Dövlət Əmək Müfəttişliyi aylıq və 9 aylıq hesabatlar yayıb
09.10.2015
Bu il Dövlət Əmək Müfəttişliyi Xidməti 1,5 milyon manatdan artıq gecikdirilmiş sosial xarakterli ödənişlərin işçilərə ödənilməsini təmin edib. Məlumatı Transparency.az-a Əmək və Əhalinin Sosial Müdafiəsi Nazirliyi verib.
Hesabata görə, sentyabr ayında həyata keçirilən nəzarət tədbirləri və vətəndaşların müraciətləri ilə bağlı görülən tədbirlər nəticəsində ötən ilin müvafiq dövrü ilə müqayisədə 6 dəfə çox, yəni 863001 manat məbləğində gecikdirilmiş ödənişlərin işçilərə ödənilməsi təmin olunub. Həmin vəsait əsasən gecikdirilmiş əmək haqlarından ibarətdir.
Bu sahədə qanunvericiliyin tələblərinin pozulması hallarının daha çox sahibkarlıq subyektlərində baş verdiyi müəyyən edilib və belə hallara yol vermiş işəgötürənlərlə bağlı inzibati tədbirlər görülüb.
Ümumilikdə cari ilin yanvar-sentyabr aylarında 1502739 manat məbləğində gecikdirilmiş sosial xarakterli ödənişlərin işçilərə ödənilməsi təmin olunub, bu da ötən ilin 9 ayı ilə müqayisədə 3,6 dəfə çoxdur. Ödənilməsi təmin olunan gecikdirilmiş sosial xarakterli ödənişlərin 1407267 manatı (93,6 faiz) əmək haqlarından, 82947 manatı (5,5 faiz) sosial müavinət və kompensasiyalardan, qalanı isə zərərə görə ödənclərdən ibarət olub.
Hesabat dövründə işdən qeyri-qanuni şəkildə azad edildiyi müəyyən olunan 16 nəfərin yenidən öz əvvəlki işinə qaytarılması da təmin edilib.
Dostları ilə paylaş: | 
