I. Fanning mazmuni “Maktabgacha ta’limda tasviriy faoliyat” fanidan tasviriy san’at asoslarini o‘rganish, maktabgacha ta’lim muassasalarida tasviriy faoliyat mashg‘ulotlarini to‘g‘ri tashkil qilish, bolalarda shu fan bo‘yicha boshlang‘ich bilim, ko‘nikma va malakalarni shakllantirish uchun eng samarali metodik vositalarni tanlashda bo‘lajak tarbiyachilarga yordam berish. Jamiyatdagi zamonaviy texnologiyalar, jumladan, ta’lim sohasida ham bo‘layotgan inqilobiy o‘zgarishlar mutaxassislarga yangi funktsional talablarni qo‘ya boshladi. Endilikda malakali mutaxassisdan faqatgina o‘zining bevosita xizmat vazifasini yaxshi bajarishgina emas, balki yangi uslublarni topib amaliyotga kiritish, mustaqil qaror qabul qila bilish va ijodiy ishlay olish kabi ko‘nikmalar talab qilinadi. Bunda mutaxassis o‘qitish metodlari va yo‘llari bo‘yicha mustahkam bilimga ega bo‘lishni, o‘qitishning tub maqsadini tasavvur qila olishi, unga erishish yo‘llari va vositalarini bilishi lozim. Talabalarga bu bilimlarni puxta egallashiga yordam berish asosiy maqsaddir.
Shuningdek, tasviriy faoliyat turlarini o‘qitishning maqsad va vazifalari, fanning mazmuni va tuzilishi, o‘qitishning metod va tashkiliy shakllari, vositalarini tanlash va ishlab chiqish, boshqa fanlar bilan aloqasi, mavzularning mazmuni va ularning ketma-ketligi, tushunchalarni shakllantirish yo‘llari, ko‘rsatmali qurollardan foydalanish bo‘yicha tavsiyalar, tasviriy va amaliy topshiriqlar mazmuni va o‘rni kabi masalalar haqida bilim berishdir.
