Yaradıcı şöbə - mətnçiləri, rəssamları, ixtisaslı – qrafikləri, rejissorları, redaktorları və s. yaradıcı işçiləri özündə birləşdirir. Bunlar birlikdə reklam müraciətinin ideyasının ən mühümünü və onun realizasiyasının daha düzgün vasitəsini tapıb həyata keçirirlər. Onlar reklam münasibətlərini öyrənirlər və ona uyğun olaraq reklamın reallaşması üçün lazım olan vasitələri seçirlər.
D.Oqilvi bu şöbə haqqında belə yazır: “ Yaradıcı tərəf bütün tərəflərin əsasıdır. Bizim kontorun rəhbərləri yaradıcı işçilərin rolunu aşağı salmamalıdırlar. Əksinə, onlara görkəmli şəxsiyyət kimi hörmət edib onların qayğısına qalmalı və əmək haqqlarını yaxşı ödəməlıdirlər.” Yaradıcı şöbəni kreativ (yaradıcı) direktor idarə edir. Direktorun vəzifəsi reklam ideyalarını təhlil etmək, brendlərə xidmət göstərməsi üçün reklam strategiyalarının hazırlanması, reklam ideyasının reallaşması prosesində iştirak etmək və onu idarə etməkdən ibarətdir. Yaradıcı direktorla yaxın təmasda çalışanlardan biri də art direktordur. Art direktorun vəzifəsi reklam kampaniyasını dizayn baxımından tam təmin etməkdən ibarətdir.
