Organizm funksiyasining nerv orqali boshqarilishi. Bosh miya va orqa miya barcha organlar bilan nervlar orqali bog‘langan. Miya bilan organlar oʻrtasida ikki tomonlama nerv bogʻlanishi mavjud. Bosh miya va orqa miya nerv impulslari, ya’ni nerv hujayralari membranalari orqali uzatiladigan elektr signallari orqali organlar ishini boshqarib turadi. Nerv impulslari ham organizmga biologik faol moddalar singari ta’sir ko‘rsatadi va hujayralar, organlar yoki organizm funksiyasini qo‘zg‘atadi yoki tormozlaydi.
Organizm funksiyasining nerv boshqarilishi miya bilan barcha organlar oʻrta- sida mavjud bo‘lgan ikki tomonlama bog‘lanish tufayli amalga oshadi.
Tashqi muhit sharoiti o‘zgarganida organlarda joylashgan nervlarning uch- lari - retseptorlar qo‘zg‘alib, nerv impulslari, ya’ni elektr signallari hosil qiladi. Signallar sezuvchi nerv tolalari membranalari orqali orqa miya va bosh miyaga uzatiladi. Harakatlantiruvchi nervlar esa bu signallarni miyadan tegishli organlarga oʻtkazadi. Organlardagi muskullar nerv impulslari ta’sirida qisqarib, organlar ish bajaradi. Organizm bilan tashqi muhit o‘rtasidagi ikki tomonlama nerv bog‘lanishi tufayli organizm tashqi muhitda sodir bo‘layotgan o‘zgarishlarga moslashib, organizm ichki muhiti doimiyligi saqlanib qoladi.
