O‘zbekiston milliy universiteti z. Z. Abdushukurova, S. Q. Zakirova, S. Sidiqov, S. Abdullaev O‘zbekiston tuproqlarining agrokimyoviy tavsifi

1-rasm. Tuproq unumdorligining elementlari va shart sharoitlari
Bu shart-sharoitlar o‘z navbatida atmosfera elementlari bilan bevosita bog‘liq bo‘ladi. Tuproq unumdorligining omillari jumlasiga tuproqning barcha xossalari va tartibotlari kiradi. Ana shunday eng muhim xossalar va tartibotlarga tuproqning mexanik tarkibi va strukturasi bilan bevosita bog‘liq bo‘lgan fizikaviy, suv, havo xossalari va rejimlarini, tuproqning singdirish qobiliyati bilan bog‘liq bo‘lgan xossalar (singdirilgan kationlar tarkibi, tuproq eritmasining reaksiyasi) ni kiritish mumkin. Qishloq xujalik ishlab chiqarishida tuproqdan foydalanilayotganda, tuproq unumdorligining barcha omillari va shart-sharoitlariga ta’sir etish lozim.
Tuproq unumdorligining quyidagi turlari ajratiladi: tabiiy, sun’iy, potensial, effektiv (samarali), nisbiy va iqtisodiy unumdorliklar. Bularning barchasini siz tuproqshunoslik darslarida to‘liq o‘zlashtirgansiz.
Tuproq, unumdorligining boshlang‘ich darajasidan yuqori holatda yaratilishi unumdorlikning kengaytirilgan tarzda qayta tiklanganligini bildiradi. Tuproq unumdorligining qayta tiklanishi tuproq hosil bo‘lish jarayonining ob’ektiv qonunidir va uning namoyon bo‘lishining barcha shakllariga xosdir.
Tabiiy tuproq paydo bo‘lish jarayonining rivojlanishi unumdorlikning to‘liq bo‘lmagan, oddiy yoki kengaytirilgan tipdagi qayta tiklanishi muayyan tuproq paydo bo‘lish jarayonlari yoki ularning birgalikdagi rivojlanishi bilan aniqlanadi. Tuproqdan dehqonchilikda foydalanish jarayonida uning unumdorligini qayta tiklanishi tabiiy omillar ta’siri va insonning turli usullar bilan tuproqga ta’sir etishida sodir bo‘ladi. Madaniy tuproq paydo bo‘lish jarayoni tabiiy va antropogen omillar ta’sirida sodir bo‘ladi. Inson erdan o‘zoq vaqt foydalanganda, tuproqda kechadigan tabiiy jarayonlar, tuproqning qator xossalari va tartibotlari o‘zgarib, yangi madaniy tuproqlar paydo bo‘ladi. Tuproq unumdorligini doim yaxshi va yuqori holatda saqlab turish maqsadida inson tomonidan tuproq tabiiy xossalarining o‘zgartirish jarayonlariga tuproqni madaniylashtirish deyiladi. Tuproqlarni madaniylashtirishga qaratilgan kompleks tadbirlar tizimi, ekinlardan barqaror va muttasil yuqori hosil olishni ta’minlovchi tuproq xossalarini yaxshilash imkonini beradi. Tuproqlarni madaniylashtirishning biologik, kimyoviy va fizikaviy usullaridan foydalaniladi.
B i o l o g i k u s u l tuproqda chirindi va azotning ko‘proq to‘planishiga imkon beradigan tadbirlarni o‘z ichiga oladi. SHu maqsadda ko‘p yillik o‘tlar (beda va turli dukkaklilar) ekiladi va mahalliy-organik o‘g‘itlardan foydalaniladi.
K i m yo v i y u s u l erga mineral o‘g‘itlar solish yuli bilan tuproqda o‘simliklar uchun zarur oziq elementlari miqdorini ko‘paytirish hamda tuproqning kimyoviy xossalarini yaxshilashga qaratilgan.
F i z i k a v i y u s u l l a r g a fizik-mexanikaviy va meliorativ tadbirlar qo‘llanish ya’ni erni ishlash, haydalma qatlamda agronomik jihatdan qimmatli struktura yaratish, tuproqning suv-fizik, issiqlik xossalari va rejimlarini yaxshilash singari tadbirlar kiradi.
Qo‘riq erlar ishlab chiqarish aylanmasiga kiritilib, madaniylashtirilgandan keyin, u tabiiy unumdorlik bilan bir qatorda sun’iy unumdorlikka ega bo‘la boshlaydi. Lekin tuproq qanchalik madaniylashtirilmasin, sun’iy unumdorlik bilan bir qatorda, doim tabiiy unumdorlikka ham ega bo‘ladi. Demak, bu har ikkala unumdorlik turlari bir-biri bilan bog‘liq. Erlar qanchalik uzoq muddat foydalanilib, uning madaniy holati yaxshilanib, yuqori agrotexnik tadbirlar tizimi qo‘llanilsa, tuproqning sun’iy unumdorligi ham shuncha yuqori bo‘ladi. Madaniy o‘simliklar tomonidan tabiiy va sun’iy unumdorliklar foydalanilganda, bular haqiqiy, samarali unumdorlikka aylanadi. Bundan tashqari potensial samarali unumdorlik ham ajratiladi. Bu unumdorlik tabiiyga nisbatan ancha yuqori bo‘lib, insonlarning erga sarflaydigan mehnati va moddiy mablag‘i sarfiga bog‘liq.
Tuproq unumdorligining kengaytirilgan qayta, takror yaratilish jarayonlari yuqori dehqonchilik madaniyati sharoitida, samarali va potensial samarali unumdorlikning muntazam ravishda oshib borishiga bog‘liq. Jadal dehqonchilik sharoitida tuproq unumdorligining takror yaratilishi asosan ikki yo‘l bilan, tuproqning moddiy tarkibini yaxshilash va texnologik usullardan samarali foydalanish orqali amalga oshiriladi. Birinchi usulga o‘g‘itlar va turli meliorantlardan, pestitsidlardan foydalanish hamda texnologik jihatdan qulay ekinlarni almashlab ekish, ikkinchisiga - erga mexanik ishlov berish yuli bilan tuproqning fizik holatini yaxshilash singarilar kiradi. Muayyan sharoitlarda bu usullardan to‘g‘ri va maqbul holda foydalanish zonal dehqonchilik tizimining mazmunini belgilaydi.