2 – Leksiya. Sherebe tazalaw bo’liminin’ teoriyaliq tiykarlari ha’m texnologiуаliq esaрlari

Qızdırılǵan tazalanǵan sherebeniń hám hálsiz eritpeniń basım payyda etiwshi bachokları. 25-Súwrettegi 6 hám 7-bachoklar, sarplanıw regulyatorına kelip túsiwshi suyıqlıqtıń turaqlı basımın payda etiw ushın arnalǵan. Olar vertikal cilindr tárizli polat ıdıs kórinisinde bolıp, ishinde suyıqlıq qáddiniń qalqıtpa regulyatorı bar. Qalqı, suyıqlıq júriwshi liniyaǵa ornatılǵan droselli zadvijka menen baylanısqan. Ishindegi suyıqlıqtıń ornatılǵan qáddine baylanıslı joqarıǵa qalqıp shıǵıp yamasa tómenge túsip, qalqı, trubadaǵı zadvijkanı ashadı yamasa jawadı, basım payda etiwshi bachokqa suyıqlıqtıń quyılıwın azaytadı yamasa kóbeytedi, usılayınsha suyıqlıqtıń qáddin turaqlı uslaydı.
Soda eritpesin, qızdırılǵan tazalanǵan sherebeni hám hálsiz suyıqlıqtı (kondensattı) jetkerip beriliwiniń regulyatorı tuwrı múyeshli polat yachik kórinisinde boladı, ol vertikal aralıq diywalı belgili keńliktegi vertikal sańlaqqa iye eki bólimge bólingen. Sańlaq arqalı suyıqlıqtıń sarplanıwı suyıqlıq kelip túsiwshi bólimindegi suyıqlıqtıń qáddine baylanıslı. Sarplanıw ólshegishtegi suyıqlıqtıń qáddi qoldan yamasa avtomat tárizde trubaprovodtaǵı krannıń halatın ózgertiw jolı menen qáliplestiriledi.
Hálsiz hák súti ushın aralastırıw nawası 15 (25-súwretke qarań) – gorizontal ornatılǵan polat karobka, onıń ishinde 15 ayl/min tezlikte párrikli bılgawısh aylanadı.
Tazalanbaǵan sherebeni reagentler yamasa kaustifikaciyalanǵan soda eritpesi menen aralastırǵısh (25-súwretke qarań) 11 tuwrı múyeshli uzınlıǵı 3500 mm, eni 400 mm hám biyikligi 500 mm paydalı kólemi 0,64 m³ bolǵan nawa kórinisinde boladı. Jaqsı aralastırıwı ushın reagentler hám tazalanbaǵan sherebe aralastırǵıshqa bir-birine salıstırǵanda 90º múyesh astında beriledi. Suyıqlıqtıń aralastırǵıshta bolıw waqtı 5 sek. tan aspaydı.
Reaktor (29-súwret) tazalanbaǵan sherebe hám reagentler arasındaǵı reakciyanı ótkeriw ushın xızmet qıladı, ol polattan jasalǵan ultanı konus tárizli cilindrlik ıdıs 1 kórinisinde boladı, úskeneniń ulıwma biyikligi 10,6 m, cilindrlik bóliminiń biyikligi 6,5 m, cilindrlik bóliminiń diametri 5 m, kólemi 155 m³. Reagentler menen aralastırılǵan tazalanbaǵan sherebe reaktorǵa uzınlıǵı 2,4 m hám diametri 220 m bolǵan kirgiziw trubası 3 arqalı kelip túsedi. Reaktordaǵı suyıqlıqtıń qáddi qalqıma regulyator 2 menen tártiplestiriledi. Qalqıma regulyator 2, suyıqlıq tındırǵıshqa aǵıp ketiwshi, trubaprovodqa ornatılǵan drosselli zadvijkaǵa 4 biriktirilgen (baylanısqan). Qalqlılı regulyator suspenziya qáddin ózgertiw imkanın beredi, demek suspenziyanıń reaktorda bolıw waqtında ózgertiwge sharayat jaratadı. Házirgi waqıtta qalqıma regulyatorlar gidrostatikalıq qáddi ólshew úskeneleri menen almastırılǵan, óytkeni sherebe tazalaw sharayatında qalqıma regulyatorǵa duz shókpesi ósedi hám iske jaramsız bolıp qaladı.