Hüseyn Cavidin ev-muzeyi. 1981-ci ildə ümummilli lider Heydər Əliyevin bilavasitə təşəbbüsü və
qayğısı sayəsində Bakıda yaradılmışdır. 1991-ci ildən fəaliyyətə başlamışdır. 1995-ci ilədək Mədəniyyət
Nazirliyinin tərkibində olmuş, həmin ildə AMEA-nın tabeliyinə verilmişdir. Vaxtilə Hüseyn Cavidin yaşadığı
binada (Bakı, İstiqlaliyyət küçəsi, 8) yerləşir. Muzeyin ekspozisiya və fondlarında görkəmli dramaturq Hüseyn
Cavidin həyat və yaradıcılığını əks etdirən 7000-ə yaxın eksponat mühafizə olunur. Muzey elmi tədqiqat
müəssisəsi kimi fəaliyyət göstərir.
Muzeyin yaradılmasında, eksponatların toplanılmasında, habelə Hüseyn Cavid yaradıcılığının
öyrənilməsində 1991-ci ildən ömrünün sonunadək (2004) muzeyin direktoru kimi çalışan qızı Turan Cavidin
böyük əməyi olmuşdur.
Naxçıvan şəhərində də Hüseyn Cavidin ev-muzeyi yaradılmışdır (1981).
Muzeyin ünvanı: Bakı şəhəri Istiqlaliyyət küç., 8 Telefon :492 06 57 ***
