15-mavzu. Ijtimoiy ne`matlar va umumiy resurslar. Reja

15-mavzu. Ijtimoiy ne`matlar va umumiy resurslar. Reja

15-MAVZU. IJTIMOIY NE`MATLAR VA UMUMIY RESURSLAR.
Reja:
15.1. Mahsulotlarning turli xil turlari
15.2. Ommaviy (umumiy foydalanishdagi) tovarlar
15.3. Umumiy resurslar
TАYANCH SO‘Z VA IBORALAR:
Iste’molda cheklanganlik, xususiy mahsulotlar, ommaviy resursla,r umumiy resurslar, ”tekinxo‘rlar”, harajatlar va daromadlar, tahlili umummilliy resurslar fojeasi, umumiy foyda, mudofaa tizimi, fundamental ilmiy tadqiqotlar, ommaviy mahsulotmi, harajatlar va daromadlarni tahlil qilish.
15.1. Mahsulotlarning turli xil turlari.

Bozorlar insonlar hohlayotgan mahsulotlar etkazib berishda qanchalik yaxshi ishlashadi? Bu savolga javob masalaning mohiyati qay darajada chuqur anglab yetilganligiga bog`liq. Biz 7-bobda ta’kidlab o‘tganimizdek, bozor konussimon qutili muzqaymoqning samarali sonini ta’minlab berishi mumkin: muzqaymoqning narxi ularga bo‘lgan talab va taklifni muvozanatlashtirishi va bu muvozanat ishlab chiqaruvchi daromadlarini maksimallashtirishi hamda iste’mol tanqisligini bartaraf etishi mumkin. Bundan tashqari, biz 10-bobda ko‘rib o‘tganimizdek, bozor alyuminiy ishlab chiqaruvchilarni biz nafas olayotgan havoni ifloslantirishdan qaytarishga umid qila olmaydi. Bozorda xaridor va sotuvchilar odatda o‘z qarorlarining tashqi oqibatlariga e’tibor qaratishmaydi. Shunday qilib, bozorlar mahsulot muzqaymoq bo‘lganda yaxshiroq va mahsulot toza havo bo‘lganda yomonroq ishlashadi.

Bozordagi turli xil mahsulotlar haqida fikr yuritib, ularni quyidagi ikki sifatga ko‘ra guruhlash mumkin:
- Mahsulot iste’moldan mahrum qilinish (eksklyuzivlik) xususiyatiga egami? Ya’ni, kishilarni uning iste’molidan mahrum etish mumkinmi?
- Mahsulot iste’molda cheklanganmi? Ya’ni, bir kishining mahsulotni iste’mol qilishi boshqa kishilarning uni iste’mol qilish qobiliyatlarini kamaytiradimi?
Ushbu ikki sifatning ishlatilishi, 1-rasmda mahsulotlarni 4 guruhga taqsimlaydi:
1. Shaxsiy buyumlar iste’moldan mahrum qilinish va iste’molda cheklanganlik xususiyatlariga ega. Masalan, konussimon qutili muzqaymoqni ko‘rib chiqamiz.
Muzqaymoq iste’moldan olinishi mumkin, chunki kimnidir muzqaymoq iste’molidan mahrum qilish uchun o‘sha kishiga muzqaymoqni bermaslikning o‘zi kifoya. Konussimon qutili muzqaymoq iste’molda cheklangan, chunki agarda biror kishi muzqaymoqni iste’mol qilsa, boshqa bir kishi aynan o‘sha muzqaymoqni iste’mol qilish imkoniyatiga ega bo‘lmaydi. Iqtisodiyotda ko‘pgina mahsulotlar aynan konussimon qutili muzqaymoq kabidir: siz to‘lovni amalga oshirmay turib biror narsani qo‘lga kirita olmaysiz va siz to‘lovni amalga oshirgandan so‘ng shu tovar hisobiga foyda olishi mumkin bo‘lgan yagona shaxsga aylanasiz. Biz ilgarigi 4-,5- va 6-boblarda talab va taklifni, shuningdek, 7-, 8- va 9-boblarda bozorlar samaradorligini tahlil qilganimizda mahsulotlar iste’moldan mahrum qilinish va iste’molda cheklanganlik xususiyatlariga ega ekanligini taxmin qilgandik.
2. Umumiy foydalanishdagi mahsulotlar iste’moldan mahrum qilinish va iste’molda cheklanganlik xususiyatlariga ega emasdirlar. Ya’ni kishilarga umumiy foydalanishdagi mahsulotlarning iste’molini cheklash mumkin emas, shuningdek, bir kishining iste’moli boshqa kishining uni iste’mol qilish imkoniyatini kamaytirmaydi. Masalan, kichik shaharchada tornado ovozi umumiy foydalanishdagi mahsulot hisoblanadi. Ya’ni, tornado yuzaga kelgandan keyin hech kimni uning ovozidan himoya qilish mumkin emas (demak bu ist’emoldan olinishi mumkin emas). Undan tashqari, biror kishi ushbu shovqindan foyda oladigan bo‘lsa, u boshqa biror kishining imkoniyatlarini kamaytirib yubormaydi (demak bu iste’molda cheklangan emas).

Tabiiy monopoliyalar

• yong'indan himoya
• Kabel TV
• tirbanad bo’lmagan yo’llar uchun to’lov

davlat maxsulotlari

• Milliy mudofaa
• Tirband bo’lmagan yo’llar uchun to’lov

Umumiy resurslar

• dengizdagi baliq
• Atrof muhit
• bepul yo’llardan ketyapish

Xususiy mulk

• Muzqaymoq ko’nusi
• kiyimlar
• tirband yo’llardan foydalanish uchun to’lov

Iste'moldagi raqobat?

Yo`q

Yo`q

Ha

Ha

Mustasnomi?

Tovarlarning to'rt turi.

Mahsulotlar ikki xususiyatlariga ko'ra to'rt toifaga guruhlangan bo'lishi mumkin; (1) odamlar undan foydalanishdan to’xtatiadigan tovarlar bundan mustasno. (2) Agar bitta odamning tovarlarni iste’mol qilishi, boshqa odamlarning shu tovarlarni iste’mol qilishlarini qisqartirsa, bu tovarlar raqobatdosh bo’ladi.

RASM

3. Umumiy resurslar cheklanganlik xususiyatiga ega, biroq iste’moldan mahrum qilinishi mumkin bo‘lmagan mahsulotlar. Masalan, okeandagi baliq iste’molda cheklanganlik xususiyatiga ega, agar biror shaxs okeandan baliq tutib olsa, u holda boshqa bir shaxs uchun tutib olish mumkin bo‘lgan baliqlar soni kamayadi. Shu bilan birga bu baliqlar, iste’moldan mahrum qilinishi mumkin bo‘lgan mahsulot emas. Sababi, okeanni cheksizlik xususiyatini inobatga olsak, baliq tutuvchilarni baliq tutishdan to‘xtatish o‘ta mushkul vazifadir.
4. Agar mahsulot iste’moldan mahrum qilinish xususiyatiga ega bo‘lish bilan bir qatorda cheklanganlik xususiyatiga ega bo‘lmasa, u holda mazkur mahsulot tabiiy monopoliya ishlab chiqarish uchun yaxshigina misol bo‘la oladi. Masalan, kichik shaharchada yong`inga qarshi himoya tizimini misol keltiraylik. Biror kishini bu mahsulotni (xizmatni) iste’mol qilishdan mahrum etish juda oson: yong`inga qarshi kurashish bo‘limi shunchaki o‘sha kishining uyi yonib bitishi uchun imkoniyat yaratib beradi. Shu bilan birga, bu mahsulot (xizmat) cheklanganlik xususiyatiga ega emas. Ya’ni butun boshli shaharning yong`inga qarshi kurashish bo‘limi harajatlari to‘langanda, kichik bir uyni yong`indan himoya qilish harajatlari hech narsa emas (15 bobda tabiiy monopoliyalar mavzusi chuqurroq o‘rganiladi va unga kengroq ta’rif beriladi).
Yuqorida ko‘rib chiqilgan 1-rasm mahsulotlarni aniq 4 guruhga bo‘lishni ko‘zda tutganiga qaramasdan, odatda ular o‘rtasidagi chegara ko‘p hollarda aniq bo‘lmaydi. Mahsulot iste’moldan mahrum qilinish xususiyatiga egami yoki iste’molda cheklanganmi ko‘p holatlarda aniq bir darajaga bog`liq bo‘lib qoladi. Okeandagi baliq iste’moldan mahrum qilinish xususiyatiga ega bo‘lmaydi, sababi, okeanda kuzatish imkoniyati juda qiyin, lekin shu bilan birga qo‘riqlanadigan qirg`oqqa ega suv havzasi baliqni aksariyat holatlarda iste’moldan mahrum qilinuvchi xususiyatiga ega qilishi mumkin. Xuddi shunday tartibda, baliq odatda iste’molga cheklangan mahsulot bo‘lgani bilan baliq ovlovchilar soniga ko‘ra uni iste’molga cheklanmagan mahsulot sifatida ko‘rib o‘tish mumkin (shimoliy-amerikalik balik tutvchilarni u erlarga evropalik ko‘chmanchilarni ko‘chib kelgungacha bo‘lgan holatini eslang). Bu fikr bizning tahlil uchun, shu bilan birga, yuqoridagi boshqa to‘rt guruh mahsulotlari uchun ham foydali bo‘ladi.
Mazkur bobda biz iste’moldan mahrum qilinish xususiyatiga ega bo‘lmagan mahsulotlarni ko‘rib chiqamiz: ommaviy (umumiy foydalanishdagi) mahsulotlar va umumiy resurslar. Sababi, kishilar bu mahsulotlarni iste’molidan mahrum etilishlari yoki voz kechishlari mumkin emas, ular hamma uchun mavjud. Ommaviy mahsulotlar va umumiy resurslarni o‘rganish tashqi faktorlarni o‘rganish bilan chambarchas bog`liq. Ushbu har ikkala mahsulot uchun ham tashqi faktorlar yuzaga keladi, chunki ba’zi bir tabiiy ne’matlar (boyliklar) narxga ega bo‘lmaydi. Agar biror bir kishi ommaviy (umumiy foydalanishdagi) mahsulotdan iste’mol qilishi (foydalanishi) kerak bo‘lsa, aytaylik tornado ovozidan, boshqa bir kishi esa undan ko‘ra yaxshiroq ko‘rinishda (vaziyatda) ham foydalanishi mumkin. Ularning har ikkisi mahsulot uchun haq to‘lamasdan foyda olishadi – bu ijobiy tashqi ta’sir. Xuddi shunday, biror kishi ommaviy (umumiy foydalanishdagi) mahsulotni iste’mol qilayotganda, aytaylik, okeandagi baliqni, boshqa kishilarda undan foydalanish imkoniyati pasayib ketadi, chunki tutilishi mumkin bo‘lgan baliqlar soni kamayadi. Ular yuzaga kelgan yo‘qotishdan ma’lum ma’noda zarar ko‘rishadi, biroq hech kim buni qoplab berish majburiyatini olmaydi – bu esa salbiy tashqi ta’sir. Ushbu kabi tashqi ta’sirlar tufayli, iste’mol qilish va ishlab chiqarish to‘g`risidagi ko‘pchilik qarorlar resurslarning samarasiz taqsimlanishiga olib keladi. Ushbu holatlarda davlatning aralashuvigina iqtisodiy farovonlikka va resurslar barqarorligiga olib kelishi mumkin.
15.2. Ommaviy (umumiy foydalanishdagi) tovarlar
Ommaviy (umumiy foydalanishdagi) mahsulotlarning boshqa mahsulotlardan farqini yaxshiroq tushunish va ular tufayli jamiyatga kelib chiqishi mumkin bo‘lgan muammolarni ko‘rib chiqish uchun keling, bir misolni ko‘ramiz: mushakbozlik. Bu mahsulot iste’moldan mahrum qilinish xususiyatiga ega emas, sababi mushakbozlik bo‘lgan holatda biror kishini uni tomosha qilishdan qaytarish mumkin emas. Shuningdek, bu cheklanganlik xususiyatiga ham ega mahsulot emas, sababi biror kishini mushakbozlikdan zavq olishi boshqa bir kishini undan olishi mumkin bo‘lgan zavq darajasini kamaytirmaydi.
“Tekinxo‘rlar” (ommaviy mahsulotlardan foydalanib, ularga haq to‘lamaydigan kishilar) muammosi
AQShning Smolltaun shaharchasi fuqarolari, iyulning to‘rtinchi kunida mushabozlik o‘tkazilishini yoqtirishadi. Mushakbozlik shaharchaning har 500 aholisiga 10 so‘mdan to‘g`ri keladi va shahar byudjetiga yakunda jami 5000 so‘m daromad keltiradi. Mushakbozlikni tashkil etish harajatlari jami 1000 so‘mga to‘g`ri keladi. Ushbu faoliyatdan olinayotgan daromad (5000 so‘m) unga ketgan harajatdan (1000 so‘m) ko‘proq ekanligi inobatga olinsa, to‘rtinchi iyulda mushakbozlikni o‘tkazish Smolltaun shaharchasi uchun daromadli faoliyatdir.
Xo‘sh, xususiy sektor mazkur faoliyatni samarali yo‘lga qo‘ya oladimi? Yo‘q. Aytaylik, shaharchada yashovchi tadbirkor Ellen Smolltaun shaharchasi uchun mushakbozlik o‘tkazishni tashkil etishga bel bog`ladi.
Ellenda, shubhasiz, chiptalarni sotish bilan bog`liq muammolar yuzaga keladi, sababi uning salohiyatli mijozlari bilishadiki, mushakbozlikni chipta sotib olmasdan ham ko‘rish mumkin. Sababi, mushakbozlik iste’moldan mahrum qilinish xususiyatiga ega bo‘lmagan mahsulotdir, chunki kishilarda chiptasiz ham mushakbozlikni tomosha qilishga rag`bat bor. “Tekinxo‘rlar” bu shunday kishiki – yaxshi narsadan foyda oladi, ammo unga haq to‘lamaydi. Kishilar bunda rag`batga ega bo‘lishadi, turgan gapki, agar chipta sotib oluvchilar mavjud bo‘lmasa bozor samarali natijaga ega bo‘lmaydi.
Bozorda mazkur muvaffiqqiyatsizlikni ko‘rib chiqish yo‘llaridan biri bu mazkur holatga sabab bo‘layotgan tashqi ta’sirlarni ko‘rib chiqish.
Agarda, Ellen mushakbozlik marosimini shahar markazidagi displeyda namoyish etsa, bu narsa “tekinxo‘r” tomoshabinlar uchun samara keltiradi, ammo Ellenga emas. Marosimni ekranda namoyish qilish to‘g`risida qaror qabul qilish bilan Ellen tashqi ta’sirlarni e’tibordan chetda qoldiradi. Mushakbozlik aholi tomonidan katta qiziqishga sabab bo‘lgani bilan, yakunda u daromadli faoliyat bo‘lmay qoladi. Natijada, marosimni displeyda namoyish etmasdan Ellen o‘zi uchun ratsional qaror qabul qiladi, biroq aholini mushakbozlik zavqidan mahrum etadi.
Xususiy bozor Smolltaun shaharchasi aholisi hohishiga ko‘ra mushakbozlik tashkil etishga tayyor emasligiga qaramay ushbu holatning yechimi juda oddiy: to‘rtinchi iyul tadbirlarini mahalliy hukumat moliyalashtirishi zarur. Shahar hokimiyati aholidan olinadigan soliqni 2 so‘mga oshirib, kelib tushgan mablag`lar hisobiga Ellenni mushakbozlik o‘tkazish uchun yollashi mumkin. Shaharchada 8 so‘m barcha uchun yaxshi yechim, 10 so‘mdan esa, 2 so‘m soliq to‘lovini ayirib tashlagan holda, daromad hosil bo‘lmoqda. Shunday qilib, Ellen Smolltaunga tadbirkor sifatida yordam bera olmagan bo‘lsa-da, unga jamiyat a’zosi sifatida yordam berishi mumkin.
Smolltaun hikoyasi sodda bo‘lsa-da real hayotni aks ettiruvchi o‘ziga xos voqe’likdir. Aslida AQShdagi ko‘pgina mahalliy hukumatlar to‘rtinchi iyul mushakbozliklari uchun pul to‘lashadi. Undan tashqari mazkur hikoya ommaviy mahsulotlarning umumiy xususiyatini ochib beradi: ommaviy mahsulotlar iste’moldan mahrum qilinish xususiyatiga ega emas, “tekinxo‘rlar” muammosi esa ommaviy mahsulotlarning xususiy sektor tomonidan taqdim etilishiga to‘sqinlik qiladi. Shu bilan birga, davlat bu masalani mahsulotlardan kelayotgan daromad ularga sarflanayotgan harajatlarni qoplashi mumkin bo‘lgan darajada hal etishi, soliqlar bilan birga umumiy harajatlarni qoplashi, barcha masalalarni ijobiy hal etishi mumkin.
Ba’zi bir muhim ommaviy mahsulotlar.
Ommaviy (umumiy foydalanishdagi) mahsulotlar uchun misollar talaygina. Quyida biz ulardan eng muhim uchtasini ko‘rib chiqamiz.
Mudofaa tizimi. Mamlakatni xorijiy bosqinchilardan himoya qiluvchi mudofaa tizimi bunga klassik misol bo‘la oladi. Butun mamlakat himoyalangandan keyin biror bir kishini bu mahsulotning (xizmatning) iste’molidan, ya’ni tinchlikdan bahra olishdan mahrum qilib bo‘lmaydi. Undan tashqari biror kishi mudofaa tizimidan foydalanayotganda, u boshqa bir kishini bu mahsulotdan (xizmatdan) foydalanishiga to‘sqinlik qila olmaydi. Shunday qilib, mudofaa tizimi iste’moldan mahrum qilinish xususiyatiga ham cheklanganlik xususiyatiga ham ega emas.
Shu bilan birga mudofaa tizimi eng serharajat ommaviy mahsulot hisoblanadi. 2007-yilda AQSh federal hukumati mudofaa tizimiga 553 milliard so‘m mablag` sarfladi, ya’ni aholi jon boshiga 1800 so‘m. Bu mablag`ning ko‘p yoki kamligi yuzasidan aholi o‘rtasida turli xil fikrlar mavjud bo‘lganiga qaramay, hech kim mudofaa tizimi uchun davlat harajatlari zarur ekanligini inkor etmaydi. Davlatning o‘ziga hos himoyachilari bo‘lgan iqtisodchilar ham mudofaa tizimining ommaviy mahsulot ekanligini inobatga olib, uni davlat tomonidan ta’minlanishini yoqlashadi.
Fundamental ilmiy tadqiqotlar. Bilim ilmiy tadqiqotlar asosida yuzaga keladi. U yoki bu davlatning bilimlarni shakllantirishga yo‘naltirilgan siyosatini baholashda umumiy bilimlarni aniq texnologik bilimlardan farqlash zarur. Uzoqroq muddat xizmat qiluvchi batareykalarni ixtiro qilish, kichikroq hajmdagi mikrochiplarni yaratish yoki yaxshiroq musiqa eshitish asbobini ishlab chiqishga o‘xshagan aniq texnologik bilimlar odatda patentlangan bo‘lishi mumkin. Patent ixtirochiga ma’lum bir muddatda u yaratgan yoki ixtiro qilgan sohada faoliyat yuritish uchun alohida huquqni beradi. Boshqa shaxslar patentlangan ma’lumotlardan foydalanganlik huquqi uchun ixtirochiga haq to‘lashadi. Boshqacha aytganda patent ixtirochining bilimini iste’moldan mahrum qilinish xususiyatiga ega qiladi.
Bunga qarama-qarshi ravishda umumiy bilimlar ommaviy mahsulot hisoblanadi. Masalan, matematik olim teoremani patentlay olmaydi. Teorema isbotlanganidan so‘ng bilim iste’moldan mahrum qilish xususiyatiga ega bo‘lmaydi. Teorema umumiy foydalanishdagi bilimlar sirasiga kiradi, har kim biror-bir ayblovsiz undan foydalanish huquqiga ega. Teorema shuningdek, iste’molda ta’qiqlangan ham emas, biror kishini teoremadan foylanishi boshqa bir kishini undan foydalanish imkoniyatlarini kamaytirmaydi.
Daromad olishga intilgan firmalar keyinchalik ularni patentlash yoki qayta sotish hisobiga ko‘proq daromad olishni ko‘zlab, tayyor ilmiy tadqiqotlar hisobiga yangi loyihalarni ishlab chiqishga juda ko‘p mablag` ishlatishadi, biroq ular fundamental ilmiy izlanishlarga ko‘p mablag` sarf etishmaydi. Bunda ularni rag`batlantiruvchi omil - ilgari boshqalar tomonidan ishlab chiqilgan umumiy bilimlarga mablag`ni iqtisod qilish. Buning natijasi o‘laroq, u yoki bu davlat siyosatining mavjud emasligi tufayli jamiyat yangi fundamental ilmiy izlanishlarga juda kam resurs sarflaydi.
Davlat ommaviy mahsulot hisoblangan umumiy bilimlarni turli xil usullar bilan ta’minlashga harakat qiladi. Sog`liqni saqlash milliy instituti va Milliy ilmiy jamg`arma kabi davlat idoralari tibbiyot, matematika, fizika, ximiya, biologiya va hatto iqtisodiyot kabi yo‘nalishlarda fundamental tadqiqotlar uchun turli xil subsidiyalar ajratadi. Ba’zi kishilar davlatning kosmik dasturlarni moliyalashtirish siyosatini ularni jamiyatda umumiy bilimlarni kuchaytirilishiga qo‘shishi mumkin bo‘lgan hissasi tufayli yoqlashadi (biroq ba’zi olimlar kosmik sayohatlarni amalga oshirishga qaratilgan loyihalarga skeptik yondoshishgan). Olinayotgan foydani aniqlash qiyinligi hisobiga davlat tomonidan mazkur urinishlarga mustahkam qo‘llab-quvvatlashni aniqlash qiyin. Bundan tashqari, mazkur tadbirlarga yo‘naltirilgan moliyaviy mablag`larni tasdiqlab bergan Kongress a’zolari ushbu yo‘nalishlarda yetarlicha bilim va tajribaga ega emas, bu tadbirlarning samarali ekanligini aniqlab berishga qodir emaslar. Shunday qilib, fundamental izlanishlar ommaviy mahsulot bo‘lgan bir paytda davlatni ularni kerakli hajm va yo‘nalishlarda moliyalashtirishga qodir emasligiga hayron bo‘lishimiz kerak emas.
Qashshoqlikka qarshi kurashish. Ko‘pgina davlat dasturlari nochorlarga yordam berishga yo‘naltirilgan. Ijtimoy himoya qilish tizimi (rasman yordamga muhtoj oilalarga vaqtincha ko‘mak deb nomalanadi) ayrim nochor oilalarga katta bo‘lmagan daromadni ta’minlab beradi. Undan tashqari, oziq-ovqat talonlari dasturi kam daromadli kishilarga oziq-ovqat mahsulotlarini xarid qilishni subsidiyalaydi, shuningdek, turli xil uy-joy bilan ta’minlash davlat dasturlari ularni yashash joylari bilan ta’minlab beradi. Qashshoqlikka qarshi kurashishga yo‘naltirilgan ushbu dasturlar moliyaviy jihatdan barqaror bo‘lgan oilalar tomonidan to‘lanadigan soliqlar hisobiga moliyalashtiriladi.
Iqtisodchilar qashshoqlikka qarshi kurashishda davlatning tutgan roli borasida o‘zaro hamfikr emaslar. Biz mazkur masalani 20-bobda atroflicha o‘rganib chiqishimizga qaramasdan, hozir muhim bir jihatga e’tibor qaratamiz: qashshoqlikka qarshi kurashish tarafdorlari ushbu kurashishni ommaviy mahsulot hisoblashadi. Hatto, barcha qashshoqlik mavjud bo‘lmagan jamiyatda yashashni xohlasa-da, qashshoqlikka qarshi kurashish umuman olganda “yaxshi” tadbir emas, sababi bu masalalar shaxsiy tartibda amalga oshirilishi zarur.
Qashshoqlikni bartaraf etish maqsadida, aytaylik, kimdur boy kishilar jamiyatini tashkil etdi. Ular ommaviy mahsulotlar taqdim etishadi. Bu iste’molda cheklangan mahsulot bo‘lmaydi: biror kishini qashshoqlik mavjud bo‘lmagan jamiyatda yashashi boshqa bir kishini ana shu jamiyatda yashashiga to‘sqinlik qilmaydi. Bu iste’moldan mahrum qilish xususiyatiga ham ega bo‘lmaydi: qashshoqlik bartaraf etilgandan so‘ng kimdur, hech kim bundan mahrum etilmaydi.
Natijada, “tekinxo‘rlar” qashshoqlikka qarshi kurashishda ishtirok etmasdan turib qashshoqlik mavjud bo‘lmagan sharoitda yashash imkoniyatiga ega bo‘lishadi.
“Tekinxo‘rlar” muammosi tufayli qashshoqlikni xususiy homiylik yordamlari hisobidan bartaraf etish, turgan gapki, mumkin emas. Shu bilan birga, davlatning aralashuvi ushbu masalani hal etishi mumkin. Nochorlarning hayot tarzini ko‘tarishni ko‘zlab boylarni soliqqa tortish hammasini yaxshilashi mumkin. Nochorlar baxtli – sababi ular yaxshi hayot tarziga ega bo‘lishayapti, boylar baxtli – sababi ular qashshoqlar nisbatan kam bo‘lgan jamiyatda yashashni yaxshi ko‘rishadi.
Keys. Mayoqlar ommaviy mahsulotmi?
Ba’zi bir mahsulotlar sharoitga qarab ommaviy mahsulotdan shaxsiy mahsulotga aylanishi mumkin. Masalan, agar mushakbozlik aholisi ko‘p bo‘lgan shaharda o‘tkazilsa u ommaviy mahsulotdir. Shu bilan birga, bu tadbir Walt Disney World kabi shaxsiy ko‘ngilochar xiyobonlarda o‘tkazilsa, mushakbozlik xxususiy mahsulotga ko‘proq to‘g`ri keladi, sababi xiyobonga kirish uchun alohida to‘lov amalga oshiriladi.
Boshqa bir misol sifatida mayoqni ko‘rishimiz mumkin. Iqtisodchilar anchadan beri mayoqlarni ommaviy mahsulot namunasi sifatida ishlatib kelishayapti. Mayoqlar dengizda ma’lum bir hududlarni yoritib beradi va ular yordamida suv kemalari begona suv hududlaridan xalos bo‘lishadi. Mayoqlarning kema kapitaniga beradigan foydasi iste’moldan mahrum qilish xususiyatiga ham cheklanganlik xususiyatiga ham ega emas, shuning uchun ham har bir kapitan mayoqlardan yo‘l yorituvchi vosita sifatida foydalanib ularga haq to‘lamasdan mustaqil harakat qilishlari mumkin. “Tekinxo‘rlar” muammosi tufayli, xususiy bozorlar kapitanlarni ular uchun zarur bo‘lgan mayoqlar bilan ta’minlab bera olishmaydi. Aynan shu sababli hozirda ko‘pchilik mayoqlar davlat nazoratida bo‘lib qolmoqda.
Shu bilan birga, ayrim holatlarda mayoqlar xususiy mahsulotlarga yaqin bo‘lishadi. XIX asrda Angliya qirg`oqlarida, masalan, bir qator mayoqlar xususiy mulk sifatida boshqarib kelingan. Mayoqlardan foydalanish uchun kema kapitanlari emas, balki yaqin atrofdagi port egalari haq to‘lashgan. Agarda port egalari mayoq uchun haq to‘lashmasa, mayoq egalari uni o‘chirib qo‘yishgan va kemalar, turgan gapki, bu portda to‘xtamasdan o‘tishgan.
U yoki bu mahsulot ommaviy mahsulotga mansub ekanligini aniqlashda, avvalo uning egasi kim ekanligiga va ushbu benefitsiarlar iste’moldan mahrum qilish xususiyatiga ega yoki yo‘qligiga e’tibor qaratish zarur. Qachonki mahsulot iste’molchilari soni ko‘p va ulardan u yoki bunisini ajratish imkoni bo‘lmasa “tekinxo‘rlar” muammosi yuzaga keladi. Agar mayoq bir qancha kapitanlarga xizmat ko‘rsatsa bu ommaviy mahsulot, va shu bilan birga u birgina port egasiga xizmat ko‘rsatsa, xususiy mahsulot hisoblanadi.
Harajatlar va daromadlarni tahlil qilishning murakkab jihati
Shu vaqtgacha biz ko‘rib chiqdikki, xususiy bozorlar samarali miqdorda ta’minlay olmaganligi sababli ommaviy mahsulotlarni davlat ta’minlab beradi. Shu bilan birga, davlat faqatgina birinchi qadamni qo‘yish funksiyasini bajarishi ham mumkin. Keyinchalik esa davlat qaysi ommaviy mahsulotlarni qancha hajmda yetkazib berish kerakligini ko‘rsatib berishi zarur.
Aytaylik, davlat yangi shosseni qurish loyihasini – ommaviy mahsulotni (xizmatni) ko‘rib chiqayapti. Shosse qurilishi to‘g`risida yakuniy xulosaga kelishdan oldin, davlat, shosseni unga ketadigan harajatlar va keyinchalik uning faoliyatini ta’minlash harajatlari bilan ishlatishi mumkin bo‘lganlardan kelib tushuvchi foydani ko‘rib chiqishi lozim. Bu qarorga kelishdan oldin davlat, harajatlar va daromadlarni tahlil qilish deb nomlanuvchi jamiyatga ushbu tovar yalpi foydasini aniqlab beradigan tadqiqotni olib borish uchun iqtisodchilar va injenerlar komandasini jalb qilishi mumkin.
Harajatlar va daromadlar tahlili o‘ziga xos murakkab jarayon. Shosse kelgusida barcha uchun bepul foydalanishga mo‘ljallanganligi sababli uning qiymatini (yoki foydalilik darajasini) aniqlovchi narx mavjud emas.
Kishilardan shunchaki ular shosseni qanchaga baholashlarini so‘rash ishonchli emas, anketalash ham samarali usul emas, sababi so‘rovda qatnashuvchilar haqiqiy bahoni berish uchun moddiy rag`batga ega bo‘lmaydilar. Shossedan kelajakda foydalanishi mumkin bo‘lganlarda uni daromadlilik darajasini oshirishga ko‘proq rag`bat bor. Shosseni qurilishidan zarar ko‘rishi mumkin bo‘lganlarda esa shosse qurilishiga ketadigan harajatlarni oshirib ko‘rsatishga va uning qurilishini to‘xtatishga rag`bat mavjud.
Ommaviy mahsulot (xizmat) larni samarali tarzda taqdim etish, o‘z o‘zidan, xususiy mahsulot (xizmat) larni taqdim etishga qaraganda bir muncha mushkulroq. Xususiy mahsulot xaridorlari bozorga chiqishganda ular o‘zlari to‘lay olishi mumkin bo‘lgan narxga qarab fikr yuritishadi. Shu bilan birga sotuvchilar o‘z harajatlarini o‘zlari qabul qilishlari mumkin bo‘lgan narx yordamida ko‘rsatishadi. Muvozanat nuqtasi esa resurslarni samarali taqsimlash nuqtasi bo‘lib, u barcha ma’lumotlarni o‘zida aks ettiradi. Ommaviy mahsulotlarda, bundan farqli o‘laroq, harajatlar va daromadlar tahlilchilari davlat ommaviy mahsulotlarni qanday va qancha miqdorda ta’minlashi bo‘yicha hech qanday baho signallariga ega bo‘lishmaydi. Ularning harajatlar va daromadlar to‘risidagi xulosalari, nari borsa, eng yaxshi taxminiy xulosalar, xolos.
Keys stadi. HAYOT QIYMATI QANCHA?
Tasavvur qiling, siz xalq deputatlari mahalliy kengashiga a’zo sifatida saylandingiz. Shahar injeneri yoningizga shunday bir taklif bilan keldi: shahar 10 000 so‘m sarflab, hozirda faqat STOP belgisi qo‘yilgan markaziy ko‘chadagi chorrahada svetofor o‘rnatishi va uni keyinchalik boshqarishi mumkin. Svetoforning ustun jihati - harakat havfsizligi oshiriladi. Injenerni ilgarigi shunga o‘xshash chorrahalardagi loyihalar tahlili asosidagi bahosiga ko‘ra, svetofor faoliya muddati davomida o‘lim bilan tugaydigan yo‘l-harakati hodisalari darajasini 1,6 foizdan 1.1 foizgacha tushiradi. Siz bunga mablag` sarflaysizmi?
Ushbu savolga javob topish uchun siz harajatlar va daromadlar tahliliga murojaat etishingizga to‘ri keladi. Biroq siz darhol o‘ziga xos qarshilikka duch kelasiz: agar siz foydalilik darajasini hisoblamoqchi bo‘lsangiz, harajatlar va daromadlar bir xil kattaliklarda (o‘lchovlarda) hisoblanishi lozim. Qiymat pul birligida (so‘mda) o‘lchanadi, biroq svetofordan keladigan foyda inson hayotini saqlab qolish pul birligida o‘lchanmaydi. Qabul qilinishi lozim bo‘lgan qarorni aniqlash uchun siz so‘mning inson hayotidagi o‘lchamini aniqlashingiz zarur bo‘ladi.
Dastavval siz inson hayoti bebaho, deb o‘ylashni hohlashingiz mumkin, qolaversa, siz o‘zingiz yoki biror sevimli kishingizning hayoti uchun o‘z hohishingiz bilan sarflashingiz mumkin bo‘lgan pulning qiymati yo‘q. Bu shundan dalolat beradiki, inson hayoti pulda (so‘mda) qiymatga ega emas.
Biroq bu javob harajatlar va daromadlar tahlili uchun o‘ta mavhumdir. Agar biz rostdan ham inson hayoti uchun cheksiz qiymatliklarni sarflamoqchi bo‘lsak, u holda har bir ko‘cha burchagida svetor o‘rnatib chiqishimiz va barcha yangi yirik yuk avtomashinalariga eng so‘nggi havfsizlik funksiyalarini joylashtirishimiz lozim bo‘ladi.
Ustiga ustak, svetoforlar har bir burchakda emas va kishilar ko‘p holatlarda xavfsizlik yostiqchasi yoki tormoz tizimining bloklanishiga qarshi mexanizmga ega bo‘lmagan, qimmat bo‘lmagan avtomobillarga haq to‘lashni afzal ko‘rishadi. Ommaviy yoki xususiy mahsulotlar to‘g`risidagi har ikki qarorda ham ko‘proq iqtisod qilish maqsadida hayotimiz bilan tavakkal qilishga tayyor bo‘lamiz.
Inson hayoti so‘mdagi ekvivalentga ega emas, degan qarorni qabul qilgandan so‘ng qanday qilib bu qiymatni aniqlab olishimiz mumkin?
O‘lim to‘g`risida da’vo qilgan taraf harajatlarini qoplab berish maqsadida “agar vafot etgan shaxs tirik bo‘lganda qancha mablag` ishlab topishi mumkinligini aniqlash” usuli sudlar tomonidan qo‘llanilib kelinadi. Iqtisodchilar bu usulni ko‘p holatlarda tanqid qilishadi, sababi bu usul hayotni yo‘qotishning boshqa qiymatliklarini e’tiborga olmaydi. Shunday qilib, bu usul g`alati ko‘rsastkichni o‘zida aks ettiradi, go‘yoki nogiron yoki pensionerning hayoti hech qanday qiymatga ega emasdek.
Inson hayotini baholashning eng yaxshi usuli bu – inson o‘z hayotini yo‘qotish uchun mavjud bo‘lgan tavakkalchilik va bunga to‘lanishi lozim bo‘lgan haq miqdorini bilishdir. O‘lish tavakkalchiligi, masalan, ish joyiga qarab baholanadi. Osmono‘par binolardagi quruvchilar o‘z ish joylarida ofis ishchilariga qaraganda ko‘proq tavakkalchilikka duch keladilar. Iqtisodchilar ko‘proq va kamroq tavakkalchililik darajasi, ta’lim sifati, tajriba va boshqa ish haqini belgilab beruvchi faktorlarga qarab kishilar o‘z hayotlarini qanchaga baholashlari mumkinligi haqida ba’zi bir tushunchalarga, ega bo‘lishlari mumkin. Ushbu usulni qo‘llab o‘tkazilgan tadqiqotlarga ko‘ra inson hayoti qiymati 10 million so‘mga baholanishi to‘g`risida xulosaga kelingan.
Endi biz, yuqorida keltirib o‘tilgan misolimizga qaytib shahar injenerining taklifiga munosabat bildirishimiz mumkin. Svetofor inson hayotini saqlab qolish tavakkalchiligi darajasini 0,5 foizgagina yaxshilaydi. Shunday qilib, svetovor o‘rnatilishidan kutilishi mumkin bo‘lgan foyda 50 000 so‘m (yoki 0,005*10 million so‘m) ni tashkil etadi. Bu ko‘rsatkich loyiha xarajati bo‘lgan 10 000 so‘mdan bir muncha ko‘p, demak siz loyihani tasdiqlashingiz mumkin.
15.3. Umumiy resurslar.
Umumiy resurslar, xuddi ommaviy mahsulotlar kabi iste’moldan mahrum qilinish xususiyatiga ega emas: ular iste’mol qiluvchilar uchun mavjud va bepul. Shu bilan birga umumiy resurslar cheklanganlik xususiyatiga ega: biror kishining umumiy resurslarni iste’mol qilishi boshqa bir kishining ularni iste’mol qilish imkoniyatlarini pasaytirib yuboradi.
Shunday qilib, umumiy resurslar yangi muammolarni keltirib chiqaradi. Atroflicha o‘rganib chiqilgandan so‘ng siyosatchilar umumiy resurslarni qanday hajmda iste’mol qilinayotganligi haqida qayg`urishlari lozim. Bu masalani Umummilliy resurslar fojeasi hikoyasidan to‘liqroq anglash mumkin.
Umummilliy resurslar fojeasi.
O‘rta asrlardagi kichik bir shaharcha hayotini ko‘rib chiqamiz. Shaharchada mavjud ko‘pgina iqtisodiy faoliyat turlaridan eng muhimlaridan biri - bu qo‘y yetishtirish edi. Shahardagi ko‘pgina oilalar qo‘ylarni yetishtiruvchi xo‘jalikka (fermalarga) ega edilar, ular qo‘ylarning yunglarini keyinchalik kiyim-kechak sifatida ishlatish uchun sotishar edi.
Bizning hikoyamiz boshlangan vaqtda qo‘ylar ko‘pgina vaqtlarini shaharni qamrab olgan Umumiy Maydon deb nomlanuvchi umumiy yerlarda (yaylovlarda) yotib o‘tkazishar edi. Shaharda hech bir oila o‘zining shaxsiy er maydoniga ega emas edi. Buning o‘rniga aholi kollektiv (jamoa) er maydonlariga (yaylovlariga) ega bo‘lib, o‘z qo‘ylarini mazkur erlarda boqishar edi. Kollektiv (jamoa) mulki yaxshi samara beradi, chunki erlar yaxshi ko‘rinishda saqlanadi. Kishilar o‘zlari uchun shaxsiy er maydonlarini ajratib olgunlariga qadar Umumiy Maydon iste’moldan cheklanmagan xususiyatga ega edi va kishilarni qo‘y yetishtirishlarida hech qanday to‘siqlar mavjud emas, bir so‘z bilan aytganda hamma baxtli edi.
Yillar o‘tishi bilan shaharcha aholisi soni ham unga baravar ravishda Umumiy Maydonda boqilayotgan qo‘ylar soni ham ortib borar edi. Yer maydonining o‘zgarmas hajmida qo‘ylar sonining ortib borishi yerning o‘zini o‘zi qayta tiklash qobiliyatini kamaytirib borar edi. Oxir oqibat yerni tarkibi shu darajada yomonlashib ketdiki natijada u o‘zining hosildorlik darajasini butkul yo‘qotdi.
Ekinlarsiz Umumiy Maydonda qo‘ylarni etishtirish imkonsiz va qachonlardir rivoj topgan yung etishtirish sanoati o‘z o‘zidan yo‘qolib boradi. Ko‘pgina oilalar o‘zini o‘zi ta’minlash uchun daromad manbalarini yo‘qotishadi. Xo‘sh, ushbu muammoning yuzaga kelish sabablari nima? Nega cho‘ponlar qo‘ylar sonini Umumiy Maydonni ishdan chiqarish darajasigacha o‘sishiga yo‘l qo‘yishdi? Muammo shundaki, ommaviy va xususiy rag`batlar (manfaatlar) tubdan farq qiladi.
Hosildor erlar sifatini saqlab qolish cho‘ponlarning birgalikdagi jamoaviy harakatlariga bog`liq. Agar cho‘ponlar birgalikda harakat qilishganida edi, ular qo‘ylar sonini Umumiy Maydon quvvati yetadigan darajada saqlab qolishlari mumkin edi. Biror bir oila uning qo‘ylari sonini kamaytirishdan manfaatdor emas, lekin har bir qo‘ylar guruhi aslida umumiy muammoning alohida bir bo‘lagi hisoblanadi.
Aslini olganda, umummilliy resurslar fojeasi tashqi ta’sirlarni o‘rganmaganlikdan kelib chiqadi. Bir oilaning qo‘ylari umumiy maydonda boqilganda bu o‘z o‘zidan ikkinchi bir oila qo‘y boqishi mumkin bo‘lgan er maydoni sifatini yomonlashtiradi. Kishilar yaylovda qancha qo‘y boqish mumkinligini aniqlashayotganda bu kabi tashqi masalalarga befarqlik bilan yondoshishadi, natijada qo‘ylarning umumiy soni haddan ziyod ortib ketadi.
Agar muammo ilgariroq ko‘rib chiqilganda, shahar aholisi buning yechimini turli usullar bilan topgan bo‘lar edi. Buni har bir oiladagi qo‘ylar sonini cheklash, ularning ma’lum bir soni uchun soliq joriy etish yoki qo‘ylarning ma’lum bir sonini boqish huquqini auksion savdolarida sotish kabi usullar bilan tartibga solish mumkin edi. Ya’ni o‘rta asrlardagi shahar qo‘ylar sonining haddan ziyod ortib ketishi muammosini zamonaviy jamiyat atrof-muhitni ifloslanishiga qarshi kurashayotgan usullar orqali bartaraf etishi mumkin edi.
Buning ustiga er bilan bog`liq holat uchun yana ham soddaroq usullar mavjud: shahar er maydonini barcha oilalarga teng bo‘lib berishi mumkin edi. Har bir oila o‘z er maydonini to‘siqlar bilan chegaralashi, keyinchalik uni chorva sonining haddan ziyod ko‘p bo‘lishidan himoyalashi mumkin edi. Shunday qilib, er umummilliy resurs emas, balki xususiy mulkka aylana boshlaydi. Bu narsa aslida XVII asrda Angliyada o‘rab olish vaqtida yuz berdi ham.
Umummilliy resurslar fojeasi umumiy saboqqa ega: qachonki biror kishi umumiy resursdan foydalanganda, u albatta boshqalarning undan foydalanish imkoniyatlarini kamaytiradi. Aynan mana shu salbiy samara tufayli umummilliy resurslardan ehtiyotsizlik bilan foydalaniladi. Davlat umummilliy resurslar iste’molini kamaytirish maqsadida ushbu muammoni tartibga solish choralari yoki soliqlar orqali hal etishi mumkin. Boshqa tarafdan olib qaralganda, davlat gohida umummilliy resursni xususiy mulkka aylantirishi ham mumkin.
Bu hikoya (dars) ming yillar davomida barchaga saboq bo‘ldi. Qadimgi grek faylasufi Aristotel umummilliy resurslar haqida shunday degan: “Barcha uchun birdek mavjud bo‘lgan ne’matlarga odatda kamroq e’tibor beriladi, sababi kishilar o‘zining shaxsiy buyumlariga boshqalar bilan birgalikda egalik qilayotgan buyumlariga qaraganda ko‘proq hurmat bajo keltirishadi”.
Ayrim muhim umumiy resurslar
Umumiy resurslardan foydalanishning ko‘pgina misollari mavjud. Deyarli barcha holatlarda umummilliy resurslar fojeasidagi kabi muammo yuzaga keladi. Alohida shaxslar umumiy resurslardan haddan ziyod ko‘p foydalanishadi. Davlat, aksariyat hollarda, haddan ziyod ko‘p foydalanish muammosini yengillashtirish maqsadida ularning xulq-atvorlarini tartibga soladi yoki turli yig`imlar joriy etadi.
Toza havo va suv. Biz 10-bobda ta’kidlab o‘tganimizdek, bozorlar atrof-muhitni oqilona himoya qilishmaydi. Qat’iy tartibga solish choralari yoki atrof-muhitni ifloslantirganlik uchun soliqlar bilan bartaraf etilishi mumkin bo‘lgan ifloslanish salbiy tashqi ta’sir hisoblanadi. Bozorning ushbu salbiy jihatini jamiyatning umumiy muammosi sifatida ko‘rish mumkin. Toza havo va toza suv huddi ochiq hosildor yerlar, atrof-muhitning haddan ziyod ifloslanishi esa huddi chorvaning haddan ziyod ortib ketishi kabi umumiy resurslardir. Atrof-muhitning haddan ziyod ifloslanishi umummilliy resurslar fojeasining zamonaviy ko‘rinishidir.

Blumberg rejasi

Ko`pchilik iqtisodchilar yo`l harakatini tartibga solish mexanizmi sifatida yo`l narxini yoqlab chiqishdi. Yaqinda ular Nyu York Shahar merini bunga ko`ndirishdi.

Tirband avtomobil yo‘llari. Yo‘llar yoki ommaviy mahsulot yoki umumiy resurs bo‘lishi mumkin. Agar yo‘llar tirband bo‘lmasa, u holda bir kishining undan foydalanishi boshqa bir kishining foydalanishiga halaqit qilmaydi. Bu holatda mahsulot iste’molda cheklanganlik xususiyatiga ega bo‘lmaydi va yo‘l ommaviy mahsulot bo‘lib qoladi. Shu bilan birga, agar yo‘llar tirband bo‘lsa, u holda bu yo‘ldan foydalanish salbiy tashqi ta’sirni beradi. Agar biror kishi ushbu yo‘ldan yursa, yo‘l yana ham tor bo‘lib, boshqa kishilarni sekinroq yurishga majbur etadi. Bu holatda yo‘l umumiy resurs hisoblanadi.

Davlat tomonidan yo‘llarda avtomobillar tirbandligi muammosini bartaraf etish yo‘llaridan biri bu haydovchilarga shaharlararo transport qatnovlariga soliq solish. Shaharlararo transport qatnovlariga soliq solish o‘z mohiyatiga ko‘ra, tirbandlikni tartibga soluvchi soliqdir. Ba’zida, xuddi mahalliy yo‘llarda bo‘lgani kabi, qatnovlar uchun soliq solish amaliy yechim bo‘lmay qoladi, sababi soliq summasi juda yuqoridir. Biroq, London shahri to‘lov hajmini oshirish usulini tirbandlikni bartaraf etishdgi eng muhim usul deb topdi. Yangiliklarda ma’lum qilinishicha, bu usul Nyu-York shahri uchun ham ko‘rib chiqilmoqda.
Gohida tirbandlik kunning ma’lum bir qismidagina muammo bo‘lib qoladi. Agar ko‘prikda yuk avtomobili tig`iz-paytda o‘tayotgan bo‘lsa, tirbandlik muammosi faqatgina mana shu soatdagina yuzaga keladi. Ushbu masalaning samarali yechimi shuki – tig`iz paytda yurganlik uchun to‘lovni yana ham oshirish zarur. Bu narsa haydovchilarni o‘zlarining harakatlanish grafiklarini o‘zgartirib, tig`iz paytda yurmasliklari uchun o‘ziga hos stimul bo‘ladi.
O‘tgan bobda muhokama qilingan tirbandlik muammosiga qarshi kurashuvchi usullardan yana biri - bu benzin uchun soliq. Benzin, ma’lumki avtomobilda harakatlanish uchun samarali yoqilg`i hisoblanadi: benzin narxini oshirish, odatda harakat hajmini kamaytirishni talab etadi. Shunday qilib, benzin uchun soliq yo‘llarning tirbandlik darajasini kamaytiradi. Shu bilan birga, benzin uchun soliq mutloq yechim emas, sababi bu yo‘llarda harakatlar hajmidan tashqari boshqa masalalarga ham ta’sir ko‘rsatadi. Masalan, benzin uchun soliq tirbandlik qayd etilmagan yo‘llarda ham harakatlar sonini kamaytirib yuboradi.
Baliq, kit va boshqa yovvoyi jonivorlar. Ba’zi bir tur jonivorlar umumiy resurs hisoblanadi. Masalan baliq va kit tijorat qiymatiga ega va har qanday kishi okeanga borib, u yerda mavjud bo‘lgan hamma narsani tutib olishi mumkin. Har kishi jonivorlar turlarini keyingi yilga ham saqlab qo‘yishga kam rag`bat his qilishadi. Xuddi chorva yetishtirishning haddan ziyod ko‘p soni Umumiy Maydonni barbod qilganidek, haddan ziyod ko‘p baliq va kit ovlanishi dengiz jonivorlari ko‘payishining tijorat maqsadlariga putur yetkazishi mumkin.
Okean eng kam tartibga solinuvchi umumiy resurs bo‘lib qolmoqda. Ikki muammo oddiy yechimga ega. Birinchidan, okeanga ko‘pgina davlatlar chiqish yo‘llariga ega, shuning uchun har qanday yechim turli xil ma’no kasb etadigan xalqaro darajadagi hamkorlikni talab etadi. Ikkinchidan, okeanlar shu darajada yirikki, har qanday kelishuvni to‘la qonli amalga oshirish juda qiyin. Natijada, baliq ovlash hatto odatda do‘st mamlakatlar orasida ham o‘ziga xos nizolarga sabab bo‘lib qoladi.
AQShda baliq va boshqa yovvoyi jonivorlarni himoya qilishga qaratilgan turli xil qonunlar mavjud. Masalan, baliq tutish va ovchilik bilan shug`ullanish huquqini beruvchi litsenziya davlat harajatlari baliqchilik va ovchilik muddatining kamayishiga sabab bo‘ladi. Baliqchilardan ko‘p holatlarda kichik baliqlarni tashlab yuborishni va ovchilardan faqat alohida jonivorlarni o‘ldirishni talab qilishadi. Barcha bu kabi qonunlar umumiy resurslardan foydalanishni bekor qiladi va jonivorlarning ko‘payishiga xizmat qiladi.
Keys stadi. Nega sigirlar qirilib ketmadi?
Butun dunyo tarixida ko‘pgina jonivorlar turlari qirilib ketish havfi ostida bo‘lishgan. Evropaliklar ilk marta Shimoliy Amerikaga qadam qo‘yishganida, 60 milliondan ortiq bizon (qo‘tos) lar qit’adan ko‘chib ketishga majbur bo‘lishgan. Undan tashqari, qo‘toslarni ovlash XIX asrda shu darajada mashhur bo‘lganki, 1900-yillarga kelib, ya’ni davlatlar ularni himoya qilishga kirishishlaridan oldin jonivorlar soni 400 tagacha qisqarib ketgan.
Ba’zi bir Afrika mamlakatlarida fillar xuddi shu kabi muammoga duch kelmoqda, brakonerlar jonivorlarni ularning suyaklari va tishlari uchun o‘ldirishmoqda.
Shu bilan birga, barcha jonivorlar ham bu muammoga duch kelishganlari yo‘q. Masalan, sigirlar qimmatli oziq-ovqat manbai hisoblanishadi, lekin hech kim sigirlarni yaqin orada qirilib ketadi deb hisoblamaydi. Amalda, mol go‘shtiga bo‘lgan katta talab ushbu jonivor turining saqlanib qolishiga o‘ziga xos kafolat.
Nega fil suyagiga bo‘lgan katta ehtiyoj fillarning qirilib ketishi uchun xavf bo‘lishi mumkinu, ammo mol go‘shtiga bo‘lgan ehtiyoj sigirlar saqlab qolinishiga kafolat manbai? Sababi shundaki, fillar aksariyat hollarda umumiy resurs hisoblanishadi, sigirlar bo‘lsa xususiy mulk obyektidir.
Fillar qarovsiz holatda erkin ko‘chib yurishadi. Har qanday brakoner o‘zi topishi mumkin bo‘lgan fillardan imkon qadar ko‘prog`ini o‘ldirishga intiladi. Brakonerlar juda ko‘p va ular fillarni saqlanib qolishi va tarqalishidan deyarli hech qanday manfaat ko‘rishmaydi.
Bundan farqli o‘laroq, chorva mollari xususiy mulk bo‘lgan fermalarda saqlanadi. Ferma egalari chorva sonining imkon qadar ko‘payishidan manfaatdor, sababi ular daromad manbaidir.
Dunyo davlatlari hukumatlari fillar saqlab qolishni ikki xil usul bilan amalga oshirishga urinib ko‘rishishdi. Keniya, Tanzaniya va Uganda kabi davlatlarda fillarni o‘ldirish va ularning suyagini sotishni noqonuniy faoliyat deb belgilab qo‘yishdi. Biroq bu qonunlarni amalga oshirish qiyin kechdi va muammo aktual ko‘rinishda saqlanib qoldi.
Botsvana, Malavi, Namibiya va Zimbabve kabi davlatlar esa fillarni xususiy mulk sifatida kishilarga taqsimlab berishdi va faqatgina mulk egalariga ularni o‘ldirishga ruxsat berishdi. Er egalarida endilikda fillarni saqlab qolishga rag`bat paydo bo‘ldi va fillar soni ko‘paya boshladi. Xususiy mulk va uning ortidagi daromad olish maqsadi sabab Afrika fillari yaqin orada xuddi sigirlar kabi qirilib ketish muammosidan xalos bo‘lishadi.
X U L O S A
1. Mahsulotlar iste’moldan mahrum qilinish va iste’molda cheklanganlik xususiyatlariga ko‘ra farq qiladi. Agar biror kishini tovarning iste’molidan to‘xtatish (mahrum qilish) mumkin bo‘lsa u mahsulot mahrum qilinish xususiyatiga va bir kishining iste’moli boshqa kishilarning aynan o‘sha mahsulotni iste’mol qilish qobiliyatlarini kamaytirsa, u holda mahsulot cheklanganlik xususiyatiga ega bo‘ladi. Bozorlar iste’moldan mahrum qilinish va iste’molda cheklanganlik xususiyatlariga ega bo‘lgan xususiy mulk uchun yaxshi ishlashadi. Boshqa ko‘rinishdagi mahsulotlar uchun yaxshi samarali ishlamaydi.
2. Ommaviy mahsulotlar iste’moldan mahrum qilinish va cheklanganlik xususiyatiga ham ega emas. Ommaviy mahsulotlarga misol qilib mushakbozlikni, milliy mudofaa tizimini va ilmiy tadqiqotlarni keltirish mumkin. Sababi kishilar ulardan foydalanganlik uchun haq to‘lashmaydi, biroq ular xususiy mulk qo‘liga o‘tsa ularda erkin harakat uchun rag`bat mavjud bo‘ladi. Shuning uchun ham davlat harajatlar va daromadlar tahlili asosida xulosa qilgan holda ommaviy mahsulotlarni taqdim etadi.
3. Umumiy resurslar iste’molda cheklanganlik xususiyatiga ega, biroq iste’moldan mahrum qilinish xususiyatiga ega emas. Bunga misol sifatida yaylovlarni, toza havoni va tirband yo‘llarni keltirish mumkin. Kishilar ulardan foydalanganlik uchun haq to‘lashmasa, ular odatda mazkur mahsulotlardan haddan ziyod va samarasiz foydalanishadi. Shunday qilib, davlat umumiy resurslardan foydalanishni cheklash uchun turli xil usullarni qo‘llaydi.


http://fayllar.org