Universitetlər Konsorsiumu (latınca consortium-həmiştirak, birgə iştirak) nisbətən yeni və son illər aktiv inkişaf edən universitet təhsilinin institusional modelidir. Konsorsium əsaslı universitet təhsili modeli bir neçə universitetin fəaliyyətini müasir İKT əsasında birləşdirir və koordinasiya edir. Bu modelin tətbiq olunduğu universitetlər kimi ABŞ-ın Milli Texnologiya Universitetini, Yaponiyanın Kioto universitetini, Qlobal Universitet təşkilatını göstərmək olar [77].
Teleuniversitet universitet təhsilinin ənənəvi universitetlərin resurslarının birləşdirilməsinə əsaslanan yeni institusional formasıdır, lakin bu birlik universitetlər konsorsiumu ilə müqayisədə daha güclüdür. Bu tip universitetlərə ABŞ-da Stenford və Çin Xalq Respublikasında Çin Təhsil və Araşdırma Şəbəkəsini (ÇTEAŞ) misal göstərmək olar [111, 194].
Virtual universitetlər-İKT-nin potensial imkanlarını tam reallaşdıran, yalnız e-təhsil və distant tədris texnologiyalarının tətbiq edilməsi ilə tədris proqramları təqdim edən yeni tip tədris təşkilatlarıdır. Virtual universitetin tədris korpusu, tələbə yataqxanaları, kampusu, inzibati işçilər üçün kabinetləri və mühazirə zalları yoxdur. Bu model, hələ ki, tam reallaşdırılmamışdır. O, ciddi çətinliklərlə, xüsusilə virtual universite-tin akkreditasiyası problemi, başqa sözlə, ictimai etibar qazanmaq, diplom və sertifi-katlar, müvafiq dərəcələr vermək hüququ əldə etmək problemləri ilə üzləşir .
