Ministry of higher and secondary education

Kesimlik kategoriyasi. Gap bo’laklari Pm ma‘nosi bilan uzviy bog’liqdir. Shu boisdan gap bo’laklarini ko’rib o’tish bevosita gapning «jon»ini, markazini shakllantiruvchi vosita - kesimlik kategoriyasining tarkibi, ma‘nolari va ifodalanish usullariga qisqacha sharh berishimiz zarur. Zero, gap kengaytiruvchilari tushunchasi, ularni ajratish shu asosda gapning struktur zaruriy va ixtiyoriy tarkibiy qismlarini ajratish gapning «yuragi», gapning gap ekanligini ta‘minlovchi kesimlik kategoriyasi va uning ko’rsatkichlari, ifodalanish xususiyatlari bilan uzviy bog’liqdir. Shu sababli, gapning gapligini, ya‘ni bir nisbiy tugal fikrni, so’zlovchining hukmini, oy-xayollarini boshqalarga yetkazishning, ular tomonidan to’g’ri anglanishining eng muhim omili - bu nutq bosqichida nutq sharoiti, lisoniy bosqichda esa kesimlik kategoriyasidir.
Demak, kesimlik kategoriyasi fikrni shakllantiruvchi uni tinglovchiga yetkazishning eng muhim lisoniy omildir. Kesimlik kategoriyasi mazmun jihatidan tasdiq-inkor (T), so’zlovchining bayon etilgan fikrga bildirgan munosabati (M), zamon (Z) va shaxs-son (SH) ma‘nolaridan tarkib topadi. (Buni qisqacha shartli ravishda T, M, Z, Sh deb belgilaymiz va qulaylik uchun keyingi o’rinlarda ana shu shartli qisqatmalardan foydalanamiz). Bu ma‘nolar yaxlit holda voqelangandagina ichki mazmun tomonini namoyon qila oladi. T, M, Z, Sh ma‘nolarining har biri alohida-alohida ravishda yuzaga chiqishi mumkin. Masalan, modal so’zlarda mayl (modallik) ma‘nosi bo’ladi. Kishilik olmoshlari va egalik qo’shimchalarida shaxs-son ma‘nosi yetakchilik qiladi. Tasdiq-inkor so’zlari (ha, yo’q) da bo’lishli-bo’lishsizlik (-ma, 0) da tasdiq-inkor ma‘nosi yorqin ifodalangan bo’ladi. Payt ravishlari, zamon otlari, shuningdek, o’rin-payt kelishigi shaklida, ravishdosh va sifatdoshlarda zamon ma‘nosi ifodalanadi. Lekin bularning barchasi alohida-alohida voqelanishlar bo’lib, kesimlik vazifasida yuzaga chiqishidan boshqa holatlarda yaxlit sistem tabiatga ega bo’lmaydi. Zero, kesimlik kategoriyasi mazkur alohida olingan kategoriyalarning yaxlitligi (sistemasi) dan iboratdir. Har qanday tizim o’z tarkibiy qismlarining oddiy yig’indisidan kattaroq butunlikdir. Chunki T,M,Z,SH, kategoriyalari kesimlik kategoriyasida birlashar ekan, bu butunlik tarkibiy qismlarida avval bo’lmagan, lekin sistema tashkil etganda tug’iladigan hodisalarni ham qamrab oladi. Masalan, o’tgan yili o’qimagan odam birikuvidagi o’qimagan so’z shaklining birikuvchisi o’tgan yili so’z kengaytiruvchisi (lekin gap bo’lagi emas) dir. U o’tgan yili o’qimagan gapidagi o’tgan yili so’z shakli gap bo’lagi (hol)dir. Demak,birinchi qurilmadagi kesimlik kategoriyasi azosi emas, shu boisdan uning birikuvchisi (o’tgan yili) gap bo’lagi emas. Ammo ikkinchi qurilmada -gan kesimlik kategoriyasini tarkibiy qismi bo’lib, uning birikuvchisi gap bo’lagidir. Gap kesimlik tarkibidagina gap bo’laklarini o’ziga tobelaydi. Bu uning butunlik tarkibida kasb etgan yoki namoyon bo’lgan belgisidir.
Kesimlik kategoriyasining nutqiy gaplarda voqelanishidagi ikki holatini farqlash lozim.
1.Kesimlik kategoriyasining grammatik (morfologik) shakllar orqali voqelanishi.
2.Kesimlik kategoriyasining semantik-funktsional ifodalanishi.
Bundan kelib chiqqan holda gaplarni ikkiga ajratish mumkin:
1.Grammatik shakllangan gaplar.
2.Semantik-funktsional shakllangan gaplar.