Temur davrining dong'i chiqqan olimlaridan Sa'duddin at-Taftozoniy, Said Sharif Muhammad al-Jurjoniy, Xoja Muhammad az-Zohid al-Buxoriyni ko'rsatib o'tish lozim. Xoja Muhammad az-Zohid al-Buxoriy Qur'oni karimni yuz jildda (!) tafsir qilgan. Musiqa ilmida shuhrat topgan bastakor va ustoz Abduqodir al-Marog'iy nomi ham tarixda qolgan. Ibn Arabshoh yozishiga qaraganda, mavlono Ahmad ibn Shams turkcha, forscha, arabchada «malik ul-kalom» unvonini olgan. Bu uchala tilning podshohi deganidir. Ushbu munosabat bilan shuni alohida ta'kidlamoqchi edikki, o'rta asrlarda ilmiy, adabiy va madaniy hayotning milliyligi qaysi tilda bitilgani bilan belgilanmagan.
Temur faoliyatining bosh g'oyasi va amaliy shiori «Kuch — adolatda» degan hikmatki, u umuminsoniy ahamiyatga ega. Bu g'oya hozir ham, bundan keyin ham eng e'zozli umuminsoniy ma'naviy qadriyatlardan, axloqiy va huquqiy me'yorlardan biri bo'lib qoladi. Rostgo'ylik, haqiqatgo'ylik, adolatparvarlik, yurti va fuqarolari to'g'risida qayg'urish, mamlakati tinch va osoyishta, obod va farovon bo'lishiga butun kuch g'ayratini, aql-zakovatini yo'naltirish kabi Temurning xos fazilatlari uning chinakam buyuk ma'naviy shaxs bo'lishiga, buyuk yaratuvchi davlat boshlig'i sifatida tarixda o'chmas iz qoldirishiga xizmat qildi. Mazkur fazilatlar uning avlodlariga ibrat bo'ldi va hozirgacha ibrat bo'lmoqda.
Davlat boshqaruvi, demokratiya tamoyillariga suyanish, ijtimoiy hayotni tartibga solish, jinoyatchilikka qarshi kurash va huquq ustuvorligini ta'minlash, xalqaro munosabatlarning teng, ikki tomonlama manfaatdor iqtisodiy aloqalar va hamkorlik asosida kurishga oid bugun tan olingan umumbashariy me'yorlar, qadriyatlarning birortasi yo'qki, u Temurning amaliy faoliyatida va siyosatida kurtak sifatida mavjud bo'lmasa.
Temurning davlat ishlarining 90 foizi kengashu mashvarat, faqat 10 foizi kuch qilich (ma'muriy yo'l) orqali hal qilinishi lozim degan tamoyili o'z davri uchun davlatni maslahat asosida boshqarish, ya'ni o'ziga xos demokratik boshqaruv me'yoridir. Xalq norozi bo'lgan, adolatni buzgan hokimlarni vazifasidan chetlashtirib jazolashi yoki mamlakatning bir sarhadidan ikkinchi sarhadiga boshiga bir lagan javohirni qo'yib o'tayotgan bolakayning biror dona javohiri yo'qolmaydigan tartib o'rnatilgani adolat va hukuk ustuvorligining amalda ta'minlanishidir. G’arb davlatlari hukmdorlariga yozgan maktublarida mamlakatlar o'rtasida urushlar emas, savdo-sotik rivojlanishi farovonlikka, obodonchilikka xizmat qilishi to'g'risidagi fikrlari va bunday aloqalarni o'rnatish bo'yicha bildirgan amaliy takliflari bugungi xalqaro siyosiy va iqtisodiy aloqalar negizida yotgan tamoyilning o'sha davrda nish urgan kurtagidir.
