Odam havoda karbonat angidrid miqdori 2—3% gacha ortishiga chiday oladi. Agar u 4—5% ga yetsa, yurak qisqarishi tezlashadi, boshi og’riydi, odam qusadi, hushidan ketishi mumkin. Havodagi suv bug’i miqdori tashqi muhit haroratiga bog’liq.
Bolalarning nafas olish organlari tuzilishi va funktsiyasiga ko’ra kattalarnikidan farq qiladi. Yangi tug’ilgan bolalarda halqum tor va burun teshigi ingichka, kichik bo’lib, shilliq qavat qon va limfa tomirlari bilan ko’p ta’minlangan. Gaymarov bo’shlig’i, g’alvirsimon suyakdagi qo’shimcha yo’llar yaxshi rivojlanmagan bo’ladi. Gaymarov bo’shlig’i ikki yoshdan kattalasha boradi va 5—6 yoshda rivojlanib bo’ladi.
