Mühazirə Pedaqoji biliklər sistemində "İnformatikanın tədrisi üsulları"

Tədqiqat metodunun mahiyyəti ondan ibarətdir ki, müəllim tapşırığı izah edir, bu sırada şagirdlər müstəqil şəkildə bəzi faktları özləri aşkar edirlər. Məsələn, məntiq bölməsinin tədrisində müəllim şagirdlərə tapmacalar düzəltmək tapşırığını verir və şagirdlər əvvəlcə verilmiş tapmacaların cavablarını tapır, sonra isə özləri tapmaca düzəldir.
Müəllimin şərhi tədris materialının ətraflı izahıdır. Bu metoddan bəzi mövzuların izahında, məsələn, kompüter texnologiyaların inkişafı tarixi, virusların təsnifatı və s. istifadə edilir.
Söhbət – müəllim və şagirdlər arasında qarşılıqlı sual-cavaba əsaslanır.
Məsələn, informasiya anlayışının izahını qarşılıqlı sual-cavab əsasında vermək olar.
Əyani təlim metodları – yüksək keyfiyyəti təmin edən və praktik vərdişlərin formalaşdırılmasına yönəldilən metodlardır.
Didaktik oyunlar – öyrənilən obyekt, hadisə və prosesin modelləşdirilməsi məqsədilə tətbiq edilir. Oyun şagirdi əməyə və təlimə hazırlayır.

Problemli təlim metodu – şagirdlərin məntiqi təfəkkürünün inkişafına təkan verir. Problem o zaman yaranır ki, ziddiyyət olsun. Ziddiyyətin həll edilməsi problemli təlim metodu sayəsində baş verir. Məsələn, informasiyanın ölçülməsi mövzusunu keçərkən şagirdlərə belə bir suallarla müraciət etmək olar:

• 
  İnformasiyanın miqdarı 1 bitdən kiçik ola bilərmi?
  
• 
  Əgər bir simvol 1 baytla ölçülürsə, onda bəs 1 bitlə nə ölçülür? Axı hərfin səkkizdə birini bitlə ölçmək mümkün deyil.
  

Sonra isə evristik metodla problemin həlli tapılır.
Proqramlaşdırılmış təlim metodu kompüterin yaddaşında və ya proqramda qabaqcadan tərtib edilmiş materiala əsaslanır.
İnformatika dərslərində tətbiq edilən metodların bəzi cəhətlərin qeyd edək. Təlimin ilk illərində klaviatura və mausla işi öyrədərkən reproduktiv metodlardan istifadə etmək səmərəlidir. Müəllim şagirdlərin hər birinə yaxınlaşaraq onlara əllərini düzgün qoymağı öyrətməlidir. Bu zaman müəllim lokal şəbəkə vasitəsilə şagirdlərin hər birinin işinə nəzarət edə bilər və ya proyektorla öz işini nümayiş etdirər.
İnformatikadan təlim metodlarının səmərəli seçilməsi bir sıra şərtlərdən asılıdır – müəllimin nəzəri və praktik hazırlılığı, şagirdlərin real dərkemə qabiliyyəti, mövcud əyani vəsait, texniki avadanlıqlar, materialın öyrənilməsinə ayrılan vaxt və s.