Sotsiologiyaa

Iqtisodiy munosabatlarni o’rganishda asosiy e`tibor: mehnatning ijtimoiy muammolari, mehnat faoliyati va taqsimot munosabatlariga qaratiladi.
Jamiyat a`zolari tomonidan yaratilgan moddiy boyliklar ular o’rtasida qanday tarzda va qay miqdorda taqsimlanishidagi farq ijtimoiy guruhlar o’rtasidagi farqni keltirib chiqaradi. Xususiy mulkning qonuniy deb e`lon qilinishi bilan jamiyatimiz ijtimoiy tarkibidagi tekischilik asta-sekin o’z o’rnini ijtimoiy mavqei jihatidan va etishtirilayotgan moddiy ne`matlarning taqsimoti jihatidan farq qiluvchi ijtimoiy guruh va sinfiy tabaqalarga bo’linib bormoqda.
Respublikaning asta-sekin bozor munosabatlariga o’tib borish davrida Prezident I.A. Karimov tomonidan belgilangan besh tamoyilga asoslangan tarzda siyosat yurgizilmoqda. Bularning birinchisi – iqtisodiyotning siyosatdan ustun bo’lishi, uni har qanday mafkuraviy tazyiqlardan ozod qilish lozimligi.
Ikkinchisi – iqtisodiyotni boshqarishda, ayniqsa, bozor iqtisodiyoti sharoitida, yangi tuzum barpo etilayotganda davlat boshqaruv tizimini qo’ldan chiqarmasligi, ya`ni davlat asosiy islohotchi bo’lmog’i lozimligidir.
Uchinchisi – qonunlarga barchaning barobar rioya etishini ta`minlash, ya`ni qonun ustuvorligi.
To’rtinchisi – kuchli ijtimoiy siyosat yuritish.
Beshinchisi – bozor iqtisodiyotiga shoshqaloqlikka yo’l qo’ymay, bosqichma-bosqich o’tish zarurligi. Taqsimot munosabatlari sotsiologiya predmetiga taalluqli bo’lib, uning tarkibiga ishlab chiqarish qurollari taqsimoti, jamiyat a`zolarining ishlab chiqarishning turli tarmoqlari bo’yicha joylashuvi va jamiyat tomonidan ishlab chiqarilgan moddiy ne`matlar, ishlab chiqarish qurollari va iste`mol mollari kiradi. Mohiyat e`tibori bilan taqsimot munosabatlari mavjud ishlab chiqarish munosabatlari xarakteriga mos keladi.
Alohida kishilar va ijtimoiy guruhlarning iqtisodiy, ijtimoiy va siyosiy faoliyati mohiyati taqsimot muno­sabatlarining xarakteri bilan belgilanadi. Ijtimoiy guruhlar, tabaqalar va alohida olingan kishilarning real daromadlari darajasi, bu daromadlarning o’zgarishi va rivojlanishi istiqbollari ularning ijtimoiy-siyosiy pozitsiyalarini belgilaydi.
Sobiq sovet tuzumi davrida ijtimoiy guruhlarning moddiy daromadlarini tenglashtirish siyosati yurgizildi. Natijada kishilarning mehnatga munosabati susayib, ijodiylik, omilkorlik, ishbilarmonlik, tadbirkorlik, moddiy manfaatdorlik kabi ijtimoiy-iqtisodiy rivojlanishning muhim stimullari yo’qola borayotgan edi.
Demak, taqsimot munosabatlari jamiyat hayoti, ay­niqsa, uning iqtisodiy jihatdan rivojlanishida muhim o’rin tutadi. Bozor iqtisodiyotiga bosqichma-bosqich o’tish munosabati bilan O’zbekistonda mulkchilik turli shakllarining joriy qilinishi va ularning davlat himoyasiga olinishi taqsimot munosabatlarida tubdan o’zgarishlarga olib kelmoqda. Bu esa, o’z navbatida, jamiyat iqtisodiy rivojlanishini ta`minlashga xizmat qilmoqda.
O’zbekiston o’z milliy puliga ega bo’lishi munosabati bilan iqtisodiy va taqsimot munosabatlarida sezilarli o’zgarish sodir bo’la boshladi. O’z navbatida mamlakat ichki bozorini to’ldirish — davlat siyosati darajasiga ko’tarildi. Ammo mustaqillikning dastlabki yillarida hamdo’stlik mamlakatlari o’rtasidagi iqtisodiy integratsiyaning vaqtincha buzilganligi oqibatida yuzaga kelgan iqtisodiy taqchillik, ayniqsa, xalq iste`moli mollari tanqisligi iqtisodiy va taqsimot munosabatlari­ga ham sezilarli ta`sir ko’rsatdi. Uning oqibatida kishilarning turmush darajasi ancha pasaydi. SHunga qaramasdan, O’zbekiston davlatining bu sohadagi siyosati milliy boylikning ko’payishini, respublikaning mustaqilligini mustahkamlashni, odamlarga munosib turmush va ish sharoitlarini ta`minlaydigan qudratli, barqaror va jo’shqin rivojlanib boruvchi iqtisodiyotni barpo etishni ko’zda tutgan buyuk maqsaddan iborat bo’lmoqda.
Prezidentimiz tomonidan 2010 yil 12 noyabrda Parlamentimiz palatalarining qo’shma majlisida ilgari surilgan kontseptual masalalarning 6-yo’nalishi “Demokratik bozor iqtisodiyotini va islohotlarni yanada chuqurlashtirish” ga qaratilgan bo’lib, unda “xususiy mulkning xuquq va himoyasini mustaxkamlash, mulkdor qonuniy yo’l bilan qo’lga kiritgan yoki yaratgan o’z mulkining daxlsizligiga shubha qilmasligini ta`minlashga qaratilgan kafolatlar tizimini yaratish zarurligi, tadbirkorlar o’z biznesiga bexavotir investitsiya kiritishi, ishlab chiqarish faoliyatini kengaytirishi, mahsulot xajmi va olayotgan daromadini ko’paytirishi, o’z mulkiga o’zi egalik qilishi, foydalanishi va tasarruf etishi lozim” ⁵⁷ligiga keng to’xtalib o’tdi.
Xulosa qilib aytganda, iqtisodiy va taqsimot munosabatlari sotsiologiya fani doirasidagi tadqiqot ob`ekti sifatida muhim o’rin tutadi.
Jamiyatning ijtimoiy tarkibida ijtimoiy-sinfiy munosabatlar ham alohida o’rin egallaydi. Sobiq sovet sotsiologiyasida sinfiy munosabatlar, sinfiy kurash masalalariga juda keng o’rin berilib, bu munosabatlar ijtimoiy tarkibdagi boshqa barcha elementlar, munosabatlar ichida eng muhim va belgilovchi hisoblangan. Buning sababi, unda jamiyatning iqtisodiy tarkibi boshqa ijtimoiy guruhlardagiga nisbatan to’laroq va aniqroq aks etadi, deb ko’rsatilgan. Haqiqatan ham sotsializm davrida mavjud ishchilar va dehqonlar sinfi jamiyatning eng kam ta`minlangan, quyi darajadagi sinflarini tashkil qildi. Intelligentsiya ijtimoiy qatlami esa moddiy ta`minlanganlik jihatidan ulardan unchalik farq qilmagan. O’tgan davrda, asosan, ikki sinf — ishchilar va dehqonlar sinfi va intelligentsiya qatlami mavjud deb ko’rsatilib, jamiyat ijtimoiy tarkibidagi boshqa guruhlar (masalan, yuqori tabaqa chinovniklari, mafiya guruhlari va shu kabilar)ning ahamiyati mutlaqo tilga olinmas edi.