Xəbər bülleteni №34

        Rövşən Ağayev

Sonuncu yazım sərvət qeyri-bərabərliyi haqda idi – amma gəlirlərin deyil, əmlak və aktivlərin ən üst səviyyədə olan əhali qruplarının əlində təmərküzəşməsinin doğurduğu bərabərsizliyə həsr edilmişdi (Zənginlərin pulunu necə saymalı?).

Həmin yazıda əlimiz çatan məlumatlardan aydın görünürdü ki, daşınmaz və daşınar əmlak fondunun, maliyyə akitvlərinin əhəmiyyətli hissəsinin (ən azından yarıdan çoxu) əhalinin üst səviyyədə yer tutan 5%-lik kəsiminin əlində cəmlənməsi çox realdır. Bahalı avtomobil parkının, bank depozitlərinin və kreditlərin azı 75-80%-nin bütün iqtisadi subyektlərin ən yaxşı halda zəngin onda birinə məxsus olması hələlik əmlak qeyri-bərabərliyinin səviyyəsini kobud da olsa qiymətləndirmək, bu istiqamətdə hətta ibtidai səviyyədə təsəvvür formalaşdırmaq üçün bizə yardım edə biləcək nadir məlumatlar sayıla bilər.

Kaş Azərbaycanda da ev təsərrüfatları inkişaf etmiş ölkələrdəki kimi elektron formada gəlir və əmlak bəyannaməsi təqdim edəydi. O zaman əhalinin ən üst sıradakı kəsimində (yəni əhalinin 10-da bir hissəsində) hər 1000 nəfərə neçə mənzil və qeyri-yaşayış obyektinin düşdüyü bilinərdi və bunu əhalinin orta təbəqədən aşağı səviyyədə yaşayan 50%-lik kəsiminin payına düşən mənzil və qeyri-yaşayış obyektləri ilə müqayisə etmək imkanı olardı.

Əslində normal və şəffaf hökumət özü bu məlumat bazasını yaratmağa, onun əsasında təhlillər aparmağa, belə informasiyaları ictimailəşdirməyə maraqlı olmalıdır. Ən azı ona görə ki, ölkədə ədalətli sosial mühitin, effektiv iqtisadi siyasətin formalaşdırılması, uzunmüddətli siyasi, iqtisadi və sosial sabitliyə zəmanət sayılan orta sinfin mövcudluğu məhz gəlir və əmlak bölgüsündən, bu bölgüdə ədalətin təmin edilməsindən asılıdır.

Hökumət gəlir və əmlak təmərküzləşməsi ilə bağlı son dərəcə hərtərəfli məlumat bazasına malik olmaqla bu problemlərin həllinə nail ola bilər:

— yoxsulluqla gerçək mübarizə üçün siyasi mexanizmlər və alətlər;

— yoxsullara səmərəli yardım sisteminin qurulması;

— zənginlərin gəlir və əmlakının vergiyə cəlb edilməsi yolu ilə gəlirlərin bölgüsü və yenidən bölgüsündə daha ədalətli mexanizmlərin yaradılması;

— bütün bu məqsədlər üçün hökumətin zəruri maliyyə bazasının formalaşdırılması;

— orta sinfin ayaqda qala bilməsi üçün bu sinfə yönəlik dəstəkləyici vergi və sərmayə sisteminin formalaşdırılması.

Hökumət hətta müstəqil təhlil institutlarının bu məlumatlara çıxış imkanının yaradılmasında maraqlı olmalıdır. Amma bu, seçicinin səsi ilə formalaşan, hesabatlı, şəffaf və demokratik (iştirakçı) hökumətlər üçün keçərlidir. Bir halda ki, məmurlar kresloya xalqa xidmət etmək deyil, daha çox zənginləşmək vasitəsi kimi baxır və ən üstdəki 10%-lik zəngin kəsimi istinasız olaraq özləri təmsil edirlər, mümkün qədər belə məlumatların nəinki ictimailəşməsinə, hətta tarixdə izi qalmasın deyə belə məlumat bazasının yaradılmamasına çalışırlar. Bircə sübut: mövcud qanunvericiliyə görə, əmlaka mülkiyyət sənədi verərkən səlahiyyətli orqan (reyestr xidməti) əmlakın dəyərini də müəyyən edib göstərməlidir. Son 2-3 ildə mülkiyyət sənədi alan ən azı 3-4 nəfər dost-tanışdan soruşdum, onlardan heç biri mülkiyyəti təsdiqləyən sənəddə dəyəri müəyyən edən rəqəm olduğunu təsdiqləmədi.

Əslində onsuz da sənəd verilərkən əmlaka baxış keçilir və qiymətləndirici şirkətlərlə müqavilə əsasında bütün əmlakın bazar dəyərini müəyyən edib məlumat bazasında əmlakı təyinatına və dəyərinə görə qruplaşdırmaq, fərdi məlumat azadlığını pozmadan (mülkiyyət sahiblərinin adı çəkilmədən) yalnız rəqəmlərin əks olunduğu bu bazanı onlayn formada saxlamaq olar.

Aydın məsələdir ki, indiki idarəetmə mühitində bu, xəyal olaraq qalacaq. Əgər kommersiya obyektlərinin təsisçilərinin ismini açıqlamaq qanunla qadağan edilirsə, hökumətdən mülkiyyətin dəyərini açıqlaya biləcəyini gözləmək sadəlövhlükdür.

Milli gəlir ölkə daxilində mal və xidmətlərin yaradılması nəticəsində proses iştirakçılarına çatan gəlirlərin məcmusudur. Milli gəlir əmək gəlirləri formasında işçilərə, mülkiyyətdən gəlirlər formasında sahibkarlara, vergi gəlirləri formasında hökumətə çatan gəlirlərin cəmidir. Milli gəlirlə ümumi daxili məhsul arasında fərq ölkənin dünyanın qalan hissəsi ilə iqtisadi əlaqələrinin saldosu qədərdir. 2015-ci ildə Azərbaycanın ÜDM-i 54,5 milyard olub. Amma Azərbaycanın dünya ölkələrinə ödədiyi əməkhaqqı, pul transfertləri, mülkiyyət və investisiya gəlirləri həmin ölkələrdən eyni mənbələr üzrə aldığı gəlirlərdən 1,9 milyard manat az olub: yəni mənfi 1,9 milyard manatlıq saldo. Saldo müsbət olduqda ÜDM məbləğini bu həcmdə artırmaq, mənfi olduqda həmin həcmdə azaltmaq lazımdır. Deməli, indiki halda Azərbaycanın milli gəliri 52,6 milyard manat təşkil edir.

Milli gəlirin əmək və mülkiyyət sahibləri arasında bölgüsü nə qədər proporsional olursa, cəmiyyətdə sərvət və gəlir bölgüsü də bir o qədər ədalətli olur. Azərbaycanda rəsmi statistikanın məlumatlarının inkişaf etmiş ölkələrlə müqayisəsi göstərir ki, bizdə mülkiyyət sahibləri milli gəlirdən daha böyük pay götürür. Əmək sahibləri və hökumətin milli gəlirindən aldığı pay həddən artıq kiçikdir.

Rəqəmlərə diqqət edək. Azərbaycanın təxminən 53 milyard manatlıq milli gəlirinin 10,5 milyard manatı və ya 19,8%-i əmək gəlirləri kimi işləyənlərə, 4,5 milyard manatı (8,4%) istehsal və idxala vergilər formasında (mənfəət vergisi istisna olmaqla) hökumətə, 38 milyard manatı (71,8%) ümumi mənfəət (qarışıq gəlirlər) formasında sahibkarlara və mülkiyyət sahiblərinə çatır. Ümumi mənfəətə (qarışıq gəlirlər) mülkiyyətin icarəsindən renta gəlirləri, qiymətli kağızlardan və depozitlərdən faiz gəlirləri və sahibkarların istehsal (xidmət) fəaliyyətindən əldə edilmiş bölüşdürülməmiş mənfəət daxildir.

Eyni rəqəmləri dünyada sosial dövlət kimi tanınan bir sıra ölkələrin timsalında nəzərdən keçirək: İsveç, İsveçrə və Almaniyada milli gəlirin orta hesabla 50-55%-i əmək gəlirləri formasında işçilərə, 15-20%-i vergilər formasında hökumətə çatır. Göründüyü kimi, bu ölkələrdə muzdla çalışanlara və hökumətə çatan pay 65-75%, sahibkarlara və mülkiyyət sahiblərinə çatan hissə 25-35% intervalındadır. Bu, bizdəkinin tam əksi olan bir mənzərədir.

Şübhəsiz ki, Azərbaycanda gizli iqtisadiyyatın real miqyasının yüksək olması milli gəlirin məbləğinin də daha böyük olması deməkdir. Amma gizli iqtisadiyyatda da gəlirlərin əsas hissəsi yenə sahibkar və mülk gəlirlərinə çatır. Sahibkar hökumətdən vergini yayındırırsa, deməli, bu qazanc onun özünə qalır. Onlar vergidən yayındırdıqları gəlirin bir hissəsini qeyri-rəsmi maaşların verilməsinə yönəldir, yerdə qalanını isə öz ciblərinə qoyurlar.

Ola bilər, gizli iqtisadiyyat hesabına milli gəlirin real həcmi rəsmi bəyan ediləndən xeyli böyükdür (bəzi məlumatlara görə, gizli iqtisadiyyat 40-50% intervalındadır). Amma şübhəsiz ki, hətta gizli gəlirlər nəzərə alınsa belə, bölgü elə rəsmən elan edilən səviyyədədir: milli gəlirin hər 4 manatından 3-ü mülkiyyət sahiblərinə, yalnız 1 manatı əməyi ilə pul qazananlara və hökumətin büdcəsinə çatır. Sosial ədalətin ən yüksək səviyyədə olduğu, milli gəlirin təxminən 25%-nə mülkiyyətçilərin sahib çıxdığı sosial dövlətlərdə (məsələn, İsveç) sərvətin ən yaxşı halda 35-40%-i əhalinin ən zəngin 10%-nə aiddir. Bizim vəziyyətimizə gələndə, rəsmi statistika özü etiraf edir ki, milli gəlirin 75%-i mülkiyyət sahiblərinə məxsusdur.

Prezident İlham Əliyev Almaniyadadır

06.06.2016

Prezident İlham Əliyev iyunun 6-da Almaniya Federativ Respublikasına işgüzar səfərə gedib. AZƏRTAC xəbər verir ki, Berlin şəhərinin Tegel hava limanında dövlət başçısı fəxri qarovulla qarşılanıb.

“ASAN Viza” üçün Miqrasiya Məcəlləsində dəyişiklik edilir

06.06.2016

Azərbaycana gələn əcnəbilərə və vətəndaşlığı olmayan şəxslərə birbaşa “ASAN Viza” sistemi ilə elektron viza almaq imkanı yaradılır. Bunun üçün Miqrasiya Məcəlləsində dəyişikliklər edilir.

AZƏRTAC xəbər verir ki, dəyişikliklər Milli Məclisin hüquq siyasəti və dövlət quruculuğu komitəsinin iyunun 6-da keçirilən iclasında müzakirə olunub. Qeyd edilib ki, Azərbaycana gələn əcnəbilər və vətəndaşlığı olmayan şəxslər özləri birbaşa müraciət etməklə “ASAN Viza” sistemi ilə uzağı üç iş günü müddətində elektron viza ala biləcəklər.

Komitə sədri Əli Hüseynli layihəni təqdim edərək bildirib ki, hazırda əcnəbilər və vətəndaşlığı olmayan şəxslər elektron viza almaq üçün özləri birbaşa müraciət edə bilmir, bu proses turizm şirkətləri vasitəsi ilə həyata keçirilir: “Dəyişiklikdən sonra həmin şəxslər “ASAN Viza” sistemində yerləşdirilmiş elektron müraciət formasında nəzərdə tutulan məlumatları sistemə daxil edəcək. Müraciətin qəbulu barədə müvafiq təsdiqnamə alındıqdan sonra qanunla müəyyənləşmiş məbləğdə dövlət rüsumu da elektron qaydada ödənəcək. Viza rəsmiləşdirilərək müraciət etmiş şəxsin poçt ünvanına göndəriləcək. Viza verilməsindən imtina edildikdə də şəxsə bu barədə məlumat veriləcək.

Elektron viza pasporta yapışdırılmayacaq. Əcnəbi və ya vətəndaşlığı olmayan şəxs onu çap edərək Azərbaycanın dövlət sərhədinin buraxılış məntəqəsindən keçərkən pasportla və geri qayıdış bileti ilə təqdim edəcək. Buraxılış məntəqəsində pasportda şəxsin ölkəyə daxil olması və ərazini tərk etməsi barədə qeyd aparılacaq. Məlumat “Giriş-çıxış qeydiyyat” idarələrarası avtomatlaşdırılmış məlumat-axtarış sistemi vasitəsi ilə real vaxt rejimində “ASAN Viza” sesteminə ötürüləcək”.

Fərman: elektron viza üç günə veriləcək

Berlində görüşlər

07.06.2016

Almaniyaya səfər edən prezident İlham Əliyev iyunun 6-sı Berlində “Airbus Group” şirkətinin icraçı vitse-prezidenti Jan Pier Talamoni ilə görüşüb. Görüşdə Azərbaycanla “Airbus Group” şirkətinin səmərəli əməkdaşlığının olduğu bildirilib, müxtəlif sahələrdə, xüsusilə “Azərbaycan Hava Yolları” Qapalı Səhmdar Cəmiyyəti ilə “Airbus Group” arasında, o cümlədən kosmik sənaye sahəsində əməkdaşlığın daha da inkişaf etdirilməsi yönündə fikir mübadiləsi aparılıb.

AZƏRTAC xəbər verir ki, İlham Əliyev Alman-Azərbaycan Forumunun idarə heyətinin sədri Hans-Eberhard Şlayer və qurumun üzvləri ilə də bir araya gəlib. Görüşdə Azərbaycanla Almaniya arasında münasibətlərin hazırkı səviyyəsindən məmnunluq ifadə olunub, əlaqələrin perspektivlərinə dair fikir mübadiləsi aparılıb. İlham Əliyev idarə heyətinin üzvlərini aprelin əvvəlində Ermənistan silahlı qüvvələrinin Dağlıq Qarabağ cəbhəsində törətdiyi təxribatlar barədə məlumatlandırıb. Dağlıq Qarabağ münaqişəsinin həlli ilə bağlı danışıqlar prosesi ətrafında fikir mübadiləsi aparılıb, dövlət başçısı danışıqların vəziyyəti ilə bağlı məlumat verib.

Həmin gün İlham Əliyev Berlində Münhen Təhlükəsizlik Konfransının sədri Volfqanq Fredrik İşinger ilə görüşüb. Görüşdə Azərbaycanla Münhen Təhlükəsizlik Konfransı arasında yaxşı əməkdaşlığın olduğu bildirilib. Azərbaycanın konfransın işində hər zaman fəal olduğu vurğulanıb, ölkənin dünyada təhlükəsizliyin təmin olunması işinə verdiyi töhfənin əhəmiyyəti qeyd edilib. Söhbət zamanı Dağlıq Qarabağ münaqişəsinə də toxunulub.

Yalnız iki valyuta bahalaşmayıb

07.06.2016

İyunun 7-də Meksika pesosu (1 peso 0,0804 manatdır) və yapon yeni (100 yen 1,3953 manatdır) çıxılmaqla bütün xarici valyutaların rəsmi kursu qalxıb. Transparency.az-ın məlumatına görə, Mərkəzi Bank 1 ABŞ dollarını 1,5024 manata, 1 avronu 1,7063 manata, 1 Rusiya rublunu 0,0229 manata satır. 1 dollar ötən gün 1,4994 manata, 1 avro 1,7005 manata, 1 rubl isə 0,0228 manata təklif olunub.

Digər valyutaların məzənnəsini Mərkəzi Bank iyunun 7-də belə müəyyən edib:

1 gürcü larisi – 0,7037 manat

1 ingilis funt sterlinqi – 2,1822 manat

1 türk lirəsi – 0,5175 manat.

Hillari Klinton qələbəni təmin etdi

07.06.2016


Demokratlar Partiyasından ABŞ prezidentliyinə əsas iddiaçı Hillari Klinton 2383 səs baryerini aşıb. Özəl hesablama aparan “Assoşieyted Press” agentliyi iyunun 7-də belə açıqlama yayıb. Rəqibi Berni Sandersin 1567 nümayəndə ilə Hillari Klintondan xeyli geri qaldığı bildirilir.

Hillari Klinton 1947-ci il oktyabrın 26-sı Çikaqoda doğulub. Yel Universitetinin hüquq fakültəsini bitirib. 1993-2001-ci illərdə prezident postunu tutmuş Bill Klintonun xanımıdır. 2009-2013-cü illərdə ABŞ-ın dövlət katibi olub.

Prezident seçkisi noyabrın 8-də olacaq. Həm respublikaçılar, həm də demokratlar prezidentliyə vahid namizədi iyul ayında keçiriləcək qurultaylarında seçməlidir. Qurultaya nümayəndə toplamaq üçün ştatlarda ilkin seçki yarışı keçirilir.

Respublikaçılar Partiyasından ABŞ prezidentliyinə yeganə iddiaçı Donald Tramp namizəd olmaq üçün gərəkli 1237 səs baryerini ötən ay keçib. Transparency.az-ın məlumatına görə, o, mayın 4-dən Respublikaçılar Partiyasından prezidentliyə yeganə iddiaçıdır.

Azərbaycan neftinin qiyməti 50 dolları ötüb

07.06.2016

Azərbaycan neftinin qiyməti artıb. AZƏRTAC-ın 7 iyun məlumatına görə, “AzəriLayt” markalı neftin bir barreli 0,75 dollar bahalaşaraq 50,72 dollara satılır.

Nyu-Yorkun NYMEX birjasında “Layt” markalı neftin bir barreli 0,13 dollar ucuzlaşaraq 49,21 dollar, Londonun İCE birjasında “Brent” markalı neftin bir barrelinin qiyməti 0,15 dollar azalaraq 50,11 dollar olub.

İyunun 1-də Azərbaycan neftinin qiyməti 51,55 dollara qalxmışdı. Bundan əvvəl ilin ən yüksək qiyməti mayın 27-də qeydə alınıb: 51,31 dollar.

Azərbaycanın dövlət büdcəsində xam neftin satış qiyməti bir barrel üçün 25 ABŞ dolları götürülüb.

Şəmkir və Goranboyda əlillərin problemləri müzakirə edilib

07.06.2016

İqtisadi və Sosial İnkişaf Mərkəzi hərəkət imkanları məhdud insanların yaşam şəraitinin vətəndaş cəmiyyəti, media, hökumət və özəl sektorun səyləri ilə yaxşılaşdırmaq layihəsi  aparır. Şəmkirdə Avropa İttifaqının dəstəyi ilə keçirilən uyğun təlimdə Şəmkir Rayon İcra Hakimiyyətinin, Dövlət Sosial Müdafiə Fondunun, Əmək və Əhalinin Sosial Müdafiəsi Nazirliyinin, Məşğulluq İdarəsinin nümayəndələri, əlilliyi olan şəxslər iştirak edib.

Ombudsman Aparatının Gəncə Regional Mərkəzinin rəhbəri Səbuhi Abbasov “Əlillərin hüquqlarının müdafiəsi ilə bağlı mövcud qanunvericilik” mövzusunda təqdimat edib. Əlillərin fəaliyyətinin qorunmasında ombudsman təsisatının fəaliyyəti və əlillərin hüquqlarının müdafiəsi sahəsində beynəlxalq və ölkədaxili standartlar barədə məlumat verilib, əlilliyi olan şəxslərin yaşam şəraitinin yaxşılaşdırılması ilə bağlı müxtəlif təklif və təşəbbüslər səslənib.

Oxşar təlim Goranboy rayonunda da təşkil edilib.

Hər iki təlim interaktiv formada keçirilib və bütövlükdə 50-dən şəxsi əhatə edib.

Ekoloji pozuntuların statistikası

07.06.2016


Ekologiya və Təbii Sərvətlər Nazirliyi ölkə ərazisində növbəti yoxlama aparıb. Rəsmi məlumata əsasən, 15-31 may aralığını əhatə edən araşdırma zamanı hüquqi və fiziki şəxslərin yol verdiyi qanun pozuntularına görə 101 akt və protokol tərtib olunub, nöqsanların aradan qaldırılması üçün icrası məcburi olan 33 müddətli göstəriş verilib.

Hesabatda bildirilir ki, 45 iş üzrə 59 900 manat məbləğində inzibati cərimə tətbiq edilib, ətraf mühitə dəymiş ziyana görə 5 iş üzrə 323,9 manat məbləğində iddia qaldırılıb, ətraf mühitə tullantıların atılması və axıdılmasına görə hüquqi və fiziki şəxslərə qarşı 162 iş üzrə 50568,98 manat məbləğində ödəmə tətbiq edilib.

Tədbir görülməsi üçün hüquq mühafizə orqanlarına 16, icra qurumlarına 20, məhkəmələrə isə 2 iş göndərilib.

Britaniya Avropadan ayrılırmı?

07.06.2016

İyunun 23-ü Böyük Britaniyada ölkənin Avropa İttifaqında qalıb-qalmamasını müəyyənləşdirmək üçün referendum keçiriləcək.

1957-ci ildə əsası qoyulmuş Avropa İttifaqına Böyük Britaniya 1973-cü ildə daxil olub. Hazırda Avropa İttifaqının 28 üzvü var.

Böyük Britaniyada Avropa İttifaqı ilə üzülüşməyin tərəfdarı olanların arqumenti nədir?

Beynəlxalq hüquq eksperti Ataxan Əbilov Transparency.az-a bildirib ki, Britaniya əvvəldən qurumun daxilindəki sürətli inteqrasiyadan narazı olub: “Ötən ilin noyabrında baş nazir Devid Kemeron Avropa İttifaqı Şurasının sədri Donald Tuska məktub yazıb bildirdi ki, Avropa liderləri onun Avropa İttifaqını yenidən qurmaq tələblərinə laqeyd qalsalar, Böyük Britaniya qurumdan çıxa bilər. Bu təkliflər hər şeydən öncə Avropa İttifaqında miqrantların işləməsi ilə bağlı qaydaları məhdudlaşdırmaqdan ibarət olub. Bundan başqa Kemeron Avropa İttifaqı daxilində inteqrasiyanın azaldılması və milli hakimiyyətlərin Avropa qanunvericiliyini bloklamaq üçün daha çox səlahiyyətlərə yiyələnməsini istəyir.

Bu ilin fevralında Böyük Britaniya ilə Avropa İttifaqı arasında “Avropa İttifaqı daxilində Böyük Britaniya üçün yeni qaydalar” haqqında razılaşma imzalanıb. Görünür, bu da İngiltərəni razı salmayıb və iyunun 23-nə Avropa İttifaqında qalıb-qalmamaq referendumu təyin edilib. Baş nazir dövlətin Avropa İttifaqında qalmasını dəstəklədiyini söyləyir və bununla bağlı çoxluğun dəstəyini qazanmaq üçün referendumun zəruriliyini qeyd edir”.

Ölkənin Avropa İttifaqından çıxması Böyük Britaniya, Avropa İttifaqı, vahid Avropa ideyası üçün hansı nəticələr doğura bilər? Suala cavab olaraq Ataxan Əbilov deyir ki, əslində ingilislərin Avropa İttifaqında iştirakı indiyə kimi həlledici xarakter daşımayıb, çünki ingilislər təbiətən konservativ ideyalara köklənmiş xalq hesab edilirlər: “Onlar həmişə bu toplumda birləşməyə ehtiyatlı yanaşıblar və daha çox başqalarının təcrübəsindən öyrənməyə meyllidirlər. Bundan əlavə Avropa İttifaqında inteqrasiyanın müxtəlif səviyyələri var və Böyük Britaniya onsuz da onların bir hissəsində iştirak etmir. Böyük Britaniya avro zonasına və Şengen meydançasına daxil deyil. Ona görə də ən pis formada belə Böyük Britaniyanın Avropa İttifaqından tamamilə üzülüşməsi mümkün ola bilməz. Hər bir halda müəyyən əməkdaşlıq çərçivələrinin qalması qaçılmazdır.

Referenduma gəldikdə, sosioloji sorğuların nəticəsindən çıxış etsək görərik ki, cəmiyyət iki hissəyə bölünüb. Bu günə proqnoz təxminən əlli-əlliyədir. Gənclər, miqrantlar Böyük Britaniyanın Avropa İttifaqında qalmasına tərəfdardır. Yaşlı nəsil isə əks mövqedədir. Hazırkı kabinet də təbliğatını İngiltərənin Avropa İttifaqında qalması istiqamətində qurub. Fikrimcə, referendumun nəticəsi pozitiv olacaq və Böyük Britaniya Avropa İttifaqında qalacaq”.

Manatı saxlamağa 2 milyard 692,8 milyon dollar sərf olunub

07.06.2016

Dövlət Neft Fondu iyunun 7-də keçirilən hərracda 23 banka 50 milyon ABŞ dolları satıb.

Transparency.az bildirir ki, bununla Dövlət Neft Fondunun bu ilin valyuta hərraclarında satdığı valyutanın həcmi 2 milyard 7,4 milyon dollara çatıb.

Mərkəzi Bankdan isə 2016-cı ilin hərraclarında 685,4 milyon ABŞ dolları alınıb.

İl ərzində manatın kursunu sabit saxlamağa üst-üstə 2 milyard 692,8 milyon dollar sərf olunub.

Ötən il Azərbaycan manatı iki dəfə devalvasiyaya uğrayıb. Əvvəl manatın dollara rəsmi məzənnəsi 78 qəpikdən 1 manat 5 qəpiyə qaldırılıb, sonra Mərkəzi Bankın qərarı ilə manat üzən məzənnə rejiminə keçirilib və dollar qarşısında rəsmi kurs 1 manat 55 qəpik olub.

İlham Əliyev Azərbaycan-Almaniya İqtisadi Forumunun açılışında iştirak edib

07.06.2016

AZƏRTAC xəbər verir ki, iyunun 7-si Berlində Azərbaycan-Almaniya İqtisadi Forumunun açılışı olub. Prezident İlham Əliyev mərasimdə iştirak edib.

Almaniyanın vitse-kansleri, iqtisadiyyat və enerji naziri Ziqmar Qabriel çıxışında Cənub Qaz Dəhlizi layihəsinin əhəmiyyətinə toxunaraq onu Xəzərin karbohidrogen ehtiyatlarını Avropaya çatdıracaq yeni layihə kimi xarakterizə edib.

Vitse-kansler iqtisadi inkişafına görə Azərbaycanın bir neçə il dalbadal dünyada birinci olduğunu diqqətə çatdırıb. Ölkədə çalışan alman şirkətlərinin uğurla fəaliyyət göstərdiyini deyən iqtisadiyyat və enerji naziri Almaniya ilə Azərbaycan arasında güclü əlaqələrin olduğunu vurğulayaraq forumun ikitərəfli əlaqələrə güclü dəstək verəcəyini bildirib.

Nazir Dağlıq Qarabağ münaqişəsindən narahatlığını ifadə edərək tərəflərin Vyana görüşündən sonra nizamlama ilə bağlı nikbinliyin yarandığını söyləyib.

Forumda çıxış edən prezident İlham Əliyev Almaniya ilə Azərbaycanın yaxşı tərəfdaşlar olduqlarını, iki ölkə arasında fəal siyasi dialoqun aparıldığını bildirib. Münasibətlərin iqtisadi əlaqələrin inkişafına da təsir etdiyini deyən dövlət başçısı bildirib ki, Azərbaycan iqtisadiyyatının inkişafı üçün təhlükəsizlik və sabitlik vacibdir.

Son vaxtlar Dağlıq Qarabağda, qoşunların təmas xəttində baş verən hadisələrə diqqəti cəlb edən İlham Əliyev vurğulayıb ki, atəşkəs olduqca kövrəkdir, Ermənistan vəziyyətə nəzarət edə bilmir və status-kvo bu cür davam edə bilməz. İşğal olunmuş ərazilərdən bütün işğalçı qüvvələrin çıxarılmasının vacibliyini vurğulayan dövlət başçısı Avropanın indi üzləşdiyi miqrasiya problemi nəticəsində yaranan humanitar böhranı Azərbaycanın 20 il bundan əvvəl yaşadığını qeyd edib, BMT Təhlükəsizlik Şurasının qətnamələrini icra etmədiyi üçün Ermənistana sanksiyaların tətbiq olunmamasından təəssüfləndiyini bildirib.

“Münaqişənin tezliklə həll olunması regionun sabitliyinə xidmət edəcək” deyən İlham Əliyev bildirib ki, bu çətin vəziyyətə baxmayaraq Azərbaycan uğurla inkişaf edir: “Son 25 ildə ölkəmizdə çox güclü siyasi və iqtisadi islahatlar həyata keçirilib, bütün azadlıqlar təmin olunub”.

Dövlət başçısı Azərbaycanın qlobal enerji layihələrinin həyata keçirilməsində mühüm rol oynadığını vurğulayıb. Avropaya qaz ixracını təmin edəcək layihənin 2012-ci ildən icra olunduğunu bildirən İlham Əliyev Cənub Qaz Dəhlizi layihəsinin mühüm qolu olan TAP-ın inşasının uğurla davam etdiyini deyib. Prezident layihə üzrə güclü tərəfdaşlıq komandasının yarandığını vurğulayıb, bu layihələrə Avropa İttifaqının da böyük dəstək verdiyini diqqətə çatdırıb. Prezident bütün tərəfdaşlara fayda verəcək bu layihənin mənbələrin şaxələndirilməsi baxımından mühüm əhəmiyyət kəsb etdiyini bildirib.

Hazırda ölkədə qeyri-neft sektorunun inkişafına xüsusi diqqət yetirildiyini deyən dövlət başçısı ixrac potensialının şaxələndirilməsi, kənd təsərrüfatının, informasiya-kommunikasiya texnologiyalarının, nəqliyyat sektorunun inkişaf etdirilməsinin prioritet məsələlər sırasında olduğunu vurğulayıb.

İlham Əliyev Bakı-Tbilisi-Qars dəmir yolunun bu il istifadəyə veriləcəyinə ümidvar olduğunu bildirib, Bakıda ən böyük dəniz limanının tikintisinin aparıldığını, bununla da ölkənin gələcəkdə logistik mərkəzə çevriləcəyini söyləyib.

“Biz Azərbaycanda daha çox alman şirkətlərini görmək istəyirik” deyən dövlət başçısı ölkədə əməkdaşlıq üçün mühüm sahələrin olduğunu vurğulayıb, forumun əlaqələrin daha da möhkəmlənəcəyinə töhfə verəcəyinə əminliyini ifadə edib.

Forumda “Knauf” şirkətlər qrupunun icraçı direktoru, Şərqi Avropa ilə İqtisadi Əlaqələr üzrə Komitənin idarə heyətinin üzvü Manfred Qrunke və Almaniya-Azərbaycan Ticarət və Sənaye Palatasının rəhbəri Samir Axundov Azərbaycanla Almaniya arasında iqtisadi əlaqələrin inkişafından danışıblar.

ATV əməkdaşlarına təzyiqə görə cinayət işi qaldırılıb

07.06.2016


İyunun 4-də jurnalistlərin Şamaxıda döyülməsi, təhqir olunması və çəkiliş avadanlığının sındırılması barədə Şamaxı Rayon Polis Şöbəsindən daxil olmuş materiallar rayon prokurorluğunda araşdırılıb. Baş Prokurorluğun mətbuat xidmətinin açıqlamasına görə, Azad Azərbaycan Müstəqil Teleradio Şirkətinin (ATV) “Yoxlama” layihəsinin rəhbəri Azər İsmayılovun və layihənin əməkdaşları Elgün Bayramlının, Loğman İsmayılovun, Polad Axundzadənin, Arif Quliyevin və İlqar Quliyevin iyunun 4-ü saat 20 radələrində “Şamaxı” restoranında çəkiliş apardıqları zaman restoranın müdiri Hüseyn Allahverdiyevin və onun qardaşı oğlu Elşad Osmanovun jurnalistlərin qanuni peşə fəaliyyətinə mane olmaqla onlara müxtəlif bədən xəsarətləri yetirdiyi müəyyənləşdirilib. Hadisə zamanı şirkətə məxsus videokamera və mikrofon da zədələnib.

Faktla bağlı rayon prokurorluğunda Cinayət Məcəlləsinin 163.1-ci (Jurnalistlərin qanuni peşə fəaliyyətinə mane olma) və 221.2.1-ci (bir qrup şəxs tərəfindən xuliqanlıq) maddələri ilə cinayət işi başlanıb. İş üzrə müvafiq ekspertizalar, o cümlədən məhkəmə-tibb ekspertizaları təyin edilib və digər zəruri prosessual hərəkətlər yerinə yetirilib.

Hazırda iş üzrə istintaq tədbirləri davam etdirilir.

Ekspert təklif edir: hökumət fondu kimə nə verdiyini açıqlasın

07.06.2016

“Sahibkarlığa Kömək Milli Fondu vəsait verdiyi subyektlərin adını açıqlamalıdır”. Transparency.az-ın məlumatına görə, iqtisadçı Rövşən Ağayev belə yazır.

Ekspert fermerlərə verilən subsidiyalar və aztəminatlı ailələrə verilən sosial yardımlar üzrə adlı siyahıları xatırladaraq yazır ki, bu məlumatlar uzunmüddətli ictimai çəkişmə, qınaqdan sonra açıqlanıb: “İctimai vəsaitlə həyata keçirilən heç bir layihənin dəyəri, satınalma şərtləri, ictimai vəsait hesabına verilən kreditlərin məbləği, krediti alan subyektlərin adı, ictimai vəsait hesabına verilən subsidiya və dövlət sosial yardımlarının məbləği, həmin vəsaitləri alan subyektlərin adı gizli saxlana, kommersiya sirri hesab edilə bilməz. Sahibkarlığa Kömək Milli Fondunun vəsaitləri də ictimaidir. Bu vəsaitləri alan subyektlərin adları açıqlanmalıdır. Layihələrin detallarını (məsələn, xərclərin strukturunu) ictimailəşdirmək tələb edilmir, bu, kommersiya sirri sayılır. Amma vəsaiti alan şəxsin (yaxud şirkətin) ismi, alınan məbləğ, yönəldilən layihənin adı və həyata keçiriləcək yer kommersiya sirri deyil. İctimai nəzarət və monitorinq üçün bu məlumatlar çox mühümdür”.

Ekspert fondun bu ilin ilk rübü üzrə verdiyi kreditlərin strukturuna nəzər salaraq sahibkarlar arasında aparılan bölgüyə diqqət çəkib: “Verilən kreditlərin 93 faizi (36,9 milyon manat) kredit xətti açılan cəmi 2 faiz sahibkar (6 layihə) arasında bölüşdürülüb. Vəsaitlərin 7 faizi isə 98 faiz sahibkara (315 layihə) çatıb. İnkişaf etmiş ölkələrin təcrübəsi göstərir ki, böhranı yenməyin və dayanıqlı iqtisadi inkişafı təmin etməyin yolu kiçik və orta sahibkarlığın inkişafından keçir. Bizdə isə hökumət fondu əlindəki resursların 93 faizini iri sahibkarlara yönəldir. Bu vəziyyətə ictimai nəzarəti təmin etmək üçün sözügedən məlumatlar onlayn qaydada ictimailəşdirilməlidir”.

Transparency.az bildirir ki, İqtisadiyyat Nazirliyinin Sahibkarlığa Kömək Milli Fondunun verdiyi son məlumata görə, bu il 1040-a yaxın sahibkara 56,8 milyon manat güzəştli kredit verilib.

Ermənistan Milli Təhlükəsizlik Xidmətində qulluq yaşını və qaydalarını dəyişir

07.06.2016

İyunun 7-də Ermənistan parlamenti Milli Təhlükəsizlik Xidmətində qulluqla bağlı qanuna dəyişiklikləri nəzərdə tutan layihəni ilk oxunuşda qəbul edib. Qanun layihəsinin lehinə 117, əleyhinə 2 deputat səs verib.

Novator.az-ın məlumatına görə, yenilik Milli Təhlükəsizlik Xidmətində ali zabit heyətinin pensiyaya çıxmaq yaşının 65-ə qaldırılmasını nəzərdə tutur. Hazırda bu hədd 60 yaşdır, 65 yaş yalnız general-polkovniklərə şamil olunur.

Layihədə Operativ Kəşfiyyat İdarəsinin yüksək ixtisaslı əməkdaşlarının xidmət müddətinin 10 ilə qədər uzadılması təklifi də yer alır.

Qanun layihəsində elmi dərəcəsi olan, orduda xidmətdən azad şəxslərin Milli Təhlükəsizlik Xidmətində qulluğa gətirilməsi də nəzərdə tutulur. Hazırda orduda xidmət (qadınları çıxmaqla) təyinat üçün mütləq şərtdir.

Əli İnsanova yeni cinayət işi?

07.06.2016

Hüquqşünas Namizəd Səfərov həbsdə olan sabiq səhiyyə naziri Əli İnsanova yeni cinayət işinin açıldığı haqda məlumat yayıb. O, iyunun 7-də “Facebook” səhifəsində yazır ki, Əli İnsanova Cinayət Məcəlləsinin 315-ci maddəsi ilə cinayət işi açılıb, yeni işlə əlaqədar sabiq nazir saxlandığı 13 saylı Cəzaçəkmə Müəssisəsindən Bakı İstintaq Təcridxanasına köçürülüb.

Cinayət Məcəlləsinin 315-ci maddəsi hakimiyyət nümayəndəsinə qarşı müqavimət göstərmə və ya zor tətbiq etmə barədədir. Maddənin 1-ci hissəsinə görə, hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olmayan zor tətbiq etməklə müqavimət göstərmə, xidməti vəzifələrini yerinə yetirməsi ilə əlaqədar ona və ya onun yaxın qohumlarına qarşı belə zor tətbiq etmə və ya zor tətbiq etmə hədəsi ilə hədələmə üç ilədək müddətə azadlıqdan məhrumetmə ilə cəzalandırılır. 2-ci hissəyə əsasən, həyat və sağlamlıq üçün təhlükəli olan zor tətbiq etməyə üç ildən yeddi ilədək müddətə azadlıqdan məhrumetmə cəzası düşür.

Əli İnsanovun vəkili Toğrul Babayev isə APA-ya açıqlamasında bildirib ki, yeni ittiham barədə yayılan məlumatlar yalandır: “Bir az əvvəl onunla cəza çəkdiyi 13 saylı Cəzaçəkmə Müəssisəsində görüşdük. Heç bir problemi yoxdur”.

Əli İnsanovun 70 yaşı var. O, 1993-2005-ci illərdə səhiyyə naziri işləyib. 2005-ci il oktyabrın 19-da dövlət çevrilişinə cəhd ittihamı ilə tutulub, sonra iqtisadi cinayətlər ittihamı ilə 11 il müddətinə azadlıqdan məhrum edilib. 2013-cü il martın 14-də Avropa İnsan Hüquqları Məhkəməsi sabiq nazirin ədalətli mühakimə olunmadığı haqda qərar çıxarıb. Həmin qərara əsaslanan Azərbaycan Ali Məhkəməsinin Plenumu Əli İnsanovun işini yenidən baxılması üçün apellyasiya instansiyasına göndərib. 2014-cü ilin fevralında Bakı Apellyasiya Məhkəməsi işə baxılmasını yekunlaşdırıb, Əli İnsanov barəsində çıxarılmış 11 illik həbs qərarı qüvvədə saxlanıb.

Manat iki amilə görə ucuzlaşa bilər

07.06.2016

Yaxın günlərdə manat ucuzlaşa bilər. Transparency.az-ın məlumatına görə, iqtisadçı Qubad İbadoğlu belə proqnoz verir. Ekspert iyunun 7-də yaydığı açıqlamada mümkün ucuzlaşmaya iki əsas göstərir: “İyunun 14-15-də ABŞ-ın Federal Ehtiyat Sisteminin (FES) növbəti toplantısında uçot dərəcəsinin qaldırılması ehtimalı getdikcə artır və bu, dolların bahalaşması üçün əsaslar yarada bilər. FES-in qərarının ABŞ-la ticarət və investisiya əməkdaşlığı güclü olan ölkələrlə yanaşı Azərbaycan, Rusiya, Qazaxıstan və Türkiyə kimi valyuta bazarı xarici şoklara həssas ölkələrə də təsirləri gözlənir.

FES-in ya 14-15 iyun, ya da 26-27 iyul toplantısında uçot dərəcəsini qaldıracağı real görünür. Uçot dərəcəsinin artırılması ilə pul kütləsi azalır deyə dolların mövqeyi möhkəmlənir.

Manatın məzənnəsinə təsir göstərəcək ikinci amil 17-19 iyunda Bakıda keçiriləcək “Formula 1” yarışlarına gələcək turistlər ola bilər. Mərkəzi Bankın Azərbaycanı turistlər üçün cəlbedici etmək məqsədilə manatı ucuzlaşdırması mümkündür. Xaricilərin yemək və istirahət xərcləri manata tələbatı artıracaq. Bazara bu məqsədlə dolların çıxması iqtisadi qanunauyğunluğa görə manata tələbatı artırmaqla onu bahalaşdırmalıdır. Amma bu, turistlər üçün Azərbaycan bazarının cazibədarlığını azalda bilər”.

Merkellə nədən danışılıb?

08.06.2016


Prezident İlham Əliyevin Almaniyaya iyunun 6-da başlayan işgüzar səfəri başa çatıb. Paytaxt Berlinin Tegel hava limanından dövlət başçısı fəxri qarovulla yola salınıb.

Səfərin ikinci günü – iyunun 7-də İlham Əliyev vitse-kansler, iqtisadiyyat və enerji naziri Ziqmar Qabriellə görüşüb. Söhbət zamanı böyük iqtisadi layihələrin həyata keçirilməsi, kənd təsərrüfatı, əczaçılıq, təhsil, nəqliyyat, enerji, su təsərrüfatı, torpaqların təmizlənməsi, kosmik sənaye və digər sahələrdə əməkdaşlıq imkanları barədə fikir mübadiləsi aparılıb.

Həmin gün prezident federal kansler Angela Merkellə bir araya gəlib. Kansler Azərbaycanın mühüm coğrafi mövqedə yerləşdiyini deyib, dünyada gedən iqtisadi böhran və neftin qiymətinin kəskin düşməsi məsələlərinə toxunaraq Almaniya hökumətinin bu böhranın aradan qaldırılması üçün Azərbaycan hökumətinin həyata keçirdiyi iqtisadi islahatları, əhalinin yaşayış səviyyəsinin yaxşılaşdırılması sahəsində gördüyü tədbirləri alqışladığını bildirib.

Prezident İlham Əliyev son zamanlarda Azərbaycanda həyata keçirilən iqtisadi tədbirlərdən danışaraq ölkədə iqtisadiyyatın neftdən asılılığının azaldılması, qeyri-neft sektorunun inkişafı, iqtisadiyyatın şaxələndirilməsi, iqtisadi imkanların daha da artırılması və digər sahələrdə ciddi addımların atıldığını bildirib. Dövlət başçısı ölkədə yoxsulluğun azaldılması, əhalinin rifahının yaxşılaşdırılması sahəsində həyata keçirilən işlərdən danışıb.

Görüşdə Azərbaycanın Avropanın enerji təhlükəsizliyinin təmin edilməsindəki rolu qeyd edilib, Cənub Qaz Dəhlizinin bu baxımdan regional əməkdaşlığa, eyni zamanda Azərbaycan-Avropa İttifaqı iqtisadi əməkdaşlığının genişləndirilməsinə töhfə verdiyi bildirilib.

AZƏRTAC-ın məlumatına görə, görüşdə Azərbaycanda insan haqlarının təmin olunması, demokratikləşmə prosesinin inkişafı istiqamətində atılan müsbət addımlardan danışılıb.

Söhbət zamanı Dağlıq Qarabağ münaqişəsi ilə bağlı məsələlər ətrafında geniş müzakirələr aparılıb. Prezident İlham Əliyev cəbhə xəttində baş verən son hadisələr və indiki vəziyyət barədə məlumat verib, bu münaqişənin həlli ilə bağlı aparılan danışıqlar prosesinin hazırkı vəziyyəti və perspektivləri barədə danışıb, ATƏT-ə sədrlik edən ölkə kimi Almaniyanın Minsk qrupu çərçivəsində münaqişənin nizamlanması prosesində rolu barədə fikir mübadiləsi aparılıb.

Görüşdən sonra Angela Merkel və İlham Əliyev jurnalistlərin qarşısına çıxıblar. Federal kansler görüşdə ikitərəfli əlaqələrin daha da intensivləşdirilməsi ilə bağlı razılığa gəlindiyini bildirib. Azərbaycanda aparılan iqtisadi islahatların bu sahədə şaxələndirməyə geniş imkanlar açdığını deyən Angela Merkel Almaniyanın həmin prosesdə iştirak etməyə hazır olduğunu diqqətə çatdırıb.

“Azərbaycan hökuməti bir neçə əfv qərarı qəbul edib və biz bu addımı alqışlayırıq” deyən kansler Dağlıq Qarabağ münaqişəsi ilə bağlı müzakirələrin də aparıldığını vurğulayıb. O bildirib ki, hazırda ATƏT-ə sədrlik edən Almaniya münaqişənin sülh yolu ilə həllinə öz töhfəsini vermək istəyir: “Almaniya Dağlıq Qarabağ münaqişəsinin həll edilməsinə nail olmaq üçün Minsk qrupunun həmsədr ölkələri qismində Rusiya, ABŞ və Fransa hökumətlərinə dəstək göstərmək üçün öz əlaqələrindən maksimum şəkildə istifadə edəcək”.

Federal kansler onu da vurğulayıb ki, Avropa İttifaqı və Azərbaycanın, eyni zamanda Almaniya və Azərbaycanın mövcud əlaqələrini daha da inkişaf etdirmək, əlaqələri sıxlaşdırmaq, bütün sosial və iqtisadi aspektləri müzakirə etmək üçün yaxşı imkanlar var.

Prezident İlham Əliyev Almaniya ilə Azərbaycan arasında fəal siyasi dialoqun mövcud olduğunu vurğulayıb. Dövlət başçısı əmin olduğunu bildirib ki, Azərbaycan-Almaniya əlaqələrinin uğurlu inkişafı regionda sülh və sabitliyin möhkəmlənməsinə xidmət edəcək.

“Dağlıq Qarabağ münaqişəsinin həlli müzakirələrimizin ən vacib hissələrindən biri idi” deyən İlham Əliyev qeyd edib ki, Azərbaycan bu münaqişənin beynəlxalq hüququn normaları və BMT-nin Təhlükəsizlik Şurasında qəbul edilmiş qətnamələrin icra olunması əsasında ən tez zamanda həllini istəyir. Ermənistanın BMT Təhlükəsizlik Şurasının qətnamələrini icra etmədiyini, beynəlxalq hüququ kobud şəkildə pozduğunu, etnik təmizləmə siyasəti yürütdüyünə və suveren dövlətin ərazisini işğal etdiyinə görə Ermənistana heç bir sanksiyanın tətbiq edilmədiyini deyən dövlət başçısı vurğulayıb ki, Azərbaycan münaqişənin sülh yolu ilə, BMT nizamnaməsi, Helsinki Yekun Aktı və beynəlxalq təşkilatların qəbul etdiyi müvafiq qətnamələr əsasında həll olunmasını istəyir.

Aprelin əvvəllərində qoşunların təmas xəttində Ermənistanın törətdiyi təxribatlardan danışan İlham Əliyev Ermənistanın təcavüzü nəticəsində mülki şəxslərin qətlə yetirildiyini, mülki obyektlərə çoxlu ziyan dəydiyini bildirib. “ATƏT-ə sədrlik edən ölkə kimi Almaniya da status-kvonun qəbuledilməz olduğunu açıq şəkildə bəyan edib” deyən dövlət başçısı may ayında Vyanada baş tutan görüşün əsaslı danışıqlara başlanması üçün mühüm addım olduğunu diqqətə çatdırıb.

Prezident İlham Əliyev iki ölkə arasındakı iqtisadi əlaqələrdən danışarkən bildirib ki, Azərbaycanla ticarət Almaniyanın Cənubi Qafqaz regionu ilə apardığı ticarətin 80 faizini təşkil edir. İki ölkə enerji sahəsində yaxşı əməkdaşlıq qurduğunu deyən dövlət başçısı bu baxımdan Cənub Qaz Dəhlizi layihəsinin əhəmiyyətini vurğulayıb, Asiya ilə Avropanı birləşdirəcək nəqliyyat layihəsinin önəmindən danışıb.

“Azərbaycan demokratiyaya, insan hüquqlarının qorunmasına sadiqdir” deyən İlham Əliyev ölkədə bütün azadlıqların təmin olunduğunu bildirib, Azərbaycanda müxtəlif konfessiyaları təmsil edən insanların sülh və harmoniya içərisində yaşadıqlarını xatırladıb.

Dollar, avro və rubl yeni məzənnə ilə satılır

08.06.2016

Azərbaycan Mərkəzi Bankı iyunun 8-də xarici valyutaların rəsmi kursunu yeniləyib (Siyahı). Transparency.az xəbər verir ki, 1 ABŞ dollarının rəsmi məzənnəsi 1,5024 manatdan 1,5054 manata qalxıb.

Ötən gün 1,7063 manata satılan 1 avronu Mərkəzi Bank 1,7124 manata təklif edir.

1 Rusiya rublu isə 0,0233 manatdır. İyunun 7-də rəsmi məzənnə 0,0229 manat idi.

Hərbi xidmətdən möhlət qaydasını dəyişən layihə parlament iclasına getdi

08.06.2016

“Hərbi vəzifə və hərbi xidmət haqqında” qanun dəyişir. Layihə iyunun 7-də Milli Məclisin müdafiə, təhlükəsizlik və korrupsiya ilə mübarizə komitəsinin elm və təhsil komitəsi ilə birgə iclasında müzakirə olunub.

AZƏRTAC-ın məlumatına görə, qanun layihəsini təqdim edən Milli Məclis sədrinin birinci müavini, müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov bildirib ki, hərbi xidmətə çağırışdan möhlət hüququ indi ancaq bakalavriat pilləsində təhsil alanlara verilir: “Qanunun 21-ci maddəsinə edilən dəyişikliyə əsasən, bundan sonra həmin möhlət hüququ magistratura və doktorantura səviyyələrinə də şamil olunacaq. Həmçinin xarici ölkələrdə əyani təhsil alanlara ali təhsil pilləsinin bakalavriat, magistratura və doktorantura səviyyələrində, tibb təhsili üçün ali baza tibb təhsili və rezidenturada (internaturada) təhsil alanlara müvafiq təhsilini bitirənədək çağırışdan möhlət hüququ veriləcək”.

Elm və təhsil komitəsinin sədri İsa Həbibbəyli qeyd edib ki, magistr və doktorantlara çağırışdan möhlət hüququnun verilməsi təhsilin fasiləsizliyini təmin edəcək, gənclərin elmə gəlişinə təkan verəcək.

Qanun layihəsi Milli Məclisin plenar iclasına tövsiyə olunub.

Cəbhə zonasında yaşayış kompleksi və hospital istifadəyə verilib

08.06.2016

Müdafiə naziri general-polkovnik Zakir Həsənov və nazirliyin rəhbər heyəti cəbhə zonasında olub. İyunun 8-də yayılan rəsmi məlumata görə, hərbi qulluqçuların döyüş, eləcə də atəş və taktiki hazırlıqlarının yüksəldilməsi məqsədilə nəzərdə tutulan təlim poliqonuna gələn nazir ərazidə cəbhə xəttindəki vəziyyətin modelləşdirilməsi, təlimlərin real döyüş şəraitinə uyğun keçirilməsi və digər praktiki məşqlərlə bağlı görülən işlərlə maraqlanıb.

Müdafiə naziri ərazidəki komanda məntəqəsində olub, çöl şəraitində yaradılmış düşərgədə təlim keçən şəxsi heyətlə görüşüb, onların peşəkarlıq və döyüş qabiliyyətlərinin artırılması ilə bağlı müvafiq göstəriş və tapşırıqlarını verib.

Sonra nazirliyin rəhbərliyi hərbi şəhərcik ərazisində yeni inşa edilmiş yaşayış kompleksinin açılışında iştirak edib. Ümumilikdə hər biri üç otaqdan ibarət 52 xidməti mənzil kommunikasiya xətləri ilə tam təchiz olunub. Müasir standartlara cavab verən təmirli otaqlar mebel və digər avadanlıqla təmin edilib. Yaşayış kompleksinin həyətində yaşıllaşdırma və abadlıq işləri görülüb, hərbi qulluqçular və onların ailə üzvlərinin səmərəli istirahəti üçün lazımi şərait yaradılıb.

Müdafiə naziri cəbhə boyu zonada yeni istifadəyə verilən səhra hospitalının açılışını da həyata keçirib. Müdafiə Nazirliyi Tibb Baş İdarəsinin rəisi general-mayor Natiq Əliyev görülən işlər barədə məruzə edərək bildirib ki, təxirəsalınmaz və ixtisaslaşdırılmış tibbi yardımın göstərilməsi üçün nəzərdə tutulan səhra hospitalı ən müasir tibbi avadanlıqla tam təchiz olunub.

Hospitalın əməliyyat, reanimasiya, müayinə, intensiv terapiya, rentgen, laboratoriya otaqları və palataları ilə tanış olan nazir tibb personalı ilə görüşərək şəxsi heyətə daha keyfiyyətli tibbi xidmətin gostərilməsi ilə bağlı müvafiq tapşırıqlarını verib.

Səfir: “Vətən müharibəsində şəxsən iştirak etməyə hazıram”

08.06.2016


“Azərbaycan ona qarşı həyata keçirilən təcavüzün nəticələri ilə heç vaxt barışmayacaq”. Rusiyadakı səfir Polad Bülbüloğlu “Moskovski Komsomolets” qəzetinə müsahibəsində belə deyib.

AZƏRTAC-ın məlumatına görə, Dağlıq Qarabağ münaqişəsi ilə əlaqədar suala cavab verən diplomat deyib: “Ermənistan başqa dövlətin ərazisini işğal edib və indi dünyaya izah etməyə çalışır ki, belə də olmalıdır. Amma bu absurddur! Azərbaycan, onun ərazisinin işğalı, özgə ərazisini qanunsuz işğal edən təcavüzkar var. Azərbaycan ona qarşı həyata keçirilən təcavüzün nəticələri ilə heç vaxt barışmayacaq. Özünümüdafiə BMT-nin nizamnaməsinə uyğun olaraq hər bir ölkənin hüququdur. Bu, qədim dövrlərdən indiyə qədər hər bir xalqın müqəddəs borcudur.

Azərbaycan vətəndaşı kimi, əslən Qarabağdan olan, Şuşada ata-baba evi indi işğal altında olan bir insan kimi dəfələrlə demişəm və indi də deyirəm ki, vətənimin torpaqlarını işğalçılardan azad etmək üçün Vətən müharibəsində şəxsən iştirak etməyə hazıram. Lakin bu gün prezident İlham Əliyevin rəhbərliyi ilə Azərbaycanda dövlət quruculuğu, o cümlədən hərbi quruculuq sahəsində əldə edilən müvəffəqiyyət sayəsində silahlı qüvvələrimizin potensialı kifayət qədər çoxdur və aprel hadisələri zamanı Müdafiə Nazirliyi könüllülərin orduya cəlb edilməsinə ehtiyac olmadığını bildirib”.

Polad Bülbüloğlunun sözlərinə görə, münaqişənin həllində real irəliləyiş tərəflər arasında razılaşdırılmış qrafik üzrə erməni işğalçı qüvvələrinin çıxarılması və Azərbaycanın ərazi bütövlüyünün bərpasının həyata keçirilməsi ilə başlamalıdır: “Qısa müddətdə məhz bu nəticənin əldə edilməsinə ATƏT-in Minsk qrupunun həmsədrləri, o cümlədən təşkilatın səhra missiyaları yardım etməlidirlər. Sülhməramlı adı altında mövcud status-kvonun möhkəmləndirilməsi mexanizmlərinin yaradılmasına cəhd göstərilməsi səmərəsizdir. Azərbaycan belə bir yanaşmaya razılıq verməyəcək, çünki o, həm ölkəmizin maraqları, həm də beynəlxalq hüquq baxımından qəbuledilməzdir. Regionun müharibənin nəticələrinin uzun müddət saxlanılmasına və işğal vəziyyətinin konservasiyasına deyil, sülhə ehtiyacı var. Birgə səyləri məhz bu istiqamətə yönəltmək lazımdır”.

Seçki yarışının adı: Tramp – Klinton

08.06.2016

İyunun 7-də ABŞ-ın bir neçə ştatında prezidentliyə iddiaçıların ilkin seçkisi keçirilib. Transparency.az-ın məlumatına görə, Kaliforniyada  Respublikaçılar Partiyasından Donald Tramp 77,7%, Demokratlar Partiyasından Hillari Klinton 63,5% nəticə göstərib.

Respublikaçıların yarışmadığı Şimali Dakotada Demokratlar Partiyasından Berni Sanders 64,2% səslə qalib gəlib.

Cənubi Dakotada Donald Tramp səslərin üçdə ikisini toplayıb. Bu ştatda Hillari Klinton 51,5% səslə önə çıxıb.

Nyu-Cersi ştatında Donald Tramp 80%, Hillari Klinton 63,3% səs alıb.

Nyu-Meksika ştatında Donald Trampın nəticəsi 72,8%, Hillari Klintonun nəticəsi 52,8%-dir.

Montanada Donald Tramp 73,1% səs alıb. Bu ştatda Hillari Klinton Berni Sandersi kiçik üstünlüklə geridə qoyub.

Beləliklə, prezident seçkisində Respublikaçılar Partiyasını Donald Trampın, Demokratlar Partiyasını Hillari Klintonun təmsil edəcəyi dəqiqləşir. Yekun qərarlar qurultaylarda veriləcək. Respublikaçıların qurultayı gələn ay Klivlenddə, demokratların qurultayı Filadelfiyada keçiriləcək.

Donald Tramp qurultaya 1477 nümayəndə (1237 bəs edir), Hillari Klinton 2487 nümayəndə (2383 bəs edir) qazanıb.

Son rəy sorğularına görə, amerikalıların 46%-i prezident seçkisində Hillari Klintona səs verməyə hazırdır. Donald Trampı seçicilərin 35%-i dəstəkləyir. Seçicilərin 19%-i hələ qərara gəlməyib.

Prezident seçkisi noyabrın 8-də olacaq.

Donald Tramp 1946-cı il iyunun 14-də Nyu-York ştatında doğulub. Ata tərəfdən alman, ana tərəfdən şotland əsillidir. Tikinti maqnatıdır. Nyu-York Hərbi Akademiyasını və Pensilvaniya Universitetinin Uorton Biznes Məktəbini bitirib.

Hillari Klinton 1947-ci il oktyabrın 26-sı Çikaqoda doğulub. Yel Universitetinin hüquq fakültəsini bitirib. 1993-2001-ci illərdə prezident postunu tutmuş Bill Klintonun xanımıdır. 2009-2013-cü illərdə ABŞ-ın dövlət katibi olub.

Ali Məhkəmə Abdulla Abdullayevi azadlığa buraxdı

08.06.2016

İyunun 8-də Ali Məhkəmədə iş adamı Abdulla Abdullayevin kassasiya şikayətinə baxılıb.

Report.az-ın məlumatına görə, hakim İlham Cəfərovun sədrliyi ilə keçirilən prosesdə Abdulla Abdullayevin təqsirli bilindiyi maddələrdən biri üzrə işə xitam verilib. Söhbət Cinayət Məcəlləsinin 193-1.3.2-ci (cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma) maddəsindən gedir. Digər maddələr — Cinayət Məcəlləsinin 178.3.1-ci (mütəşəkkil dəstə tərəfindən dələduzluq törədilməsi), 178.3.2-ci (külli miqdarda ziyan vurmaqla dələduzluq), 179.3.1-ci (mütəşəkkil dəstə tərəfindən mənimsəmə və ya israf etmə)  179.3.2-ci (külli miqdarda mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri üzrə o, yenə təqsirli bilinsə də, Ali Məhkəmə iş adamının cəzasını 5 il sınaq müddəti olmaqla şərti cəza ilə əvəzləyib. Beləliklə, Abdulla Abdullayev azadlığa çıxır.

Abdulla Abdullayev 2014-cü il aprelin 4-dən həbsdədir. 2015-ci il sentyabrın 7-də Bakı Ağır Cinayətlər Məhkəməsi onu 13 il müddətinə azadlıqdan məhrum edib. Hökmdə “AMAY” MMC-nin faktiki rəhbəri kimi göstərilən Abdulla Abdullayev başqaları ilə birlikdə 2006-2008-ci illərdə İqtisadiyyat və Sənaye Nazirliyi yanında Sahibkarlığa Kömək Milli Fondunun xətti ilə kənd təsərrüfatı, eləcə də digər sahələrin inkişafına yönəldilməsi nəzərdə tutulan 3 milyon 397 min manat məbləğində vəsaiti “AMAY”ın Xətai rayonu ərazisində yerləşən binasının təmir-tikinti işlərinə sərf etməkdə günahkar bilinib.

İlham Əliyev müsəlman ölkələrinin səfirləri ilə görüşüb

08.06.2016

İyunun 8-də prezident İlham Əliyev Ramazan ayı münasibətilə müsəlman ölkələrinin Azərbaycandakı diplomatik nümayəndəliklərinin və beynəlxalq təşkilatlarının rəhbərlərini qəbul edib.

Ramazan ayının başlaması münasibətilə təbriklərini çatdıran İlham Əliyev deyib ki, görüş iştirakçılarının təmsil etdiyi ölkələrin Azərbaycanla həm ikitərəfli, həm çoxtərəfli formatda əlaqələri qurulub. Gələcəkdə bu əməkdaşlığın daha da dərinləşəcəyinə əminliyini ifadə edən dövlət başçısı vurğulayıb ki, beynəlxalq təşkilatlar çərçivəsində də uğurlu əməkdaşlıq var.

Prezident aprel ayında İslam Əməkdaşlıq Təşkilatının Türkiyədə keçirilən zirvə görüşündə bu həmrəyliyin bir daha nümayiş olunduğunu diqqətə çatdıraraq həmin tədbirdə Ermənistan-Azərbaycan, Dağlıq Qarabağ münaqişəsi ilə bağlı çox ciddi sənədin qəbul edildiyini, aprel ayında Azərbaycana qarşı törədilən erməni təxribatının pisləndiyini qeyd edib. “Biz bu addımları çox yüksək qiymətləndiririk və bunlara görə müsəlman ölkələrinə minnətdarlığımızı bildiririk” deyən dövlət başçısı bu münaqişənin region üçün böyük təhlükə olduğunu diqqətə çatdırıb, onun fəsadları barədə danışıb, Ermənistanın etnik təmizləmə siyasəti apardığını, Xocalı soyqırımını törətdiyini, işğal edilən torpaqlarda bütün tarixi və dini abidələri dağıtdığını söyləyib.

AZƏRTAC-ın məlumatına görə, Ermənistan rəhbərliyinin Avropa ölkələrinə münaqişə ilə bağlı daim təhrif edilən məlumatlar verdiyini və eyni zamanda bu münaqişəyə dini don geyindirməyə çalışdığını deyən dövlət başçısı diqqətə çatdırıb ki, bir çox hallarda onlar üç müsəlman ölkəsi əhatəsində xristian dəyərlərini müdafiə etdiklərini də iddia edirlər. “Bu, böyük riyakarlıqdır. Siz — Azərbaycanda yaşayan insanlar yaxşı bilirsiniz ki, ölkəmizdə dini, milli zəmində heç vaxt münaqişə olmayıb” deyən İlham Əliyev ölkədə məscidlərlə yanaşı kilsələrin və sinaqoqların fəaliyyət göstərdiyini, erməni kilsəsinin şəhərin mərkəzində toxunulmaz qaldığını və Azərbaycan dövlətinin bu kilsənin təmirinə vəsait ayırdığını da bildirib, Ermənistan rəhbərliyinin bu ucuz və nalayiq çıxışlarının riyakarlığın təzahürü olduğunu vurğulayıb: “Bu, bir daha Ermənistan rəhbərliyinin müsəlman ölkələrinə düşmən gözü il baxdığını təsdiq edir”.

Ermənistana pul köçürmələri 2,5% azalıb

08.06.2016

-cı ilin yanvar-aprel aylarında Ermənistana bankla fərdi pul köçürmələrinin həcmi 377,7 milyon dollar olub. Bu, ötən illə müqayisədə 2,5% azalma deməkdir.

Ermənistan Mərkəzi Bankının hesabatına görə, pul köçürmələrinin 52,7%-i Rusiyanın payına düşür. Rusiyadan Ermənistana bankla fərdi pul köçürmələri ötən ilin eyni dövrü ilə müqayisədə 10,3% azalıb. Eyni müddətdə Ermənistandan Rusiyaya pul köçürmələri 40,7% çoxalıb.

Transparency.az xəbər verir ki, hesabat dövründə Rusiyadan Ermənistana pul daxilolmalarının təmiz həcmində 39,3% azalma var.

Zəhərlənmə statistikası açıqlanıb

08.06.2016


Səhiyyə Nazirliyi Kliniki Tibbi Mərkəzin toksikologiya şöbəsinə ötən il daxil olan xəstələr haqqında məlumat yayıb.

Şöbənin əsas vəzifələri kəskin zəhərlənmiş və onun nəticəsində vəziyyəti ağırlaşmış xəstələrin müalicəsi və reabilitasiyası, aktiv detoksikasiya üsulları tələb edən, endogen intoksikasiyalı xəstələrin müalicəsi, şəhərin və respublikanın müalicə-profilaktika müəssisələrinə mütəxəssis məsləhətlərinin verilməsi və operativ köməklik göstərməkdən ibarətdir.

Bildirilir ki, ötən il toksikologiya şöbəsinə 2462 xəstə hospitalizasiya olunub, bu da əvvəlki illə müqayisədə 27 nəfər çoxdur. Xəstələrin 1432 nəfəri şöbəyə qəsdlə olmayan və məişət zəhərlənməsi, 1030 nəfəri isə sui-qəsd xarakterli zəhərlənmə ilə daxil olub.

823 nəfər dərman zəhərlənməsi, 502 nəfər dəm qazı və digər toksiki qazlarla zəhərlənmə, 350 nəfər isə yandırıcı məhlullardan zəhərlənmə diaqnozu ilə qəbul edilib.

Xəstələrin 740 nəfəri və ya 30,1 faizi 20-29 yaş qrupuna aid olub, 419 nəfəri və ya 17 faizi isə 15 yaşına qədər uşaqlar təşkil edib.

Qlobal Sülh İndeksi: Azərbaycan 163 ölkə içində 134-cüdür

08.06.2016

İqtisadiyyat və Sülh İnstitutu Qlobal Sülh İndeksini açıqlayıb. “Azadlıq” radiosunun məlumatına görə, hesabatda dünyanın cəmi 10 ölkəsində münaqişə baş vermədiyi bildirilir.

Qlobal Sülh İndeksində 163 dövlətdə sülhün durumu 23 keyfiyyət və kəmiyyət göstəricisinə əsasən dəyərləndirilib. İndeks 3 əsas meyar – cəmiyyətdə təhlükəsizlik səviyyəsi, yerli və beynəlxalq münaqişələrin miqyası və hərbləşdirmə dərəcəsinə əsasən hazırlanır.

Qiymətləndirməyə görə, dünyanın ən dinc ölkəsi İslandiyadır. Növbəti yerlərdə Danimarka, Avstriya, Yeni Zelandiya və Portuqaliya gəlir.

Beş ildən çox vətəndaş müharibəsinin getdiyi Suriya ən təhlükəli ölkə kimi birincidir.

Azərbaycan 163 ölkə içində 134-cü, Ermənistan 110-cu, Rusiya 151-ci, Gürcüstan 85-ci yerdə qərarlaşıb. Ukrayna 156-cı, İran 133-cü, Əfqanıstan 160-cıdır.

Avropa dünyanın ən dinc regionu elan olunub. İlk onluqdakı yeddi ölkə məhz Avropada yerləşir.

İndeksə əsasən, yalnız Botsvana, Çili, Kosta-Rika, Yaponiya, Mavriki, Panama, Qətər, İsveçrə, Uruqvay və Vyetnamda heç bir münaqişə baş vermir.

Komitə sədrindən bahalaşma rəqəmləri

08.06.2016

Dövlət Statistika Komitəsi istehlak bazarında qiymətlərin necə dəyişdiyini açıqlayıb. Transparency.az bildirir ki, iyunun 8-də komitə sədri Tahir Budaqovun imzası ilə yayılan informasiyada 2016-cı ilin yanvar-may aylarında istehlak məhsullarının və xidmətlərin 2015-ci ilin eyni dövrünə nisbətən 10,4 faiz, o cümlədən ərzaq məhsullarının 11,9 faiz, qeyri-ərzaq məhsullarının 15,3 faiz, əhaliyə göstərilən ödənişli xidmətlərin 4,4 faiz bahalaşdığı qeyd olunur.

Hesabata görə, 2016-cı ilin may ayında aprel ayına nisbətən istehlak məhsullarının və xidmətlərin qiymətləri 0,1 faiz, o cümlədən ərzaq məhsullarının qiymətləri 0,7 faiz düşüb, qeyri-ərzaq məhsullarının qiymətləri 0,3 faiz, əhaliyə göstərilən ödənişli xidmətlərin qiymətləri isə 0,2 faiz artıb.

Xaçmazda əmək yarmarkası

08.06.2016

İyunun 8-i Xaçmazda Əmək və Əhalinin Sosial Müdafiəsi Nazirliyi yanında Dövlət Məşğulluq Xidmətinin təşkilatçılığı ilə keçirilən əmək yarmarkasında 29 müəssisə 448 iş yeri təklif edib.

AZƏRTAC xəbər verir ki, Heydər Əliyev adına Mədəniyyət Mərkəzində keçirilən yarmarkada təklif edilən işlərə görə əməkhaqqı 110 manatdan 771 manatadək məbləğdə müəyyənləşdirilib. Təklif olunan iş yerlərinin 257-si qulluqçu, 86-sı fəhlə, 105-i isə xidmət sahəsinə aid olub.

Əmək yarmarkasına 400 nəfərdən çox işaxtaran qatılıb. Onlardan 75 nəfərinə işə göndəriş verilib, 12 nəfər isə ictimai işlərə cəlb olunub.

Gürcüstanda parlament seçkisinin vaxtı bilindi

08.06.2016


İyunun 8-də Gürcüstanın baş naziri Georgi Kvirikaşvili ölkədə növbəti parlament seçkisinin vaxtı ilə bağlı qərar imzalayıb. Novator.az xəbər verir ki, qərara əsasən, Gürcüstanda parlament seçkisi bu il oktyabrın 8-nə təyin olunub.

Gürcüstan Konstitusiyasına görə, qərar imzalandığı gündən qüvvəyə minir. Bu həm də seçkiqabağı kampaniyanın başlanması deməkdir.

Gürcüstanda səlahiyyət müddəti 4 il olan 150 yerlik parlamentin 77 deputatı proporsional (partiya siyahıları üzrə), 73 deputatı majoritar (dairələr üzrə) üsulla seçilir. Hökuməti parlamentdə mandatların yarıdan çoxunu əldə edən partiya formalaşdırır.

Bu il 180 Qarabağ müharibəsi əlili və şəhid ailəsi mənzillə təmin edilib

08.06.2016

Tərtər və Ağcabədi rayonlarında 8 fərdi yaşayış evi Qarabağ müharibəsi əlilləri və şəhid ailələrinin istifadəsinə verilib. Əmək və Əhalinin Sosial Müdafiəsi Nazirliyinin  8 iyun məlumatına görə, fərdi yaşayış evindən 2-si Qarabağ müharibəsi əlillərinə, 6-sı şəhid ailələrinə təqdim olunub.

Nazirlik bildirir ki, bu il 180 nəfər Qarabağ müharibəsi əlili və şəhid ailəsini mənzillə təmin edib. Cari ilin ötən dövründə Siyəzən, Şabran, Qusar, Şamaxı, Ağstafa, Qazax, Biləsuvar, Sabirabad, İmişli, Füzuli, Oğuz, Şəki, Beyləqan və digər rayonlarda fərdi yaşayış evləri, Beyləqan rayonunda çoxmənzilli yaşayış binası, Abşeron rayonunda hazır yaşayış binalarından alınaraq təmir edilən mənzillər istifadəyə verilib.

Ermənistanda ən varlı deputatın maaşını kəsirlər

08.06.2016

Ermənistan parlamentinin spikeri Qalust Saakyan iyunun 8-də oliqarx deputat, Çiçəklənən Ermənistan Partiyasının yaradıcısı Qaqik Sarukyanın əməkhaqqını kəsmək niyyətində olduğunu açıqlayıb. Novator.az-ın məlumatına görə, spiker niyyətini Qaqik Sarukyanın parlament iclaslarından davamlı şəkildə yayınması ilə əsaslandırıb: “Mən heç bir tədbir görməyəcəm. Yeganə cəzam Sarukyanın əməkhaqqını kəsmək olacaq”.

Ermənistanın ən varlı 3 adamından biri olan Qaqik Sarukyan Çiçəklənən Ermənistan Partiyasını 2004-cü ildə yaradıb. Ermənistan parlamentində partiya deputat sayına görə ikinci fraksiyadır.

Ermənistan parlamentinin sözçüsü Arsen Babayan bildirib ki, 2015-ci ildə iclasları buraxdıqlarına görə deputatlardan 18 milyon dram (38 min ABŞ dolları) tutulub. Ölkədə parlament üzvlərinin orta əməkhaqqı 500 min dramdır (1000 dollardan bir qədər artıq).

Azərbaycanlıların dünyaya müraciəti

08.06.2016

Dünya azərbaycanlılarının IV qurultayı nümayəndələrinin dünya ictimaiyyətinə, beynəlxalq təşkilatlara, xarici ölkələrin hökumət rəhbərlərinə və parlamentlərinə müraciəti yayılıb. Müraciətdə 28 ildir davam edən Ermənistan-Azərbaycan, Dağlıq Qarabağ münaqişəsinin hələ də həll edilməməsindən narahatlıq ifadə olunur. Qeyd edilir ki, Azərbaycan ərazilərini işğal altında saxlayan Ermənistan silahlı qüvvələrinin qoşunların təmas xəttində törətdiyi hərbi təxribatlar nəticəsində günahsız mülki şəxslər həlak olur, yaşayış məskənləri, təhsil ocaqları, ictimai obyektlər dağıdılır, münaqişə bölgəsində yerləşən tarixi abidələr, habelə ərazinin flora və faunası qəddarcasına məhv edilir: “Təəssüf ki, beynəlxalq ictimaiyyət uzun illərdir münaqişənin aradan qaldırılması ilə bağlı Azərbaycanın çoxsaylı müraciət və çağırışlarına biganə yanaşıb, nəticədə bütün regionun inkişafına və təhlükəsizliyinə təhdid olaraq qalan bu problem daha mürəkkəb xarakter alıb.

Ermənistanın Azərbaycana qarşı hərbi təcavüzü çoxsaylı insan tələfatına, ağır maddi və mənəvi itkilərə səbəb olub. Bir milyondan çox soydaşımızın doğma torpağından didərgin düşməsi və hələ də öz evlərinə qayıda bilməməsi insan hüquqlarının kobud şəkildə pozulmasının əyani sübutudur.

Münaqişənin ilk mərhələsində — 1988-ci ildə Ermənistanda öz tarixi dədə-baba yurdlarında yaşayan 250 mindən çox azərbaycanlı deportasiya edilib. Ermənistanın monoetnik dövlətə çevrilməsi ilə nəticələnən bu kütləvi deportasiya zamanı yüzlərlə dinc azərbaycanlı qətlə yetirilib, onlara aid iki mindən çox yaşayış məntəqəsindən bütün əhali zorla çıxarılıb, minillikləri əhatə edən tarixə malik Azərbaycan toponimləri saxtakarlıqla dəyişdirilib. Ermənistanda və Azərbaycanın işğal altında olan ərazilərində azərbaycanlılara məxsus tarixi-mədəni abidələr, muzeylər, məscidlər, müqəddəs sitayiş yerləri, qəbiristanlıqlar tamamilə dağıdılıb. Münaqişə başladığı dövrdən indiyədək yalnız Azərbaycanda 890 yaşayış məntəqəsi, 150 min ev, 7 min inzibati bina, 693 məktəb, 855 uşaq bağçası, 695 sağlamlıq mərkəzi, 927 kitabxana, 44 məbəd, 9 məscid, 9 etnoqrafik əhəmiyyətli tarixi yer, 464 tarixi abidə və muzey, 40 min muzey eksponatı, 6 min sənaye və kənd təsərrüfatı müəssisəsi, 160 körpü, 2300 kilometr su kəməri, 2 min kilometr qaz kəməri, 15 min kilometr elektrik xətti, 1200 kilometr irriqasiya sistemi dağıdılıb, 280 min hektar meşə, 1 milyon hektar əkin sahəsi tamamilə məhv edilib”.

Müraciət bu çağırışla bitir: “Biz — dünya azərbaycanlılarının IV qurultayının nümayəndələri beynəlxalq təşkilatlara, xarici ölkələrin dövlət və hökumət başçılarına, ATƏT-in Minsk qrupunun həmsədr ölkələrinə müraciət edərək Azərbaycan torpaqlarının işğaldan azad edilməsi, münaqişənin sülh yolu ilə nizamlanması üçün Ermənistan rəhbərliyinə təzyiq göstərməyə, problemin beynəlxalq hüququn normaları əsasında ədalətli həlli naminə səylərini birləşdirməyə dəvət edirik”.

Müraciət iyunun 4-də qəbul edilib.

Xarici valyutalar bahalaşıb

09.06.2016

İyunun 9-da xarici valyutalar bahalaşıb. Transparency.az-ın məlumatına görə, 1 ABŞ dollarının rəsmi kursu 1,5054 manatdan 1,5084 manata yüksəlib.

1 avronu Mərkəzi Bank 1,7203 manata satır. Ötən gün avro 1,7124 manata təklif edilib.

1 Rusiya rublunun məzənnəsi isə 0,0233 manatdan 0,0236 manata qalxıb.

Mərkəzi Bank 1 gürcü larisinə 0,7098 manat, 1 ingilis funtuna 2,1878 manat, 1 İsveçrə frankına 1,5738 manat, 1 türk lirəsinə 0,5217 manat qiymət qoyub (Məzənnələr).

Ötən il Azərbaycan manatı iki dəfə devalvasiyaya uğrayaraq dollar qarşısında 78 qəpikdən 1 manat 55 qəpiyə qalxıb. Dövlət Neft Fondu və Mərkəzi Bank manatın kursunu sabit saxlamaq üçün 2016-cı ilin hərraclarında üst-üstə 2 milyard 692,8 milyon dollar satıblar.

Prezident: “2004-cü ildən bəri Azərbaycanda iqtisadiyyat 300 faiz artıb”

09.06.2016


AZƏRTAC iyunun 7-si Berlində keçirilmiş Azərbaycan-Almaniya İqtisadi Forumundan ətraflı məlumat yayıb. Prezident İlham Əliyev forumda deyib ki, iqtisadi müstəqillik olmadan Azərbaycan siyasi müstəqilliyə nail ola bilməzdi: “Əgər biz başqa ölkələrdən asılı olsaydıq və iqtisadi cəhətdən müstəqil olmasaydıq, müstəqil siyasət həyata keçirmək üçün imkanlarımız çox məhdud olardı. Bu səbəbdən də biz Azərbaycanın inkişafına böyük sərmayə yatırdıq. Biz Ermənistanla atəşkəs dövründən ölkəni inkişaf etdirmək üçün istifadə etdik və düşünürəm ki, çox yaxşı nəticələr əldə etdik. Hazırda Azərbaycan müasir, inkişaf edən, iqtisadi cəhətdən müstəqil, iqtisadiyyatı şaxələndirilmiş, qlobal enerji və nəqliyyat layihələrinin həyata keçirilməsinə rəhbərlik edən və dünyada çox yaxşı nüfuza malik bir ölkədir.

Son 10-12 ildə əsasən neft hasilatının artması hesabına, — lakin təkcə buna görə yox, — iqtisadiyyatımız sürətlə inkişaf etdi. 2004-cü ildən bəri Azərbaycanda iqtisadiyyat 300 faiz artıb. Biz yoxsulluq və işsizlik səviyyəsini əhəmiyyətli dərəcədə azaltmağa nail olmuşuq. Hazırda hər iki göstərici 5 faizə yaxındır. Neft satışından əldə olunan gəlirləri qeyri-neft sektoruna yatırmağa başladığımızdan iqtisadiyyatımızın rəqabətliliyi artıb. Davos Dünya İqtisadi Forumunun hesablamalarına görə, Azərbaycan iqtisadiyyatı rəqabət qabiliyyəti indeksinə görə dünyada 40-cı yerdədir.

Əlbəttə ki, enerji sektorunun inkişafı və enerji amili bizim üçün, həm də təkcə bizim üçün deyil, digər ölkələr üçün də vacibdir. 1994-cü ildən Azərbaycan nəhəng enerji layihələri — ilk növbədə Azərbaycanı Qara dəniz və Aralıq dənizi ilə birləşdirən neft kəmərlərinin tikintisini həyata keçirir. Hazırda bəzi Avropa ölkələri enerji balanslarındakı neftin təxminən 30 faizini Azərbaycandan alırlar. 2012-ci ildən biz qonşu ölkələrə və Avropaya qaz kəmərinin tikintisi layihəsini həyata keçiririk. Artıq bizim Gürcüstan, Türkiyə, Rusiya və İran kimi qonşu ölkələrə qaz ixrac etməyə imkan verən bir neçə kəmərimiz var. Biz hər dörd istiqamətdə təbii qaz ixrac edirik.

Hazırda biz tərəfdaşlarımızla birlikdə Cənub Qaz Dəhlizi layihəsini həyata keçiririk. Bu, 2012-ci ildə Azərbaycan və Türkiyənin Trans-Anadolu kəmərinin tikintisinə dair sazişin imzalanması ilə başladı. O vaxtdan bir çox başqa layihələrə start verilib. Cənub Qaz Dəhlizi layihəsinin bir hissəsi olan Trans-Adriatik kəmərinin tikintisinə bu ilin mayında başlanıb. Layihə dörd layihədən ibarətdir — dünyanın ən böyük qaz yataqlarından biri olan “Şahdəniz”dən qazın hasil olunması, Azərbaycanı Gürcüstan və Türkiyə ilə birləşdirən kəmərin tikintisi, sonra Türkiyənin şərq sərhədindən qərb sərhədinə kəmər — bu, TANAP adlanır və Türkiyə-Yunanıstan sərhədindən İtaliyaya kəmər — bu, TAP — Trans-Adriatik kəmər adlanır.

Bütün bu layihələr tərəfdaşlarımızla razılaşdırılmış şəkildə həyata keçirilir. Bu layihələrdə yeddi ölkə iştirak edir, onlardan üçü Avropa İttifaqının üzvüdür. Avropa Komissiyası bizim təşəbbüslərə güclü dəstək verir. Ötən il və bu il biz Bakıda Cənub Qaz Dəhlizi Məşvərət Şurasının iclaslarını keçirmişik. Orada Azərbaycanın aparıcı rolu yüksək qiymətləndirilib. Planlarımıza əsasən, Azərbaycan və Türkiyəni birləşdirən kəmər iki ilə istismara veriləcək və 2020-ci ilədək Azərbaycan qazı ilk dəfə olaraq Avropa bazarlarına çıxarılacaq. Bizim üçün bu, təchizat marşrutlarını şaxələndirmək imkanıdır. Tranzit ölkələr üçün bu, pul qazanmaq və tikintiyə və sonra layihənin texniki təminatına minlərlə insanı cəlb etmək imkanıdır, istehlakçılar üçün isə alternativ enerji mənbəyidir. Layihəmizin üstünlüyü ondadır ki, bu, təkcə marşrutların deyil, mənbələrin şaxələndirilməsidir. Bu, daha vacibdir.

Bizim böyük qaz ehtiyatlarımız var. Azərbaycanın təsdiqlənmiş qaz ehtiyatları 2,6 trilyon kubmetrdir. Əminəm ki, vaxt keçdikcə yeni kəşfiyyat layihələri ilə biz mütləq bu göstəriciləri daha da artıracağıq. Lakin enerji amili bizim üçün artıq prioritet deyil. Biz iqtisadiyyatı şaxələndirməklə əsas diqqəti qeyri-enerji sektoruna cəmləşdirmişik. Bu gün enerji amili ümumi daxili məhsulda cəmi 30 faizdən bir qədər artıq, gəlirlərimizdə yarıdan aşağıdır. Lakin bir nömrəli məsələ ixrac potensialımızın şaxələndirilməsidir və biz şəffaflıq, düzgün idarəetmə, ixracın stimullaşdırılması, investisiya mühitinin yaxşılaşdırılması ilə bağlı mühüm iqtisadi islahatların həyata keçirilməsini davam etdirmək üçün beynəlxalq maliyyə institutları ilə sıx şəkildə işləyirik.

1995-ci ildən bəri Azərbaycana 200 milyard dollar investisiya yatırılıb, bunun yarısı xarici investisiyalardır. Bizim hazırda prioritet hesab etdiyimiz sahələr arasında kənd təsərrüfatı birinci yerdədir. Çünki əhalinin demək olar ki, yarısı kənd yerlərində yaşayır və bunun üçün yaxşı iqlim şəraiti mövcuddur. Yüksək texnologiyalar — İKT sektoru kifayət qədər inkişaf edib. Azərbaycan kosmik sənayesi olan ölkəyə çevrilib, iki peyki orbitə buraxıb və bu proses davam etdiriləcək.

Biz coğrafi mövqeyimizdən istifadə edərək qitələri birləşdirən çox güclü logistik və nəqliyyat infrastrukturu yaratmışıq. Məsələn, İpək Yolunun bərpası ilə bağlı layihəyə 2007-ci ildə — biz Türkiyə və Gürcüstanla birgə üç ölkə arasında Asiya və Avropanı birləşdirən dəmir yolunun tikintisinə başlamağımızla start verildi. Beləliklə, indi bu layihə demək olar ki, hazırdır və ümidvaram, bu ilin sonunadək bu marşrut açılacaq.

Artıq Azərbaycan ərazisi ilə Çindən Avropaya ilk sınaq konteyner qatarları keçib. Bu, Asiyadan Avropaya və əks istiqamətdə ən qısa yol olacaq. Ümidvaram ki, alman şirkətləri bu ilin sonunadək reallaşacaq bu imkandan yararlanacaqlar. Eyni zamanda Xəzər dənizində Bakıya yaxın yerdə ən böyük dəniz limanının tikintisi və yenə də Azərbaycan ərazisindən istifadə etməklə Cənubdan Şimala daha bir dəhlizin yaradılması layihələri ilə Azərbaycan nəqliyyat nöqteyi-nəzərindən regionun coğrafi və logistik mərkəzinə çevriləcək. Bu, nəinki iqtisadi cəhətdən faydalı olacaq, həm də əməkdaşlığı və qarşılıqlı əlaqələri gücləndirəcək. Əgər biz sabit vəziyyət yaratmaq istəyiriksə, — düşünürəm ki, regionun bütün ölkələri bunu etmək istəyir, — bizim regionda fəal beynəlxalq əməkdaşlığa ehtiyacımız var və ən yaxşı yol qarşılıqlı əlaqələrdir.

Enerji layihələri bizim hamımızı bir-birimizdən asılı edir. Biz bazarlardan asılıyıq, bazarlar təchizatdan asılıdır. Nəqliyyatla bağlı vəziyyət də eynidir. Bu, ölkələr arasında proqnozlaşdırılmanı və əməkdaşlığı artıracaq, eyni zamanda Avropa İttifaqı-Azərbaycan əlaqələri də daha sürətlə inkişaf edəcək.

Bu gün bizim aramızda yaxşı əməkdaşlıq mövcuddur. Azərbaycan Avropa İttifaqına üzv olan 8 ölkə ilə strateji tərəfdaşlıqla bağlı sənədləri imzalayıb və ya qəbul edib. Bu, Avropa İttifaqı-Azərbaycan əməkdaşlığının ümumi formatı üçün yaxşı əsasdır”.

İlham Əliyev qeyd edib ki, Azərbaycanda 169 alman şirkəti fəaliyyət göstərir: “Əlbəttə ki, mən ölkəmizdə daha çox alman şirkətinin fəaliyyət göstərməsini istəyirəm. Onlar podratçı olaraq Azərbaycanın inkişafı üçün çox əhəmiyyətli layihələr həyata keçirirlər. Azərbaycandakı yaxşı investisiya mühitini və siyasi mühiti nəzərə alaraq, biz onları həm də investor kimi görmək istəyirik”.

Ermənistana keçən Azərbaycan vətəndaşının şəxsiyyəti müəyyənləşdirilib

09.06.2016

İyunun 9-da Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası rəsmi məlumat yayıb. Qeyd olunur ki, aidiyyəti beynəlxalq təşkilatlar və dövlət qurumları ilə birlikdə aparılan araşdırma nəticəsində iyunun 7-də Ermənistan tərəfə keçdiyi bildirilən Azərbaycan vətəndaşının şəxsiyyəti müəyyənləşdirilib: “Həmin qadın Gədəbəy rayonunun Arabaçı kənd sakini, 1977-ci il təvəllüdlü Qətibə İbrahim qızı Ələkbərovadır. Araşdırma nəticəsində Qətibə Ələkbərovanın Qazax Rayonlararası Ruhi Xəstəxanada dispanser qeydiyyatında olduğu müəyyən edilib.

Hazırda Qətibə Ələkbərovanın azad edilməsi istiqamətində tədbirlər görülür. Məsələ ilə bağlı ictimaiyyətə əlavə məlumat veriləcək”.

131 QHT layihəsinə yaşıl işıq

09.06.2016

QHT-lərə Dövlət Dəstəyi Şurası 2016-cı ilin 2-ci qrant müsabiqəsinin yekunlarını təsdiqləyib (Müsabiqənin nəticələri www.cssn.gov.az;www.qhtxeber.az saytlarında yerləşdirilib).

Məlumata görə, aprelin 5-də elan olunan 14 mövzulu qrant müsabiqəsinə 295 layihə təklifi daxil olub. Onlardan 21-i təşkilatın qanuni təmsilçisinin səlahiyyət müddətinin bitməsi, layihə təkliflərinə tələb olunan sənədlərin təqdim edilməməsi və digər bu kimi çatışmazlıqlara görə seleksiyadan keçməyib. 274 layihə ekspertizaya təqdim edilib. 123 layihə keçid balı topladığı üçün onların maliyyələşdirilməsi qərara alınıb.

Həmçinin 1-ci qrant müsabiqəsinin nəticələrindən narazı olub Apellyasiya Komissiyasına müraciət edən QHT-lərdən 8-nin layihəsini maliyyələşdirməyə müsbət rəy verilib.

İclasda Apellyasiya Komissiyasının yeni tərkibi də müəyyən edilib: Emin Həsənli, Sahib Məmmədov, Nərgiz Xələf, Rauf Məcidbəyli, bir QHT və bir jurnalist.

Azərbaycan neftinin qiyməti 53 dollara yaxınlaşır

09.06.2016

İyunun 9-da Azərbaycan neftinin qiyməti 52 dolları ötüb. AZƏRTAC xəbər verir ki, “AzəriLayt” markalı neftin bir barreli 89 sent bahalaşaraq 52,37 dollara qalxıb.

2016-cı ildə Azərbaycan neftinin ən yüksək qiyməti iyunun 1-də qeydə alınmışdı: 51,55 dollar.

Azərbaycanın dövlət büdcəsində xam neftin satış qiyməti bir barrel üçün 25 ABŞ dolları götürülüb.

Hazırda Nyu-York birjasında “Layt” markalı neftin bir barreli 49,65 dollara, London birjasında “Brent” markalı neftin bir barreli 50,36 dollara satılır.

Bakıda üç marşrut xətti ləğv olundu

09.06.2016

Bakıda 16, 18 və 96 saylı marşrut xətləri ləğv olunub. AZƏRTAC-ın məlumatına görə, qərarı Bakı Nəqliyyat Agentliyi çıxarıb.

İyunun 8-də Bakı Nəqliyyat Agentliyində şəhər nəqliyyatında müntəzəm sərnişindaşıma sahəsində xidmət göstərən daşıyıcı şirkətlərin rəhbərləri ilə görüş keçirilib. Görüş zamanı qanunvericilikdən irəli gələn və Bakı Nəqliyyat Agentliyinin hazırladığı konsepsiyada nəzərdə tutulan şərtlərə və tələblərə cavab verməyən daşıyıcılarla bağlı tədbir görüləcəyi diqqətə çatdırılıb. 16, 18 və 96 saylı marşrut xətləri tələblərə cavab vermədiyindən və təkrarlanan marşrut xətləri hesab olunduğu üçün iyunun 9-dan xətdən çıxarılıb.

Ötən ay DSMF-də 16 001 nəfər qeydiyyata düşüb

09.06.2016

Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun fərdi uçot sistemində qeydiyyatda olan sığortaolunanların sayı açıqlanıb. Rəsmi məlumata görə, may ayında 16 001 nəfər, yanvar-may aylarında isə 76 004 nəfər artım qeydə alınıb və fərdi şəxsi hesabı olan sığortaolunanların sayı 3 256 158 nəfərə çatıb.

Sığortaolunanlar arasında 30 yaşa qədər olanlar 20,7 faiz, 30-40 yaşlarında olanlar 25,2 faiz, 40-50 yaşlarında olanlar 20,1 faiz, 50-60 yaşlarında olanlar 21,2 faiz təşkil edir. Qalan sığortaolunanlar isə 60 yaşdan yuxarı olan şəxslərdir.

Türkiyə hara gedir?

09.06.2016

Türkiyədə kürd separatçıları ilə mübarizə fonunda terror hadisələri çoxalıb. Ölkənin bir çox dövlətlə (Rusiya, ərəb ölkələri, Qərb dövlətləri) münasibətləri gərgindir. Türkiyədə sosial-iqtisadi durum da problemlərsiz deyil.

Türkiyənin Karabük Universitetinin dosenti, azərbaycanlı siyasi analitik Ələskər Ələskərli Transparency.az-ın bu yöndə suallarını cavablandırıb: “Türkiyədəki mövcud durumu 1990-cı illərlə müqayisə edirlər. O vaxt da terror hadisələri həddindən artıq intensiv hal almışdı. Lakin indi terrorun qidalandığı mənbələrin sayı artıb və ölkənin təhlükəsizliyini təhdid edən ünsürlər daha da çoxalıb. Türkiyə ilə qonşu dövlət olan Suriyadakı durum, İŞİD faktoru da vəziyyəti ağırlaşdıran hallardır. Yəni Türkiyənin terrora qarşı mübarizəsi sadəcə PKK ilə məhdudlaşmır. Çox sayda daxili və xarici faktorların bir- birinə qarışdığı mürəkkəb vəziyyət yaranıb və bu, terror təşkilatlarının fəaliyyəti üçün münbit şərait yaradır.

Bugünkü terror çox fərqlidir. Ona qarşı mübarizə siyasəti də bu fərqləri diqqətə alaraq aparılmalıdır. Türkiyə güclü dövlətdir, bu problemlərin öhdəsindən gələcəyinə inanıram”.

Türkiyənin Rusiya ilə və digər ölkələrlə münasibətlərinə toxunan siyasi analitik qeyd edib ki, tarixi keçmiş unudulmamalıdır: “Hətta Sovet İttifaqı dağıldıqdan sonra da Türkiyə və Rusiya arasında hər zaman açıq və gizli rəqabət yaşanıb. İqtisadi sahədə yaxınlaşma olsa da, siyasi gərilmələr vaxtaşırı sezilib, Orta Asiya, Qafqaz, Balkan coğrafiyası ilə bağlı mənafelər tez-tez toqquşub. İndi Orta və Yaxın Şərq də bura əlavə edilib. Ona görə də Türkiyə və Rusiya arasındakı münasibətlər hər zaman məsafəli və kövrək qalacaq. Qərbin siyasəti isə terror, Suriyadakı vəziyyət, humanitar fəlakətlərlə bağlı həddindən artıq eqoistləşib, hətta riyakarcasına eqoistləşib”.

Hazırda Türkiyədə ən çox müzakirə olunan məsələlərdən biri ölkənin prezident idarə üsuluna keçməsi təklifidir. Dövlət başçısı Rəcəb Teyyub Ərdoğan necə bir prezidentlik idarəçiliyi istəyir? Bu sistemə keçid Türkiyəyə nə verə bilər?

Transparency.az-ın bu sualları ətrafında danışan Ələskər Ələskərli deyib ki, prezident idarə üsuluna keçid prosesi başlasa da, layihənin detalları, necə nəticələnəcəyi haqda heç bir təsəvvür yoxdur: “Müxalifət prezident idarə üsuluna keçid təkliflərinə sərt şəkildə etiraz edir. Konstitusiyanı dəyişmək, yeni idarəetmə forması yaratmaq yox, demokratik təsisatları gücləndirmək, hüquqi mexanizmləri daha effektiv işlətmək təklifləri səslənir.

Türkiyədəki dəyişiklik üçün bildiyim arqument güclü və operativ idarəetmə sisteminin qurulması zərurətidir. Necə bir prezidentlik idarəçiliyi olacağına gəlincə, demokratiya hökumət sistemlərinin necə adlandırılması ilə bağlı deyil. Dünyanın bir çox ölkəsində ABŞ-dakı kimi prezident üsul idarəsi var. Amma hamısı Amerika demokratiyası kimi rejim təsis edə bilibmi? Yaxud əksinə baxsaq, bütün parlamentar sistemlər demokratikdirmi? Fikrimcə, Türkiyədə idarəetmə rejimini dəyişməkdən çox onun necə effektiv işləyəcəyi haqda düşünmək lazımdır”.

Neft Fondu 29 banka 50 milyon dollar satdı

09.06.2016

İyunun 9-da Dövlət Neft Fondu valyuta hərracına 50 milyon ABŞ dolları məbləğində vəsait çıxararaq 29 banka satıb.

Transparency.az bildirir ki, bununla Dövlət Neft Fondunun bu ilin valyuta hərraclarında satdığı valyutanın həcmi 2 milyard 57,4 milyon dollara çatıb.

Mərkəzi Bankdan isə 2016-cı ilin hərraclarında 685,4 milyon ABŞ dolları alınıb.

“Əksəriyyət Böyük Britaniyanın ittifaqda qalmasına səs verəcək”

09.06.2016

Böyük Britaniyada 23 iyun referendumunda səsvermə üçün qeydiyyat vaxtı iyunun 9-da bitir. Referenduma Böyük Britaniyanın Avropa İttifaqında qalıb-qalmaması sualı çıxarılıb (Britaniya Avropadan ayrılırmı?).

1957-ci ildə əsası qoyulmuş Avropa İttifaqına Böyük Britaniya 1973-cü ildə daxil olub. Avropa İttifaqının daha 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.

Beynəlxalq məsələlər üzrə ekspert Rövşən İbrahimli Transparency.az-a deyib ki, referendum Avropa İttifaqından ayrılacağı təqdirdə Böyük Britaniyanın iqtisadi cəhətdən güclənəcəyi inamına söykənir: “Yəni Böyük Britaniya birinci növbədə öz milli maraqlarını güdür. Ölkə dünyanın əsas maliyyə mərkəzlərdən biridir və həmin statusu qorumaq istəyir. Məhz ona görə Britaniya vahid pul birliyi olan avro zonasına qoşulmayıb, hələ də funt sterlinqdən istifadə edir.

Başqa bir səbəb psixoloji faktordan doğur. Britaniyalılar adada yaşayır və özlərini coğrafi olaraq kontinental Avropadan ayrı görürlər. Qitədəki problemlər onlara bir növ yaddır, Avropanın yaşadığı iqtisadi çətinliklərin həllinə şərik olmaq istəmirlər”.

Bununla yanaşı ekspert düşünür ki, ittifaqdan ayrılması ölkəyə baha başa gələ bilər: “Böyük Britaniya ilə Avropa İttifaqının sıx inteqrasiyası var. Birlikdən ayrılma ölkənin iqtisadi göstəricilərinə, ticarət əlaqələrinə, işgüzarlığa, işsizlik səviyyəsinə mənfi təsir göstərə bilər. Üstəlik, Şotlandiya bir daha müstəqillik üçün referenduma gedə bilər, çünki əsasən bu region Avropa İttifaqının tərkibində qalmağı arzulayır. Bu baxımdan düşünürəm ki, referendumda əksəriyyət Böyük Britaniyanın ittifaqda qalmasına səs verəcək”.

İngiltərə, Şotlandiya, Uels və Şimali İrlandiya bölgələrindən ibarət Böyük Britaniyanın əhalisi 65 milyon nəfərə yaxındır.

Qaza ümid eləmək olarmı?

09.06.2016

İqtisadçı Rövşən Ağayev Trans-Anadolu qaz kəmərinə (TANAP) çəkilən xərclərdən və layihənin mümkün gəlirlərindən yazıb.

2018-ci ildə istismara verilməsi planlaşdırılan Trans-Anadolu qaz kəməri ilə Avropaya 10 milyard, Türkiyəyə isə 6 milyard kubmetr Azərbaycan qazının nəqli nəzərdə tutulur. İlkin ötürücülük qabiliyyəti ildə 16 milyard kubmetr olacaq kəmərin tutumunun 2023-cü ildə 23 milyard kubmetrə, 2026-cı ildə isə 31 milyard kubmetrə çatdırılması gözlənir.

“Cənub” qaz dəhlizinin ən uzun hissəsini təşkil edən TANAP Cənubi Qafqaz boru kəmərindən alacağı təbii qazı 2020-ci ilin əvvəlindən Trans-Adriatik (TAP) boru kəmərinə qoşularaq Yunanıstan, Albaniya və İtaliyadan keçməklə Avropaya çatdıracaq.

Transparency.az-ın məlumatına görə, qarşıdakı 3-4 ilə Azərbaycanın TANAP layihəsinə 10 milyard dollara yaxın sərmayə qoyacağını deyən ekspert Rövşən Ağayev layihənin gəlirləri haqda nikbin proqnoz verməyib: “Sərmayənin ən azı 7-8 milyard dolları xarici borc hesabına qoyulacaq. Bu, Azərbaycanın indiki xarici borcuna bərabər məbləğdir. Bəs yaxın 10-15 ildə qaz gəlirləri neftdən itirdiyimiz gəlirlərin hansı hissəsini kompensasiya edə biləcək? Azərbaycan hökuməti qiymətlərin ən pik dövründə mənfəət neftindən 1 ildə 16 milyard dollar qazanıb. Hazırkı qiymətlərlə bu məbləğ 7 milyard dollar ətrafındadır. Əgər qiymətlər indiki səviyyədə qalsa, hasilatın azalması nəticəsində 2020-ci ildən sonra mənfəət neftindən illik gəlir maksimum 3-4 milyard dollar ola bilər. İndiki qiymətlər və proqnoz edilən hasilat əsasında qiymətləndirdikdə pik dövrdə mənfəət qazından hökumətin illik qazancının 2-2,5 milyard dollar intervalında dəyişməsi mümkündür.

Dünya qaz bazarında çox sərt rəqabət dövrü gəlir. Maye qazın əsas alıcısı Cənubi Koreya və Yaponiya yanacaq istehlakını azaltdığına görə ekspertlər sürətlə artan maye qaz həcminin təklif artıqlığı yaradacağını proqnoz edir. Məsələn, Beynəlxalq Energetika Agentliyi bəyan edib ki, 2021-ci ilədək dünyada sıxılmış qazın istehsal həcmi 45% artacaq. Bir tərəfdən nəhəng qaz istehlakçılarının alternativ enerjidən istifadəsi nəticəsində tələbatda azalma yaranıb, o biri tərəfdən isə istehsalda az qala 50% artım baş verir. Oxşar mənzərəni son 2 ildə slans neftinin bazarda yaratdığı durumda görürük”.

Ekspert əlavə edib ki, Polşa ölkədə tikilən nəhəng maye qaz terminalı səbəbindən Rusiyanın “Qazprom” şirkəti ilə müqaviləni uzatmaq niyyətində deyil: “Öz növbəsində Avstraliyanın 2021-ci ilədək maye qaz istehsalında Qətəri geridə buraxıb dünya lideri olacağı real görünür. Azərbaycan hakimiyyəti bəyanat versə də, neft və qazı unuda bilmədi, bütün potensialını, strategiyasını yenə bu sektor üzərində qurdu. Bu layihələri davam etdirmək lazımdır. Amma qoyulan sərmayələrin həcmi, aparılan islahatların miqyası və əməliliyi ilə hökumət nümayiş etdirməli idi ki, qeyri-neft sektorunun inkişafı onun üçün birincidir. Belə olmadı. Bəyanatlarda qeyri-neft sektorunun, əməli fəaliyyətdə neft-qaz sektorunun inkişafı prioritetdir”.

51 sahibkara 371 min manat güzəştli kredit verilib

09.06.2016

Sahibkarlığa Milli Kömək Fondu növbəti iqtisadi forumu iyunun 9-u Ağsuda keçirib. Economy.gov.az-ın məlumatına görə, forumda Ağsu və ətraf rayonlardan olan 51 sahibkara 371 min manat güzəştli kredit verilib. Əsasən heyvandarlıq, kartofçuluq, bağçılıq, arıçılıq sahələrin inkişafına yönəldiləcək vəsait hesabına 50-dən çox yeni iş yerinin açılması nəzərdə tutulur.

Tədbirdə məlumat verilib ki, 2016-cı ilin ötən dövrü ərzində 1100-ə yaxın sahibkara 57,3 milyon manat güzəştli kredit verilib, bunun nəticəsində 2200-dən çox yeni iş yerinin açılmasına imkan yaradılıb. İndiyədək Dağlıq Şirvan iqtisadi rayonunda fəaliyyət göstərən sahibkarlıq subyektlərinin 5100-dən çox yeni iş yeri açılmasına imkan verən 1800-ə yaxın investisiya layihəsinə 64,3 milyon manat güzəştli kredit ayrılıb.

Elçibəyi prezident səlahiyyətindən məhrum etmiş qərar

09.06.2016


1993-cü il iyunun 4-ü Gəncədə Müdafiə Nazirliyinə tabe olmayan hərbi hissə siyasi hakimiyyətə qiyam qaldırdı. Sabiq korpus komandiri Surət Hüseynovun başçılıq etdiyi hərbi qiyam siyasi hakimiyyətin dəyişməsi ilə nəticələndi: baş nazir Pənah Hüseyn, parlamentin sədri İsa Qəmbər istefa verdilər, Heydər Əliyev Ali Sovetin sədri seçildi, ardınca prezident Əbülfəz Elçibəy Bakını tərk etdi.

İyun hadisələrində ən əsas məqamlardan biri Milli Məclisin Əbülfəz Elçibəyi prezident səlahiyyətindən məhrum edən qərarıdır. Həmin qərarın ardınca keçirilmiş referendumda (29 avqust 1993-cü il) Əbülfəz Elçibəyin hakimiyyətdən getməsi  qətiləşib.

Transparency.az/cnews Əbülfəz Elçibəyi prezident səlahiyyətindən məhrum etmiş qərarı oxucuların diqqətinə çatdırır.

Azərbaycan Respublikasının prezidenti Əbülfəz Qədirqulu oğlu Əliyevin (Elçibəyin) Azərbaycan Respublikasının prezidenti vəzifələrini daha icra edə bilməməsi və Azərbaycan Respublikası prezidentinin səlahiyyətinin Azərbaycan Respublikası Ali Sovetinin sədri Heydər Əlirza oğlu Əliyevə keçməsi haqqında Azərbaycan Respublikası Milli Məclisinin qərarı

Azərbaycan Respublikası Konstitusiyasının 121-4-cü maddəsinə əsasən, Azərbaycan Respublikasının prezidenti Azərbaycan Respublikası vətəndaşlarının hüquq və azadlıqlarının, Azərbaycan Respublikasının qanunlarına əməl olunmasının təminatçısı kimi çıxış edir, Azərbaycan Respublikasının suverenliyinin qorunmasına, müdafiəsinə, dövlət təhlükəsizliyinin və ərazi bütövlüyünün təmin edilməsinə dair tədbirlər görür, Azərbaycan Respublikası dövlət orqanlarının bu sahələrdə fəaliyyətinə rəhbərlik edir.

Azərbaycan Respublikasının prezidenti Əbülfəz Elçibəy 1993-cü il iyun ayının 17-dən 18-nə keçən gecə qəflətən, dövlət orqanlarının rəhbərlərinə xəbər vermədən Bakı şəhərindən Naxçıvan Muxtar Respublikasının Ordubad rayonunun Kələki kəndinə getmişdir.

Prezidentin mətbuat xidməti tərəfindən yayılmış sonrakı rəsmi məlumata görə, “Prezident Əbülfəz Elçibəy iyun ayının 17-dən 18-nə keçən gecə Bakı şəhərində gözlənilən qırğının qarşısını almaq və öz təhlükəsizliyini təmin etmək üçün vəzifəsinin icrasını heç kimə həvalə etmədən Bakının Binə aeroportundan Naxçıvana uçmuşdur”.

Həmin gündən Naxçıvan Muxtar Respublikası Ordubad rayonunun Kələki kəndində qalan Əbülfəz Elçibəy Azərbaycan dövlətinin başçısı kimi fəaliyyətini həlledici dərəcədə məhdudlaşdırmış, respublikanın dövlət idarəetmə orqanları ilə faktiki olaraq əlaqəsini itirmiş və ali icra hakimiyyəti funksiyalarının yerinə yetirilməsindən özünü kənarlaşdırmışdır. Bu səbəbdən o, Azərbaycan Respublikasının prezidenti vəzifələrini daha icra edə bilmir.

Bu müddət ərzində respublikanın başqa bölgələri, o cümlədən Bakı ilə bütün əlaqələrini yalnız son dərəcə qeyri-sabit işləyən ümumi telefon rabitəsi vasitəsi ilə quraraq Azərbaycan Respublikasının prezidenti obyektiv məlumatların alınmasından, ölkədəki gərgin ictimai-siyasi və hərbi vəziyyətə düzgün qiymət verilməsindən, baş verən hadisələrə təsir göstərə bilən təxirəsalınmaz qərarların qəbul edilməsindən özünü məhrum etmiş və beləliklə də hadisələrin inkişafına nəzarət etmək imkanını itirmişdir. Bununla da Əbülfəz Elçibəy Azərbaycan Respublikasının Konstitusiyası ilə onun üzərinə qoyulmuş Azərbaycan Respublikası vətəndaşlarının hüquq və azadlıqlarının, Azərbaycan Respublikası qanunlarına əməl olunmasının təminatçısı kimi öz vəzifəsini yerinə yetirə bilmir.

Azərbaycan ərazisində müharibə getdiyi dövrdə respublikanın suverenliyinin qorunmasının, onun müdafiəsinin, dövlət təhlükəsizliyinin və ərazi bütövlüyünün təmin edilməsinə məsuliyyət daşıyan respublika prezidentinin Ermənistanın işğalçı qoşunları ilə döyüşən hərbi hissələrlə ümumiyyətlə əlaqəsi yoxdur. Belə vəziyyətdə Əbülfəz Elçibəyin Azərbaycan Respublikası Silahlı Qüvvələrinin ali baş komandanı kimi üzərinə düşən vəzifələri yerinə yetirməsi, o cümlədən strateji əhəmiyyətli əməliyyat planlarını təsdiq etməsi, bilavasitə onun tabeliyində olan müdafiə, daxili işlər və milli təhlükəsizlik nazirliklərinin silahlı qüvvələrini əlaqələndirməsi qeyri-mümkün olmuşdur. Xüsusi rabitə vasitələrinin olmaması üzündən dövlət və hərbi sirlərin açılması üçün real təhlükə yaranmışdır.

Hadisələrin bu səmtdəki inkişafı, habelə mövcud şəraitdə respublika həyatının mühüm sahələrini — müdafiəni, təhlükəsizliyi, daxili hüquq qaydasını təmin edən dövlət idarəetmə orqanları rəhbərlərinin olmaması Azərbaycan dövlətçiliyini təhlükə qarşısında qoyur, dövlət hakimiyyət qurumlarının və idarəetmə sisteminin dağılmasına gətirib çıxarır. Respublikamızın müxtəlif bölgələrində yaranmış hakimiyyət boşluğu nəticəsində müxtəlif cinayətkar qruplar fəallaşaraq ağır cinayətlər, xüsusilə də qətllər, qarətlər, ictimai təhlükəsi yüksək olan başqa əməllər törətməkdədirlər. Vəziyyətin bu cür kəskinləşməsi Azərbaycanın fəlakətinə, dövlətçiliyimizin süqutuna səbəb ola bilər.

Yaranmış vəziyyət respublikadakı durumun sabitləşdirilməsinə, gərginliyin aradan qaldırılmasına, dövlətçiliyin möhkəmləndirilməsinə, qanunçuluğun bərpasına, bütün qüvvələrin xarici təcavüzə qarşı səfərbər edilməsinə yönəldilmiş qəti və təxirəsalınmaz tədbirlərin görülməsini tələb edir.

Belə şəraitdə Azərbaycan Respublikasının Milli Məclisi 1993-cü il 21 iyun tarixli qərarı ilə Azərbaycan Respublikasının prezidenti Əbülfəz Elçibəyə Bakı şəhərinə təcili olaraq qayıtması barədə müraciət etmişdir. Lakin Əbülfəz Elçibəy bu müraciətə əhəmiyyət verməyərək paytaxta qayıtmamış və heç bir təsirli tədbir görməmişdir.

Bununla Əbülfəz Elçibəy Azərbaycan Respublikasının prezidenti vəzifələrini icra etməsini qeyri-mümkün etmişdir.

Azərbaycan Respublikası Konstitusiyasının 121-7-ci maddəsinə əsasən, “Azərbaycan Respublikasının prezidenti bu və ya başqa səbəblərə görə öz vəzifələrini daha icra edə bilmədikdə, Azərbaycan Respublikasının yeni prezidenti seçilənədək onun səlahiyyəti Azərbaycan Respublikası Ali Sovetinin sədrinə keçir”.

Göstərilənləri nəzərə alaraq, 1993-cü il iyunun 4-də Gəncə şəhərində baş vermiş hadisələrdən sonra Azərbaycan Respublikasında yaranmış ictimai-siyasi böhrandan çıxış yollarını tapmaq, habelə Qarabağın Ağdam, Ağdərə, Füzuli və başqa rayonlarında erməni hərbi qüvvələrinin qarşısını almaq, Azərbaycan dövlətçiliyi üçün yaranmış təhlükəni və vətəndaş müharibəsi təhlükəsini aradan qaldırmaq, idarəetmə sisteminin fəaliyyətini bərpa etmək məqsədilə Azərbaycan Respublikasının Milli Məclisi Azərbaycan Respublikası Konstitusiyasının 121-7-ci maddəsini rəhbər tutaraq qərara alır:

1. Əbülfəz Qədirqulu oğlu Əliyevin (Elçibəyin) Azərbaycan Respublikasının prezidenti vəzifələrini daha icra edə bilməməsi təsdiq edilsin.

2. Azərbaycan Respublikası prezidentinin səlahiyyəti Azərbaycan Respublikası Ali Sovetinin sədri Heydər Əlirza oğlu Əliyevə keçsin.

Azərbaycan Respublikası Ali Soveti sədrinin müavini
Afiyəddin Cəlilov

 Bakı şəhəri, 24 iyun 1993-cü il

Vergi yoxlamaları nə qədər azalıb?

09.06.2016

Vergilər Nazirliyinin Vergi Auditi və Operativ Vergi Nəzarəti İdarəsinin rəisi Toğrul Quliyev “Vergilər” qəzetinə müsahibə verib. O qeyd edib ki, vergi siyasəti və bu siyasət nəticəsində həyata keçirilən islahatların məqsədi vergilərin vaxtında ödənilməsini təmin etməkdən ibarətdir: “Əsas məqsədlərdən biri də vergi ödəyicilərində, xüsusilə də kiçik sahibkarlıq subyektlərində itkinin qarşısının alınması üçün maliyyə sanksiyaları və cərimələrin tətbiqinin məhdudlaşdırılmasıdır. Bu da nəticə etibarilə sahibkarlıq subyektlərinin iqtisadi fəallığının artırılmasına kömək etməlidir.

Ötən ilin sonlarından başlayaraq ölkə başçısının müvafiq fərmanına əsasən, dövlət qurumlarının sahibkarlıq subyektlərində apardığı yoxlamalar dayandırılıb. Həmin fərman vergi yoxlamalarına şamil olunmasa da, Vergilər Nazirliyinin kollegiya iclasının qərarı ilə kiçik sahibkarlıq subyektlərində səyyar vergi yoxlamalarının və operativ nəzarət tədbirlərinin (əmək müqavilələrinin bağlanmasına və aksizli məhsulların satışı zamanı aksizlərin tətbiqinə nəzarət və dövriyyənin müəyyənləşdirilməsi üçün xronometraj metodu ilə müşahidələrin aparılması istisna olmaqla) keçirilməsi də müvəqqəti olaraq dayandırılıb. Beləliklə, ölkədə sahibkarlığın inkişafı, sahibkarlıq subyektlərinin öz fəaliyyətini yeni iqtisadi şəraitə uzlaşdırılması üçün münbit şərait yaranıb.

Bununla belə, sahibkarlıq subyektlərinin öz vergi öhdəliklərini vaxtında və tam həcmdə yerinə yetirməsinə vergi nəzarəti təmin olunur. Vergilər Nazirliyi sahibkarlıq subyektlərinin fəaliyyətinə distant nəzarət sistemlərinə malikdir və kiçik sahibkarlıq subyektlərində yoxlamaların dayandırılmasına baxmayaraq operativ vəziyyətə nəzarət edilir.

Digər vergi ödəyicilərinə gəlincə, təyin edilən bütün yoxlamalar risk meyarlarına əsaslanır, yoxlamalar yalnız ciddi nəticələr gözlənilən vergi ödəyicilərində aparılır. Ümumiyyətlə, vergi orqanlarında tətbiq olunan informasiya texnologiyaları vergidən yayınma risklərinin səviyyəsini və hüquq pozuntularının mövcudluğu faktlarını müəyyən etməyə, belə faktlar dəqiq araşdırıldıqdan sonra vergi yoxlamalarının təyin edilməsi barədə qərarın qəbul edilməsinə imkan verir”.

Toğrul Quliyevin sözlərinə görə, 2015-ci ilin oktyabr ayının 1-nə səyyar vergi yoxlaması üzrə açılmış qərarların sayı 4704 olduğu halda 2016-cı ilin iyunun 1-nə onların sayı 2034 olub, bu da səyyar vergi yoxlaması qərarlarının sayının təxminən 2,3 dəfə azalması deməkdir: “2016-cı ilin yanvar-may ayları ərzində 2509 səyyar vergi yoxlaması başa çatıb, bu da 2015-ci ilin müvafiq dövrü ilə müqayisədə 2219 ədəd və ya 46,9% az olub. 2015-ci ilin yanvar-may ayları ərzində 36066 vergi ödəyicisi üzrə vergi nəzarəti tədbiri keçirilərək 38190 akt tərtib edildiyi halda 2016-cı ilin eyni dövrü üzrə 4242 vergi ödəyicisi üzrə vergi nəzarəti tədbiri keçirilərək 4743 akt tərtib edilib, bu da ötən ilin müvafiq dövrü ilə müqayisədə nəzarət tədbirləri ilə əhatə olunmuş vergi ödəyicilərinin sayının 8,5 dəfə azalması deməkdir.

Operativ vergi nəzarəti tədbirləri zamanı keçən ilin yanvar-may aylarında tətbiq edilmiş inzibati cərimə və maliyyə sanksiyalarının məbləği 10 milyon 963,6 min manat olduğu halda bu ilin cari dövrü ərzində bu göstərici cəmi 387,3 min manat təşkil edib. Operativ vergi nəzarəti tədbirləri zamanı aşkarlanmış 1835 hal üzrə vergi ödəyicilərinin vergi qanunvericiliyinin pozulması halları üzrə məsuliyyətdən imtina qərarları çıxarılıb, bu da həmin vergi ödəyicilərinin maliyyə itkilərinə məruz qalmamasına imkan verib.

Cari ilin may ayında aparılmış vergi nəzarəti tədbirləri zamanı 6 vergi ödəyicisinin 118 nəfəri əmək müqavilələri hüquqi qüvvəyə minmədən muzdlu işə cəlb etdiyi aşkarlanıb, bu hallar cinayət məsuliyyətinə səbəb olduğu üçün toplanmış sənədlər aidiyyəti üzrə göndərilib.

Aksizli malların istehsalı və satışı ilə məşğul olma fəaliyyəti üzrə keçirilmiş vergi nəzarəti tədbirləri zamanı 21,9 min manat məbləğində 2,2 min ədəd saxta aksizli mallar, 37,7 min manat məbləğində 8,6 min ədəd aksiz markası olmayan malların satışı halları və aksizli malların satış məqsədi ilə nağd qaydada alınmasına görə 146,2 min manatlıq 22,6 min ədəd mal aşkar edilib.

Eyni zamanda kustar üsulla spirtli içki istehsal edən 2 şəxs müəyyən edilərək rəsmiləşdirilib və sənədlər cinayət işinin başlanması üçün aidiyyəti üzrə göndərilib.

Keçirilmiş operativ vergi nəzarəti tədbirləri zamanı 82 halda qanunla müəyyən edilmiş qaydada akkreditasiya olunmadan idman mərc oyunlarının təşkili və ya keçirilməsi halları aşkarlanaraq İnzibati Xətalar Məcəlləsinə əsasən protokollar tərtib edilib və məhkəmələrə göndərilib.

Keçirilən vergi nəzarəti tədbirləri əhali ilə pul hesablaşmalarının aparılması qaydalarına riayət olunması vəziyyətinin də qənaətbəxş olmadığını göstərir. Bu sahədə riskli hesab edilmiş 257 vergi ödəyiciləri üzrə keçirilmiş vergi nəzarəti tədbirləri zamanı qanun pozuntuları aşkar edilib və aparılmış xronometraj metodu ilə müşahidələr zamanı dövriyyənin orta hesabla 4 dəfə azaldıldığı müəyyən edilib”.

“İş yerinə dair arayış” elektron xidmətindən istifadə sayı 30 faizədək artıb

09.06.2016

Bu ilin 5 ayında Əmək və Əhalinin Sosial Müdafiəsi Nazirliyinin “İş yerinə dair arayış” elektron xidmətindən istifadə sayı 30 faizədək artıb. Nazirliyin məlumatına görə, iyunun 1-dək əhali həmin e-xidmətdən 300 min dəfəyə yaxın faydalanıb.

Ötən ay “İş yerinə dair arayış” elektron xidmətindən 15 902 dəfə istifadə olunub, bu da əvvəlki ilin may ayı ilə müqayisədə 18,7 faiz, cari ilin aprel ayı ilə müqayisədə 15,7 faiz çoxdur.

Ümumilikdə 2015-ci ilin yanvar-may aylarında vətəndaşlar bu e-xidmətdən ötən ilin müvafiq dövrü ilə müqayisədə 30 faiz çox, 73 001 dəfə faydalanıb.

“İş yerinə dair arayış” e-xidməti 2014-cü ilin dekabrında istifadəyə verilib. Hər bir şəxs “Elektron hökumət” portalında “İş yerinə dair arayış” e-xidmətini seçməklə öz iş yerinə dair arayışı real vaxt rejimində əldə etmək imkanına malikdir. Sənəddə işəgötürən haqqında məlumatlar, onun əlaqə nömrəsi, işçinin şəxsi məlumatları, əmək müqaviləsinin bağlandığı tarix, onun müddətli və ya müddətsiz olması, arayışın etibarlılıq müddəti, digər məlumatlar əksini tapır. Arayışın təqdim edildiyi hər hansı təşkilat isə onun üzərindəki ştrix-kod vasitəsilə “E-hökumət” portalında arayışın, orada əksini tapan məlumatların düzgünlüyünü yoxlaya bilir.

Üç ayda Azərbaycan Gürcüstan iqtisadiyyatına 137 milyon dollar sərmayə yatırıb

09.06.2016

2016-cı ilin birinci rübündə Azərbaycan Gürcüstan iqtisadiyyatına 137 milyon ABŞ dolları həcmində birbaşa investisiya yatırıb. Gürcüstan Milli Statistika Xidmətinin məlumatına görə, siyahıda Azərbaycandan sonra 57 milyon dollarla Türkiyə, 44 milyon dollarla Böyük Britaniya yer alır.

Gürcüstan iqtisadiyyatına yatırılan 376,4 milyon dollar xarici sərmayənin 53 faizi və ya 200 milyon dolları nəqliyyat və rabitə sektoruna yönəldilib.

Xəbəri AZƏRTAC yayıb.

Milli Şura xalqa müraciət edib

09.06.2016

İyunun 9-da Demokratik Qüvvələrin Milli Şurası xalqa müraciət edib. Azadliq.info-nun məlumatına görə, müraciətdə deyilir: “Ölkəmiz ağır sosial, iqtisadi, mənəvi problemlər altında olsa da, hökumətin Azərbaycan xalqı, xüsusən də onun əqidəli, yüksək təhsilli, ölkəyə müsbət dəyişiklik gətirmək istəyən kəsimi ilə savaşı davam edir. Son bir neçə ildə yüzlərlə şəxs siyasi sifarişlərlə haqsız və qanunsuz həbs edilib. Çox yaxşı haldır ki, Milli Şura olaraq bizim, ölkədəki prinsipial qüvvələrin, vətəndaş cəmiyyətinin, dəyişiklik istəyən vətəndaşlarımızın apardığı mübarizə, göstərdiyi müqavimət və beynəlxalq təşkilatların dəstəyi nəticəsində son zamanlar 17-18 nəfər tanınmış siyasi məhbus azad edilib. Bununla belə, son həbslərlə birlikdə yenə də ölkədə 100 nəfərə yaxın siyasi məhbus var. Hakimiyyətin xüsusən Xalq Cəbhəsinin, “Nida” Vətəndaş Hərəkatının üzvlərindən, inanclı kəsimin nümayəndələrindən, bir neçə bloqçudan ibarət siyasi məhbuslara, eləcə də tanınmış ictimai-siyasi xadimlərin qohumları olduqları üçün həbs edilmiş siyasi girovlara anlaşılmaz, sərt, kinli münasibəti təəssüf doğurur və ölkədə vətəndaş qarşıdurmasını körükləyən faktorlardan biri kimi qiymətləndirilir”.

Ölkədəki sosial-iqtisadi problemlərə toxunan Milli Şura qeyd edir ki, bir il ərzində iki dəfə devalvasiya nəticəsində əhalinin həyat səviyyəsi təqribən yarıbayarı pisləşib: “Yüz minlərlə iş yeri bağlanıb, əhalinin real gəlirləri kəskin şəkildə aşağı düşüb. Azərbaycan iqtidarı isə sosial-iqtisadi problemlərin köklü həlli üçün real addımlar atmaq əvəzinə çoxsaylı bir-birinə zidd, biri digərini təkrar edən gərəksiz fərman və sərəncamlarla islahat görüntüsü yaratmağa çalışır. Buna paralel olaraq da ölkə sürətlə böyük borclanmaya sürüklənir. Bütün beynəlxalq qurumlardan israrla kredit istənilir, ölkənin xarici borcları artırılır. Biz Milli Şura adından hökuməti məsuliyyətli olmağa, sosial-iqtisadi problemlərin həlli imitasiyasından əl çəkib, real tədbirlər üçün elementar vəzifələrini yerinə yetirməyə çağırırıq.

Bakının mərkəzində aparılan söküntülər zamanı tarixi binaların dağıdılması da bizi ciddi narahat edən haldır. “Sovetski” adlanan məhəllədə köhnə yaşayış evləri ilə yanaşı 70-dən artıq tarixi abidə də sökülən binaların siyahısına salınıb. Dünyada hətta zəruri köçürmələr zamanı da tarixi binaları qorumağın çoxlu üsulları və nümunələri var. Təəssüf ki, Azərbaycan hökuməti “Sovetski”də bu üsul və nümunələrin heç birindən yararlanmadan şəxsi mənfəət və şöhrətpərəstlik motivləri ilə ucdantutma, binaların tarixi memarlıq əhəmiyyətini nəzərə almadan söküntü işi aparır. Biz bunu tarixi irsimizə hörmətsizlik kimi qiymətləndirir və bağışlanmaz səhv hesab edirik. Hökuməti ərazidə hələ salamat qalmış, yaxud tam dağıdılmamış tarixi binaları sökmək planından imtina etməyə, onların qorunması və bərpası üçün zəruri addımlar atmağa çağırırıq”.

Müraciətdə aprel döyüşlərinin işğalçı üzərində əhəmiyyətli üstünlük qazanılmadan dayandırılmasına da etiraz bildirilir: “Biz hakimiyyəti ən azı milli təhlükəsizliklə bağlı məsələlərdə məsuliyyətli olmağa, hansısa kənar güclərin maraq və istəklərindən deyil, az xalqının mənafeyindən çıxış etməyə çağırırıq”.

Müraciətdə qeyd olunur ki, problemlərin köklü həlli xalqın ciddi şəkildə təşkilatlanmasından, millət olaraq öz taleyinə sahib çıxmasından keçir: “Milli Şura olaraq bəyan edirik ki, xalqımız bu ünvanda təşkilatlanıb səfərbər olunacağı təqdirdə onun maraqlarına uyğun dəyişikliklərin həyata keçirilməsi üçün gərəkli hər cür fədakar addımı atmağa hazırıq. Bir daha xalqımızı siyasi fəallıq nümayiş etdirməyə, Milli Şura ətrafında təşkilatlanamağa və taleyinə sahib çıxmağa çağırırıq”.

Milli Şura 2013-cü ilin iyun ayında yaradılıb. Qurumun sədri tarixçi professor Cəmil Həsənli, öncül şəxsləri AXCP lideri Əli Kərimli, sabiq deputatlar Gültəkin Hacıbəyli, İbrahim İbrahimli, hüquqşünas Qurban Məmmədov və başqalarıdır.

Qəzetin yeni sahibləri 13 illik baş redaktorla üzülüşdü

09.06.2016

Rusiyanın aparıcı nəşrlərindən olan “Novıye İzvestiya”nın baş redaktoru Valeri Yakov iyunun 9-da qəzeti tərk edib. Novator.az-ın məlumatına görə, Valeri Yakov dostlarına və oxuculara ünvanlandığı açıqlamasında qəzetin yeni sahiblərinin belə qərar verdiyini deyib: “Həyatımın 19 ilini həsr etdiyim qəzetin yeni sahiblərinin öz məqsədi və planları var. Kiminlə və necə işləmək qərarı onların hüququdur”.

“Novıye İzvestiya” mayın 13-də çapını dayandırıb. Redaksiya bu addımı maliyyə çətinlikləri üzündən atdığını bildirib. Açıqlamada bəzi tərəfdaşların süni şəkildə yaratdığı maliyyə vəziyyətinin çap versiyasının fəaliyyətini davam etdirməyə imkan vermədiyi qeyd olunub. Redaksiya bildirib ki, yaxın vaxtda maliyyə çətinliklərini dəf etmək mümkün olmasa, qəzetin saytı da fəaliyyətini dayandıracaq.

“Novıe İzvestiya”nı 1997-ci ildə “İzvestiya” qəzetindən ayrılmış bir qrup jurnalist yaradıb. 2003-cü ilə qədər qəzetə “İzvestiya”nın baş redaktor postundan istefa vermiş İqor Qolembiovski rəhbərlik edib. Valeri Yakov 1997-ci ildən “Novıe İzvestiya”nın baş redaktor müavini, 2003-cü ildən isə baş redaktoru idi.

Bəzi ali məktəblərə tələbə seçimini müstəqil aparmaq səlahiyyəti verildi

10.06.2016


Prezident İlham Əliyev “Birgə Azərbaycan-Fransız Universiteti (UFAZ)” layihəsinin həyata keçirilməsi barədə sərəncam imzalayıb. Sərəncam UFAZ layihəsinə cəlb edilən Azərbaycan ali təhsil müəssisələrinə Dövlət İmtahan Mərkəzi publik hüquqi şəxsin keçirdiyi qəbul imtahanlarının nəticələri əsasında tələbə seçimini müstəqil aparmaq hüququ verir.

İyunun 9-da imzalanan sənəddə deyilir ki, UFAZ layihəsinə cəlb olunan Azərbaycan ali təhsil müəssisələri tətbiq etdikləri Fransa ali təhsil müəssisələrinin təhsil proqramlarını birgə idarə etmək hüququna malikdirlər və onlar maddi-texniki baza imkan verdiyi hallarda UFAZ layihəsi üçün müəyyən edilmiş dövlət hesabına təhsilalanların sayından artıq ödənişli əsaslarla da tələbə qəbulu apara bilərlər.

Sərəncamda Nazirlər Kabinetinə UFAZ layihəsi çərçivəsində dövlət hesabına təhsil alan tələbələrin sayını hər il müəyyənləşdirmək; UFAZ layihəsinə cəlb olunacaq ali təhsil müəssisələrinin maddi-texniki bazasının təşkili və əməliyyat xərclərinin maliyyələşdirilməsi məsələlərini həll etmək tapşırılıb.

Sərəncam Azərbaycanda ali təhsil sisteminin təkmilləşdirilməsi və Fransanın nüfuzlu ali məktəbləri ilə əlaqələrin genişləndirilməsi, eləcə də Azərbaycan vətəndaşlarına xaricə getmədən öz vətənlərində aparıcı ölkələrin ali təhsil standartları çərçivəsində keyfiyyətli təhsil almaq imkanının yaradılması məqsədilə əsaslandırılıb.

Əli İnsanov: “Heç bir təhdid məni çəkindirə bilməz”

10.06.2016

Ali Məhkəmə iyunun 9-da hakim İnqilab Nəsirovun sədrliyi ilə sabiq səhiyyə naziri Əli İnsanovun kassasiya şikayətinə baxılıb. Şikayət təmin olunmayıb.

Əli İnsanov məhkəmədə iştirak etməyib.

2005-ci il oktyabrın 19-da dövlət çevrilişinə cəhd ittihamı ilə tutulan Əli İnsanov sonra iqtisadi cinayətlər ittihamı ilə 11 il müddətinə azadlıqdan məhrum edilib. 2013-cü il martın 14-də Avropa İnsan Hüquqları Məhkəməsi sabiq nazirin ədalətli mühakimə olunmadığı haqda qərar çıxarıb. Həmin qərara əsaslanan Azərbaycan Ali Məhkəməsinin Plenumu Əli İnsanovun işini yenidən baxılması üçün apellyasiya instansiyasına göndərib. 2014-cü ilin fevralında Bakı Apellyasiya Məhkəməsi işə baxılmasını yekunlaşdırıb, Əli İnsanov barəsində çıxarılmış 11 illik həbs qərarı qüvvədə saxlanıb.

Vəkil Toğrul Babayev “Turan”a deyib ki, Bakı Apellyasiya Məhkəməsinin 2014-cü ilin fevralında çıxardığı qərardan Ali Məhkəməyə kassasiya şikayəti 2015-ci ilin mayında verilib. Ali Məhkəmə işə 11 ay sonra – 2016-cı il iyunun 9-da baxıb.

Toğrul Babayev vurğulayıb ki, Ali Məhkəmənin Plenumu 2013-cü il noyabrın 15-də Avropa Məhkəməsinin qərarını əsas götürərək işi yenidən apellyasiya instansiyasına göndərsə də, Ali Məhkəmə Bakı Apellyasiya Məhkəməsinin 2014-cü ilin fevralında Əli İnsanov barəsində çıxardığı qərarı qüvvədə saxlayıb.

“Turan”ın məlumatına görə, Əli İnsanov vəkili vasitəsilə Ali Məhkəmənin iyunun 9-da çıxardığı qərara münasibətini də bildirib. Vəkilinin qeyd etdiyinə görə, Əli İnsanov belə deyib: “Heç bir məntiqə sığmayan, qanuna uyğun gəlməyən, açıq-aşkar siyasi qərar Azərbaycan məhkəmə sistemini qanundan kənarda qoyur. Azərbaycan hakimiyyəti özünün imzaladığı beynəlxalq sənədləri, götürdüyü öhdəlikləri inadkarlıqla inkar etməklə Azərbaycanın dünyada etibarsız tərəfdaşlıq imicini formalaşdırır. Mən hər zaman olduğu kimi rahat və nikbinəm. Heç bir siyasi, hüquqi və fiziki təhdid məni mübarizəmdən çəkindirə bilməz. Ali Məhkəmənin bugünkü qərarını əldə edən kimi təkrarən Avropa İnsan Hüquqları Məhkəməsinə şikayət edəcəm”.

Dolların kursu qalxıb, avro və rubl ucuzlaşıb

10.06.2016

Mərkəzi Bank iyunun 10-da dolları bahalaşdırıb. Transparency.az bildirir ki, 1 ABŞ dollarının rəsmi kursu 1,5084 manatdan 1,5114 manata qaldırılıb.

Avro və Rusiya rublunda isə ucuzlaşma qeydə alınıb. 1 avronun rəsmi məzənnəsi 1,7203 manatdan 1,7070 manata, 1 rublun kursu isə 0,0236 manatdan 0,0235 manata enib.

Ötən il Azərbaycan manatı iki dəfə devalvasiyaya uğrayaraq dollar qarşısında 78 qəpikdən 1 manat 55 qəpiyə qalxıb. Dövlət Neft Fondu və Mərkəzi Bank manatın kursunu sabit saxlamaq üçün 2016-cı ilin hərraclarında üst-üstə 2 milyard 742,8 milyon dollar həcmində vəsait satıblar.

Dövlət Sərhəd Xidmətinin hüquqları artdı

10.06.2016

Prezident İlham Əliyev fərman imzalayaraq Dövlət Sərhəd Xidmətinin əsasnaməsində dəyişikliklər edib. Transparency.az-ın məlumatına görə, Dövlət Sərhəd Xidmətinin vəzifələri sırasına yeni bənd əlavə edilib. Yeniliyə əsasən, qurum narkotik vasitələrin, psixotrop maddələrin və onların prekursorlarının, güclü təsirli, zəhərli, zəhərləyici, radioaktiv, partlayıcı maddələrin və qurğuların, hərbi texnikanın, odlu silah və döyüş sursatının, nüvə, kimyəvi, bioloji və digər kütləvi qırğın silahlarının, kütləvi qırğın silahlarının hazırlanmasında istifadə oluna bilən materialların və avadanlıqların Azərbaycan Respublikası dövlət sərhədinin buraxılış məntəqələrindən qanunsuz keçirilməsinin qarşısını almaq üçün tədbirlər görməlidir.

Əsasnaməyə başqa bir əlavə Dövlət Sərhəd Xidmətinin hüquqlarının genişləndirilməsini nəzərdə tutur. İndən belə qurumun şəxslərin Azərbaycan Respublikasının dövlət sərhədindən qanunsuz keçməsinin, habelə narkotik vasitələrin, psixotrop maddələrin və onların prekursorlarının, güclü təsirli, zəhərli, zəhərləyici, radioaktiv, partlayıcı maddələrin və qurğuların, hərbi texnikanın, odlu silah və döyüş sursatının, nüvə, kimyəvi, bioloji və digər kütləvi qırğın silahlarının, kütləvi qırğın silahlarının hazırlanmasında istifadə oluna bilən materialların və avadanlıqların dövlət sərhədindən qanunsuz keçirilməsinin qarşısını almaq məqsədilə Azərbaycan Respublikası dövlət sərhədinin buraxılış məntəqələrində ölkəyə gələn və ölkədən gedən nəqliyyat vasitələrinə baxış keçirilməsini təmin etmək hüququ var.

Ali Məhkəmə məmurlarının statusunda yeniliklər

10.06.2016

“İnzibati və yardımçı vəzifələrin təsnifat toplusu”nda dəyişikliklər edilib. Fərmanı dövlət başçısı İlham Əliyev imzalayıb.

Transparency.az bildirir ki, fərmanla Ali Məhkəmə Aparatının rəhbəri postu inzibati vəzifələrin ali təsnifatı cərgəsinə aid edilib. İndiyəcən bu sıraya Prezident Administrasiyasının rəhbəri, Milli Məclis Aparatının rəhbəri, Konstitusiya Məhkəməsi Aparatının rəhbəri, Nazirlər Kabineti Aparatının rəhbəri, dövlət müşaviri vəzifələri daxil idi.

Ali Məhkəmə Aparatı rəhbərinin müavini və aparatın şöbə müdiri vəzifələri isə inzibati vəzifələrin birinci təsnifatına aid edilir.

Fərman “İnzibati və yardımçı vəzifələrin təsnifat toplusu”nda (Sənəd) başqa yenilikləri də nəzərdə tutur.

Peruda yeni prezident

10.06.2016

Peruda prezident seçkisinin rəsmi nəticəsi açıqlanıb. Novator.az-ın məlumatına görə, Seçki Prosesləri üzrə Milli Büro iyunun 5-də keçirilmiş ikinci turda Pedro Kuçinskinin qalib gəldiyini bəyan edib. Onun 50,12% səs topladığı bildirilir. Sabiq prezident Alberto Fuximorinin qızı Keyko Fuximori seçicilərin 49,88%-nin dəstəyini alıb.

77 yaşlı Pedro Kuçinski əvvəllər energetika və dağ-mədən sənayesi naziri, iqtisadiyyat naziri, Mərkəzi Bankın sədri və baş nazir postlarını tutub.

Pedro Kuçinski 1938-ci ildə Perunun paytaxtı Limada, 1936-cı ildə Almaniyadan mühacirət etmiş ailədə dünyaya gəlib. Ali təhsilini Oksford və Prinston universitetlərində alıb. Dünya Bankında, Beynəlxalq Maliyyə Korporasiyasında çalışıb.

İqtisadiyyat Nazirliyi vətəndaşlara yeni xidmətlər təklif edir

10.06.2016

İqtisadiyyat Nazirliyinin 195-2 Çağrı Mərkəzi vətəndaşlara yeni xidmətlər təklif edir. Rəsmi məlumata görə, Çağrı Mərkəzi canlı rejimdə fəaliyyət göstərdiyi zaman müraciət edənlərə səsli menyu vasitəsilə 1 düyməsini seçərək operatorla canlı əlaqə yaratmaq imkanı ilə bərabər 2 düyməsini seçməklə nazirliyin fəaliyyət istiqamətlərinə dair müvafiq ümumi məlumatlar da təklif edir. Vətəndaş 195-2-2 yığdıqdan sonra bunlar barədə ümumi məlumatlar əldə edə bilər:

1 düyməsi vasitəsilə Sahibkarlığa Kömək Milli Fondunun vəsaitlərinin istifadəsi qaydaları,

2 düyməsi vasitəsilə İqtisadiyyat Nazirliyində verilən lisenziyalar,

3 düyməsi vasitəsilə İqtisadiyyat Nazirliyinin investisiya təşviqi sənədini verməsi qaydası,

4 düyməsi vasitəsilə investisiya təşviqi sənədini almış hüquqi şəxslərə və fərdi sahibkarlara texnikanın, texnoloji avadanlıqların və qurğuların idxalı üçün təsdiqedici sənədin verilməsi qaydası,

5 düyməsi vasitəsilə İqtisadiyyat Nazirliyində qrant müqavilələrinin (qərarların) qeydə alınması qaydası,

6 düyməsi vasitəsilə sahibkarlıq sahəsində qanunvericiliyə uyğun olaraq həyata keçirilən yoxlamaların dövlət tənzimlənməsi,

7 düyməsi vasitəsilə istehlakçıların hüquqlarının müdafiəsi.

Eyni zamanda rəsmi iş günlərində və saatlarında 195-2-2 yığaraq səsli menyudan istifadə zamanı prosesin istənilən mərhələsində sıfır düyməsini (0) seçməklə Çağrı Mərkəzi ilə canlı əlaqə yaratmaq olar.

195-2 Çağrı Mərkəzinin vətəndaşlara təklif etdiyi digər mühüm xidmət isə canlı rejimdə fəaliyyət göstərmədiyi vaxtlarda müraciət edənlərə səsli menyu vasitəsilə 1 düyməsini seçərək nazirliyin fəaliyyət istiqamətlərinə dair müvafiq ümumi məlumatların verilməsi ilə yanaşı 2 düyməsini seçməklə növbəti iş günündə Çağrı Mərkəzinin əməkdaşının onunla əks əlaqə yaratması üçün zəng sifarişi edə bilməsi imkanlarının yaradılmasıdır. Zəng sifarişi edildiyi halda mərkəzin əməkdaşı özü vətəndaşla əlaqə saxlayaraq onu maraqlandıran sualları cavablandıracaqdır.

195-2 Çağrı Mərkəzinin xidmətlərindən istifadə etmək üçün ölkənin istənilən yerindən bütün telefonlardan heç bir koddan istifadə etmədən 195 nömrəsinə zəng edərək 2 düyməsini yığmaqla nazirliyin səlahiyyətlərinə dair məsələlərlə bağlı müraciət etmək olar. Stasionar nömrələrdən 195-2 nömrəsinə edilən bütün zənglər və Çağrı Mərkəzində göstərilən bütün xidmətlər ödənişsizdir.

Əmək müqaviləsi bildirişləri: iki ildə 5 milyon 438 min 642 dəfə istifadə

10.06.2016

Əmək və Əhalinin Sosial Müdafiəsi Nazirliyinin hesabatına görə, ötən ay əmək müqaviləsi bildirişləri üzrə elektron informasiya sisteminə edilən müraciətlərin sayı aprel ayı ilə müqayisədə 4 faiz, 2015-ciilin may ayı ilə müqayisədə isə 33,9 faiz artaraq 206 424-ə çatıb.

Həmin müraciətlərin 194 438-i “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” e-xidmətinə, 11 986-sı isə “Əmək müqaviləsi bildirişləri barədə məlumatların işçilər tərəfindən əldə edilməsi” e-xidmətinə yönəlib.

Əmək müqaviləsi bildirişləri üzrə elektron qeydiyyat sistemi əmək münasibətlərinin elektron şəkildə qeydiyyatdan keçirilməsinə və işçilərin əmək müqaviləsi bildirişləri barədə məlumatları əldə etməsinə xidmət edir. Sistemin tətbiqinə 2014-cü ilin iyulundan başlanıb. Bu il iyunun 1-dək əmək müqaviləsi bildirişləri üzrə elektron informasiya sistemindən 5 milyon 438 min 642 dəfə istifadə qeydə alınıb.

Qazaxıstanda yeni qaynama: 5 yaraqlı öldürüldü

10.06.2016


İyunun 10-da Qazaxıstanın Milli Təhlükəsizlik Komitəsi Aktobe şəhərində keçirilən xüsusi əməliyyatda 5 yaraqlını məhv edib. Şəhərdəki yaşayış binalarından birinin mənzilinə sığınmış yaraqlılar güc strukturlarının təslim olmaq tələbinə atəşlə cavab veriblər. Bundan sonra başlayan əməliyyatda 4 yaraqlı öldürülüb.

Əməliyyat keçirildiyi zaman digər bir yaraqlı patrul maşınını atəşə tutub və polisin açdığı cavab atəşi ilə öldürülüb. Bu hadisə nəticəsində 2 polis əməkdaşının yaralandığı bildirilir.

Xəbəri AZƏRTAC yayıb.

İyunun 5-də Aktobe şəhərində naməlum silahlı qruplar iki silah mağazasına və hərbi hissəyə hücum etmiş, üç mülki şəxs və üç hərbçi həyatını itirmişdi. Hücumda iştirak edən yaraqlılardan 13-ü öldürülmüş, 6-sı isə hadisə yerindən uzaqlaşmağa nail olmuşdu.

Olayın ardınca Qazaxıstanın Milli Təhlükəsizlik Komitəsi ölkədə dövlət çevrilişinə cəhd göstərən qrupun üzvlərini həbs edib. Dövlət çevrilişinə cəhd qrupuna biznesmen Toxtar Tuleşovun başçılıq etdiyi bəyan olunub. Həbs edilənlər arasında baş prokurorun sabiq birinci müavini və Konstitusiya Şurasının sabiq üzvü İlyas Baxtıbayev, Cənubi Qazaxıstan vilayətinin Daxili İşlər Departamentinin sabiq rəisi general-mayor Xibratulla Doskaliyev, həmin departamentin rəisinin sabiq birinci müavini polkovnik Saken Aytbekov, Müdafiə Nazirliyinin hərbi hissələrinin komandirləri, polkovniklər Beksat Jumin və Kayrat Bernebayev tutulublar.

İstintaq iddia edir ki, Toxtar Tuleşov hakimiyyəti zorla ələ keçirməyi planlaşdırıb. Toxtar Tuleşov bu ilin yanvarında tutulub. Biznesmenə narkotik ittihamı və cinayətkar qrupu maliyyələşdirmək ittihamı irəli sürülüb

İyunun 8-i Qazaxıstan prezidenti Nursultan Nazarbayev xalqa müraciətində ölkədə “rəngli inqilab”ların əlamətlərinin olduğunu bildirib: “Hamımız bilirik ki, “rəngli inqilab”ların müxtəlif metodları var və onlar süni mitinqlərdən, qətllərdən, hakimiyyəti ələ keçirmək cəhdlərindən başlanır. Bu əlamətlər bizdə də özünü göstərdi. Bəziləri dövlət siyasətinin və qanunlarımızın liberallığından sui-istifadə edib hakimiyyətin möhkəmliyini yoxlamaq istədilər”.

Nursultan Nazarbayev ekstremistlərin və terrorçuların məhv edilməsi üçün hakimiyyətin ən sərt tədbirlərə əl atacağını vurğulayıb: “Aktobedə hücumları həyata keçirən cinayətkarlar göstərişi xaricdən alıblar. Əldə etdiyimiz məlumata görə, terror aktını radikal, saxta dini cərəyanların tərəfdarları təşkil edib və  onlar xaricdən təlimatlandırılıblar”.

Vergi daxilolmaları haqqında hesabat

10.06.2016

Vergilər Nazirliyindən Transparency.az-a verilən məlumata görə, 2016-cı ilin yanvar-may ayları ərzində qurumun xətti ilə dövlət büdcəsinə 2 milyard 683 milyon 536,5 min manat vəsait daxil olub, proqnoz tapşırığına 103,2 faiz əməl edilib.

Hesabat dövründə 44 min 961 vergi ödəyicisi qeydiyyata alınıb.

2016-cı il üçün dövlət büdcəsinin gəlirləri 16 milyard 822 milyon manat proqnozlaşdırılır. Vergilər Nazirliyinin xətti ilə dövlət büdcəsinə 7 milyard 10 milyon manat daxilolma nəzərdə tutulur (41,7 faiz).

Vergilər Nazirliyi risklərin vahid mərkəzdən idarə etməyə başlayıb

10.06.2016


Vergilər Nazirliyi Avtomatlaşdırılmış Vergi İnformasiya Sistemində “Risklərin vahid mərkəzdən idarə edilməsi” alətinin tətbiqinə başlayıb. Transparency.az-a verilən rəsmi məlumata görə, “Risklərin idarə edilməsi” aləti müasir texnologiyalara əsaslanaraq vergidən yayınma hallarını aşkar etməklə onların elektron qaydada idarə olunmasını, mövcud risklərin daha dəqiq qiymətləndirilməsini və vergi potensialının düzgün dəyərləndirilməsini təmin edir: “Həmin alət istər elektron, istərsə də digər vasitələrlə aşkar olunmuş hər bir yayınma halının dəqiqliklə yoxlanmasına, onun vergi nəzarəti tədbiri baxımından düzgün qiymətləndirilməsinə və aşkar edilmiş hallar üzrə daha səmərəli vergi nəzarəti tədbirinin seçilməsinə imkan verir. Bununla da vergidən yayınan hər bir vergi ödəyicinin vergi nəzarəti tədbirlərindən kənarda qalması hallarının aradan qaldırılması, habelə heç bir risk meyarına əsaslanmayan vergi nəzarəti tədbirlərinin keçirilməsinin qarşısı alınacaq.

“Risklərin idarə edilməsi” aləti vasitəsilə aşkar edilmiş risk mövcud potensial vergitutma baxımından dəyərləndirilir. Bundan sonra aşkar edilmiş yayınma halının növünə uyğun olaraq 3 növ (kameral vergi yoxlaması, səyyar vergi yoxlaması və ya operativ vergi nəzarəti tədbiri) vergi nəzarəti tədbirindən biri seçilir və onun icrası avtomatik olaraq həmin alət vasitəsilə müvafiq vergi orqanına həvalə edilir. “Risklərin idarə edilməsi” aləti vasitəsilə aşkarlanmış elə risklər mövcud ola bilər ki, vergidən yayınma halının vergi ödəyicisinin ilkin sənədləri əsasında yoxlanması zərurəti yaransın. Bu halda səyyar vergi yoxlamasının təyin edilməsi məqsədəmüvafiq hesab olunur.

Həmin alət vasitəsilə hər hansı bir vergi ödəyicisinin dövriyyəsinin biznes ölçüsü və yerləşdiyi məkan nəzərə alınmaqla analoji fəaliyyətlə məşğul olan ödəyici ilə müqayisədə kəskin fərqləndiyi aşkar edilərsə, həmin tip yayınma halları ilə əlaqədar xronometraj metodu ilə müşahidələr aparıla bilər.

Vergi nəzarəti tədbirlərinin təyin edilməsi “Risklərin idarə edilməsi” aləti vasitəsilə həyata keçirildiyindən həmin yoxlamalara vahid mərkəzdən nəzarət ediləcək. Yerli vergi orqanlarının müvafiq risk meyarına əsaslanmayan, qiymətləndirmə nəticəsində vergidən yayınma ehtimalı olmayan vergi yoxlamalarının qarşısı tamamilə alınacaq”.

Vergi orqanlarına şikayətlərin sayı 16,1% azalıb

10.06.2016

May ayında vergi orqanlarına 8664 müraciət daxil olub. Vergilər Nazirliyi bildirir ki, müraciətlərin 95,9%-i ərizə, 4,%-i şikayət, 0,1%-i təklifdir.

Müraciətlərin 42,9%-i müxtəlif arayışların alınması, 32,4%-i kameral vergi yoxlamaları, 6,8%-i vergi borcları, 1,5%-i səyyar vergi yoxlamaları, 2%-i vergidən yayınma və dividendlərin verilməsi, 1,1%-i operativ vergi nəzarəti tədbirləri, 0,3%-i vergi orqanlarının vəzifəli şəxslərinin hərəkəti (hərəkətsizliyi), 0,4%-i qanunsuz sahibkarlıq fəaliyyəti, 0,1%-i korrupsiya hüquqpozmaları, 12,5%-i digər məsələlərlə bağlıdır.

Müraciətlərin 65,5%-i müsbət həll olunub.

Hesabat dövründə vergi orqanlarına daxil olan şikayətlərin sayı ötən ilin may ayı ilə müqayisədə 16,1% azalıb.

Ötən ay vergi orqanları ümumilikdə 533 vətəndaşı qəbul edib.

Kənd təsərrüfatı məhsullarının istehsalçı qiymətləri necə dəyişib?

10.06.2016

Yanvar-may aylarında kənd təsərrüfatı məhsullarının istehsalçı qiymətləri 2015-ci ilin eyni dövrünə nisbətən 10 faiz, o cümlədən bitkiçilik məhsullarının istehsalçı qiymətləri 20,9 faiz düşüb, heyvandarlıq məhsullarının istehsalçı qiymətləri isə 1,4 faiz artıb. Transparency.az-ın məlumatına görə, Dövlət Statistika Komitəsi belə hesabat yayıb.

Hesabatda qeyd olunur ki, may ayında kənd təsərrüfatı məhsullarının istehsalı aprel ayına nisbətən 0,7 faiz, o cümlədən bitkiçilik məhsullarının istehsalı 1,8 faiz ucuzlaşıb, heyvandarlıq məhsullarının istehsalı isə 0,3 faiz bahalaşıb.

Ay ərzində xiyarın, pomidorun, lobyanın və kələmin istehsalçı qiymətlərində azalma, çay yarpağının və almanın istehsalçı qiymətlərində isə artım müşahidə olunub.

May ayında heyvandarlıq məhsullarından südün, qoyun və keçilərin istehsalı ucuzlaşıb, yumurtanın, donuz və quş ətinin istehsalı bahalaşıb.

Ermənistana keçmiş qadın geri qaytarıldı

10.06.2016

İyunun 7-də Ermənistan tərəfə keçmiş Azərbaycan vətəndaşı Qətibə Ələkbərova iyunun 10-da Beynəlxalq Qızıl Xaç Komitəsinin himayəsi altında repatriasiya olunub.

“Trend”in məlumatına görə, Qətibə Ələkbərova Azərbaycanın Qazax şəhəri ilə Ermənistanın İcevan şəhəri arasında yerləşən yolda, dövlət sərhədində Azərbaycan rəsmilərinə təhvil verilib.

1977-ci il təvəllüdlü Qətibə İbrahim qızı Ələkbərova Gədəbəy rayonunun Arabaçı kənd sakinidir.

Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının iyunun 9-da yaydığı məlumatda deyilirdi ki, Qətibə Ələkbərova Qazax Rayonlararası Ruhi Xəstəxanada dispanser qeydiyyatındadır.

Göyçayın icra başçısı dəyişdi

10.06.2016

İyunun 10-da Göyçay Rayon İcra Hakimiyyətinin başçısı Mübariz Ağayev tutduğu vəzifədən azad olunub. Prezident İlham Əliyev belə sərəncam imzalayıb.

Transparency.az bildirir ki, Mübariz Ağayev 1 sentyabr 1953-cü ildə Ucar rayonunun Məlikumudlu kəndində doğulub. Azərbaycan Texnologiya İnstitutunu bitirib. 2006-2007-ci illərdə Göyçayın, 2007-2012-ci illərdə Mingəçevirin, 2012-2015-ci illərdə Qubanın icra başçısı olub. 27 yanvar 2015-ci ildə yenidən Göyçay Rayon İcra Hakimiyyətinin başçısı vəzifəsinə təyin edilib.

İlham Əliyevin iyunun 10-da verdiyi başqa sərəncamla Mehdi Səlimzadə Göyçay Rayon İcra Hakimiyyətinin başçısı təyin olunub. Mehdi Səlimzadə Ədliyyə Nazirliyinin Bələdiyyələrlə İş Mərkəzinin rəhbəri idi.

Dövlət Miqrasiya Xidməti may ayı üzrə hesabat yayıb

10.06.2016


Dövlət Miqrasiya Xidməti 2016-cı ilin may ayı üzrə hesabat yayıb. Hesabata görə, ay ərzində 1845 əcnəbinin Azərbaycan Respublikasında olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərini pozması müəyyən edilib. Onlardan 25-nin Azərbaycanda müvəqqəti və ya daimi yaşamaq üçün əsas verən sənədləri yenisi ilə əvəz olunub.

157 nəfərin ölkə ərazisində yaşamaları leqallaşdırılıb, 1329 əcnəbinin Azərbaycan ərazisini 48 saat ərzində tərk etmələri, 334 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.

Müvəqqəti yaşamaq icazəsi almaq üçün məqsədli şəkildə nikaha daxil olan, lakin birgə yaşamayan 2, əvvəllər barəsində deportasiya qərarı qəbul edilmiş, lakin sonradan məqsədli şəkildə pasport məlumatlarını dəyişərək ölkə ərazisinə daxil olan 1 əcnəbi aşkarlanıb və qanuna müvafiq tədbirlər görülüb.

Ay ərzində Dövlət Miqrasiya Xidmətinə əcnəbilər və vətəndaşlığı olmayan şəxslərdən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin verilməsi, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazələrinin verilməsi və mövcud iş icazələrinin müddətlərinin uzadılması ilə bağlı 8951 müraciət daxil olub. Müraciətlərin hər biri ayrı-ayrılıqda araşdırılıb və müvafiq qərarlar qəbul edilib.

Ötən ay ərzində olduğu yer üzrə qeydiyyatla bağlı 49118 əcnəbinin müraciəti qeydə alınıb.

Dövlət Miqrasiya Xidməti ay ərzində ayrı-ayrı bölgələrdə 34 maarifləndirmə tədbiri keçirib və 638 şəxsə səyyar xidmət göstərib.

Azərbaycandan baxanda kim sərfəli və şanslı görünür?

10.06.2016

Bu il noyabrın 8-i ABŞ-da prezident seçkisi keçiriləcək. Prezidentliyə iki əsas iddiaçı var: Respublikaçılar Partiyasından Donald Tramp, Demokratlar Partiyasından Hillari Klinton. Onlar ştatlardakı ilkin seçki yarışlarından qalib çıxıblar. Namizədliklə bağlı yekun qərarlar qurultaylarda veriləcək. Respublikaçıların qurultayı gələn ay Klivlenddə, demokratların qurultayı Filadelfiyada keçiriləcək.

Donald Tramp 1946-cı il iyunun 14-də Nyu-York ştatında doğulub. Tikinti maqnatıdır. Nyu-York Hərbi Akademiyasını və Pensilvaniya Universitetinin Uorton Biznes Məktəbini bitirib.

Hillari Klinton 1947-ci il oktyabrın 26-da Çikaqoda doğulub. Yel Universitetinin hüquq fakültəsini bitirib. 1993-2001-ci illərdə prezident postunu tutmuş Bill Klintonun xanımıdır. 2009-2013-cü illərdə ABŞ-ın dövlət katibi olub.

Kimin seçilməsi ABŞ-a, dünyaya, o cümlədən Azərbaycana daha sərfəlidir? Donald Trampın, ya Hillari Klintonun? Transparency.az bu sualla siyasətçilərə və jurnalistlərə müraciət edib.

Azərbaycan Xalq Cəbhəsi Partiyasının sədri Əli Kərimli Hillari Klintonun seçilmə şansını yüksək qiymətləndirir: “Qalmaqallı açıqlamaları Donald Trampı bəzi təbəqələr arasında məşhurlaşdırsa da, onun prezident olmaq şansı yüksək deyil. Amerikanın, o cümlədən dünyanın, bizim regionun, Azərbaycanın maraqları üçün ciddi siyasi təcrübəyə malik, sabiq dövlət katibi kimi bütün dünyanı tanıyan Hillari Klinton daha uyğun namizəddir”.

Siyasi icmalçı Azər Rəşidoğlu isə namizədlər arasında heç bir fərq görmür: “ABŞ-da kimin prezident seçilməsindən asılı olmayaraq mövcud doktrina dəyişməz qalacaq. Birləşmiş Ştatlar dünyanın tək gücüdür, onunla uğursuz rəqabət aparan Rusiya, Çinin dünya siyasətinə önəmli təsir imkanları yoxdur. Fikrimcə, ABŞ-ın yeni prezidenti Hillari Klinton olacaq və bununla da ölkə Avrasiya bölgəsində öz təsirini bərqərar edəcək.

Hətta Donald Tramp seçilsə belə, Azərbaycana və dünyaya münasibət kəskin dəyişə bilməz. ABŞ demokratiya mərkəzidir. Vaxtilə bu ölkədə qaradərili insanların hüququ yox idi. İndi isə qaradərili prezident iki dəfə ardıcıl Ağ evin sahibi oldu. Növbəti mərhələdə qadın, daha sonra hansısa azlığın nümayəndəsi prezident seçilə bilər. Azad cəmiyyət olan ABŞ dünyaya yeni paradiqmalar gətirir”.

Jurnalist Xalid Kazımlı Hillari Klintonu daha sərfəli seçim hesab edir: “Onun ən azı necə işləyəcəyini, hansı prinsipləri əsas götürəcəyini bilmək mümkündür. Donald Tramp ekstravaqant, avantürist, qaranlıq adamdır. O, ABŞ prezidenti seçilərsə, dünyanın düzəni pozulacaq. Düzdür, ABŞ-da prezident seçilənlər seçkiqabağı təşviqat kampaniyasındakından xeyli fərqli olurlar, vədləri ilə hərəkətləri üst-üstə düşmür, amma yenə də Tramp təhlükə vəd edən siyasi fiqurdur. Fikrimcə, Hillari Klinton cüzi səs üstünlüyü ilə seçilərək tarixə ABŞ-ın ilk qadın prezidenti kimi düşəcək”.

Respublikaçı Alternativ Hərəkatının liderlərindən olan politoloq Azər Qasımlı bildirir ki, 2016-ci ilin seçkisi öz fərqli namizədləri ilə maraqlı görünür: “Seçkidə Amerikada formalaşmış siyasi-iqtisadi sistemdə müəyyən islahatların aparılması, transformasiyaların olması təklifləri verən, fikir söyləyən, tamamilə fərqli dünyagörüşünə malik şəxsiyyətlər iştirak edir. Demokrat Berni Sanderslə respublikaçı Donald Trampın namizəd kimi müəyyən uğur qazanmaları, Hillari Klintona ciddi şəkildə rəqib çıxmaları islahatlara ehtiyacdan xəbər verir.

Sanders daha çox sosial demokrat kimi göründü, daha çox sol düşüncəyə malikdir, Amerikanın xarici, iqtisadi siyasətinin dəyişməsinə tərəfdar çıxır. Donald Tramp isə populist çıxışları, müsəlmanlara münasibəti ilə yadda qaldı. O, bütün dünya, o cümlədən Amerika üçün qara qutudur, kim olduğunu heç kəs bilmir.

Hillari Klinton seçilsə, ehtimal ki, çox şey dəyişməyəcək, Barak Obamanın siyasəti davam etdiriləcək. Hər halda o, daha şanslı görünür, Amerika tarixinə ilk xanım prezident kimi düşə bilər. Ehtimal ki, qadınların, gənclərin böyük əksəriyyəti ona səs verəcək. Demokrat elita Klintonu dəstəkləyəcək, bəs respublikaçı elita Trampa dəstək verəcəkmi, bu, sualdır. Hər şey seçki kampaniyası və debatlarda kimin üstün olacağından asılıdır”.

Transparency.az bildirir ki, ABŞ-da prezidenti ştatların seçki günü müəyyənləşdirdiyi xüsusi nümayəndələrdən ibarət Seçicilər Kollegiyası seçir. Hər ştatın ABŞ Konqresində təmsilçilərinin sayı qədər nümayəndə seçmək hüququ var.

Ştatların neçə nümayəndə seçməsi onların əhalisinin sayına bağlıdır. Məsələn, Kaliforniya ştatını Seçicilər Kollegiyasında 55 seçici, Texası 38, Nyu-York və Floridanın hər birini 29 seçici təmsil edir. Bir çox ştatın, o cümlədən paytaxt Vaşinqtonun yerləşdiyi Kolumbiya dairəsinin cəmi 3 səsi var.

Prezident seçilmək üçün 538 nümayəndədən 270-nin səsini qazanmaq lazımdır. Prezidentliyə namizədlərin heç biri bu qədər səs qazanmasa, dövlət başçısını Konqresin Nümayəndələr Palatası seçir.

Sənaye məhsullarının istehsalçı qiymətlərinin dəyişməsi haqqında hesabat açıqlanıb. Transparency.az-ın məlumatına görə, Dövlət Statistika Komitəsi bildirir ki, 2016-cı ilin yanvar-may aylarında sənaye məhsullarının istehsalı 2015-ci ilin eyni dövrünə nisbətən 7 faiz, o cümlədən mədən sənayesi üzrə 6,5 faiz, emal sənayesi üzrə 9,2 faiz, elektrik enerjisi, qaz və buxar istehsalı, bölüşdürülməsi və təchizatı üzrə 7,5 faiz, su təchizatı, tullantıların təmizlənməsi və emalı sahəsi üzrə isə 1,5 faiz bahalaşıb.

2016-cı ilin may ayında aprel ayına nisbətən sənaye məhsullarının istehsalçı qiymətləri 9,8 faiz, o cümlədən mədən sənayesi üzrə 11,3 faiz, emal sənayesi üzrə 4,2 faiz, su təchizatı, tullantıların təmizlənməsi və emalı sahəsi üzrə 7,6 faiz artıb.

Mədən sənayesində istehsal xam neft və təbii qaz hasilatı üzrə 11,4 faiz bahalaşıb, metal filizlərinin hasilatı üzrə 2,9 faiz ucuzlaşıb.

Ay ərzində emal sənayesində istehsalçı qiymətləri rezin və plastik kütlə məmulatlarının istehsalı üzrə 8,6 faiz, neft məhsullarının istehsalı üzrə 7,1 faiz, kimya sənayesi üzrə 6,1 faiz, toxuculuq sənayesi üzrə 3 faiz, geyim istehsalı üzrə 2,2 faiz, qida məhsullarının istehsalı üzrə 2,1 faiz, poliqrafiya fəaliyyəti üzrə 0,5 faiz, elektrik avadanlıqlarının istehsalı üzrə 0,2 faiz artıb, dəri, dəridən məmulatların, ayaqqabıların istehsalı üzrə 3,6 faiz, metallurgiya sənayesi üzrə 2,1 faiz, içki istehsalı üzrə 0,7 faiz, tikinti materiallarının istehsalı üzrə 0,1 faiz düşüb.

Azərbaycan ərazisi ilə daşınan yüklərin həcmi 12,3 faiz azalıb

10.06.2016

Dövlət Statistika Komitəsi Avropa-Qafqaz-Asiya dəhlizinin Azərbaycan hissəsində bu ilin yanvar-aprel aylarında nə qədər yük və sərnişin daşındığını açıqlayıb. Bildirilir ki, ilin ilk dörd ayı ərzində Avropa-Qafqaz-Asiya nəqliyyat dəhlizinin Azərbaycan hissəsində daşınan yüklərin həcmi 15707,4 min ton, yük dövriyyəsi isə 3044,8 milyon ton-kilometr olub. Yüklərin 10090,7 min tonu və ya 64,2 faizi avtomobil nəqliyyatı, 4233,2 min tonu və ya 27 faizi dəmir yolu nəqliyyatı, 1383,5 min tonu və ya 8,8 faizi dəniz nəqliyyatı ilə daşınıb.

Ötən ilin müvafiq dövrü ilə müqayisədə dəhliz vasitəsilə daşınan yüklərin həcmində 12,3 faiz azalma müşahidə edilib, bunun da əsas səbəbi dəmir yolu və dəniz nəqliyyatı ilə yük daşınmasındakı azalmalar (müvafiq olaraq 24,6 faiz və 43,9 faiz) olub. Qeyd olunan dövrdə avtomobil nəqliyyatı ilə daşınan yüklərin həcmi 2,7 faiz artıb.

Dəhliz vasitəsilə daşınan yüklərin 14,4 faizini və ya 2261,9 min tonunu tranzit yüklər təşkil edib. 2016-cı ilin yanvar-aprel aylarında dəhliz vasitəsilə 109,7 milyon sərnişin daşınıb, sərnişin dövriyyəsi 2211,9 milyon sərnişin-kilometr olub. 2015-ci ilin müvafiq dövrü ilə müqayisədə sərnişin daşınması 2,2 faiz, sərnişin dövriyyəsi isə 1,1 faiz artıb.

Timoşenkonun partiyası rəy sorğusunda önə çıxıb

10.06.2016

Ukraynanın “İmic Kontrol” Tədqiqat Mərkəzi siyasi partiyaların reytinqini müəyyən etmək üçün paytaxt Kiyevdə keçirdiyi sosioloji sorğunun nəticələrini açıqlayıb. Novator.az-ın məlumatına görə, sorğu iyunun 4-5-də 1134 nəfər paytaxt sakini arasında aparılıb.

Sorğunun nəticələrinə görə, yaxın vaxtlarda parlament seçkisi keçirilsə, sabiq baş nazir Yuliya Timoşenkonun liderlik etdiyi Batkivşina Partiyası 17% səs toplayar.

Respondentlərin 16,8%-i indiki dövlət başçısı Pyotr Poroşenkonun blokuna dəstək verib.

Digər partiyaların şərti parlament seçkisində səsləri belə bölünüb:

Samopomoş Partiyası – 11,9%

Radikal Partiya – 8,6%

Vətəndaş Mövqeyi Partiyası – 6,1%

Azadlıq Partiyası – 5,4%

Müxalif blok – 5%.

Ukraynada sonuncu parlament seçkisi 2014-cü il oktyabrın 26-da keçirilib. Pyotr Poroşenko blokunun qalib gəldiyi seçkidə mandat sayına görə sonrakı yerləri Xalq Cəbhəsi, Samopomoş bloku, Müxalif blok, Radikal Partiya, Batkivşina bloku, Azadlıq Partiyası və başqaları tutub.