|
Antroponimik oronimlər. Azərbaycan oronimiyasında şəxs adları
əsasında düzəlmiş müsbət və mənfi relyef formalı coğrafi obyekt adları
mühüm yer tutur. Bu oronimlərin əksəriyyəti mikrooronimlərdir. Mikrooronim
əsas etibarilə keçmiş feodal zümrəsinə mənsub adamların, bəy və
mülkədarın malikanələri, onlara məxsus yaylaq və qışlaq adları əsasında
yaranmışdır. Başqa sözlə, oronimlərin bu hissəsi xüsusi mülkiyyətin
məhsulu olmaq etibari ilə keçmişdə bu və ya digər oronimik ərazidən müxtəlif
təsərrüfat sahəsi məqsədi ilə (biçənək, əkin yeri, örüş və s.) istifadə
edilməsi ilə əlaqədar yaranmışdır. Ona görə də bu qrupa aid mikrooronimlər
əsasən mənsubiyyət bildirən sonluqlarla (şəkilçilərlə) bitirlər: Məmmədli
dərəsi (Masallı rayonu), Əhməd çalası (Qubadlı rayonu) kimi yüzlərlə belə
nümunələrin adını çəkmək olar.
Dostları ilə paylaş: | 
