Qarori kadastr sohasida ayrim davlat xizmatlari ko‘rsatishning ma’muriy reglamentlarini tasdiqlash to‘G‘risida

2-bob. Davlat xizmatlari ko‘rsatish tartibi
7. Ko‘p yillik dov-daraxtlarga bo‘lgan mulk huquqini davlat ro‘yxatidan o‘tkazish bo‘yicha davlat xizmatlarini ko‘rsatish ushbu Reglamentga 1-ilovada keltirilgan sxemaga muvofiq amalga oshiriladi.
8. Yuridik va jismoniy shaxslar yoki ularning vakolatli vakillari (keyingi o‘rinlarda — ariza beruvchi) ko‘p yillik dov-daraxtlarga bo‘lgan mulk huquqi yuzaga kelganda, boshqa shaxsga o‘tganda, bekor qilinishida, cheklanganda davlat ro‘yxatidan o‘tkazish uchun Davlat xizmatlari markazlariga o‘zi kelib murojaat etadi yoki O‘zbekiston Respublikasi Yagona interaktiv davlat xizmatlari portalida (keyingi o‘rinlarda — YIDXP) davlat xizmatidan elektron shaklda foydalanish uchun ro‘yxatdan o‘tadi.
9. Ariza beruvchi o‘zi kelib murojaat etgan taqdirda, Davlat xizmatlari markazlari xodimi — ariza beruvchi nomidan, YIDXP orqali murojaat etgan taqdirda esa, mazkur Reglamentga 2-ilovaga muvofiq shakldagi so‘rovnomani elektron shaklda mustaqil to‘ldiradi. Uchinchi shaxslar manfaati uchun harakat qilayotganda, so‘rovnomaga belgilangan tartibda rasmiylashtirilgan ishonchnoma ilova qilinadi.
Arizada ko‘p yillik dov-daraxtlar o‘sadigan yer uchastkasining kadastr raqami ko‘rsatiladi hamda ko‘p yillik dov-daraxtlarga bo‘lgan huquqni belgilovchi hujjatlar ilova qilinadi.
Davlat xizmatlari markazlari tomonidan ariza beruvchilardan ushbu bandda ko‘rsatilmagan ma’lumotlarni hamda boshqa hujjatlarni talab qilish qat’iyan taqiqlanadi.
10. So‘rovnoma to‘ldirilgandan so‘ng ariza beruvchi ma’lumotlarning to‘g‘riligini tekshirib, so‘rovnomani identifikatsiya qilishning zamonaviy vositalari bilan tasdiqlaydi.
Ariza beruvchi tomonidan so‘rovnomani ERI bilan tasdiqlash talab etilmaydi.
11. Ko‘p yillik dov-daraxtlarga bo‘lgan huquqlarni davlat ro‘yxatidan o‘tkazish uchun undiriladigan to‘lov miqdorlari Vazirlar Mahkamasining “Davlat kadastri sohasida davlat xizmatlari narxlarini belgilashda tabaqalashtirilgan yondashuv tartibini takomillashtirish to‘g‘risida” 2014-yil 10-iyuldagi 186-son qaroriga asosan belgilanadi.
Davlat xizmati ko‘rsatilishi uchun YIDXP orqali murojaat etilganda, belgilangan yig‘im summasining 90 foizi undiriladi.
Davlat xizmati uchun yig‘imni undirish Yagona billing tizimi orqali amalga oshiriladi.
12. Yig‘imlar summasi quyidagi tartibda taqsimlanadi:
a) Davlat xizmatlari markazlariga o‘zi kelib murojaat etganda:
20 foizi — O‘zbekiston Respublikasi Adliya vazirligining Davlat xizmatlarini rivojlantirish jamg‘armasining shaxsiy hisobvarag‘iga;
qolgan mablag‘larning 80 foizi O‘zbekiston Respublikasi Davlat soliq qo‘mitasi huzuridagi Kadastr agentligi Davlat kadastrlari palatasining hisobvarag‘iga, 20 foizi tegishliligi bo‘yicha Davlat kadastrlari palatasining hududiy boshqarmalari hisobvarag‘iga o‘tkaziladi;
b) YIDXP orqali murojaat etilganda:
10 foizi — O‘zbekiston Respublikasi Adliya vazirligining Davlat xizmatlarini rivojlantirish jamg‘armasining shaxsiy hisobvarag‘iga;
11,25 foizi — Axborot-kommunikatsiya texnologiyalarini rivojlantirish jamg‘armasining elektron hukumat va raqamli iqtisodiyotning idoralararo loyihalarini moliyalashtirish bo‘yicha maxsus hisobvarag‘iga;
qolgan mablag‘larning 80 foizi O‘zbekiston Respublikasi Davlat soliq qo‘mitasi huzuridagi Kadastr agentligi Davlat kadastrlari palatasining hisobvarag‘iga, 20 foizi tegishliligi bo‘yicha Davlat kadastrlari palatasining hududiy boshqarmalari hisobvarag‘iga o‘tkaziladi.
13. Ariza beruvchi davlat xizmatidan foydalanishdan mulk huquqi davlat ro‘yxatidan o‘tkazilguniga qadar uni ko‘rsatishdan bosh tortish huquqiga ega.
Ariza beruvchi davlat xizmatidan foydalanishdan bosh tortganda, uning so‘rovnomasi ko‘rilmasdan qoldiriladi. Bunda to‘langan yig‘im summasi qaytarilmaydi.
14. Ariza beruvchi Davlat xizmatlari markaziga kelib murojaat etganda, uning so‘rovnomasi Davlat xizmatlari markazlari xodimi tomonidan to‘ldirilib, ariza beruvchi tomonidan tasdiqlanganidan so‘ng barcha hujjatlar real vaqt rejimida tegishliligi bo‘yicha Kadastr agentligi Davlat kadastrlari palatasining boshqarmalariga elektron shaklda yuboriladi. YIDXP orqali murojaat qilinganda esa so‘rovnoma avtomatik tarzda tegishliligi bo‘yicha Kadastr agentligi Davlat kadastrlari palatasining boshqarmalariga yuboriladi.
15. Quyidagilar ko‘p yillik dov-daraxtlarga bo‘lgan mulk huquqini davlat ro‘yxatdan o‘tkazishni rad etish uchun asos hisoblanadi:
taqdim etilgan hujjatlarda noto‘g‘ri yoki buzib ko‘rsatilgan ma’lumotlarning mavjudligi;
hujjatlarni lozim tarzda rasmiylashtirmay taqdim etish;
ko‘p yillik dov-daraxtlar joylashgan yer uchastkasiga bo‘lgan huquqning davlat ro‘yxatidan o‘tkazilmaganligi;
ko‘p yillik dov-daraxtlarga bo‘lgan mulk huquqini tasdiqlovchi hujjatlar taqdim etilmaganligi;
ko‘p yillik dov-daraxtlarning birlamchi kadastr yig‘majildining (kadastr pasporti) mavjud emasligi;
davlat ro‘yxatidan o‘tkazuvchi organda ushbu ko‘chmas mulk obyektining mansubligi masalasida nizolar borligidan dalolat beruvchi sud hujjatlarining mavjudligi;
vakolatli organ tomonidan ko‘chmas mulk obyektiga taqiq yoki xatlov qo‘yilganligi;
ro‘yxatdan o‘tkazuvchi tomonidan huquqlarni davlat ro‘yxatidan o‘tkazish to‘xtatib turilgan hollarda, taqdim etilgan materiallardagi kamchiliklarning uch ish kuni mobaynida bartaraf etilmasligi;
huquqlarning yuzaga kelishini belgilamaydigan hujjatlarning taqdim etilishi;
davlat xizmatlarini ko‘rsatish uchun yig‘imni to‘lamaslik (bunda davlat xizmatidan foydalanish uchun xabarnomada ko‘rsatilgan to‘lov miqdori bir oy mobaynida to‘lanmagan buyurtmalar avtomatik rad etiladi).
Boshqa asoslarga ko‘ra, shu jumladan ro‘yxatdan o‘tkazish maqsadga muvofiq emas degan vaj bilan ro‘yxatdan o‘tkazishni rad etishga yo‘l qo‘yilmaydi.
Ariza beruvchi ro‘yxatdan o‘tkazish rad etilgan kundan boshlab bir oy mobaynida mulk huquqini davlat ro‘yxatidan o‘tkazish uchun yig‘imni to‘lamasdan qayta murojaat qilish huquqiga ega.
16. Davlat kadastrlari palatasining boshqarmalari so‘rovnoma tushgandan so‘ng ikki ish kuni mobaynida ko‘p yillik daraxtlarga bo‘lgan mulk huquqini davlat ro‘yxatidan o‘tkazadi, ko‘p yillik daraxtlarga bo‘lgan mulk huquqi davlat ro‘yxatidan o‘tkazilganligi haqida QR-kod (shtrixli kod) qo‘yilgan Reyestrdan ko‘chirmani elektron shaklda rasmiylashtiradi va Davlat xizmatlari markazlariga (o‘zi kelib murojaat etgan taqdirda) yoki ariza beruvchiga (elektron shaklda murojaat etgan taqdirda) YIDXP orqali yuboradi.
17. Davlat xizmatlari markazlari Reyestrdan ko‘chirma tushgandan so‘ng real vaqt rejimida uni ariza beruvchining elektron manziliga yuboradi va ariza beruvchini bu haqda axborot-kommunikatsiya tizimi orqali xabardor qiladi. Davlat xizmatlari markazlari xodimi ariza beruvchi o‘zi kelib murojaat qilgan taqdirda, ariza beruvchining so‘roviga ko‘ra, unga Reyestrdan ko‘chirmani elektron shaklda yoki qog‘oz shaklda berishi mumkin.