Pedagogik jarayon – o‘qituvchi va o‘quvchilar, tarbiyachi va tarbiyalanuvchilarning o‘zaro bir maqsadga qaratilgan, ya’ni o‘quvchi shaxsini har tomonlama rivojlantirish hamda kamol toptirishga qaratilgan hamkorlikdagi faoliyatini ifodalovchi pedagogik tizimdir.
S.T.Turg‘unov
«Shaxsan men o‘qituvchi deganda — zamon bilan hamqadam bo‘lgan jonkuyar, ziyoli shaxsni, maktab deganda — bilim va ma’rifat yog‘dusi taralib turadigan, Uchinchi Renessans poydevori qo‘yiladigan tabarruk maskanni ko‘z oldimga keltiraman»
SH.Mirziyoyev
K.D Ushinskiy g’oyalarida pedagogik jarayonning yagonaligi chuqur ifodalangan. U pedagogik jarayonni maktab faoliyatining ma’muriy, o’quv va tarbiya elementlarini bir butun tizim sifatida ifodalaydi.
Umumiy o‘rta ta’lim muassasalarida pedagogik jarayonni tashkil etishda ta’lim-tarbiya jarayonini tashkil etuvchi asosiy komponentlarini to‘liq ishtirokini ta’minlash, ta’lim-tarbiya tamoyillari va qonuniyatlariga to‘liq rioya etish, yangi zamonaviy pedagogik texnologiyalarni hamda usul va metodlarni qo‘llash, ta’lim-tarbiya berishning samarali shakllarini to‘g‘ri tanlash, ta’lim-tarbiya berish vositalaridan oqilona foydalanish, ta’lim-tarbiya jarayoni tashkil etish bosqichlarini tizimli amalga oshirish hamda boshqaruvga yangicha yondashuvni talab etadi.
Pirovard natijada o‘quvchilarni mustaqil va erkin fikrlaydigan, keng tafakkurli, qobiliyatli, tashabbuskor, izlanuvchan, g‘ayratli, yutuqlarga intiluvchi va erishuvchi, yuksak axloqiy sifat va fazilatlarga ega ma’naviy barkamol etib shakllantirishga erishiladi.
