Bahorni qarshilab

BOGʻ KOʻCHA
Nechun bog‘ ko‘chaga men shuncha maftun,
Hatto yuragimda shabada esar?
Chinorga chirmashgan qayroqi uzum,
Ariq bo‘yidagi kamtar gulsafsar –
Nigohimni qo‘yib yubormas nega?
Nechun vujudimda kezadi hayrat,
Horigan yelkasin tirab devorga
Mudragan jiyda ham ko‘zimga san’at.
Arg‘imchoq sollanar, g‘iyqillar daraxt,
Onaning pinhoniy ingrashisimon.
Nega xayolotdan men gohi karaxt,
Hatto bo‘lakchadek bu yerda osmon?
Shu’lalarni bosib keng asfalt yo‘lda
Shamoldek g‘uvillab uchganda necha,
Kichik tosh tushgandek kattakon ko‘lga,
Yoddan chiqibmidi o‘tmishim, kecham.
Nechun yuragimda bunchalik hislar, 
Larzaga soladi ajib bir tuyg‘u.
To‘g‘ri, bular o‘tmish, kechagi izlar,
Ammo bolaligim, yoshligim ham shu.
1973
www.ziyouz.com kutubxonasi

---

BAHORNI QARSHILAB
123
ONAJON
Yana bahor keldi tap­taqir, siydam,
Ranglarsiz, gullarsiz men uchun bugun.
Ajinlar chizig‘i ichida diydam,
Qalbimda o‘limning dastidan tugun.
Binafsha, lolalar shumshuk va g‘arib,
Dilga muzdek tegar, bermas hayajon.
Butun go‘zalliklar sizni axtarib,
Izingizdan ketdimi, deyman, onajon.
Suvlarning qo‘shig‘i siz bilan ketmish,
Bo‘m­bo‘sh bo‘lib qolmish go‘yo Andijon.
Nahot, bular endi totli bir o‘tmish,
Nahotki, siz yo‘qsiz endi, onajon.
Hushyorman, der edim o‘zimni o‘zim,
Bugun yuragimda ming bitta armon.
Bu olamda neki ranjitmish sizni,
Bariga go‘yo bir men gunohkorman.
Siz aytgan allani aytib o‘turman,
Siz bergan yurakni mash’ala qilib.
Qaydaki, gumrohlik bo‘lsa tuturman,
Qo‘yurman odamlar yo‘liga ilib.
Yana yillar o‘tar, bahorlar balqir,
Yana ko‘zlarimda ranglanar gullar.
Qalbimni bitta o‘y kemirar, yulqir,
Yo‘q endi visolga eltguvchi yo‘llar.
Nahotki, siz yo‘qsiz endi, onajon...
1973
www.ziyouz.com kutubxonasi

---