OʻQUV FANINING DOLZARBLIGI VA OLIY KASBIY TAʼLIMDAGI OʻRNI Ushbu fan iqtisodiyotning tarmoqlarida buxgalteriya hisobining oʻrni va ahamiyati, buxgalteriya hisobi usullari va tamoyillari, buxgalteriya hisobining schyotlar tizimi, hujjatlashtirish va inventarizatsiya, buxgalteriya hisobining registrlari va shakllari, pul mablagʻlari hisobi, mehnat va ish haqini hisobga olish, tovar-moddiy zahiralar hisobi, investitsiyalar hisobi, asosiy vositalar va nomoddiy aktivlar hisobi, mahsulot (ish, xizmat) ishlab chiqarish xarajatlari va mahsulot tannarxi hisobi, byudjetlashtirish va xarajatlarni nazorat qilish, tayyor mahsulot va uning sotilishini hisobga olish, xususiy kapital hisobi, moliyaviy natijalar hisobi, hisobotlarni tuzish va taqdim etish, qurilish tashkilotlarida, qishloq xoʻjalik korxonalarida buxgalteriya hisobi, uning meʼyoriy tartibga solinishi hamda hozirgi kunda buxgalteriya hisobining rivojlanish tendensiyasi, istiqboli hamda respublikamizdagi ijtimoiy- iqtisodiy islohotlar natijalari va ustuvor vazifalari masalalarini qamrab oladi. Talabalarning ushbu fanni chuqur oʻrganishi buxgalteriya hisobi nazariyasi, moliyaviy hisob va hisobot, boshqaruv hisobi hamda boshqa tarmoqlar va sohalarda buxgalteriya hisobini tashkil etish hamda yuritishda xizmat qiladi. Ushbu “Buxgalteriya hisobi” fani “Buxgalteriya hisobi va audit” taʼlim yoʻnalishi oʻquv rejasi tarkibida modulli tizimi asosida buxgalteriya hisobi nazariyasi, moliyaviy hisob va hisobot, boshqaruv hisobi hamda boshqa tarmoqlar va sohalarda buxgalteriya hisobi kompleks ravishda oʻrganilishini nazarda tutadi.
OʻQUV FANINING MAQSADI VA VAZIFASI “Buxgalteriya hisobi” fanining asosiy maqsadi talabalarda buxgalteriya hisobining obyektlari boʻyicha yoʻnalishiga mos bilim, koʻnikma va malaka shakllantirish hisoblanadi. Ushbu maqsadga erishish uchun fan talabalarni xoʻjalik yurituvchi subyektlardagi mablagʻlar, ularning tashkil topish manbalarining harakatini toʻgʻri aks ettirish, hisobotlarni tuzish, moliyaviy hisobot maʼlumotlarining shaffofligini taʼminlash, boshqa subyektlar bilan hisoblashishlarni toʻgʻri tashkil qilishni qonunlar, qarorlar va boshqa meʼyoriy hujjatlar asosida oʻrgatishdan iborat.
