Mavzu: makroiqtisodiy tahlilda milliy hisoblar tizimi axborot bazasi sifatida

MAVZU: MAKROIQTISODIY TAHLILDA MILLIY HISOBLAR TIZIMI AXBOROT BAZASI SIFATIDA

Iqtisodiyotning real sektori tushunchasining mohiyati va uning makroiqtisodiy o‘lchamlari

Milliy hisoblar tizimi ijtimoy soha va iqtisodiyot, jamiyatdagi institutsional sektorlar va tarmoqlar uchun ham statistik ma’lumotlarni olish va tahlil qilish imkoniyatini nazarda tutadi. U jamiyatda ro‘y berayotgan o‘zgarishlarni miqdoriy o‘lchash, qiyosiy va sifat ko‘rsatkichlarini tahlil qilish imkonlarini yaratadi.

Milliy hisoblar tizimi (MHT) mamlakatning iqtisodiy rivojlanishi va boyligi ko‘rsatkichlarini makroiqtisodiy darajada umumlashtirish va tahlil qilish uchun konseptual va statistik asosni yaratadi. Asosiy hisoblar ishlab chiqarish, iste’mol, sarmoyaning jamg‘arilishi, daromadlarning taqsimlanishi va ulardan foydalanishni aks ettiradi. Aktivlar va passivlar balansi milliy boylikning barcha tarkibiy qismlari - nomoliyaviy, moliyaviy aktivlar va majburiyatlar, tabiiy resurslar va boshqalar to‘g‘risidagi ma’lumotlarni umumlashtirish imkonini beradi.
1953 yilgi MHT xalqaro darajada tan olingan dastlabki standart edi. Keyinchalik u 1968 va 1993 yillarda yangilandi. Milliy hisoblar standarti u yoki bu darajada majburiy bo‘lgan shartli qoidalarni o‘zida mujassam etadi. Masalan, ishlab chiqarish chegarasi to‘g‘risidagi qoida undan uy xo‘jaliklari tomonidan o‘z ehtiyojlari uchun foydalaniladigan xizmatlarning ko‘rsatilishini istisno etadi; o‘z navbatida, aktivlar chegarasi to‘g‘risidagi qoida ulardan uy xo‘jaliklari tomonidan ushbu xizmatlarni ko‘rsatish uchun foydalaniladigan tovarlarni, hatto ulardan ko‘p yillar mobaynida foydalanish mumkin bo‘lsa-da, chiqarib tashlaydi. Shuningdek, aktivlar chegarasi to‘g‘risidagi qoida ushbu aktivlardan innovatsiya, reklama, kadrlar tayyorlash xarajatlari kabi kelgusida ulardan foyda olish kutilayotgan xarajatlarni ham chiqarib tashlaydi.
Iqtisodiyot va jamiyatning rivojlanishi bilan ilgarigi shartli qoidalar mos kelmay qoladi, metodologiya va nazariy konsepsiyalar, foydalanuvchilar ehtiyojlarida o‘zgarishlar yuz beradi va shuning uchun milliy hisoblar standartlari vaqti-vaqti bilan yangilanib turishi lozim. 1993 yilda MHT tubdan yangilanganidan keyin BMT Statistika qo‘mitasi kichik, lekin tez-tez yangiliklar kiritishning maqsadga muvofiqligi
to‘g‘risida qaror qabul qildi, lekin bu qaror amalga oshirilmadi va shuning uchun boshqa yirik yangilashni amalga oshirish zarurati tug‘ildi.
Ushbu zarurat so‘nggi 20 yil mobaynida iqtisodiyotda ishlab chiqarish jarayonlarida axborot va kommunikatsion texnologiyalar rolining oshishi bilan bog‘liq katta o‘zgarishlar yuz berganligi, nomoddiy aktivlar va xizmatlar rolining oshganligi, milliy iqtisodiy tizimlarning globallashganligi va ijtimoiy islohotlar tufayli yuzaga keldi. Mazkur o‘zgarishlar tasniflash qismida ham, statistik tekshiruvlar va makroiqtisodiy statistikani shakllantirish uchun konseptual asos sifatida foydalaniladigan nazariy qoidalarda ham statistik ma’lumotlarni shakllantirish sohasidagi tuzatishlarni talab qiladi.
1993 yilgi MHTni yangilash jarayoni rasman 2009 yilning mart oyida nihoyasiga yetdi, o‘shanda yangilangan versiya BMT Statistika qo‘mitasi tomonidan ma’qullandi. Unga «2008 yilgi milliy hisoblar tizimi» nomini berish tavsiya etilgan.
O‘zgarishlar MHTning deyarli barcha bo‘limlarini qamrab oldi, lekin asosan ular nomoliyaviy aktivlar, moliyaviy xizmatlar va moliyaviy vositalar, to‘lov balansi, davlat boshqaruvi sektori va davlat sektori bilan bog‘liq bo‘limlarda jamlangan. Boshqacha aytganda, aksariyat tavsiyalar iqtisodiyotning globallashuvi, moliyaviy vositalardagi innovatsiyalar, boylik manbalariga hamda xususiy va davlat sektorining qarziga bo‘lgan qiziqishning oshishini tavsiflovchi iqtisodiy birliklarga va operatsiyalarga taalluqli. Tavsiyalar bir qismining amalga oshirilishi, ishlab chiqarish, iste’mol, jamg‘arishning ayrim jihatlarini aks ettirishdagi o‘zgarishlar munosabati bilan tizimining yalpi ichki mahsulot (YaIM) va omonat kabi asosiy vositalarining o‘zgarishiga olib keladi. Boshqa tavsiyalar asosiy ko‘rsatkichlarga daxldor emas, lekin ta’riflar va tasniflarni rivojlantirib, ularga aniqliklar kiritgan.
Mamlakatni jahondagi o‘rnini real sektorning rivojlanish darajasi va raqobatdoshligi belgilaydi.
Iqtisodiy adabiyotlarda iqtisodiyotni real sektoriga turlicha ta’rif beriladi va quyida ularning bir nechtasi keltirilgan.

1. 
   Iqtisodiyotning real sektori (IRS) (inglizcha - Real sektor of economy) - iqtisodiy va qonuniy belgilanmagan iqtisodiy atama hisoblanadi va ma’lum hududdagi faoliyati mahsulot ishlab chiqarishga yo‘naltirilgan kichik, o‘rta va yirik (industrial) korxonalarni birlashtiradigan iqtisodiyot sohasidir.
   
2. 
   Iqtisodiyot real sektori - bu iqtisodiyotning yirik tarkibiy qismi bo‘lib, u turli ishlab chiqarish sohalarini o‘xshash tavsiflar, iqtisodiy
   

maqsadlar, funksiyalari orqali birlashtiradi va nazariy hamda amaliy jihatdan iqtisodiyotni boshqa qismlaridan farq qiladi.

3. 
   Iqtisodiyotning real sektori - bu iqtisodiyotni material-buyum mahsulotlarini ishlab chiqaruvchi, nomaterial boylikni yaratuvchi va xizmat ko‘rsatish sohalarini o‘z ichiga oladigan soha. Real sektorga moliya-kredit, birja faoliyati kirmaydi¹.
   
4. 
   Iqtisodiyotni real sektori kapitalni spekulyativ harakati istisno qilgan holda iqtisodiyotni tuzilmaviy qayta qurish va iqtisodiy o‘sish jarayonlarini birlashtiradigan soha.
   
5. 
   Iqtisodiyotni real sektori - bu iqtisodiyotni muhim sektori bo‘lib, to‘g‘ridan to‘g‘ri mahsulot ishlab chiqarish, daromad olish va budjet daromadlari tushumini ta’minlaydi. Ishlab chiqarish, mahsulot ishlab chiqarish sohasi uning iqtisodiy atama sifatidagi sinonimlari hisoblanadi.
   
6. 
   Iqtisodiyotni real sektori - kommersiyaga asoslangan seriyali va yirik miqdorda mahsulot va tovarlar ishlab chiqaruvchi, jumladan, bino va inshootlarni qurish, aloqa, telekommunikatsiya, transport xizmatini amalga oshiruvchi kichik, o‘rta va yirik korxonalar yig‘indisidir.
   

7. Iqtisodiyotning real sektori - iqtisodiyotning bevosita moddiy ne’matlar ishlab chiqarish va xizmatlar ko‘rsatish bilan bog‘liq sohasi bo‘lib, u o‘z ichiga sanoat, qishloq xo‘jaligi, qurilish, transport, aloqa va boshqa xizmat ko‘rsatish tarmoqlarini oladi².
Iqtisodiyotda real sektorni samarali faoliyat yuritishida moliyaviy sektor muhim o‘rin egallaydi.
Moliyaviy sektor - bu qarz olish va uni qaytarish bilan bog‘liq bo‘lgan amaliyotni ijro qiladigan vositalar va institutlar to‘plamidir. Moliyaviy tizim mulk egaligini kapitaldan ajratish imkoniyatini beradi.
Moliyaviy sektorga banklar, sug‘urta kompaniyalari, fond birjalari, moliyaviy investitsion kompaniyalar, lombardlar va boshqa moliyaviy institutlar kiritiladi.
Real sektorda YaIM ni asosiy qismi yaratiladi.
Butun real sektor iqtisodiyotining umumiy holatini tavsiflovchi muhim makroiqtisodiy ko‘rsatkichlar - yalpi ichki mahsulot (YaIM), sof ichki mahsulot (SIM), milliy daromad (MD) kabilar hisoblanadi³.
Bu ko‘rsatkichlar ishlab chiqarish va xizmat ko‘rsatish sohalaridagi barcha xo‘jaliklar iqtisodiy faoliyatining umumiy va pirovard natijalarini qamrab oladi.
Shu sababli, real sektordagi makroiqtisodiy ko‘rsatkichlarni milliy iqtisodiyot holatiga bog‘liq ravishda quyidagi guruhlarga ajratish mumkin:

1. 
   Milliy iqtisodiyot ishlab chiqarish imkoniyatini tavsiflovchi ko‘rsatkichlar. Bular mamlakatning iqtisodiy resurs salohiyatini, yerosti va yerusti boyliklari zaxiralari hamda tabiiy resurslari hajmini tavsiflovchi ko‘rsatkichlar.
   
2. 
   Milliy iqtisodiyot faoliyat qilishini tavsiflovchi ko‘rsatkichlar. Bular bandlik, ishsizlik, inflatsiya, iste’mol, jamg‘arma va investitsiyalar darajasi, narxlar darajasi va uning o‘zgarishi, savdo aylanmasi, to‘lov balansi holati va boshqalar.
   
3. 
   Milliy iqtisodiyot faoliyatining natijalarini tavsiflovchi ko‘rsat- kichlar. Ishlab chiqarishning yillik hajmi (YaIM va uning harakat shakllari).
   
4. 
   Milliy iqtisodiyot natijalaridan foydalanish holatini tavsiflovchi ko‘rsatkichlar. Bular YaIM da iste’mol va jamg‘arma nisbati, ish haqi va boshqa omilli daromadlar darajasi, YaIM da investitsiyalar ulushi va boshqalar.
   

1. 
   2. Iqtisodiyotning real sektori tarkibiy tuzilishining mohiyati va tasnifi
   

Iqtisodiyot va uning alohida tarmoqlari tarkibi mamlakat iqtisodiyotini rivojlanishining asosini tashkil etadi. Iqtisodiyot va uning alohida tarmoqlarida iqtisodiy vaziyatni aniq tasavvur qilish, uning kelajakdagi rivojlanish istiqbollarini hisobga olish muhim iqtisodiy- ijtimoiy ahamiyatga ega.
Real sektor iqtisodiyoti tarkibi - bu milliy iqtisodiyotdagi tovar va xizmatlar ko‘rsatuvchi turli tarmoq va sohalar yig‘indisidan iborat bo‘lib, ular o‘zaro aloqada va bog‘liqlikda iqtisodiy faoliyatda bo‘ladilar. Real sektor iqtisodiyoti ichki va tashqi bozorga ne’matlar ishlab chiqaruvchi, zamon va bozor talabidagi o‘zgarishlarga nisbatan moslanuvchan iqtisodiy subyektlar faoliyati yig‘indisidan iboratdir.
Iqtisodiyotni real sektoriga mahsulot ishlab chiqarish bilan, nomoddiy boylik yaratish va xizmat ko‘rsatish sohalari ham kiritiladi. XX asrning ikkinchi yarmidan boshlab real sektor infratuzilmasida katta o‘zgarishlar ro‘y berdi.
Mamlakat milliy iqtisodiyoti moddiy ishlab chiqarish sohalari va bozor xizmat ko‘rsatish sohalaridan tarkib topadi. Iqtisodiyotning real sektoriga quyidagi moddiy va nomoddiy boyliklar yaratish hamda xizmatlar ko‘rsatish sohalari kiradi:

• 
  sanoat;
  
• 
  qishloq xo‘jaligi;
  
• 
  qurilish;
  
• 
  transport va aloqa;
  
• 
  boshqa xizmat ko‘rsatish sohalari.
  

Xizmatlar sohasi iqtisodiyotning muhim sohalaridan biri hisoblanadi va iqtisodiyotning barcha sohalariga sezilarli ta’sir qiladi.
Xizmatlar sohasi - bu bir tomondan aholiga ko‘rsatiladigan xizmatlarining assortimenti bo‘lsa, ikkinchi tomondan tashkilotlar va yakka ijrochilar majmuasi bo‘lib, ular xizmat ko‘rsatish faoliyati doirasida iste’molchilarga moddiy va ijtimoiy-madaniy xizmatlarni ko‘rsatishadi.
Xizmatlar sohasi tarkibida yetakchi o‘rinlarni transport xizmatlari, aloqa va axborotlashtirish xizmatlari, savdo xizmatlari, mehmonxona va turistik-ekskursiya xizmatlari egallaydi. Bulardan tashqari xizmat ko‘rsatish sohasi tarkibiga kommunal xizmatlar, maishiy xizmatlar, avtomobillarni ta’mirlash xizmatlari, tibbiy xizmatlar va boshqa xizmatlar ham kiradi. Shuningdek xizmat ko‘rsatish sohasi tarkibida bank, moliya va sug‘urta xizmatlari ham salmoqli o‘rin egallaydi, lekin ular iqtisodiyotning moliyaviy sektoriga taalluqlidir

4. 
   3. Real sektor tarkibiy tuzilishini takomillashtirish va unga ta’sir etuvchi omillar
   

Iqtisodiyot tarkibiy tuzilishini tubdan o‘zgartirish - bu milliy manfaatlarni ta’minlovchi, iqtisodiy o‘sishga yo‘l beruvchi va nihoyat, aholi farovonligini muttasil oshib borishini ta’minlovchi yangicha ishlab chiqarish tuzilmasini yaratishdir. Chunki tarkibiy tuzilishda chuqur o‘zgarishlarni amalga oshirish makroiqtisodiy barqarorlikka erishishning, istiqbolda O‘zbekistonning barqaror iqtisodiy o‘sishini va aholi farovonligini ta’minlashning, jahon iqtisodiy tizimiga qo‘shilishning eng asosiy shartlaridan biridir.
Tarkibiy o‘zgartirishlar uzluksiz yuz beradi, ularni rag‘batlantirish iqtisodiy siyosatning muhim yo‘nalishi bo‘lib qoladi. Hozirgi davr yangi texnologiya asri sifatida yangi tarkibiy o‘zgartirishlarni yuzaga keltiradi.
Shu bois tarkibiy o‘zgarishlarni ta’minlash islohotlarni chuqurlashtirishning muhim jihati deb baholash zarur.
Iqtisodiyot real sektori tarkibini o‘zgartirish butun milliy iqtisodiyotga xizmat qiladi va texnik taraqqiyotni ta’minlaydi. O‘zbekistonda iqtisodiyot tarkibini o‘zgartirish davlatning ko‘magida rivoj topadi. Chunki, bu tarmoqlarni yirik sarmoyalar hisobidangina rivojlantirish mumkin. Shuning uchun yirik tarmoqlarga investitsiyalarni davlat yo‘naltiradi va shu boisdan tarmoqlar boshqalarga nisbatan jadal o‘sib boradi. Muhim tomoni shundaki, iqtisodiyot tarkibini o‘zgartirish iqtisodiy xavfsizlikni ta’minlashning asosiy shartidir.
Iqtisodiyot real sektori tarkibini o‘zgartirish boshqa sohalarning ham o‘sishiga olib keladi. Masalan, neft mahsulotlarini ishlab chiqaruvchi neft-gaz sohasining rivojlanishi bilan birgalikda, kimyo sanoati tarmoqlarining ham rivojlanishiga zamin yaratiladi. Bu nafaqat energiya manbalarini eksport qilish imkonini beradi, balki turli kimyoviy xomashyo moddalari va tayyor mahsulotlarni eksportga yo‘naltirishga imkon yaratadi.
Iqtisodiyot real sektori tarkibini o‘zgartirish mamlakat eksport salohiyatini oshirishga ham xizmat qiladi. Tarmoqlar rivojida yangi davr boshlanadiki, bu soha korxonalari ham bozor mexanizmi asosida rivojlanadi, o‘z-o‘zini moliyalashtirish qoidasi amal qiladi, chunki iqtisodiyotni erkinlashtirish yo‘liga aytilgan tarmoqlar ham tortiladi.
Real sektordagi iqtisodiy vaziyatni baholash integrallashgan hisob- kitoblar asosida quyidagi 3 ta yo‘nalishni qamrab oladi:

1. 
   Rivojlanish istiqbollari;
   
2. 
   Faoliyat samaradorligi;
   
3. 
   Investitsion xatarlar.
   

Real sektor rivojiga ishlab chiqarish kuchlarining rivojlanish darajasi, ilmiy-texnik taraqqiyot darajasi, pul-kredit tizimi holati, soliq-budjet tizimi, davlatning investitsion siyosati, mamlakatning to‘lov qobiliyati holati ta’sir qiladi.
Real sektor rivojini, natijada iqtisodiy o‘sishni moddiy ishlab chiqarishni texnik va texnologik yangilashga yo‘naltirilgan to‘g‘ridan to‘g‘ri kapital qo‘yilmalar miqdori hamda innovatsiyalar ta’minlaydi.
Bundan tashqari, bozor iqtisodiyoti sharoitida real sektorga mamlakatning moliyaviy sektori holati ta’sir ko‘rsatadi. Jumladan, foiz stavkalari darajasi, fond birjalari, sug‘urta tizimi va boshqalar.

4. 
   4. Milliy iqtisodiyotning ishlab chiqarish natijalarini ifodalovchi ko‘rsatkichlar
   

Yalpi ichki mahsulot va uni hisoblashning usullari.
Makroiqtisodiy tahlilda statistika va milliy hisobchilik tizimida qo‘llaniladigan ko‘pgina iqtisodiy ko‘rsatkichlardan foydalanishga to‘g‘ri keladi. Milliy hisobchilik tizimi doirasida ba’zi bir asosiy statistik agregatlardan iqtisodiy faollikni makrodarajada o‘rganish uchun keng qo‘llaniladi.
Milliy ishlab chiqarish hajmini belgilab beradigan va mamlakat darajasida iqtisodiy faoliyat natijalarini baholaydigan asosiy makroiqtisodiy ko‘rsatkich - bu yalpi ichki mahsulot (YaIM) dir. Uning dinamikasi milliy iqtisodiyot qanday darajada rivojlanayotganligini, ya’ni hukumat tomonidan olib borilayotgan iqtisodiy siyosatga doir chora-tadbirlar qanchalik samarali ekanligini baholash uchun ishlatiladi.
Yalpi ichki mahsulot (Gross Domestic Product - GDP) deganda, yil davomida iqtisodiyotda (mamlakat ichkarisida) ishlab chiqarilgan barcha pirovard tovar va xizmatlarning umumiy bozor qiymatiga aytiladi.