6-Mavzu: molxonalar gigienasi. Reja

Binolarning ayrim qismlariga bo‘lgan talab - qishloq xo‘jaligi binolarini kismlariga binoning asosi, poydevor, sokol, devor, pol, shift, tom usti, darvoza, deraza va boshqalar kiradi.

Bino asosi - chorvachilik qurilishlarining asosi bo‘lib, tabiiy tuproq er hisoblanadi. U mustahkam, bir xil tarkibli, emirilmaydigan, quruq bo‘lishi va bino tagi cho‘kishi 2 smdan oshmasligi kerak. Binolarning asosi muzlaydigan qismdan 20 - 25 sm pastda bo‘lishi, er osti suvlari esa kamida 3 m chuqurda bo‘lishi kerak. Tabiiy asoslarning sifatlisi qoyali va yirik sinadigan tuproqlar hisoblanadi. Suv yuvish havfi bo‘lmasa qumoq tuproqlar ham ishlatiladi. Loyqa tuproqlar muzlagan vaqtda ko‘pchiydi va erigandan keyin o‘tiradi, natijada binolar poydevori, devorlari yorilib, cho‘kishi mumkin.

Poydevor - binoning er osti qismi bo‘lib, uning hamma qismlarini ko‘taradi. Poydevor namlik, past harorat ta’sirida emirilmaydigan, mustahkam va uzoq muddat chidaydigan bo‘lishi kerak. Devor tagiga poydevor uzluksiz (lentasimon) perimetri bo‘yicha qo‘yiladi yoki alohida-alohida qurilib, xarsang toshlardan yoki g‘ishtdan teriladi. Hozirgi vaqtda mahalliy materiallar ham ishlatiladi. Poydevorning chuqurligi ko‘pchiydigan tuproq bo‘lsa 50 - 70 sm bo‘ladi.

Sokol - poydevorning ustki qismida bo‘lib, tuproqdan yuqorida turadi va uning ustiga devor tushadi. Devorni yog‘in-sochin va erning iamligidan saqlash uchun sokol va devor o‘rtalig‘iga nam o‘tkazmaydigan izolyasiyalar yotqiziladi (1,5 - 2 sm qalinlik qora qog‘oz, asfalt, bitum, polietilen va h.k.).

Devor - bu binolarning asosiy to‘sig‘i bo‘lib, u bino ustini ko‘tarib turadi. U molxonalarni tashqi muhit ta’sirlaridan saqlaydi, bino ichida harorat va namlik rejimini hamda oynalar orqali tabiiy yorug‘lik bilan ta’minlaydi. Devor etarli darajada mustahkam, yong‘inga chidamli, o‘rtacha og‘irlikda va arzon bo‘lishi kerak.

Molxonalarning devorlari gigiena tomondan yaxshi issiqlik saqlash xususiyatiga ega, issiqlik o‘tkazuvchanlik koeffitsienti past, termik qarshilik koeffitsienti yuqori, etarli issiqlikka chidamli va o‘rtacha havo o‘tkazadigan bo‘lishi kerak. Devorlarda kondensat hosil bo‘lishiga yo‘l qo‘yilmaydi. Tashqi harorat -30°C dan past bo‘lmagan hududlarda devorlarni namlikdan saqlaydigan material bilan qoplash lozim (rezina, bitum, polietilen va h.k.). Devor uchun qurilish materiallari iqlim sharoitiga qarab tanlanadi.

Shift - binolarning chordog‘ini bino ichidan ajratadigan qismi bo‘lib, ma’lum darajada molxonalarni issiq tutadi, harorat ia namlik rejimini me’yorda saqlashga yordam beradi. Janubiy hududlarda esa molxonalarni isib ketishidan saqlaydi. Tug‘ruqxona - profilaktoriyalarda, buzoqxona va ona cho‘chqalar saqlash joylarida shiftning bo‘lishi shart.

Molxonalarning shifti zoogigieia va qurilish talablariga qarab quyidagicha bo‘ladi: shiftlarni issiqlik o‘tkazuvchanlik koeffitsienti kam bo‘lishi (0,7-0,2 m²/c⁰/s kkal); quruq, suv o‘tkazmaydigan, havoni kam o‘tkazadigan, silliq, engil, mustahkam va yomon yonadigan materiallardan qilingani ma’qul. Shiftlarni muzlash va namlik shimishiga yo‘l qo‘ymaslik kerak. Qurilishda ko‘pincha taxtadan, shox - shabba ustiga to‘shalgan qamishdan shift qilinadi va tagidan suvaladi. Beton plita, temir beton va pishiq g‘ishtdan qilingan shiftlar gigiena talablariga javob bermaydi, chunki ular kondensata bilan qorishib qoladi. Bunday shiftlar mineral tolalar, penobeton, penosilikat va boshqalar yordamida isitiladi. Taxtadan yoki shox-shabbadan qilingan shiftlar ustidan issiqlikni yaxshi saqlashi uchun tol solinib, uning ustidan 5 - 6 sm qalinlikda mineral tolalar to‘shalib, chekkalari to‘sinlarga mahkamlanadi.

Issiqlik saqlaydigan qavatdan ventilyasiya kanali qilinadi. Bu bilan binodagi namlikni yo‘qotishga va isitgichlarni quruq saqlashga erishiladi. Usti birga yopilgan binolar har xil issiqlik saqlovchi materiallar bilan (mineral paxta, keramzit, penoplast, penopolistirol, fibrolit, qamish, bosilgan poxol va boshqalar) 15 - 20 sm qalinlikda solinib, ustidan bug‘ va namlikni o‘tkazmaydigan materiallar bilan yopiladi (ruberoid, tol, bitum va boshqalar). Shiftlarni issiqlik yo‘qotish qarshiligi 2,5 - 3,0 m²/c°/s kkal dan kam bo‘lmasligi kerak. Devorlarni yomg‘ir-qordan saqlash uchun tom ustidan yopiladigan materiallar 20 - 45 sm tashqariga chiqariladi.

Pol - chorva binolarining sanitariya-gigiena holati va mikroiqlimni saqlash polning qaysi materialdan qilinganligiga bog‘liq bo‘ladi. Pollarni qurishda sanitariya-gigiena talablari bo‘yicha juda mustahkam, yaxlit, tekis, issiqlik kam o‘tkazadigan, namlikni yutmaydigan, dezinfeksiya qilishga qulay va dezinfeksiya dorilariga chidamli bo‘lishi kerak.

Chorvachilik binolari polining osti bo‘sh bo‘lmaydi, balki tuproq bilan to‘ldirilib bosiladi. Tuproq ustiga namlikni o‘tkazmaydigan qavat (yog‘langan tuproq, qora mumlangan qog‘oz, beton) yopiladi. Binolarning poli erdan 15 - 20 sm balandlikka ko‘tariladi.

Namlikni o‘tkazadigan yaxlit qilingan pollarning tagidagi tuproqni namlik o‘tkazmaydigan qavat bilan yopiladi. Bu esa tuproqqa namlik, siydikni shimilishidan saqlaydi. Tuproq orqali issiqlikning 12 - 20 %i yo‘qolishi mumkin. Issiqlikni ko‘p yutadigan pollar sovuq bo‘ladi. Bu esa mollarning shamollashiga sabab bo‘ladi. Shuning uchun pollarni isitishga juda katta ahamiyat beriladi. Bu maqsadda shlak, taxta, ichi bo‘sh g‘ishtlar va boshqa materiallar ishlatiladi yoki elektr energiyasi yordamida pol tagidan isitiladi.

Polning usti g‘adir-budir va elastik bo‘lishi gigiena tomondan ahamiyatli. Qattiq pollar hayvonlarning oyok tuyoqlariga ta’sir qiladi, tez charchaydi va har xil kasalliklarning kelib chiqishiga sabab bo‘ladi. Silliq pollarda mollar toyib oyog‘ini sindirishi yoki lat eyishi mumkin. Ayniqsa, silliq pollar bo‘g‘oz mollar uchun xavfli. Tekis va sal qiya qilingan pollardan suyuqliklar kanalizatsiya ariqchasiga qarab yaxshi oqadi. Polning qiyaligi ko‘p bo‘lmay, sigir va otlar uchun saqlanadigan binolar uchun 1 - 1,5°, cho‘chqalar uchun 2 - 4° bo‘lishi kerak. Polni haddan tashqari qiya bo‘lishi bog‘lanadigan hayvonlarda orqa oyoqlarga og‘irlik tushiradi, urg‘ochi hayvonlarda esa bachadon, qin tushishi va bola tashlash hollari yuz beradi.

Chorvachilik fermalarida molxona, cho‘chqaxona va qo‘yxonalarda panjarali pollar ishlatiladi. Panjaralar yog‘ochdan, beton, temir-beton yokni quyma cho‘yandan qilinadi. Panjara pollarni o‘rnatishda sanitariya-gigiena talablariga javob berishi, oson tozalanishi va dezinfeksiya qilinishini hisobga olish zarur.