Amerika romantizminin ikinci dövrü yetkin Amerika romantizmi (1840-1850-ci illər) adlanır. Bu dövrdə ədəbiyyat N.Hotorn, H.B.Stou, E.A.Po, H.Melvil, H.U.Lonqfello, U.H.Simms, R.U.Emerson və H.D.Toronun simasında inkişaf edir. Amerika gerçəkliyinin mürəkkəb və ziddiyyətli hadisə və prosesləri 40-50-ci illərdə romantiklərin nəzəriestetik görüşlərində büruzə olunur. Respublika 1830-cu illərdə iqtisadi böhran keçirir, korrupsioner hökümətin daxili və xarici siyasətindəki konfliktlərə görə dövlətə etimadı itirirdilər. Romantik yaradıcılıqda gerçəklik və romantik ideallar arasındakı ziddiyyətlərin kəskinləşməsi ümidsizlik və inamsızlıq yaradırdı, qeyri mükəmməl dünya və insan qavramı (N.Hotorn), kədərli əhval-ruhiyyə (E.Po), insan varlığındakı faciəviliyin dərki (H.Melvill) aydın təcəssümünü tapır.
