İdarəetmə orqanları, məntəqələri, rabitə və xəbərdarlıq vasitələri. Mülki Müdafiənin idarəetmə sistemi – idarəetmə orqanlarından, idarəetmə
məntəqələrindən, rabitə və xəbərdarlıq vasitələrindən ibarətdir.
Mülki Müdafiənin idarəetmə orqanlarına Mülki Müdafiə qərargahları, xidmətləri və köçürmə orqanları aiddir.
İdarəetmə orqanının əsas vəzifəsi – hər cür şəraitdə idarəetmə işini, yəni Mülki Müdafiə rəhbərinin qərar və göstərişlərinin həyata keçirilməsini fasiləsiz və qətiyyətlə təşkil etməkdir.
Mülki Müdafiə rəhbəri özünə tabe olan qüvvələri adətən idarəetmə məntəqəsindən idarə edir.
İdarəetmə məntəqəsi (İM) – mülki müdafiəni hərbi vəziyyətə keçirərkən və ya fövqəladə
hadisələr dövründə idarəedici heyətin yerləşməsi və işləməsi üçün nəzərdə tutulmuş, xüsusi
avadanlıqla, texniki rabitə və xəbərdarlıq vasitələri
ilə təchiz edilmiş otaqlardan (stasionar İM ), yaxud nəqliyyat vasitələrindən (səyyar İM ) ibarətdir.
İdarəetmə məntəqələri orada yerləşən heyətin fövqəladə hallarda fasiləsiz işini, normal
həyat fəaliyyətini (qidalanma, növbə ilə dincəlmə və s.) və etibarlı müdafiəsini təmin etməlidir.
Səyyar idarəetmə məntəqəsi adətən aşağıdakı otaqlardan ibarət olur:
Mülki Müdafiə rəhbərinin iş otağı; operatorlar yerləşən operativ iş otağı;
xidmət rəislərinin (mütəxəssislərin) iş otağı;
rabitəçilər qrupu yerləşən rabitə qovşağı; növbələrlə dincəlmə yeri (otağı);
İM heyəti üçün fərdi mühafizə vasitələri, ərzaq və su ehtiyatları saxlanılan yer; sanitariya qovşağı.
Səyyar idarəetmə məntəqəsi rabitə vasitələri ilə təchiz olunmuş nəqliyyat vasitələrində düzəldilir. Səyyar
idarəetmə məntəqəsi stasionar idarəetmə məntəqəsi
olmayan zədələnmə ocaqlarında və MM qüvvələrinin
yürüş marşrutlarında bilavasitə hərəkət zamanı operativ
idarəetmə üçün təşkil edilir. Səyyar İM-nə Mülki Müdafiə
rəhbəri və ya onun müavini başçılıq edir. Bu zaman Mülki
Müdafiə qərargahının rəisi stasionar idarəetmə məntəqəsində qalaraq digər tədbirlərin icrasını təşkil edir.
Təyinatına görə İM-nin əsas, ehtiyat və yardımçı növləri ola bilər. İdarəetmə
məntəqələrinin yerləri və sayı hökumətin qərarı ilə müəyyən edilir, müvafiq
nazirliklərin, yaxud icra hakimiyyəti orqanlarının vəsaiti hesabına tikilir, avadanlaşdırılır və qorunub saxlanılır.
