Dullo quronov galaktikada bir
Yüklə 1,03 Mb. Pdf görüntüsü
|
|
RAGONING SHARTLARI
Ahmadning oʻgʻirlanishi “Koʻkkezar”ning boshqa fazogirlari, miksliklar va Koʻrsichqonni qattiq qaygʻuga solib qoʻydi. Chunki ular, mana, bir necha soat oʻtsa hamki, Ahmadni kim nima maqsadda olib ketganini bilolmay tang ahvolda edilar. Fazogirlarimiz har qancha keng qamrovli qidiruv ishlarini olib borishmasin, bolakaydan biror iz, darak topib boʻlmasdi. Chunki sayyora juda katta edi-da! Hammadan ham Margolga juda qiyin edi shu lahzalarda. Chunki u jajji doʻstining hayoti uchun masʼul. Shu sabab Ahmadni bir daqiqaga nazoratsiz qoldirgani uchun oʻzini hech kechira olmayotgandi shu tobda. Biroq tushdan keyin Moki “Koʻkkezar”ning shundoqqina tagidan xat topib oldi. Xatni nomaʼlum 152 kimsa ular qidiruv ishlarini olib borishayotganda tashlab ketgandi. Moki xatni tez ochib boshqalarga ham eshittirib oʻqiy boshladi: «Men General Obmaning oʻng qoʻli, ishongan sarkardasi Rago boʻlaman. Sizning odamingiz bizda. Uni asir olganmiz, ammo quyidagi shartlarimizga koʻnsangiz, uni qaytaramiz: 1. Genaral Obmani ozod qilasiz. 2. Xaritaning hamma qismlarini bizga berasiz. 3. “Koʻkkezar” va abadiy energiya generatorini ham olishimiz shart! Agar shartlarim ertaga yulduz botgunicha bajarilmasa, Ahmadni Qora tuynukka uloqtirib yuboramiz. Biz bilan aloqaga chiqish uchun radiotoʻlqindan xabar yuboring. Toʻlqinni oʻzimiz tutib olamiz. Tamom». – Endi shunisi yetmay turgandi. Bu qaroqchilarning dastidan galaktikada tinchlik yoʻgʻ-a! – tutaqib ketdi qoʻmondon Dordon. – Yoʻq-yoʻq, ularga xabar bering, tezroq hammasini bajaramiz deng, – talvasaga tushib qolgan Margol Dordonning zirhli kiyimidan tortqilay boshladi. Ammo Dordon harbiylarga xos sovuqqonlik bilan Margolning koʻzlariga tik boqdi. Soʻng qoʻllarini Margolning yelkasiga qoʻyib, qattiq siqib qoʻydi: – Oʻzingizni bosib oling, shoshma-shosharlik bilan xulosa chiqarmang! – tanbeh berdi qoʻmondon. – Birinchidan, ularning shartlarini bajarish imkonsiz, ikkinchidan, shartlarni bajarganimiz bilan, ular Ahmadni qoʻyib yuborishiga kafolat yoʻq! – Nega imkonsiz boʻlar ekan?! – Axir, xaritaning bir boʻlagi uning barmogʻida- ku! Nima, barmogʻini kesib bermoqchimisiz?! Bundan tashqari, Obmani ikki hafta oldin Sudga topshirganmiz. Uni 153 allaqachon qatl qilishgan boʻlishlari ham mumkin. – Lekin nimadir qilishimiz kerak-ku! – Ha, hozir men shu haqda oʻylayapman. Kimda qanday fikr bor, sizlar ham taklif bering. – Dordon hammaga bir-bir qarab chiqa boshladi. Shu payt Mokining boshidagi chiroqlari lipillab yonib, unda ajoyib gʻoya tugʻilganidan darak berdi: – Mayli, ularga radiotoʻlqindan xabar joʻnatamiz. Ammo ulardan javob kelganida toʻlqin qayerdan kelganini aniqlab, oʻsha joyga bostirib boramiz! Bu gʻoya haqiqatda yaxshi edi. Qoʻmondon zudlik bilan Mokining antennalari orqali qaroqchilarga xabar yubordi: “Men qoʻmondon Dordonman. Sening shartlaringga rozimiz, faqat bizga vaqt ber. Obmani ertagacha ozod qilish imkonsiz. Chunki u olis Galaktika Sudi binosida”. Tez orada Ragoning ovozi yozilgan javob ham yetib keldi: “Yoʻq, vaqt bermaymiz. Oʻsha olis joyga «Koʻkkezar” bilan ertalabgacha yetib borsa boʻladi». Ular javobni eshitib boʻlgunlaricha Moki toʻlqin kelayotgan joyni aniqladi. Shu zahoti hamma oʻsha toʻlqin uzatilgan joyga uchib bordi. Ammo bu joyda hech kim yoʻq edi. Chunki Rago ham unchalik ahmoq emasdi. U javobni oʻz qoʻnalgʻasidan chiqib umuman boshqa joydan yuborgan, keyin javob uzatilishi bilan iziga qaytgan edi. Mokining rejasi chippakka chiqqanidan soʻng fazogirlarning hafsalasi pir boʻlib yana ortga qayta boshlashdi. Yoʻl davomida oʻylanib kelgan Margol boshqa bir taklifni aytdi: – Qanday boʻlmasin Ahmadning ovozini eshitishimiz kerak. Ishonchim komil, u biror chora oʻylab oʻzi turgan joyni bizga bildiradi. Shuday qilindi ham. Ragoga “Ahmadning ovozini eshitib, uning sogʻ-salomat ekaniga ishonch hosil qilmagunimizcha hech qanday chora koʻrmaymiz” degan xabar yuborishdi. 154 Bu xabarni olgan Rago Ahmadning yoniga kelib, chiqindixona haqida churq etmaslik sharti bilan sheriklariga xabar yoʻllashiga ruxsat berdi. Rago bu xabarni yozib olib yana sayyoraning boshqa bir burchagiga uchib ketdi. Yangi kelgan xabarda Ahmad joʻrttaga oʻzini qiynalib, qoʻrqib ketganga solib gapirgani sezilib turardi: “Meni tezroq qutqaring. Ularning hamma shartlariga rozi boʻling, iltimos! Bu joy juda sovuq, dahshatli suvarak va qurtlardan juda qoʻrqyapman”. Bu xabarni hamma birgalikda eshitdi. Koʻpchilik Ahmadning turgan manzili haqida hech narsa demaganidan afsuslandi. Donishmand Koʻrsichqon esa boshini sarak- sarak qilgancha miyigʻida kulib dedi: – Obbo, bola tushmagur-ey, axir, bu kutubxonamizning chiqindixonasi-ku! Hamma birdan Koʻrsichqonga hayron boqib qoldi. – Chiqindixona juda zax, sayyorada faqat oʻsha joyni turli hasharotlar bosib ketgan. Endi hammasi ayon boʻldi. Ahmad oʻzining zehni bilan yana bir bor doʻstlariga yordam berayotgandi. Fazogirlar zudlik bilan qutqaruv rejasini tuzib, keyin chiqindixona tomon yoʻl olishdi. Ammo bu safar oʻzlarining kemasida emas, balki chiqindixonaga har kuni yaroqsiz kitoblarni olib boradigan yuk tashuvchi kemada yoʻlga chiqishgandi. Qaroqchilar ularni sezib qolishmasligi uchun esa ustlaridan uyum-uyum chirigan kitoblarni ham bostirib olishdi. Haydovchisiz yuk kemasi chiqindixonaga tez-tez kelib turgani sabab bu safar ham qaroqchilar unga eʼtibor berishmadi. Koʻp oʻtmay kema chiqindiga qoʻshib bizning fazogirlarni ham yerga toʻkib, ortiga qaytib ketdi. Bu vaqtda Rago Dordondan hali ham javob kelmayotgani uchun tutaqib, u yoqdan bu yoqqa tinimsiz yurib turardi. Shu 155 payt chiqindilar oralab emaklab kelayotgan qutqaruvchilar hech nimadan bexabar oʻtirgan qaroqchilarga qoʻqqisdan hujum qilib qolishdi. Bu vaziyatda qaroqchilar qurollarini qoʻlga olish tugul, oʻrinlaridan turishga ham ulgurishmadi. Bir zumda hammaning peshonasiga toʻpponcha qadaldi. Dordon toʻgʻri Ragoning oldiga bordi-da, uning yoqasidan gʻijimlab yuqoriga koʻtardi, qaroqchining koʻzlariga nafrat bilan tik boqdi. Soʻng bir ogʻiz soʻz demay qattiq siltadi- da, chiqindilar orasiga uloqtirib yubordi. Askarlar tez borib yerda chalpak bo‘lib yotgan Ragoning qoʻllarini kishanladi. Margol esa yugurib borib Ahmad oʻtirgan qafasni ochdi. Jajji doʻstini qattiq quchoqlab, undan kechirim soʻradi. Ahmad esa unga hech narsa qilmaganini, hammasi ortda qolganini aytib Margolni tinchlantirishga urindi. Bu voqea hamma uchun dars boʻlgandi. Qoʻmondon Dordon fazogirlardan bir lahza boʻlsa ham hushyorlikni yoʻqotmaslikni talab qildi. Shu kuni qaroqchilarning bari qoʻl-oyoqlari boylanganicha ikki mikslik askar tomonidan salmirliklar kemasiga oʻtqazilib, Obmaning yoniga – Koinot Sudiga olib ketildi. Dordon oʻz askarlariga qaroqchilarni Sud hukmiga topshirgandan soʻng toʻgʻri Koinot muzeyiga borishni va u yerdan salmirliklarni olib Salmir sayyorasiga uchishni buyurdi. Bizning qahramonlarimiz esa oʻz kemalarida Katta Magellan bulutiga yoʻl olishdi. Rejaga koʻra fazogirlar Gamma Oltin baliq yulduzi yaqinida yagona hisoblangan Olmos sayyoraga qoʻnishlari kerak. “Koʻkkezar” Katta Magellan bulutigacha naq uch oy uchdi. Bu vaqt ichida Mokidan tashqari hamma uyqu eliksirini ichib, uyquga ketgandi. Kema Gamma Oltin baliq yulduziga yetib kelganda Moki hammani bir-bir uygʻotib, ularga qaynoqqina qahva quyib berdi. |