Sanli texnologiyalar ministrligi

Informaciya texnologiyaları (IT) - bul informaciya processlerin (informaciyanı jıynaw, saqlaw, izlew, qayta islew, uzatıw hám t.b ) hár qıylı qurallar járdeminde basqarıwdı shólkemlestiriw usılları bolıp tabıladı.
Informatika - (informatsiya), yaǵnıy xabar, informaciya maǵlıwmatlardı jıynaw, izlew, saqlaw, qayta islewdiń nızamları hám usılların úyrenedi.
Avtomatlastırıw - bul insan jumıs iskerligin mashina hám mexanizmler menen almastırıw bolıp esaplanadı. Ol texnikalıq, shólkemlestirilgen hám ekonomikalıq mazmundaǵı hárekettegi hám de ilajlar kompleksinen ibarat bolıp, islep shıǵarıw procesi, basqarıw procesiniń ol yamasa bul jumısın ámelge asırıwda insan qatnasıwın salıstırmalı yamasa pútkilley sheklew imkaniyatın beredi.
Avtomatlastırılgan informaciya texnologiyası (AIT) - basqarıw wazıypaların sheshiw ushın sistemalı islengen informaciya processlerin ámelge asırıw usıl hám qurallar kompleksi bolıp tabıladı. Ol esaplaw texnikası hám baylanıs qurallarınnan paydalanıw tiykarında rawajlanǵan programmalıq támiynattı qollaw bazasında orınlanadı.
Házirgi kúnde pán hám texnikada kóp qollanılatuǵın túsiniklerden biri - sistema bolıp tabıladı. Sistema - bul qurawshılardan ibarat bir pútinlik degen mánisti ańlatadı. Ulıwmalıq halda sistemaǵa tómendegishe táriyp keltiremiz.
Sistema - bul óz-ara baylanıslı hám birden-bir maqsetke erisiw ushın málim qaǵıyda tiykarında óz-ara múnásibette bolatuǵın elementler kópligi. Bul elementler kópligi ápiwayı elementler jıyındısınan ǵana ibarat bolmay, hár bir elementte óz gezeginde sistema bolıwı múmkin.
Sistemanı basqarıw maqsetine málim bir funkciyanı ámelge asırıw arqalı erisiledi. Bunday funkciyalarǵa :

• 
  joybarlaw (rejelestiriw);
  
• 
  analiz etiw;
  
• 
  qadaǵalaw;
  
• 
  esabat;
  
• 
  qarar qabıl etiw funktciyaları kiredi.
  

Joybarlaw dep basqarıwdıń maqseti hám oǵan erisiw jolların anıqlaw, háreket jobasın dúziw jáne onıń rawajın anıqlawǵa aytıladı.