Gimnaziyanın müdirinin müraciəti 1990-cı ildə yaradılmış təhsil müəssisəmiz respublikada ilk özəl məktəbdir. Biz bu məktəbə müəllim heyətini seçərkən çalışırdıq ki, şərəfli müəllim adına layiq olan, pedaqoji fəaliyyətində novator ideyalarla seçilən və şagirdlərin inamını və məhəbbətini qazana bilən müəllimləri işə dəvət edək.
Həyat daima hərəkətdədir. Ölkəmiz demokratik cəmiyyət quruculuğu istiqamətində irəliləyir. Əvvəlki dəyərlər, əsasən deklarativ xarakter daşıdığından və kommunist ideologiyasını əks etdirdiyindən öz əhəmiyyətini itirmişdir. Artıq müasir dövrdə bu dəyərlər yenidən nəzərdən keçirilir. Bu baxımdan biz, bu sənəd üzərində işləyərkən düşünürdük ki, elə bir sənəd hazırlayaq ki, o əməkdaşlarımızın etik davranışının, bir növ etalonuna çevrilsin.
Bu etika kodeksi müəllim kollektivinin və məktəb rəhbərlyinin iştirakı və arzuları nəzərə alınaraq hazırlanmışdır. Bu kodeks özlüyündə unikal bir sənəddir. Çünki, indiyəcən ölkədə müəllimlərin davranışını tənzimləyən sənəd olmamışdır. Ümid etmək istərdik ki, bizim təcrübəmizi digər təhsil müəssisələri də davam etdirəcəklər. İnanırıq ki, gənc nəslin tərbiyəsi kimi nəcib bir işdə bu kodeks bizim bələdçimiz olacaq.
