Qarori minimal iste’mol xarajatlari qiymatini hisoblash tartibini amaliyotga joriy etish to‘G‘risida
Yüklə 275,65 Kb. Pdf görüntüsü
|
|
O‘ZBEKISTON RESPUBLIKASI VAZIRLAR MAHKAMASINING QARORI MINIMAL ISTE’MOL XARAJATLARI QIYMATINI HISOBLASH TARTIBINI AMALIYOTGA JORIY ETISH TO‘G‘RISIDA Mamlakatimizda kambag‘allikni qisqartirish va ehtiyojmand oilalarni ijtimoiy qo‘llab- quvvatlash borasidagi chora-tadbirlarning natijadorligini oshirish va bunda aholining maqsadli guruhini aniqlash bo‘yicha vazifalar aniq bir mezon va uslubiy yondashuvlarning ishlab chiqilishini talab etadi. O‘z navbatida, ushbu uslubiy yondashuv va bazani shakllantirish aholining turmush sharoiti va ijtimoiy holatini bevosita o‘zida aks ettiruvchi, ya’ni ularning iste’mol tarkibi va xususiyatlari bo‘yicha real holatni ifodalovchi ko‘rsatkichlarni hisoblash muhim ahamiyat kasb etadi. Yuqoridagilardan kelib chiqib, xususan, mamlakatimizda aholining kambag‘al qatlamini aniqlash uslubini amaliyotga joriy etish va takomillashtirib borish, shuningdek, O‘zbekiston Respublikasi Prezidentining “ 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Yoshlarni qo‘llab-quvvatlash va aholi salomatligini mustahkamlash yili”da amalga oshirishga oid davlat dasturi to‘g‘risida ” 2021-yil 3- fevraldagi PF-6155-son va “ Kam ta’minlangan oilalarga moddiy yordam ko‘rsatish hamda kambag‘allik bilan kurashish ko‘lamini yanada kengaytirish chora-tadbirlari to‘g‘risida ” 2021-yil 11- avgustdagi PF-6277-son Farmonlari ijrosini ta’minlash maqsadida Vazirlar Mahkamasi qaror qiladi: 1. O‘zbekiston Respublikasi Iqtisodiy taraqqiyot va kambag‘allikni qisqartirish vazirligi tomonidan Jahon bankining texnik ko‘magi asosida minimal iste’mol xarajatlari qiymatining dastlabki hisob-kitoblari tayyorlanganligi ma’lumot uchun qabul qilinsin. Iqtisodiy taraqqiyot va kambag‘allikni qisqartirish vazirligi, Moliya vazirligi va Davlat statistika qo‘mitasining minimal iste’mol xarajatlari ko‘rsatkichidan kambag‘allik mezoni (yoki chegarasi) sifatida foydalanish bo‘yicha taklifiga rozilik berilsin. 2. Belgilansinki: 2022-yildan boshlab, “Ijtimoiy himoya yagona reyestri” axborot tizimi orqali oilani kam ta’minlangan deb e’tirof etish jarayonida qo‘llaniladigan va jon boshiga to‘g‘ri keladigan bir oylik daromad mezoni minimal iste’mol xarajatlariga tenglashtiriladi; O‘zbekiston Respublikasi Iqtisodiy taraqqiyot va kambag‘allikni qisqartirish vazirligi har yili avgust oyiga qadar minimal iste’mol xarajatlari qiymatining prognoz parametrlarini inflatsiya kutilmalaridan kelib chiqib hisoblaydi; Moliya vazirligi Iqtisodiy taraqqiyot va kambag‘allikni qisqartirish vazirligi bilan birgalikda minimal iste’mol xarajatlari qiymatining prognoz ko‘rsatkichlarini kelgusi yil uchun O‘zbekiston Respublikasi Davlat budjeti xarajatlari parametrlarini shakllantirishda inobatga oladi; Davlat statistika qo‘mitasi minimal iste’mol xarajatlari va kambag‘allik darajasini har yilgi hisobot yilida inflatsiya darajasidan kelib chiqib, keyingi yilning 20-yanvariga qadar e’lon qilib boradi; Iqtisodiy taraqqiyot va kambag‘allikni qisqartirish vazirligi, Davlat statistika qo‘mitasi, Moliya vazirligi xorijiy ekspertlarni jalb etgan holda, minimal iste’mol xarajatlari tarkibini respublika iqtisodiyotining rivojlanishi hamda aholi daromad va xarajatlarining o‘zgarishini inobatga olgan holda kamida har 5 yilda qayta ko‘rib chiqadi. 3. Quyidagilarni nazarda tutuvchi Aholining minimal iste’mol xarajatlari qiymati va kambag‘allik chegarasini hisoblash tartibi to‘g‘risidagi nizom ilovaga muvofiq tasdiqlansin: minimal iste’mol xarajatlari, kambag‘allik chegarasi va uy xo‘jaliklarining real iste’mol qiymatlari hamda tarkibini o‘rganish; sog‘lom hayot kechirish uchun zarur bo‘lgan oziq-ovqat va nooziq-ovqat mahsulotlar hamda xizmatlar uchun minimal iste’mol xarajatlar qiymatini hisoblash tamoyillari, bosqichlari va tartibi. 4. O‘zbekiston Respublikasi Davlat statistika qo‘mitasi, Iqtisodiy taraqqiyot va kambag‘allikni qisqartirish vazirligi hamda Moliya vazirligi xalqaro ekspertlarni jalb etgan holda uy xo‘jaliklari so‘rovi natijalaridan kelib chiqib, 2021-yilning 15-dekabriga qadar minimal iste’mol xarajatlari hisob-kitobini yakuniga yetkazsin. 5. O‘zbekiston Respublikasi Iqtisodiy taraqqiyot va kambag‘allikni qisqartirish vazirligi Davlat statistika qo‘mitasi, Moliya vazirligi bilan birgalikda Jahon banki va YUNISEFning texnik ko‘magini jalb qilgan holda 2021-yil yakuniga qadar: minimal iste’mol xarajatlarini hisoblashda har bir uy xo‘jaligi a’zolarining yoshi, tarkibidan kelib chiqqan holda tegishli koeffitsiyentlarni qo‘llash; uy xo‘jaliklari kuzatuvlari qamrovini 2023-yilgacha bosqichma-bosqich 2 baravar oshirish; kambag‘allikni qisqartirishning yangi vositalarini amaliyotga joriy etishni nazarda tutuvchi chora-tadbirlar dasturini ishlab chiqsin. 6. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov zimmasiga yuklansin. Yüklə 275,65 Kb. Dostları ilə paylaş:
|