MAVZU: XOʻJALIK YURITUVCHI SUBYEKTLARNING MAHSULOT (ISH, XIZMATLAR) ISHLAB CHIQARISH VA SOTISH HAJMINI TAHLILI
Mahsulot ishlab chiqarish hajmi va sotish ko‘rsatkichlari o‘zaro bog‘liq ko‘rsatkichlardir. Ishlab chiqarish imkoniyatlari cheklangan va talab esa cheklanmagan sharoitlarda mahsulot ishlab chiqarish hajmini oshirish muhim ahamiyatga ega hisoblanadi.
Biroq, ishlab chiqarilayotgan mahsulotlarga bozor to‘yingan, raqobat kuchayib borgan sari taxmin qilinayotgan sotish hajmi ishlab chiqarish rejasini tuzishga asos bo‘ladi.
Shu sababli, bozor munosabatlari sharoitida har bir korxona iste’molchi talabini chuqur o‘rgangan holda ularning talabini qondira oladigan va sotish imkoniyatiga ega bo‘lgan hajmda mahsulot ishlab chiqarishi lozim.
Bu esa, korxona tomonidan ishlab chiqarilgan mahsulotlarni o‘z vaqtida sotilishi va ishlab chiqarishning uzluksiz faoliyat yuritishini ta’minlaydi.
Mahsulot ishlab chiqarish va sotish hajmining o‘sish sur’atlari hamda sifatining oshishi korxonaning asosiy faoliyat xarajatlari, foyda miqdori va rentabelligiga bevosita ta’sir ko‘rsatuvchi ko‘rsatkichlar hisoblanadi. Shu bois, ushbu ko‘rsatkichlarni tahlil qilish muhim ahamiyatga ega.
Mahsulot ishlab chiqarish va sotish jarayonini o‘rganish va ularning samarasini oshirish imkoniyatlarini izlab topish hamda korxonaning moliyaviy-xo‘jalik faoliyatiga jalb qilish choralarini ko‘rish tahlilning asosiy maqsadi bo‘lib hisoblanadi.
