Bu belgi pastlik, nishablik oldida o‘rnatilib, ichidagi raqam nishablikning 100 m uzunlikka tug‘ri keladigan pasayishini foiz hisobida ko‘rsatadi. Pastlik cho‘zilib ketgan bo‘lsa, u holda ushbu belgi 7.2.1 - «Ta’sir oralig‘i» qo‘shimcha axborot belgisi bilan qo‘llaniladi. Nishablik tomon harakatlanayotgan haydovchi yo‘lning tor qismlarida ro‘paradan tepalik tomon harakatlanayotgan haydovchiga yo‘l berishi lozim.
«Tik balandlik».
Bu belgi tik balandliklar oldida o‘rnatiladi va haydovchini transport vositasining dinamik xususiyatlari, yukli yoki yuksizligiga qarab, kerakli uzatmaga ulash, balandlikka to‘xtamasdan chiqish kerakligidan ogohlantiradi. Aks holda avtomobil to‘xtab qolib, o‘z og‘irligi bilan orqaga ketishi mumkin. Nishablik va balandlik ketma-ket keladigan bo‘lsa, yuqoridagi belgilar 50 - 100 m masofada emas, balki bevosita nishablik va balandlik oldida o‘rnatiladi.
«Sirpanchiq yo‘l».
Yo‘lning ustki o‘tish qismi ma’lum sabablarga ko‘ra (loy, qavatma-qavat ho‘l barglar, muzlaganlik oqibatida) sirpanchiq bo‘lib qolsa, bunday qism oldida 1.15 yo‘l belgisi o‘rnatiladi. Haydovchi yo‘lning bunday qismlarida tezlikni kamaytirishi, keskin to‘xtamasligi, keskin burilmasligi lozim, aks holda transport vositasi sirpanib ketadi va uni boshqarish qiyin kechib boshqaruvdan chiqib ketadi.
