Aziz oʻquvchilar! Koʻrgazmamizning pastki qismida arxiv-uyachalar boʻlib, unda bir nechta shoir va yozuvchining tugʻilgan yili, joyi, ilk asari, ish faoliyati, asarlari, mukofotlari, eng mashshur asari, vafot etgan sanasi aks etgan tarqatmalar aralash holda joylashtirilgan. Siz oʻrganayotgan sevimli adibimiz ijodiga oid ma’lumotlarni arxiv-uyachalardan olib, koʻrgazmaning asosiy qismiga joylashtirishingiz kerak boʻladi.
Guruhlar baholab olingach, oʻqituvchi yangi mavzuni e’lon qiladi. III. Mavzu jarayoni: Oʻquvchilarga Nabi Jaloliddin hayoti va ijodi, “Ota” hikoyasini sirtdan oʻrganish boʻyicha tayyorlangan slayd namoyish etiladi.
(Ovoz kuchaytirgich orqali mumtoz musiqa yangrab turadi) Oʻqituvchi internetdan olingan ma’lumotlar asosida mavzuni tushuntiradi:
Zamonaviy o‘zbek adabiyotining iste’dodli vakillaridan biri, shoir, yozuvchi va rassom Nabi Jaloliddin 1962-yilda Andijon viloyatida tug‘ilgan. Ota-onasidan erta judo bo‘lgan yozuvchi qishloqdagi rassomchilik maktabinternatida o‘qishini davom ettirishga majbur bo‘ldi. U yoshligidan rasmlar chizishni mashq qildi, she’rlar yoza boshladi. O‘n olti yoshida ilk she’ri tuman gazetasida bosilib chiqdi. Harbiy xizmatdan keyin Nabi Jaloliddin Toshkent davlat universitetida (hozirgi O‘zbekiston milliy universiteti) tahsil oldi. Oliygohda o‘qish bilan birga maktabda o‘qituvchilik qildi, so‘ng esa bir qancha nashriyotlarda faoliyat olib bordi.
Proyektor orqali ota haqidagi videolavha oʻquvchilar e’tiboriga havola etiladi.
Shundan soʻng “Ota” hikoyasining bir qismining audiomatni eshittiriladi. “Rolli oʻyinlar” usuli asosida I guruh “Ota-bola suhbati: buyurish”, II guruh “Ota-bola suhbati: javob soʻrash”, III guruh esa “Ota-bola suhbati: iltimos qilish” voqeliklarini sahnalashtirib koʻrsatadi. Oʻquvchilar sahna ko’rinishini ijro etgandan soʻng ularning mazmunini yoritib beradi. “Oʻyla, izla, top!” usuli orqali oʻquvchilarning adabiyot daftarlariga darslikdagi lugʻat soʻzlar yozdiriladi. Oʻquvchilar bu soʻzlarning ma’nolarini yozishlari kerak boʻladi. Shundan soʻng lugʻat soʻzlar ma’nolari elektron doskada aks ettiriladi va oʻquvchilar oʻz-oʻzini baholash asosida tekshiradilar.
