi.

SHuningdek, bu bosqichda tovush bilan harfni farqlashga o’rgatish ko’zda tutiladi. Bu bosqichdayoq tovush va harf o’rtasidagi chegaraga qat’iy rioya qilinadi. Bolalarga tovush haqida ma’lumot kitob ochirilmay beriladi. Tovushni ifodalovchi harf ko’rsatilgach, harf ustida ishlanadi. Tovush va harfga oid xususiyatlar (tovushlarni talaffuz qilamiz, eshitamiz, harflarni yozamiz, ko’ramiz, o’qiymiz) ham izchil ravishda o’quvchilarni o’zlashtirishlarini hisobga olgan holda ochila boriladi.

Alifbo davri. Bu davr 31 dekabrgacha davom etadi. Unda asosan o’quvchilar unli, undosh tovush va unli, undosh harflar bilan tanishtiriladi. Unli va undoshlar osondan qiyinga tamoyili asosida joylashtiriladi. A, o, i unlilari, undoshlar oldin sonor tovushlar (n, m, l) e, o’, u unlilari keyin esa b, k, d, t, s kabi undoshlar so’ngroq ikki tovushni ifodalaydigan j, harf birikmalarini (ng, ch, sh), tovush bildirmaydigan harf – tutuq belgisi bilan tanishtiriladi. Tovush va harfni yaxshi tanishlari, elementar o’qishni muvaffaqiyatli egallashlari uchun bo’g’inga bo’lish, bo’g’in chegarasini aniqlash, bo’g’indan tovushni ajratish, tovush va harf munosabatini aniqlash, kesma harflardan bo’g’in tuzish va o’qish, bo’g’in-tovush, tovush-harf, tahlili kabi mashqlardan foydalaniladi.

Bu davrda bo’g’inlab o’qish asosan shakllantiriladi: ikki harf yopiq, ikki harfli ochiq, uch harfli yopiq bo’g’inlar (il, ol, la, lo, nom, lim) o’qishga o’rgatiladi.

Alifbo davrini o’rganiladigan tovush-harfning murakkablini hisobga olib 3 bosqichga ajratish mumkin;

1-bosqichda o-na, a-na, il, in, bi-lan, tuzilishidagi so’zlar;

2-bosqichda echki, un, o’n kabi artikulyasiyasi qiyin bo’lgan r, q, v, f kabi undoshlar va yo’lbars, do’st, rasm kabi tuzilishidagi so’zlar;

3-bosqichda harf birinmalari ng, ch, sh 2 tovushni ifodalaydigan j, tutuq belgisi va jurnal, jirafa, tong, so’ng, bodring, choynak, shudring kabi so’zlar o’qishga o’rgatiladi.

Alifbe davrining oxirida o’quvchilar quyidagi bilim va ko’nimalarga ega bo’lishlari zarur:

f) hamma tovushlarni tanishi va har qanday holatda to’g’ri talaffuz qilishi;

b) so’zni bo’g’in, tovush, tovush-harf tahlilini bilishi so’zdagi tovushlarning izchil tartibini aniqlay olishi, kerakli tovushni so’z va bo’g’inga ajrata olishi;

v) kesma harf va bo’g’inlardan so’z tuza olishi va o’qishi;

g) 2-3-4 bo’g’inli so’zlarni bo’g’inlab o’qishi, adabiy-orfoepik talaffuz bilan o’qishi;

d) gaplarni ohangiga rioya qilib o’qishi;

e) o’qigan matnining mazmunini tushunib, ongli o’qishi;

j) o’qigan matn mazmunini savollar asosida soddagina qilib qayta hikoyalab berishi;

z) o’qigan matniga sarlavha topishi;

i) to’g’ri, tez, ongli va ifodali o’qish malakalari shakllantirilishi.

Alifbo davri yozuv darslarining vazifasi – kichik va bosh yozma harflarni to’g’ri shakllantirish, harflarni to’g’ri ulash, alifbeda o’qilgan bo’g’in, so’z va gaplarni namunaga qarab yozish, harf, bo’g’in, so’z, gap diktantlarni yozish ko’nikmasini shakllantirish, izohli, saylanma, ko’ruv, ta’limiy, diktant yoza olishlariga erishish, umuman grafik malakani shakllantirish. Savod o’rgatish jarayonining oxirida bir darsda, agar darsning 3\2 qismi yozuvga ajratilsa, 20 tagacha so’z yoza olishlari talab qilinadi.

Ma’lumki, 1-sinfga o’quvchilar har xil tayyorgarlik bilan keladi. O’quv materiallari 1-sinf o’quvchilari saviyasiga mos, izchil ravishda beriladi. SHunga qaramay, har xil tayyorgarlik bilan kelgan o’quvchilarning uni o’zlashtirishlari turlicha bo’ladi. Bu savod o’rgatish jarayonida o’quvchilarga differensial va individual yondashishni taqozo etadi. Bunday yondashish ta’limning barcha bosqichlarida ham yaxshi natija beradi.

Differensial yondashishda o’quvchilar guruhlarga bo’linadi, har bir guruhning saviyasiga va imkoniyatiga mos topshiriqlar beriladi. Sinf o’quvchilari 3 guruhga bo’linishi mumkin. Topshiriqlar ham 3 variantda ishlab chiqiladi.

O’qituvchi sinfda frontal ishlash jarayonida 3 guruhdagi o’quvchilar bilan parallel ish olib boradi. 3 guruh uchun ham o’quv materiali qo’shimcha alifbe hisoblanadi, unga qo’shimcha alifbe uchun qo’shimcha tarqatma materiallardan, jadvallardan mustaqil ishlardan foydalaniladi.

Alifbedagi o’quv materiali yoki o’qilayotgan matnning qiyin o’rni oldin tayyorligi puxta o’quvchiga, so’ng bo’sh o’quvchiga o’qitiladi. Ba’zi o’quvchilar bilan darsdan tashqari vaqtda yakka tartibda ishlar olib borishga ham to’g’ri keladi.

YAngi material o’rganiladigan o’qish darsida ishning asosiy turlari: o’rganiladigan yangi tovushni so’zni (shu tovush so’z boshida, o’rtasida, oxirida kelgan so’zni) bo’g’in-tovush tomonidan tahlil qilish bilan ajratish. YAngi tovush ajratiladigan so’zni o’quvchilar rasm asosida o’zlari tuzgan gaplari ichidan oladilar. Tovushni ajratishda shu so’zning sxemasi – modeliga asoslanadilar. Masalan, archa. Tovushlarni eshitish, talaffuz qilish, artikulyasiyasi (nutq organlarining tovush chiqarishdagi ishi) mashq qilinadi.

Kichik va bosh harflar bilan tanishtiriladi. Bo’g’inlar o’qitiladi.

So’zlarni avval doskada, keyin “Alifbe”dan o’qish. Harf, bo’g’inlardan harf terish kartonida so’z, so’z birikmasi, gap tuzish (o’qish), so’z ma’nosi ustida ishlash.

Matnni o’qish va tahlil qilish, uni qayta o’qish, rasmni matnga bog’liqligini belgilash.

Nutq o’stirish: lug’atni boyitish, so’z birikmasi, gap ,bog’lanishli hikoya tuzish.

Umumlashtirish: yangi harfni jadvalga qo’yish, yangi o’rganilgan tovushni unli va undoshga kiritish, yangi harfni ilgari o’rganilganlar bilan qiyoslash, tovush va harfning ahamiyatini takrorlash va hokozo.

O’rganilganlarni mustahkamlash darsida yangi tovushni ajratish, yangi harf bilan tanishtirish, mashqidan tashqari barcha ish turlaridan foydalaniladi, shuningdek qo’shimcha so’zlar va matnlar bilan ishlanadi; matnni o’qish va tahlil qilishga, ko’rgazma vositalari bilan ishlashga (harfni terish kartoni, magnit doskasi, abak, sirli mato, rasmlar va b.) nutq o’stirishga, o’yinlar va qiziqarli materiallarga, ilgari o’rganilgan tovushlar va harflarni takrorlab mustahkamlashga alohida ahamiyat beriladi. Tarqatma materiallardan ham foydalaniladi.

Birinchi uchragan so’zlar bilan ishlash; ochiq bo’g’inlar bir undosh bilan tuziladi va o’qiladi, yopiq bo’g’in esa unli bilan tuzilgan ochiq bo’g’inni o’qib keyingi undosh o’qiladi va so’z to’liq tuziladi.

YAngi so’z urg’usi qo’yilgan holda beriladi, bu uni o’qishga, bo’g’inlab o’qishdek sintetik o’qishga (so’zni butunicha o’qishga) yordam beradi.

YAngi so’zni doskada katta bosma harflar bilan yozish o’quvchilarga o’qitish tavsiya qilinadi. So’z shivirlash bilan o’qiladi, kesma harf bo’g’in bilan yoziladi.

Syujetli (rasmning asosiy mazmunini bildiradigan) rasmga qarab o’qituvchi yordamida, uning yo’llovchi so’roqlari asosida hikoya tuzish, undan gapni ajratish va analiz qilish). YAngi bo’g’in, so’z tuzishda harf terish matosi, magnit doskasi, sirli mato kabilarning va yangi so’zni doskada va daftarda “yasash”ning ahamiyati juda katta. O’qish uchun xilma-xil bosma materiallardan qanchalik ko’p bo’lsa, ulardan turli xil mashqlar tuzishda foydalanilsa, o’qish shunchalik ongli, qiziqarli bo’ladi, malaka puxta shakllantiriladi. Bola endigina o’qiy boshlagan bosqichda ularni qatorni yo’qotmaslikka, shuningdek, hatto, so’zdagi keyingi harfni,keyingi so’zni yo’qotmaslikka o’rgatish juda muhimdir. Bu vazifani savod o’rgatishning boshlang’ich bosqichida xatcho’p(o’qiyotgan betni belgilab qo’yish uchun kitob ichiga solib qo’yiladigan qog’oz yoki lentacha) va tayoqcha bajaradi. O’qilayotgan qatorni kuzatib borish ko’nikmasi sinf o’quvchilaridan o’rtog’ining xatosini to’g’rilashni talab qilish bilan ham erishiladi. O’quvchilar bu talabni qizg’anib bajaradilar, shu yo’l bilan ularda darsga, o’qishga e’tibori jalb etiladi.

Savod o’rgatishning birinchi kunlaridayoq o’qish ongli bo’lishi, bolalarni ongli o’qishga o’rgatish juda muhim. So’roqlar yordamida o’qilganlarni bola qanday tushungani aniqlanadi, tekshiriladi. O’qishdan oldin o’tkazilgan tayyorlov suhbati ham o’qilgan matn yuzasidan o’tkazilgan suhbat ham shu maqsadga – ongli o’qish uchun xizmat qiladi. SHaroitga qarab, bolalarga nimanidir o’qishni talab qiladigan problemali holatni yaratish ham zarur. Bunday problemali holatni javobini “Alifbe”dan yoki terish matosidan o’qiladigan topishmoq yaratishi mumkin. Bunday maqsadni problemali savolni keltirib chiqaradigan taxminiy suhbat yordamida ham amalga oshiriladi. Masalan, “Qishda qushlar qaerga uchib ketadilar?” (Harf terish matosida: “Issiq o’lkalarga uchib ketadilar”.) Mana shu kabi tayyorlov mashg’ulotlari o’qishning yuqori darajada ongli bo’lishini ta’minlaydi va shu bilan birga, bolalar ko’z o’ngida o’quv mehnati o’zlashadi, ularni qiziqtiradi.

Ongli o’qishni ifodali o’qishdan ajratib bo’lmaydi. Ammo analitik o’qishning birinchi bosqichida ifodali o’qish mumkin emas, chunki bolalar so’zda urg’uli bo’g’inni ajrata olmaydilar, tugallangan intonasiyani, so’roq intonasiyasini, hatto orfoepik to’g’ri o’qishni ham bera olmaydilar. SHuning uchun analitik o’qish bosqichida so’zni yaxlit, orfoepik qayta o’qish tavsiya qilinadi. Bunday qayta o’qish to’g’ri intonasiyaga, ifodalilikka rioya qilib o’qishga o’rgatibgina qolmay, o’qishning ongli bo’lishiga ham yordam beradi.

Savod o’rgatishning birinchi darslaridayoq o’quvchilarga tabaqalashtirib (differensial) yondashish (bunda o’quvchilarning o’qishga tayyorgarliklaridagi farqlarni hisobga olinadi) amalga oshiriladi.

Fonetik ishlar sohasida jarangli va jarangsiz undoshlar taqqoslashga, ularning so’z ma’nosini farqlashdagi faoliyatini aniqlashga oid mashqlar o’tkaziladi. (ziyrak-siyrak, dil-til kabi). Artikulyasiyasi qiyin bo’lgan undoshlar ng (tong), lab-tish undoshi – v, qorishiq undosh s, ch, jarangli portlovchi – j va jarangli sirg’aluvchi – j kabilarni o’rganishda tovush artikulyasiyasiga oid ishlar qiyinlashadi.

Asosiy davrning oxirlarida jarangsiz jufti talaffuz qilinadigan undoshli so’zlar: ko’rib (ko’rip), qaytdik (qayttik), aytib (aytip), ketayotib (ketayotip), tortib (tortip), terib (terip), olib (olip), obod (obot) borishdi (borishti); qisqa talaffuz qilinadigan i unli bor so’zlar: bilan (blan); talaffuzda tushib qoladigan undoshli so’zlar: baland (balan), do’st (do’s), Toshkent (Toshken), farzand (farzan), daraxt (darax). Bunday so’zlarni yozilgandek o’qish – imloni o’rganishga tayyorlaydi. Bular avval orfoepik, so’ng orfoepik o’qitiladi. SHu kabi so’zlarni o’qish bilan bo’g’inlab o’qish malakasi takomillashadi: o’quvchilar talaffuzi va yozilishida farqlanadigan so’zlarni o’qishni o’rganadilar.