11. NİTQİN İFADƏLİLİYİ. Natiq fikrini düzgün, aydın, məqsədəuyğun surətdə ifadə etməklə yanaşı, onu cazibəli, təsirli, emosional bir formada verməyi, dinləyicinin qəlbinə, zehninə nüfuz edə biləcək inandırıcı və təsirli dil vasitələrindən istifadə etməyi də bacarmalıdır. Parlaq, kəskin, orijinal, ifadəli nitq dinləyicilərin hisslərinə təsir edir, marağını artırır, diqqətini cəlb edir, irəli sürülən fikirlərin məzmununu yaxşı dərk etməyə kömək göstərir. Dinləyicilər, o cümlədən də tələbələr ona görə bir sıra müəllim - natiqin mühazirələrindən razılıq edirlər ki, onların danışığı aydın, məzmunludur. Bu danışıq güclü, məntiqli, tutarlı cümlələrdən ibarətdir, həm də ifadəlidir, təsirlidir, emosionaldır.
Nitqdə ifadəlilik, emosionallıq müxtəlif vasitələrin köməyi ilə yaranır. Bura daxildir: intonasiya (ton, vurğu, pauza və s.), leksik vahidlər: sinonim və antonimlər, atalar sözü, zərbi-məsəllər, məcazi mənalı söziər, emosional nidalar və s. Sözlərin əsas mənasına əlavə məna verən bu ifadəlilik vasitələrinin köməyi ilə natiq (müəllim) ən incə mətləbləri dinləyicilərə çatdırır.
