3.Çətinlik dərəcəsi.Öyrənmənin səmərəliliyinə, onun sürətinə və düzgünlüyünə bu amilin böyük təsiri vardır.
4.Əhəmiyyəti. Materialın əhəmiyyətlilik dərəcəsi müxtəlif sahələrlə bağlı ola bilər. Əgər təlim materialı heç cür faydalanmağa imkan vermirsə, onun öyrənilməsi də bir o qədər səmərəsiz olacaqdır.
5.Anlaşıqlılığı. Anlaşıqlılıq dərəcəsi yüksək olan materiallar daha tez mənimsənilməklə yanaşı bu prosesdə buraxılan səhvlərin miqdarı az olur və həmin material uzun müddət yaddan çıxmır.
6.Strukturu. Materialın strukturu yeni ilə köhnə arasındakı əlaqənin necə, hansı yollarla yarandığına əsasən müəyyən edilir.
7.Həcmi. Materialın həcmi dedikdə ona daxil olan ünsürlərin miqdarı nəzərdə tutulur.
8.Emosionallıq. Buraya materialın cazibədarlığını, şagirdlərdə müəyyən hiss və emosiya yarada bilmək xüsusiyyətlərini aid etmək olar.
Təlim fəaliyyətini həyata keçirərkən çox vaxt belə bir sual diqqəti cəlb edir. Şagirdi oxumağa yönəldən, təhrik edən nədir? Başqa sözlə şagirdlərin təlim fəaliyyəti necə motivləşir? Şübhəsiz bu cür suallara düzgün cavab tapılması təlim fəaliyyətinin idarə olunmasını asanlaşdıra bilər. Ümumiyyətlə, motivin və motivasiyanın nədən ibarət olduğunu nəzərdən keçirək.
Motiv insanın beynində əks olunaraq onu fəaliyyətə təhrik edən amillərdir. Onlar hər şeydən əvvəl bir-birindən tələbatların növlərinə görə fərqlənirlər. Motiv obraz, anlayış, fikir, ideal şəklində də çıxış edə bilər. Motivasiya dedikdə bu elə motivlər birliyidir ki, şəxsiyyətin yönəlişliyini müəyyən etməklə onun fəaliyyətinin səmərəliliyini də şərtləndirir. Motivasiya təhriklə fəaliyyətin məqsədi arasındakı əlaqə və münasibətlərin açılmasında ifadə olunur. Təlim fəaliyyətinin oynadığı rola görə motivlərin aşağıdakı növlərini qeyd etmək olar.
