Temur tuzuklari

Xulosa :



Xulosa qilib shuni aytish joizki “Temur tuzuklari” bu faqat Amir Temurning tarjimai holidan iborat asar emas, balki Movarounnahrning hali yaxshi o‘rganilmagan ijtimoiy-siyosii tarixi hamdir. Ikkiichidan, bu asar Amir Temur asos solgan nisbatan markazlashgan feodal tuzilishini, XIV asrda jahonga dahshat solgan Temur qo‘shining tarkibi, feodal munosabatlarini va boshqa ilmiy masalalarni o‘rganishda muhim manba vazifasini o‘tashi mumkin.
Oʻz navbatida, “Temur tuzuklari” asari davlatni idora qilish usullari, qoʻshinni tashkil etish qoidalari, urushlarda amalga oshirilishi zarur boʻlgan turli harbiy uslublar singari qator siyosiy, huquqiy, harbiy va axloqiy gʻoyalar va meʼyorlarni oʻz ichiga olgan.
“Temur tuzuklari”ning markazida inson, uning qadr-qimmatini joyiga qoʻyish turadi. Shu maʼnoda Sohibqironning huquqiy qarashlarida mamlakat ishlari tuzuki alohida ahamiyatga egadir.
“Saltanat ishlarini qonun va qoidalar, toʻra va tuzukka solib, saltanatim martabayu eʼtiborini saqladim”, deyiladi “Temur tuzuklari”da. Unda saltanat obroʻ-martabasini saqlashga doir quyidagi toʻrtta asosiy tuzuk sanab oʻtilgan:
“Birinchidan, saltanatim qonun-qoidalarini islom dini va kishilarning eng xayrlisi (hazrati Muhammad)ning shariatiga bogʻlab, izzatu hurmatlash vojib boʻlgan onhazratning avlodi va sahobalariga muhabbat bildirish asosida tuzdim. Saltanatim martabasini toʻra va tuzuklar asosida shunday saqladimki, uning ishlariga aralashishga hech bir kimsaning qurbi yetmasdi.
Ikkinchidan, sipohu raiyatni umid va qoʻrquv orasida saqladim. Doʻst-dushmanni murosayu madora martabasida tutdim. Qilmishlarini, aytgan gaplarini sabr-toqat va chidam bilan oʻtkazdiim. Doʻst-dushmandan kimki menga iltijo qilib kelsa, doʻstlarga shunday muomala qildimki, doʻstligi yanada ortdi, dushmanlarga esa, shunday munosabatda boʻldimki, ularning dushmanligi doʻstlikka aylandi…
Uchinchidan, hech kimdan oʻch olish payida boʻlmadim. Tuzimni totib, menga yomonlik qilganlarni Parvardigori olamga topshirdim. Ish koʻrgan, sinalgan, shijoatli er-yigitlarni qoshimda tutdim. Sofdil kishilar, sayyidlar, olimlar va fozillarga dargohim doim ochiq edi. Nafsi yomon himmatsizlarni, koʻngli buzuq qoʻrqoqlarni majlisimdan quvib yubordim.
Toʻrtinchidan, ochiq yuzlilik, rahm-shafqat bilan xalqni oʻzimga rom qildim. Adolat bilan ish yuritib, jabr-zulmdan uzoqrokda boʻlishga intildim”.
“Temur tuzuklari”da davlat boshqaruvining har bir sohasi va har qaysi mansab darajasi boʻyicha muayyan tuzuklar bitilgan. Amir Temur 12 ta eng muhim tuzukni oʻziga shior qilib olgan va saltanatni tasarrufida saqlash uchun ularga qatʼiy amal qilgan.
Shunday qilib, 27 mamlakatdan tarkib topgan buyuk saltanat asoschisi Sohibqiron Amir Temur ibn Taragʻay yirik davlat arbobi, mohir diplomat, ulugʻ sarkarda, ilmu madaniyat homiysi, haq va adolatning jasoratli yalovbardori sifatida milliy davlatchilikda, huquq va siyosat sohasida oʻzidan unutilmas va barhayot taʼlimotlar, toʻra-tuzuklar qoldirgan.
Amir Temurning huquqiy qarashlari va qonunchilik tizimi butun Temuriylar saltanatida hayotning barcha jabhalarida oʻz aksini topib, ulkan amaliy ahamiyatga ega boʻlgan. Jumladan, Buyuk Ipak yoʻli xavfsizligini taʼminlashga xizmat qilganki, bu bilan savdo-tijorat rivojiga katta hissa qoʻshgan Sharqu Gʻarb mamlakatlarini bir-biriga yanada yaqinlashtirgan.
Qonunga asoslangan tizimning ahamiyatini chuqur anglagan Amir Temur haqli ravishda “Kuch — adolatda” degan oliy meʼyorni oʻziga shior qilib olgan va hatto ushbu hikmatni uzuk-muhriga oʻyib yozdirgan. Bu haqda Ibn Arabshoh shunday guvohdik beradi: “Temur tamgʻasining naqshi “Rosti rasti” boʻlib, bu “haqgoʻy boʻlsang, najot topasan” demakdir”. Sohibqironning bu purhikmat soʻzlari bugun ham qudratli demokratik huquqiy davlat qurish uchun asosiy yoʻllanma hisoblanadi.
Amir Temur asos solgan buyuk davlat oʻzining turli bosqichlarida — ham Turon, ham Xuroson, ham Eron, ham Hindistonda adolat meʼyorlariga asoslangan tuzum sifatida olam ahlining diqqatini oʻziga tortib, hanuz tarixiy ahamiyatini yoʻqotmagan. Bugungi kunda Sohibqironning sud va qonunchilikka munosabati ham alohida oʻrnak vazifasini oʻtaydi. Zero, bundan olti asr burun Movarounnahr sud tizimida oʻziga xos tartib va qoidalar mavjud boʻlgan.
Oʻzbekiston istiqlolga erishgach, Amir Temur shaxsi yana Vatan va millat timsoliga aylandi. Amir Temur nomi, uning siymosi xalqimizni birlashtirish, jipslashtirish, iymon-oqibatli boʻlish, qudratli kelajagimizni qurishda bizga yangi-yangi kuch-quvvat va shijoat bagʻishlab turibdi. Zero, maʼnaviyatimizning eng teran oʻq tomirlaridan biri — ulugʻ zot Amir Temur siymosidir. Sohibqiron siymosi insoniyat tarixida bizgacha boʻlgan, bizdan keyin ham boʻladigan katta bir olamshumul voqelikdir.