O‘zbekiston yozuvchilar

XORAZM RAQSI
Davra oling, o‘ynoli,
“Lazgi” chaling, o‘ynoli.
Larza soling, o‘ynoli,
O‘ynab qoling, o‘ynoli!
Bu – navbahor, o‘ynoli,
Sayradi tor, o‘ynoli.
O‘rtada, yor o‘ynoli,
Dil intizor, o‘ynoli!
Sabo bo‘lib o‘ynoli,
Daryo bo‘lib o‘ynoli.
Ziyo bo‘lib o‘ynoli,
Dunyo to‘lib o‘ynoli!
Boqib har yon, o‘ynoli,
Qochsin yomon, o‘ynoli.
Zamon-zamon, o‘ynoli,
Omon-omon, o‘ynoli!
www.ziyouz.com kutubxonasi

---

MAQSUDAM
23
KLOD MONE CHIZGAN MANZARA
Asqad Muxtorga
Qayer bu?!
Oq-kulrang bo‘shliq.
Bug‘,
Tuman.
Yo tuz konlarimi?!
Balki yupqa qor?!
Yo ohor chaplangan quruq xolst, bo‘z?!
Aniq emas. Lekin nimalardir bor!
Boshqa zalga o‘tib ketdi hamrohlar,
Bilgim keldi bu lavh sirin, anglagim.
O‘rindiqqa botdim,
Yonimga cho‘kdi
Chet tilda gapirgan yana allakim.
Sukutda,
Unutib atrof-olamni.
Idrokni yoritib qabatlarini,
Asta ilg‘ay bordim oq-kulrang sathdan
Ajib manzaraning jihatlarini.
...Nafis tong ipagi,
Titroq simob ko‘l.
Oy nurin yopingan bog‘ tinch uyquda,
www.ziyouz.com kutubxonasi

---

Omon MATJON
24
Ko‘lda esa aksi...
Bu go‘zallikni
Bir ne buzmasa deb qotdim qo‘rquvda.
Yo‘q, yo‘q!
Bu ilohiy hayot go‘shasin
Rassom zap bekitgan berib rang o‘yin.
Bu shoshqin odamlar, bu tezkor asr,
Unga yetib borishi qiyin!
1979, Nyu York,
Metropoliten-muzeyi
www.ziyouz.com kutubxonasi

---

MAQSUDAM
25
SENI YAXSHI KO‘RAMAN
1
Sen oppoq ko‘ylakda
qorasoch – 
Tushimda ko‘rinding yosh pari,
Va bor-yo‘q xotirot olamim
Chekindi ruhimdan tashqari.
Kim bo‘lding? Tanimni osmondan,
Quyoshga nur qilib elatgan!
Kim bo‘lding? Mudroq bu tanamda,
Sanoqsiz daraxtlar gullatgan!
Bu sensan, muhabbat, tanidim,
O‘ylagan, kutganim, deganim.
Lekin sen, nahotki, bilmading,
Bu – bir tush, uyquda ekanim?
Na orzu etolmay bir bo‘sa,
Izhorga na bir so‘z uzilmay.
Tush birdan uzildi...
Armonlar
Qoldi qatlari buzilmay.
Lekin sen kelishga va’da ber,
Mayliga, tushimda, bir zamon – 
Muhabbat, men seni kutaman,
Kutaman, uyg‘onmay hech qachon!
www.ziyouz.com kutubxonasi

---

Omon MATJON
26
2
O‘qiy olmas bo‘ldim kitoblar,
harflar ko‘zga arang ko‘rinar,
faqat sening chehrang ko‘rinar,
so‘zlar dostonidan ketib.
Chaman kezsam endi tinchim yo‘q,
na kapalak, na rang ko‘rinar,
faqat sening chehrang ko‘rinar
gullar bo‘stonidan ketib.
Oqshom ko‘zni yumsam ham shu hol,
ko‘kda yalt-yult bir jang ko‘rinar,
faqat sening chehrang ko‘rinar,
yulduz osmonidan ketib.
Muhabbat deb keldim dunyoga,
oshiqqa yer-ko‘k tang ko‘rinar.
faqat sening chehrang ko‘rinar,
dunyo har yonidan ketib.
3
Taqdir, nega ishqning ikki yulduzin,
Bir qutlug‘ ayyomda etdingu bunyod.
Quyun, chochinlarga tashlading bizni,
Tiniq bir osmonda qo‘ymading ozod?!
www.ziyouz.com kutubxonasi

---

MAQSUDAM
27
Taqdir, nega bizni zamondosh aylab,
Bir hayot tuzini ko‘rgizib baham.
Bir bor to‘ydirmading lekin diydorga,
Uni ham, meni ham etmading xurram?!
Nega bir tuproqda berib tavallud,
Bu jannat diyorda bor etib bizni.
Yer osti, yer ustin ganj etding, lekin
Aytishga qo‘ymading eng muhim so‘zni?!
Nega bu ming yillik nomdor shahar – 
Bag‘ri Sharq-u Gʻarbga ochiq bir makon, – 
Topib berolmadi ikkimiz uchun.
Yo bir yo‘l, hech qursa, bitta oshiyon!
Chaqin, kamalaklar darg‘asi taqdir,
Qismatlar qomusin bitganing mahal,
Avval yuraklarga boq, titrab turgan,
Muhabbat yo‘llarin ravon et avval!
4
Ko‘p kezma daraxtzor bog‘lar ichinda,
Daraxtlar dil do‘sting bo‘lolmas sening.
Chorlasang kelolmas, yonib qucholmas,
Sen faqat mening bo‘l, 
meniki,
mening.
www.ziyouz.com kutubxonasi

---

Omon MATJON
28
Ko‘p qolma jarang suv buloq bo‘yinda,
Buloq ham dil do‘sting bo‘lolmas sening.
Qaynashim chashmadan teran joydandir,
Sen faqat mening bo‘l, 
meniki, 
mening.
Ko‘p titma muhabbat kitoblarini,
Kitoblar dil do‘sting bo‘lolmas sening.
Bu ishqning tarixi mening qalbimda,
Sen faqat mening bo‘l, 
meniki, 
mening.
5
Turmushning yo‘rig‘i bois gohida,
Kutganlaring qilmas saxovat, karam.
Shundayam orzum o‘zing bo‘lgansan,
Qishdan yaratganman o‘ziga ko‘klam.
Bir kunlik nasiba poyida qushlar,
Yerga ming bor chumduk ursalar sarson.
Men kutdim labingdan bir totishni zor,
So‘ng ming yil yashay deb mast-u bearmon.
Kunduz – hamma nurdan ko‘zi to‘q chog‘lar,
Yulduzlarni hech kim olmas yodiga!
www.ziyouz.com kutubxonasi

---

MAQSUDAM
29
Sen siyoh sochingni yoy uchqunlatib,
Kunduz ham tush ko‘rgan oshiq otiga...
Kim qanday kun ko‘rsa ko‘rgan zamon bu,
Shoirning holidan kulma, iltimos:
Xayoldir yagona ovunchi uning,
Tiriklik manbayi orzudir, xolos.
6
Quyosh tong oldida qizargan kabi,
Gʻunchalar qisinib yuz yorgan kabi 
iymanib kelasan,
ochilolmaysan:
“Anavilar bor-da, o‘shalar...” deysan.
Qo‘lingda Zuhradan go‘yo bir xat bor,
go‘yoki Laylidan meros qismat bor,
ming yillik yozg‘utdan qutulolmaysan:
“Anavilar bor-da, o‘shalar...” deysan.
Azizam, yulduzlar falakda baxtli,
inson o‘z qalbida – 
yurakda baxtli...
Sen sira o‘zingni nurga solmaysan:
“Anavilar bor-da, o‘shalar...” deysan.
Gulim, “o‘sha”larga o‘chma-o‘ch ochil,
sening uchun bugun bog‘lar bo‘sh, ochil!
www.ziyouz.com kutubxonasi

---

Omon MATJON
30
Ularni qo‘yaver, ular qolmaslar,
chunki bizlar kabi seva olmaslar!
7
Turnalar uchdi,
Bulutlar ko‘chdi.
Og‘ochlarning barglari
Yerlara tushdi.
Gʻamgin ko‘rdim seni bu kez-a,
Bahoringni bermagil kuz-a,
Tabassum qil!
Nechun oy yo‘qdir,
Nurga joy yo‘qdir.
Yoshli ko‘zing bor,
Jo‘shqin soy yo‘qdir.
Gʻamgin ko‘rdim seni bu kez-a,
Yosh yarashmas bu chaqmoq ko‘z-a,
Tabassum qil!
Javobsiz so‘zim,
Zor o‘ldi ko‘zim.
Darding nadir, ayt,
Jon tutay o‘zim.
Gʻamgin ko‘rdim seni bu kez-a,
Gʻam tushmasin bu shirin so‘z-a,
Tabassum qil!
www.ziyouz.com kutubxonasi

---

MAQSUDAM
31
Qo‘zg‘alsin tog‘lar,
Chayqalsin bog‘lar.
Quyosh yuzindan
Yo‘qolsin dog‘lar.
Gʻamgin ko‘rdim seni bu kez-a,
Dog‘ yarashmas bu oppoq yuz-a,
Tabassum qil!
8
Nogahon derazam chertilar,
Kelgan kim? Ayni tong ne sazo!
...Yozaman deb xatlar, 
Yozmadi.
Kimdi u? E, senmi, xush sabo!
Sabojon, bor o‘shal bog‘ tomon,
Gullarni gapga sol tamanno.
Keltirgil iforli xabarlar,
Bor, sodiq sirdoshim, xush sabo.
U barmoq tekizib jujikkan,
muz buloq ustida bo‘l paydo. 
Oppoqmi suv osti toshlari,
so‘zlab ber, jon do‘stim, xush sabo.
Bor! Uning darchasini to‘sguvchi
ichkovak tolni eg, sol g‘ovg‘a...
Oq qog‘oz yotarmi so‘rida,
o‘sma-chi, qalam-chi, ayt, sabo?
www.ziyouz.com kutubxonasi

---

Omon MATJON
32
Fazoni bo‘ylaydi yo‘ldoshlar,
Yer bilan so‘zlashar Oy, Zuhro...
Shu yaqin, sas yetar bir joydan,
Menga hech xabar yo‘q, xat... sabo...
9
Sog‘indim men seni.
Ko‘rgim keladi,
Lekin aytolmayman hech kimga buni.
Shahar g‘uj tosh o‘rmon. Boshimga tushgan,
quyoshga talpingan og‘ochning kuni.
Sog‘indim. Kun-tunlar qatlandi qalbda,
Rangin ipaklari sog‘inchning.
Agar
yoysam yo‘llardagi simyog‘ochlarga,
zorlanib yetardi Samarqand qadar.
Sog‘indim, jahonda balki hech bir til,
Hijronim mukammal yozganmas hali.
Qadim yozmalardek ul kunlar yitdi,
Bir so‘zingni eslash olam tasalli...
Daraxtman. Men million yaprog‘im bilan,
boqaman zor titrab sen kelar kunga.
Sog‘indim men seni. 
Ko‘rgim keladi,
Lekin aytolmayman buni hech kimga. 
www.ziyouz.com kutubxonasi

---

MAQSUDAM
33
10
Mumkinmi,
Men bugun ketar chog‘ingda,
Esdalikka biron narsa so‘rasam?
Bir ilinj istaydi yuragim sendan,
Faqat yupatmagil va ichma qasam.
Endi uchrashuvlar bo‘lmas, bilaman,
Bir kunda to‘rt fasl evrilmas endi.
Gʻiybat qashqirlari, hasad itlari,
Endi ochdan o‘ling, keting, bas endi...
Mumkinmi, men sendan ketar chog‘ingda,
Esdalikka biron narsa o‘tinsam?
Uzun qora soching ko‘zdan uzildi,
Xo‘pmi, uzun tunga hamdard tutinsam?
Bir o‘xshamas qiliq qilsam nogahon
Gʻir-g‘ir yosh aylangan ul ko‘zlar qani?
Qani
Ul qish, kuzning zahridan zada – 
Orzu qushlarimning osud maskani?
Senga ne berdimki, bu soat yanib,
Qalbimga bir ovunch qilurman ta’ma?
Ketma deb aytishga haqqim yo‘q axir,
Xayr deyishga ham qo‘ymas bir nima...
www.ziyouz.com kutubxonasi

---

Omon MATJON
34
Chunki sergak, yog‘du, xunvaqt ruh bilan
Men tuydim, bilaman, sezasan sen ham:
Bizni uchrashtirdi sirli bir Shodlik,
Endi ayirmoqda anglab bo‘lmas Gʻam...
Ilinj shul:
ko‘r taqdir ajratsa hamki.
Pinhona qovushgan ikki tuyg‘uni,
Mening yuragimdan uzolmas aslo
Sendan yodgor qolgan nurli qayg‘uni...
11
Umr o‘tar, vaqt o‘tar,
Xonlar o‘tar, taxt o‘tar.
Omad o‘tar, baxt o‘tar,
Lekin hech qachon chiqmas yodimdan
Sening yurishlaring, sening kulishlaring.
Bahorda bog‘ na go‘zal,
Qor tushsa tog‘ na go‘zal,
Bu yoshlik chog‘ yana go‘zal,
Lekin hech qachon chiqmas yodimdan
So‘zsiz qarashlaring, holim so‘rashlaring.
Oy chiqar goh zaholi,
Do‘stlar ko‘pdir vafoli.
Hayot shundan safoli,
Lekin hech qachon chiqmas yodimdan
Sekin so‘zlashlaring, pinhon izlashlaring.
www.ziyouz.com kutubxonasi

---

MAQSUDAM
35
Umr – yo‘l, qayrilish – ko‘p,
Uchrashish, ayrilish ko‘p.
Unutish, aytilish ko‘p,
Lekin hech qachon chiqmas yodimdan
O‘sha kulishlaring, o‘sha kelishlaring.
12
Million jajji fonus yoqdi daraxtlar,
Kamalak. Yashillik Yomg‘ir yuz foiz...
Imon keltirgayman ammo – 
bu bog‘lar,
yorug‘dir bizning-da sevgimiz bois.
Har yog‘och, har shoxni uyg‘otdi Navro‘z,
gul bilan qitiqlab karaxt tanini.
U seni ko‘rsatdi menga. 
Va bildim
yuragim qayerda joylashganini!
Oh, bahor! Zaminning so‘z erkinligi!
Maysalar kuylashar ko‘kka o‘rlashib.
Shu buyuk quvonchga jo‘r bo‘ldik biz ham,
lablarim lablaring bilan birlashib. 
Umr nima o‘zi? 
Imon keltiray,
hikmat bu, bahordek qisqa va ayon:
Sevgi ila mas’ud onlarni o‘yla,
Asil umr shuldir. Qolgani – yolg‘on...
www.ziyouz.com kutubxonasi

---

Omon MATJON
36
QO‘SHIQ